أنتقام للعشق

البارت التاسع و الثلاثون

#أنتقام للعشق 🥀
البارت التاسع و الثلاثون
بقلم : نور حيدر
@noorhaidar18

مساء الخير عليكم متابعيني 🦋🌿...

..............................

اعتذر جدا على الاخطاء الإملائية غلسوو عود 😁

.............................
جوري /

خلصت من يمي و رحت اصعد فوك اغير ملابسي
صعدت وياي جمارة و اجت ميامين همين ظلن يشاقن وياي و يضحكن ..

دخلنه للغرفة باوعت و انصدمت من الي شفته
شهكت ميامين كالت جمارة بصدمة : شنو هذا ..

مشيت مصدومة بأتجاه السرير أباوع على فستاني
ممزق كله ظلت أيدي ترجف و عيوني غوركت
رفعته بأثنين اديه متمزق من اطرافه و من الصدر
كله اباوع عليه لونه جان ذهبي و مكلوب عليه لون احمر مثل الدم ..

دمعة نزلت من عيوني مصدومة من الي اشوفه كدامي
كتلهن بخنكة : ه هذا م منو الي سوه هيج ..

اجت عليه ميامين اخذت من أيدي الفستان
خلت ايدها على حلكه مصدومة : هااي شنو منو الي سوه بلفستان هيج..

باوعتله بعصبية : اني الي اسئل ياهو الي دخل للغرفة و هيج سووه ..

جمارة : محد صاعد ابد و كلنه جنه يمج ..

اخذت الفستان و كعدت على الجرباية و ظليت ابجي
حتى المكيااج يمكن خرب كتلهن بخنكة : ليش هيج يصير و منو الي سوه هيج اني شسويت بحياتي و يصير هيج بيه ليش ما اتهنى حالي حال البنات ..

كملت كلامي و ابجي : هاي ثالث مره بخطوبتي ما اتهنى ليش يااربي هيج صار بيه ..

اجت ميامين حضنتني كالت بهمس : اشش يعمري انتي لا تبجين و تضوجين نفسج هسه نجيبلج احلى فستان اهم شي لا تقهرين بروحج ..

وخرت من يمه ابجي : ما نلحك الناس كله اجت و ام الصالون راح تمشي و اني ماعندي فستان جديد ..

كالت جمارة بسرعه: لا بعده يمكن ما ماشية هسه اجي ..

عافتني و راحت بقت يمي ميامين تهدي بيه و اني ابجي و صافنة على الفستان من اشتريته جنت قبل لا انام اتخيله لابسته و شلون يكون عليه حلو يطلع
فرحانه جنت كلش تاليته هيج يصير بيه ..

ايدي صارت بيه صبغ احمر من اللون الي بلفستان مذبوب ..

كلت لميامين بهمس و اني بعدني ابجي
: ميامين ..

: هاا جوري ..

غمضت عيني ابجي كتله : كليلهم ماكو خطوبة اليوم ..

باوعتلي مصدومة : شنو شتحجين انتي شنو ماكو خطوبة اتخبلتي فهميني ترى الناس كله وصلت عيب شيحجون علينه ..

كتله بقهر :شلون يعني ترديني اطلع الهن هيج فهميني
الفستان و خرب و مكياجي و راح و ام الصالون راحت و الزلم على وصول  ..

انقهرت عليه ميامين و عيونه غوركت كالت :
لا تخافين هسه كلشي ينحل و حتى لو اجو الناس ينتظرون شعدنه شكم جوري عدنه احنه ..

اريد احجي و جان ينفتح الباب و تدخلت زهيرة علينه كالت بدلع : خالتي ودتني كالت يلا شطلعت خل تنزل .

انتبهت عليه و باوعت بصدمه شهكت
: هاااي شنو بعدج ملابسه و شبيه وجهج هيج جنتي تبجين شنو ؟

رفعت تك حاجبه من شافت الفستان اجت عليه و جرته من ايديه رفعته كباله و فتحت عينه بأتساع
: عزاااا شنو هذا شبيه الفستان هيج صااار منو سوه بيه هيج ..

ما خفت عني ابتسامته و الشماته اجت هيا على بالي كبل محد عده عداوه الي غيره ..

طفرت من مكاني معصبة و جريته من ايده خليته على الجرباية و اجيت لزمته من زندته بقووة حسيت اريد اشلع لحمه ..

اباوعله و عيوني تريد تنط من العصبية كتله بهمس
: انتي الي سويتي هيج بلفستان مووو ؟

كالت بوجعي :اااخ شبيج وجع ايدي وخري ..

كتله بعصبية : احجي زهيرة انتي هيج سويتي موو ..

اجت ميامين وخرته من يمي كالت : جوري اهدي ياعيوني ..

وخرت ايدها زهراء باوعتلي رافعه حاجبه
ابتسمت بأستهزاء : اكلج حبيبتي لا تذبين مشاكلج عليه اني شكوو بيج و بفستانج و اصلا اني ما ادخل لغرفتج لو ما خالتي كالت الي شخصني اني ..

كتله بقهر : لا يخصج محروك كلبج لان شهاب يريدني ما يريدج و من حركة كلبج سويتي هيج ..

ضحكت بشماته :الحمدلله و الشكر ربي على نعمة العقل خل اروح احسلي لا تذب تهمه ثانية الي ..

ميامين باوعت : انتي شسويتي ليش حجيتي وياها هيج يمكن صدك ماله ذنب ..

كتله بعصبية : محد يكرهني و يريد الشر الي غيره و احلف بالقرآن هيا هيج سوت ..

هزت راسه ميامين : مادري شحجي ..

كعدت على الجرباية و ابجي : لا تحجين شي تعبت ميامين هسه شسوي و اني كلشي مامسويه و مجاهزة ..

سمعت صوت زينب رفعت راسي شفته  كبالي
كالت بأبتسامة: ومنو كال مجاهزة لعد هذني شنوو ..

باوعت فستان بأديها و الايد الثاني حذاء
دخلت وراها جمارة و صاحت : تفضلي عيني ام علي ..

دخلن و اجت وراهن ام الصالون ام علي
كالت زينب : اريدج اطلعينه كمر هيج تلج لج ..

ابتسمت: كالت هيا كمر ما يحتاج..

كتلهن بصدمة : شتسون ..

ابتسمت زينب  : ولج لا تبجين و لا تهتمين ماطول احنه وياااج و هذا فستان جديد من فساتيني بعده حتى بلعلامه ..

جمارة ضحكت : واني رحت طفرت على ام علي كتله كلشي و هيا فهمت و بقت همزين  لحكت عليه و هم كلت لامج و كالت خل تعيد و ننتظر شنسوي لعد ..

دمعت عيني من اشوفهن هيج سوون صدك الخوة و الصداقة ما تبين الا بلشدة وهسه هنه بينن بهاي وكفتهن بدون شعور ظليت ابجي ..

اجت ميامين مخترعه : ولج شبيج تبجين مو كلشي انحل ..

مسحت دموعي و كلت بشهكة : متأثرة من الي شفته هسه صدك اخواتي انتن الله لا يحرمني منجن  ..

ابتسمت ميامين وحضنتني و اجت هم زينب  حضنتني و كالت بأبتسامة : و لايحرمنه منج يا ام الكلب الطيب
شلون ننسى وكفاتج ويانه و من نضوج و نبجي نلكاج اول وحده يمنه ..

باوعنه لجمارة مسحت دموعه بتمثيل و كالت
: اووي بجيت و اتاثرت من طاح حظجن كاافي مو مال سوالف هسه  ترى كلش اتأخرنه ..

شهكت زينب  : ييي الله يلا ولج تعاي ..

وجرتني من أيدي و كعدتني على الكرسي و بدت ام الصالون تشتغل و تمكيني تعيده من جديد ..

و زينب اجت عدلت الفستان كالت يحتاجله كوي و راحت كوته و جابته اخذته من يمه ميامين جابت عطر و عطرته و جمارة راحت جابت الحذاء لمعته جديد طلع ..

وظلن كاعدات يمي و يحجن وي ام الصالون هيج سوي و لا تسوين هيج لحد ما عصبت من يمهن و طردتهن لان خبلنه و خلنه ما تعرف تشتغل ..

خلصت من يمي و رحت باوعت على نفسي ابتسمت شكلي  احلى بهواي بهذا الفستان و المكياج ..

فتحت الباب رسيل لابسه فستان ماروني قصير لركبه من فوك ضاب على الجسم و من جوه منفوش و حزام ماروني من الخصر و ردانه طويل بس دانتيل شفاف ..

كالت بأستعجال : يلااا ترى اجو من زمان و منتظرين ..

صفنت عليه و ابتسمت و ظلت تهلهل : كلووووش..

اجن بسرعه زينب و جمارة و ميامين  جانن فوك
من سمعن الهلهوله اجن يشوفن ..

دخلن و من شافني ضحكن و ظلن يبتسمن
دمعت عينه ميامين و حضنتني : و اخيراااا شفناج فرحانة و امبين عليج الفرحة يااارب دومج هيج نشوفج ..

جمارة كالت بفرحة :  ما مصدكه راح تنجمعون انتي و شهااب بعد الصااار الحمدلله ياااارب ..

كتلهن و دموعي شوي و تريد تنزل : اسكتن ولج وعلي راح ابجي ..

زينب اشرت بسرعه : لالالا هو احنه ما عولنه تهدئين و مكياجج لا يخرب ..

رسيل ابتسمت : ماكو بعد دموع فهمتي نريد نشوف ابتسامتج ..

هزيت راسي و مبتسمه الهن كالت ميامين : يلااا خل ننزل ..

صارن كدامي ميامين و رسيل و جمارة نزلن من الدرج و اني وراهن و زينب وراي تعدل بفستاني جان فستان طويل كلش لونه جويتي و الاكتاف نازله و فتحه من الصدر و هم بيه فتحه جانبية ..

صاحت مياامين يم النسوان : الف الصلاة والسلام عليك يا رسول الله محمد ..

زينب و رسيل و جمارة : كلللوووووووشش ...

نزلت و اجت امي يمي و عيونه مغوركة تباوعلي
ابتسمت اله و صارت كبالي زهراء واكفة يم الباب مال المطبخ باوعتلي مصدومة فاكه عينه على وسعه من الصدمه و القهر ..

رفعت حاجبي اله و ابتسامة النصر على شفايفي
درت وجهي من يمه و رحت كعدني على الكوشة
و ظلن يهوسن و يركصن و اجن عليه النسوان يبوسن و يباركن و البنات اخذن صور وياي بناتنه ..

بس امه كاعده بعيد  و تباوعلي بطرف عينه معاجبه
و زهراء كاعده بصفه و وجهه احمر راح يطك من القهر
و عيونه مدمعه ..

اني شعووري بين الفرحانة و بين الخووف خايفة لا يسويه مره ثانية و يعوفني بنفس اليوم و الناس تحجي عليه مرت عليه ذكريااات خمس سنين  ..

لزمت طرف فستاني بقووة اريد ابعد كل التخيلات و الافكااار من راسي لان كاعد اتخيل هم احد يجيني هسه و يكولون ماكووو بس كلت بيني و بين نفسي
لا شهاااب وعدني بس عقلي يكلي هو هم  قبل سنوات وعدج مايعوفج بس عافج وراح و كسرج هم ..

هستوني كاعد احجي و اجاني الصوت كالوو يلااا السيد راح يعقد عليه اجت أمي كومتني و اني أيدي ترجف ..

جابن الكرسي وكعدني يم الباب و خلن رجلي بطشت المااي الي بيه ياااس و خلن على راسي شال أبيض
و القران بأيدي غطن حتى جسمي ..

و كام السيد يردد أيات قرأنية رجع كال
: شكد تردون..

أمي جاوبت : ثلاث مرات سيدنه ..

كال : خووش و بثالثة شي تردلي الموافقة ..

اجت زينب تبتسم : ولج مو من اول بداية تكولون موافقة ..

ابتسمت اله و هو ظل يحجي : ابنتي جوري هل تقبلين بشهااب كزوج لك ..

ما كتله نعم رجع حجه مره ثانية هم سكتت و اني كلبي يدك بسرعة رجع ثالث شي كال : ابنتي جوري سلمان ال.. هل تقبلين بشهااب ال.. زوج لك ان قبلتي قولي معم و أنت وكيلي

كلت بصوت يرجف : نعم و أنت وكيلي  .

انطيتهم الموافقة و ما اسمع غير صوت الهلاهل
دمعت عيني ما مصدكة يعني هسه صرت زوجته رسمي
كدام الله و الناس اني زوجتة حلالة .

اخذني و رجعني لمكاني شوي و كالن غطن راح يدخل
و كله لبست عباياته و حجابتهن بس بقت جمارة و فاتن اخواته ..

شووي و دخل و ظلن  يهوسله و هو يبوس بحبوبتي و بأمه و أمه و وجهه يصب عرك و متوتر ..

اجه عليه و احس شفايفة على كصتي طول بيه و بعد عني كعد بصف ظل يباوعلي اني هم باوعتلة بس يبتسم و همس الي : ما مصدك صرتي الي ..

ابتسمت اله و جابت أمه الذهب كالتله : خاف ما تكدر تلبسه يمه خليني اني البسه ..

باوعلي و ابتسم : لا يمه شسالفه اعرف ..

أمة عوجت حلكه و انطته العلبة :دهاااك لعد ..

هو خلاه على الميز كباله جاااب الكلادة و رفع جسمه
و بعد شعري و خلاه بلجهة الثانية و عيونه ما شاله من يمي و اني كلبي يدك بسرعه من قربة ..

خله الكلادة بركبتي حسيت بقشعريره و اني احس ملمس ايده على ركبتي ..

قرب راسه يم ركبتي يريد يسد الكلادة هم يم أذني
:دخيل الله شطالعة اليوم تخبلين ..

ابتسمت جاب بعدين الاساور لبسني وحده وحده و على كيفه و يباوعلي ..

جاب التراجي يباوعلي و يباوعلهن عاكد حاجبة
كالت فاتن بضحكة: كل عريس من يوصل لهنا لتراجي يهد كلشي و يمشي ما يكدر عوفه خوية احنه نكمل ..

باوعلي و كال : لا اني البسهن اله ..

اقترب و جاب الترجية لبسه الي و انفااسه تلفح بوجهي
من خلص من وحدة هم كال : أحبج جوريتي ..

غمضت عيني من كلامه نسيت الي يمي
درت وجهي عليه يلبسني الترجية الثانية هم لبسني
و كال : اعشقج و أموت عليج ربي لا يحرمني منج ..

بعد وجهه من يمي و اني عدلت شعري و مبتسم
كال بفرحة : هااا شعدكم بعد ..

ضحكن البنات على كلامه و اني خلجت جابو الحلقات
لبسته حلقته و هو لزم ايدي لبسني الحلقة و دنك راسة و طبع شفايفة على ايدي و هنا كلهن صاحن : اووو ..

أمه زهكت و كالت : فشلتنة ولك ..

هو ما اهتم لأي احد بس يباوعلي و اني احس وجهي اشتعل نااار من الخجل  طلع من يمه و النسوان كملت ركصهن و شوي شوي خفت بقن بس كرايبنه ..

اجت أمي كالت : يمه رجلج يريد يشوفج..

هزيت راسي و كمت وياها و اني متوترة وصلتني يم الباب دخلتني شفته كاعد على القنفة باوعلي مبتسم كام و امي عافتنه و سدت الباب وراها..

اني ظليت افرك بأيدي و منصية راسي كال بهمس
و هو قريب عليه : جوريتي ..

كتله بهدووء ممزوج بخجل : نعم ..

:أرفعي راسي جوريتي خل اشوف الي جمالج ..

رفعت راسي اله شفت عيونه مغوركة و مبتسم
ماحس غير لزمني من أيدي و جرني لصدرة
حاوطني بأثنين ايديه و حاضني بقووة مثل الي يريد يدخلني بين اضلوعه..

كال بشهكة : ااااخ يا جوريتي ما مصدك اجه هذا اليوم و صرتي الي الحمدلله الك ياااربي ..

بعدني عنه و دمعه نزلت من عينه كتله بهدوء : ليش تبجي شهاااب ؟

؛ من الفرحة جوريتي ما مصدك الله رحمني و عطف عليه و انطانياج ..

ابتسمت و اجرئت رفعت ايدي على خده و مسحت دمووعه من وجهه : كتله اوعدني بعد مراح تزعلني ..

اخذ أيدي و خلاها على شايفة باس باطن كفي
: و غلاااات عيوني الي اعزهن مراح اعوفج مره الثانية ..

كتلة و اني اباوع على عيونه : بس الموت شهااب يبعدنه ماكو شي ثاني غيره ..

هز راسه و كال : بس الموت جوريتي ..

ظليت صافنة عليه ابتسم و اقترب عليه غمضت عيوني اني متوتر و باسني برقة و هدوووء ابتعد و كال بهمس و هو يباوع لعيوني : أحبج جوريتي ..

خليت راسي على صدرة و غمضت عيوني
كتله : إني هم ..

حاوطني بأثنين ايديه : انتي شنوو ..

ابتسمت : اني هم الي كلته ..

جر نفس و كال بهمس :احجيه جوريتي اريد اسمعه من حلكج لا تشلعين كلبي ..

ابتسم و كتله بخجل : أني هم أحبك ..

جرني بقوووة لحضنه و كال : دخيلك ربي لو أظل مناااا لآخر يوم بعمري اشكرك لان رزقتني بيه هم قليل بحقك ..

رجع باسني من راسي و هو بعده حاضني
كال :تدرين شنوو ..

مخلية راسي على صدرة كتله بهمس : شنوو ؟

حجه بحب : اتمنى اضمج بين أضلووعي بكلبي هيج ماريد اي احد يشوفج او يلمحج بنظرة غيري أنه ..

ابتسمت و ظليت ساكتة سمعنه صوت الباب يندك
ابتعد من يمي و اني عدلت شكلي كال بصوته الخشن : تعاال ..

فاتت فاتن و امه كالت أمه : شنووو صارلكم ساعة هنااا
كافي عيب خل تروح يم البنات و أنتي يمه اثكلي شويه شتحجي النساوين عليج يكولون ما مصدكه..

ما عجبني كلامه بس شهاب ابتسم و كال :
والله يمه الي يشوف حسن و جمال جوريتي ما بده يطلع منا اريد بس اكعد و أكابله و بعد هيا شله دخل بلنسوان صارت ترى مريتي لو هسه اخذه منكم محد يفك حلكه و يحجي . .

فاتن ضحكت : يااا تسويه خوية ..

ابتسم : طبعا اسويه .. يلااا سوولي طريق خل امشي ..

مشت فاتن كدامه سوتله طريق هو باوعلي و غمز و عافني  ظليت مبتسمه اباوعله مشه هو و اختة
بقينه بس اني و أمه..

ظلت تباوعلي رافعه حاجبه اني ما عجبني ابقه يمه
لان اكيد راح تذبله شكم حجاية عبرت من يمه
و صدك و كفتني و حجت :اثكلي خووش ترى عيب اطولين وياااه بلغرفة و انتم هستوكم عقدتوو ما صدكتي..

ابتسمت اله و اني لازمه خصلة من شعري
كتله بدلع : شسووي عمة اذا ابنج مجلب بيه ما يقبل اطلع اكله النسوان هنااا شيكولون يكلي شعلينه بيهن ما ما مصدك صرتي مريتي ..

ضحكت و سويت نفسي خجلانه: عمه ترى ابنج مفضوح و راح يفضحني و يخجلني كدام احد بغزله و بسوالفه كليله فدووة ..

عفته فاكة حلكه عليه تريد تستوعب الي كلته
ابتسمت و كلت بين نفسي هين تردن تخربن فرحتي لا والله ما اخليجن تخربن لا فرحتي و لا حياتي
لا انتي و لا بت اختج زهيرة الحية ...

خلصت الحفلة و صعدت فوك دخلت سبحت و طلعت شسورت شعري و مشطته و لبست بجامة و رحت ادثرت بلحاافي لأن تعبانة كلش و نعسانة نمت و اني فرحانة و مرتاحة و افكر بالايااام الي تجي  ....

.................

رسيل /

جنت كاعدة الصبح اجهز بنفسي علمود خطوبة جوري
و فرحانة اله كلش تستاهل جوري بس الخير لان طيبة
بس بنفس الوقت مخرب فرحتي شااهر ..

اووف من صارت عركتنه اني وياه لحد هسه لا هو يحاجيني و لا أني احاجية مثكلة كلش عليه ..

هو انصدم من شافني ما منطيته وجهه و عايفته
وين ما امشي كمت الكااه وراي يمشي لو يذب حجاية
يريدني بس احجي و اني ماكو عايفته على الصامت

اريده يحترك بمكاانه مثل ما حركلي كلبي
اشوفه بس يتأفأف و مقهور مني و خاصة كام يتخبل من يجي يكعد بمكان و اني بسرعه اكوم ماريد اشوفه يعني ثكلت عليه كلش حسباله اجي و اعتذر منه ..

بس مثل ماهو مكبر راسه اني هم اكبر راسي
و ما انزله لو شنو  ما يسوي لأن ذليت نفسي هواية اله صااار لازم هو يجي و يتعذرلي عن كلشي حجاااه ..

بس مصدومة و مقهورة ليش لحد هسه ما اجه و لا اعتذر حتى مره بجيت كلت هيج اني سهله عنده ..

خلصت من تبديل ملابسي باوعت على نفسي بلمراية
مبتسمة على شكلي و راضية كلش طلعت من غرفتي اريد اروح يم جوري ..

شفته هو طلع من غرفته و لابس دشداشه جوزي
ضابه على جسمه و بازرة عضلاته ظليت صافنة عليه
وهو هم باااوع عليه ظل يبااوعلي من وجهي لحد رجلي ..

عكد حاجبة و أقترب عليه بسرعة كال بعصبية:
شنو هذااا اللبس ولج ..

خفت من عصبيتة بس اتظاهرت بلقوة كتله بدون اهتمام : شنو لبسيش ترى مابيه شي ..

باوع على لبسي : هذاااا تكولين مابيه شي..

رجع كمل حجه بغيرة واضحة : تنزلين هيج و يشوفوج ..

: يي عادي ماكو أحد بس بنات بيناتنه ..

باقي عاكد حاجبة و بغيرة يحجي : ولج شلون طلعين من غرفتج هيج  لا يشوفج احد  من الولد هي ثولة
لا و المصيبة  لابسه احمر الي ..

ابتسمت كتله : ملابسه الك لابسه للحفلة..

هو باوعلي خزرني شكد  فرحت من حركت كلبه
كتله : يلاا عن أذنك اريد امشي ..

هستوني اريد اعبر بس هو لزمني أيدي و جرني لغرفتي
طبك الباب و دفعني عليه ظل يبااوعلي و مخنزر
كتله بهدووء بس كلبي يدك بسرعه : شتريد شاهر ..

رفع حاجبة : هاا صارت شاهر ..

: يي شاهر لعد شنو  أسمك..

كال بهدوء و هو يباوع لعيوني : ليش هيج تسوين ..

: شنو شمسوية اني هلمرة هم ترى كافية خيري من شري ..

يباوعلي و جر حسرة : ليش تشلعين كلبي رسيل و تاليته وياج ..

باوعت على شكله كتله بهدووء  : إني  الي شلعت كلبك لو أنت شلعت كلبي ..

كال : رسيل ترى أني أغار عليج مو بيدي اعصب و ما اشوف اي شي اذا  شفت احد يباوعلج بنظرة مو زينة ..

خليت أيدي على صدرة هو باوع دفعته من يمي و انطيته ظهري كتله :مشكلتك هاي مو مشكلتي شووي اضبط عصبيتك مو تجي تجرح بيه و تلكي أسفة ..

طلعت من يمه و اني جزئيا مرتاحة من اجه و شفته هيج بعد و بعد استاذ شاهيير اخليك  تجي أنت و تعتذرلي مو أني..

نزلت جوه و بدت الهوسة و الركص و اني لان ضايجة هاي الايااام ذبيت حركتي بلركص و البنات وياي و يصفكلي و نسوان تباوعلي و تهمسلي ..

حسيت بتعب  كعدت على احد الكراسي و اكو مرة جبيرة بلعمر باوعتلي و ابتسمت: اكلج يمة انتي من يمهم ..

: يي خالة بتهم اني ..

: صلوات على محمد فدوة لهذا الجماال اكلج يمه انتي هم محجوزة لأحد..

ضحكت و عرفت شتريد مني والله لو شاهر يسمعه يمكن يشيله ويطلعه منااا و ما يعترف حتى بلعمر ..

كتله بأبتسامة  : يي خالة اني مخطوبة لابن عمي اخو العروسة ..

: ياااا الله يسعدج يمه عود ردتج لابني علاوي دكتور هو ..

: الله يحفظه الج خالة و ان شاءالله تلكين الابنية الي تناسبه ..

: الله يسمع منج يمة ..

دارت وجهه من يمي و رجعت تباوع للبنات يمكن تريد تخطب مرة ثانية لعلاوي ..

خلصت الحفلة و بقينه بس احنه  البنات صعدنه فوك مسحنه المكياااج و بدلنه حتى ننظف الهوسة باتت يمنه  ميامين و جمارة بس زينب ماقبلت ..

جمارة تمسح بلمكياج باوعتلنه و كالت :
ههههه ولج مسحنه المكياااج و طلع وجهه جبار الحقيقي ..

ضحكنه عليه  كالت ميامين : احجي عن نفسج حبي اني مو جبااار ..

تخصرت جمارة و كالت : عشتووو لعد منوو أنتي..

باوعتله و كالت بدلع : أني جعفووري ..

ضحكت عليهم كتلهن : مخبلات و العباااس ..

طلعنه و نزلنه جوه لبسنه حجاباتنه خاف احد من الولد يجي كمنه ننظف و جوري خليناها ترتاحو
لمحت شاهر و غيث دخلووو ..

كتلهن بصوت مسموع :تدرن يا بنات شصااار اليوم ..

ميامين : شنو شصار ان شاءالله خير ..

سويت نفسي ما اشوفه بس هو من سمع كلامي
وكف يريد يسمع البقية ..

عدلت شكلي و كتلهن بأبتسامة و فرحانه عود
: ههههه ولج اليوم انخطبت لواحد دكتوور ..

جمارة : جذااابة ..

هزيت راسي : والله شبيجن انخطبت لدكتور و اسمه هم علي هيا امه كالت علاوي عليه ..

ميامين : يي و أنتي شكلتي ..

بوزت و كتله : حرامات كتله أسفة خالة بس اني مخطووبة شوفن شلون ضيعت الدكتور..

كالت جمارة : عاابت هو انتي تلكين واحد احسن من ابن عمي ..

سمعت صوت غيث : احم يالله ..

باوعت غيث يباوع لجمارة مبتسم اله هيا نصت وجهه خجلانه منه اني بااوعت لجلموتي و القاااسي شفته عاكد حواجبة و يباوعلي مخنزر ..

حجه بحدة : اني صاعد و تعاي وراي رسيل ..

ميامين همست يمي : يمة يمة باااع الخزرة الله وياج رسيل جنتي خووش بنية ..

خفت من خزرته و زاد خوفي كلام ميامين
كتله : شوو انجبي و اشتغلي خل اشوف هذاك شبيه ..

عفتهم و صعدت فووك وصلت يم باب غرفتة
قريت سورة الفاتحة كون ما يعصب عليه هستوني اريد اصدق ما حس غير الباب انفتح و صار بوجهي يباوعلي بخزرة كال بنتر : ليش واكفة صارلج ساعة ما ادخلين ..

ردت اكله يا جذاب يمته صارلي ساعة هسه اجيت
بس بعدني بتفكيري و جرني من ايدي و دخلني لغرفته
طبك الباب حيل و رجع عليه باااوع ..

باوعلي و كتف ايده كال بنترة : يي ست رسيل شنو الي كلتيه مسااع ..

: شنوو شكلت ؟

صيح بوجهي : لا تستغبين احجي صدك خطبووج اليوم

ابتسمت : بي صدك بس هيا مجرد كلام يعني مصار صدك شلون يصير و اني متزوجتك ..

اقترب عليه و وجهه بوجهي كال بعصبية
: حتى لوو بس حجي اصلا شلون يتجرئن و يخطبنج و أنتي الييي وحدي ملكي ..

فرحت من كلامه بس كتله : و هنا  شعرفهن اني الك ..

خزرني : لاااازم يعررررفن هذا ما يخصني انييي ..

: شنوو يعني اكتب على كصتي اني لشاهر ..

هز راسه : ييي هيج سوووي بعد ..

فكيت  عيني : ياااا صدك تحجي عود ..

غمض عينه و رجع باوعلي اقترب من يمي
و حضني كال بحسرة : ولج والله ما استحمل احد يشوفج  انتي الي فقط اريدج حلوة بس بعيوني مو بيعونهم من سمعت خطبووج اتخبلت حتى نسيت روحي اني متزوجج..

راسي يم صدرة و اسمع دكااات كلبة السريعة
كال : اعتذر على كل كلمة حجيته الج هذاك اليوم
والله ما تعرفين شكد متحسف على كلامي عساااه ينكص لساني و لا هيج احجي  ..

رفعت راسي عليه  كتله :اسم الله عليك ..

ابتسم و كال بهدوء : تخافين عليه رسيل ؟

غوركت عيوني : طبعااا شعندي غيرك اني أحبك شاهر بس أنت تجرحني بكلامك ..

نزل راسه و باسني براسي ابتعد و كاال :اتمنى الجرح  الي وصلج يوصل لكلبي ماريدج تنجرحين من وراي
كتلج والله احبج و ما اتحمل اي احد يباوع للي احبه

رجع حضني و كال : يي ست رسيل انتي فرحانة بدكتور علاووي من خطبج ..

حجه ويقلد كلامي وي البنات كتله بضحكة  :
ههههه شسوي بدكتور علاووي و اني يمي الضاابط شاهيير حبيب كلبي ..

حضني اقوى و كاال : ربي لا يحرمني منج ..

بادلته الحضن : ولا يحرمني منك ..

صاااار ثااني و اتراضينه اني و شاهير والله و جبت راسه اجه بنفسه هو و اعتذر إنجاز عندي عظيم هههه
صااار الليل و كله طبت لغرفة ..

شفت موبايلي يرن باوعت نرجس بت خالي
ابتسمت و جاوبته :هلااااا بالحب

سمعت نبرة صوته تحجي بهدوء : هلا رسيل شلونج .

عدلت كعدتي استغربت صوته يوميه من تتصل عليه تخبص الجو بس هاي المرة هادئة كتله : شكوو شبيج نرجس شبيه صوتج ..

جرت نفس و كالت : مادري شكلج رسيل ..

كمت من مكاني كتله بخووف : شكوو ولج احجي لا تخوفيني..

كالت : امج سقطت الي ابطنه زالكه و راح الجنين و هسه هيا يمنه ..

شهكت و كتله : شتحجين انتي يمته صاار هذا الشي ..

: اليوم الصبح ..

دمعت عيني بجيت سديته من يمه و اني ميتة خوف على اني شماا سوت بيه تبقى هاي امي كمت بسرعه و رحت لغرفة شاهر فتحت الباب بسرعة حتى بدون ما ادك الباب..

دخلت بسرعة جان متمدد شاهر على جربايتة من شافني و شاف حالتي كمز من جربايتة و اجه طاير عليه ..

كال بخووف و عيونه بيهن قلق
: شكووو شبيج رسيل ..

كتله و دموعي تجري : باااجر وديني للكوت ..

عكد حاجبة و كال : ليش شكووو ؟

بجيت و كتله بخنكة :أمي نزلت الطفل و تعبانة اريد اشوفه ..

ظليت ابجي و حضني كال : ان شاءالله اخذج باجر بس هدي روحج يعمري ماريد اشوف دموعج..

ضليت ابجي بحضنه لحد ما سكتت و هو بس يهدي بيه رحت لغرفتي تمددت على الجرباية و ابجي
وغفيت بوسط دموعي خايفة على امي و ردة فعله من سمعت الطفل راح ناسية كلشي مسويته بيه ..

...................

زينب /

انطتني الفستان جوري و ردت ارجعه فووك
دخلت لغرفتي بملاابس الحفلة ظليت اباوعله و عيوني مغوركة شكد مشتاقه اله كلش ..

صارلي شهر و اني ما جاية هنااا و ماشفت ليث على الرغم يتصل بيه بس اني ما ارد و مره اجه يريد يشوفني بس فارس منعه ..

فزيت و اني اسمع صوت الباب ينقفل باوعت لكيت
ليث واكف يم الباب و يباوعلي صاافن عليه
اتقدملي و اني ذبيت الفستان و عبرت من يمه رحت للباب اريد افتحه لكيته مقفوول ..

كالت بهمس : لا اتعبين نفسج الباب مقفوول ..

بقيت منطيته ظهري كتله : افتح الباب ليث اريد اطلع..

سكوووت عم الغرفة كله و اسمع بس صوت خطواته
شووي و احس انفاااسه الحاارة تلفح على ركبتي و ظهري العااري ..

فستاااني جان لون وردي و مخصر على الجسم و بيه فتحه جانبية من الساق و فتحه من وره الظهر ..

ايده حاوطت خصري غمضت عيوني المدمعة و كلبي الي احسه طبووول تقرع بيه خله راسه على كتفي
و كاال : لا تعذبيني ويااج زينب ..

خليت ايدي على ايده اريده ابعده من يمي
كتله بخنكة : وخر من يمي ليث فدووة ..

بااسني من كتفي و كال بهمس :ليش حجيتي لفااارس

فتحت عيني و دمعة نزلت : حتى يشوفلي حل وياااك..

كال بحدة : و الطلاااق تحسينه هو الحل المناسب ..

هزيت راسي بدووون صوت ماحجيت شي
دااارني عليه و نصيت راسي كال بحدة : ارفعي  راسج و احجي كليلي هو الحل المناسب ..

رفعت راسي اله و كتله : ييي ليش طلاكنه اني وياااك احسن حل لأن ثنينه تعبنه بهذا الزواج ..

فرك وجهه بعصبية  باوعلي  و كاال:
طلاااك مرااح اطلك فهمتي و شتردين تسوين انتي و اخوج سوووي حتى لو  ابقيج معلكه يمهم بس ما اطلكج ..

صدمني  كلامه كتله بصياااح : ما تفهم اكلك ماريدك
طلكني احسلك خليني اشووف حيااتي ..

حجيت هيج و هذاا انكلب وحش عليه جرني من زندي و ضاغط عليهن بقوووة كال بعصبية و صيااح
: ييي من هااي تريد تتطلكين احجي من البداية هيج
تردين تشوفين حياااتج تردين اطلكج حتى ترحين تزوجين ..

فتحت عيني كتله : هذاا الفكرت بيه أنته هااا زواج

حجيت بعصبية  :مااشي بشنو تفكر فكر و ايي اريد اعيش حياتي و اتزوج وي شخص يحبني و احبه
مو مثلك كل ما حجيت شي ويااك كلت جبروني و جبروني ..

كال : انتي الي فهمتي تحبيني الي مستحيل تحبين شخص ثاني ..

كتله : لا تخليني اسب الحب و اسب كلبي الي حبك
اصلا من سوالفك هااي طلعتك من كلبي

اقترب عليه و كال : جذاابة و بعدج ترديني ..

باوعت بعيونه :ماريدك ليث  تعبت وياااك ذليت نفسي هواي علمودك و رحت يم اهلي شهر كامل و ما تسئل عليه و لا حاولت ترجعني ..

: لا تجذبين ولج يوميه اتصل  عليج و ماتردين عليه ..

كتله بعصبية : ما يفيد بلموبايل ليث ..

صاااح عليه بعصبية :شتردين فهمتيني مو تعبت والله ولج  حتى اجيت عليج و اخوج منعني ..

غمضت عيني : طلكني ليث ..

صاح عليه كمزت كال بعصبية : طلاااك مراح اطلك فهمتي ..

نترت بيه : لييش فهمني ..

كال بعصبية : انتي الييي فهمتي اريدج بس الي ..

فكيت عيني مصدووومة كتله : مدري شجااك ليث
اني اروح لهلي و هناك اتفاهم وياااهم تريدني حتى اصير فقط من ممتلكاتك ما تريدني اروح لغيرك ..

حجيت هيج  و هو كام يشيل بروحه و يركع و كلشي كباله يركعه بلكاع  كام يصيح و يغلط  ..

ظليت ابجي من الخووف من شااف حالتي  هيج
شمر عليه المفتااح و عاط بيه كال : امششي اطلعي برره ..

اخذت المفتااح بسرعة و طلعت من يمه رحت لغرفة  رسيل اخذت عباتي و كبل للبيت كمت ابجي بغرفتي من الي صاااار اليوم ..

يتبع...🦋
انتهى البارت اتمنى يعجبكم 💕
لا تنسون الايك +التعليق ✔
noorhaidar18

~~~~~~~~~~~~~~~~~~~~~~~~~~

هاااي صورة من البارت الجاااي منوو توقعاتكم
الي جااان بيه 🤔💔

..................

اعتذر جدا على التأخير بس والله ماكوو كهربااء و لا نت هااي يومين ماكووو تطفى ست ساعات و ربع ساعة تشتغل اله بس ان شاءالله بعد هاهية نرجع الكم و لنشر بس اعذروني فدووة حبايبي
بس حابة انوه على شي كل ما اتأخرت كلتوو اتذلينه بلتنزيل عود روايتج يصير بيه تفاعل و تصعد و انتي تذلين يعني الله عليكم الي تحجون هيج شتحسوون
شخص من يكلك  عندي ظرووف تكولون تذلينه
ترى مثل ما انتم مشغولين اني هم مشغولة حالي من حالكم و البارت  يحتاج ساعتين بالاقل يلا اخلصه
استغفر الله ترى هيا مجرد  قصة و بس تصويت تصوتون على شنوو اذلكم و الي معجبة خل يحذف القصة و عود من تكمل  يرجع يقرأها😐
و الي صبر عليه و انتظرني و سئل عن حالي احب اشكركم و ان شاءالله نرجع وياااكم و ما اقصر عليكم يااارب هاي اليومين راح ارجعلكم ان شاءالله احبكم نفر نفر 😁💕