جذبني فمك البني

البارت الثاني والاربعون

سيلين تكول..

تولت بهجة الدنيا فكل جديدها خلق وخان الناس كلهم فما أدري بمن أثق.

لا تأمن امرئاً خان امرئاً أبداً، إنّ من الناس ذا وجهين خوانا.
_______________

سيلين : شنووو انتِ تحجين صدك يعني....

ايفين : اي صدك الصارلي صدك وبعد ممنوع تجون تحجون ويايه ماريد اشوف اي واحد بيكم اطلعي برررررررررره اطلعييييييي اكرهج انتي السبب كتلج مانجي هنا نروح لبيت جدي كله صوجج كله ...

ضليت صافنه عليها ما اريد اصدك الصارلها حقيقه عقلي رافض يصدك كلامها،،

اجتي نرمان ضربتها ابره واني طلعت من الغرفه مكدرت اضل كاعده مكدرت اسمع اكثر ماريد اصدك،

ياربي ماريد لا مستحيل الصارلها حقيقي
كعدت باب غرفتها خليت ايدي على وجهي وكمت ابجي الوم نفسي لان عفتها لو الومها لان ثوله وحشريه وبكلشي حاطه خشمها لو الوم امي العافتنه لو عمامي لو الوم فردوس عطلت زواجهم لو ادهم جابنه هنا المن الوم ..

ضليت كاعده واصفك ايد بأيد طلعت نرمان من غرفتنه سألتها...

سيلين : نامت..

نرمان : اي

سيلين : وين عمو ادهم.

نرمان : طلعو

سيلين : وين راحوا ؟؟؟

تقربت مني كعدت كبالي ولزمت وجهي مسحت دموعي وكالت..

نرمان : لتبجين الله يطلع حقها وادهم متحلفله ...

سيلين : واذا موته واذا سجنه شنو راح استفاد  اختي راح ترجع لا راح ترجع ضحكه ايفين ترجع برائتها ترجع لحياتها ولج نرمان اخوج وين اريد املخه بس اشوفه.

كمت اضرب على وجهي وعلى صدري وهيه لازمتني وتهدأ بيه ...

سيلين :ليش كاعد احسج ما مستغربه الصار لاختي شنو تعرفوه مخبل وعايش بنصكم عادي لو شنوو اريد افهم.

نرمان : يجي ادهم ويحجيلج اني طلعوني من مشاكلكم..

سيلين : ليش هاي مشاكل هاي كسرت بخت هجمان بيوت قتل انسانه على قيد الحياه انتي شكاعد تحجييييين دكتوره...

فقدت كمت اصيح وماعرف شنو حجيت بعد بس هيه تحضني وتهدي بيه ، فركت وجهي قوي وكمت رحت يم ايفين كعدت يم راسها ، اون وابجي واسولف وياها وهيه نايمه متدري شصاير بالدنيا....

ضليت ماعرف شكد مر وقت وسمعت صوت ادهم يصيح جوه ، كمت نزلت الدرج ورحت يمهم جانو مجموعين بالهول ابوه وامه وايمن وعمو ادهم...

يوسف : كتلك ما اندله صار اسبوع موبايله مغلق منين اجيبه....

ادهم : اي يخاف لان يعرف اذا وصلتله لو ينكتل لو ينسجن بس وين يروح  شكد يريد يختفي..

يوسف : زين احجيلي شنو الصار شسوه..

عاط ادهم.

ادهم : كسر امانه وضاح كسر بنات العالم ابنك الراقي اللي تمشي وتسولف بيه وين ما تكعد كسر بنيه تسواه وتسوه عشيرته ، انه جنت كاعد بيتي جبرتني ابيع كله صوجك انت تتحمل ذنبهن انه شلون طاوعتكم شلوووون،
ضليت تزن براسي انت وياه عيب ما عيب من ا***** على العيب هسه الصار زين عجبك حجي ....

فرودس : هسه غير نفهم شنو الصار..

ادهم : الصااااااااار يا ام فهد ابنج كرر فعلته ويه ايفين مثل ما سوه بروايه..

فرودس : يااا عشتو وين لكاها مو احنه هنا شو لا سمعنه ولا شفنه..

ادهم : اي مو ماخذ احتياطاته مطفي الكامرات بليل والصبح يرجع يشغلهن يقفل الباب مالتها علمود من نريد ندك الباب عبالنه نايمه..

يوسف : ابني انت متوهم فهد تعالج تره.

ادهم : شلون تعالج واحنه لحد الان منعرفه سايكو لو سادي لو مازوخي لو نرجسي لو غضب ، انسان معتل نفسيآ حيرني ودوخني..

يوسف : مو التقرير مالته كتبو بيه المرض نفسي بسبب الظرف الصار تتذكر لو لا.

ادهم : لا مو هذا السبب ابنك من هو وصغير يقتل الحيوانات ويهلس الطيور بعدين يكطم روسهن وجنت احجي واكول مريض محد يصدك بيه اله شفتو بعينكم ...

يوسف : ابني هو مو تعالج و دخل مصح بعد شنو الاطباء ميفتهمون من طلعوه وكالو تشافى شفاء تام..

ادهم : اي مبين تشافى ونفس الشي كرره ويه ايفين وبعد اتعس روح اسمع منها خلي تحجيلك اريد اشوف اكو عقل يضل براسك من سوايه ابنك وبعدين منيله بيت ومأثثه اذا عنده بيت ليش كاعد على كلبي مكابلني ميولي لبيته لو اله يعكر صفو حياتي ويدمرني...

فردوس : وتريد تقنعني فهد ماخذها اسبوع بدون رضاتها ليش احنه وين رحنه.

ادهم : جان حسيتي بروايه مو جانت تنزل تطبخ وتنظف وياج عادي وهيه متعرضه لابشع التعذيب النفسي شو محسيتي وانتي غرفتج يمها صوت ما سمعنالها ولو انه جنت مسافر بس الكل يشهد ...

يوسف : يابه جانت مجرد مشكله بينهم وفضت وانه متأكد سالفه ايفين مو صحيحه لك ابني احنه بلبيت شوكت طلعو شوكت رجعو لتخبلوني وهيه ليش ما حجت ليش سكتت وتروح برجلها كل يوم.

ادهم : من سألت روايه هاي الاسئله مالتك شنو جان جوابها هااا شنو مو كلتلك اخاف منه مسوي بيها رعب و شغلات العقل ميحمله وهاي المسكينه نفس الشي سوه وياها خلاها خرسه اسبوع نريد نحجي وياها تبجي وتلطم بس تتذكر..

يوسف : المفروض من اول يوم هاي حالتها مو وره اسبوع يلا تتذكر اله هيه رايحه برجليها وياه..

ادهم : وروايه هم برجليها تروح وياه لو مو ايمن يلكفهم جان ماتت من تحجي احجي بضمير حجي عندك بنات...

ايمن : هو متشوفه ضربني هيج ضربه لان كشفته الناقص غيره بس وين يروح من ايدي الزمه الزمه....

ادهم : يعني ماكو هيج واحد لا نعرفله صديق لا نعرف مكانه وبالدوام يكولون ماخذ اجازه وين الكاه يله وين ادوره واجيبه..

استمر الجدال واني عيني عليهم ، ماعرف شنو اسوي شلون يدرون بيه هيج مجرم واحنه عايشين وياه شلون هيج شلووون صعدت فوك رحت لغرفه ايفين باوعت من الباب بعدها نايمه رحت لغرفه المكتب واتصلت على ادهم دكيت عليه مغلق تذكرت موبايله مكسور ، بعدين اتصلت على ايمن...

ايمن : هاا

سيلين : اريد عمو كله سيلين تريدك فوك.

ايمن : ايفين بيها شي

سيلين : لا مبيها اني اريده.

ايمن : ماشي هسه اصيحه..

صوته يرجف كوه يحجي وحالنه واحد اتعس من الثاني البيت مكلوب ايمن وادهم ما خلو مكان ما دورو بيه
واصلا ميعرفون وين يروح ومنين يجي ،،

اما اني ميته شعوري مينوصف ولا اكدر اعبر عن الحاله الجنت بيها بس حاولت شكد ما اكدر اقوي نفسي علمود اختي واكدر اساعدها مثل ما ساعدتني بيوم وكعت ....

صعد عمو فات للغرفه وكعد على الكرسي رجع راسه ليوره وضل يغمض بعيونه قوي عرفت راسه..

سيلين : عمو شنو الحل تره اني لحد الان مامستوعبه الصار.

ادهم : ولا انه المستوعب .

سيلين : اذا جنت تعرف بيه مريض شلون جمعتنه وياه بنفس البيت..

رفع راسه باوعلي وضيق عينه مبين كاعد يتألم والالم زاد عن حده.

ادهم : سيلين فهد حيرني دخل مصح والاطباء بالاجماع كالو تعالج وعاش ويه ياسه سنه كامله صح جان يأذيها بالكلام ويحرك امي عليها بس ماسوه هيج وياها بينما اختج نبشت بالماضي مالته وعرفت سر من اسراره اللي احنه اهله مانكدر نحجيه كدام احد  هيه تكعد تخابر بنيه غريبه وتحجيلها الاول والتالي وفوكاها طلعت صديقه فهد المقربه متشوفين اذاها بهيج طريقه..

سيلين : يعني شنو كاعد تبررله افعاله القذره..

ادهم :  انه من احجي هيج مو دفاعآ عنه ولا ابررله بس عنده ماضي يصعب عليه احجيه كدامج ما اكدر والماضي مالته جدآ مؤلم فهد بفتره المراهقه جان صف ثاني متوسط تعرض للأغتصاب وكذا يوم ضل يتعرض لهذا الشي والفاعل اقاربنه مأمنين بيه يطب ويطلع وياكل ويشرب ،

كسر عينه وصوره وضل يهدد بيه جان بوقتها كامرات عاديه لهذا مكدر يحجي اله مر اسبوع وتخربط يلا عرفنه لان اثنين شاركو بهذا الفعل تدمرت نفسيته وهو اساسا جان عدائي ويه اللي بعمره وانت شفتيه ويايه شلون يتعامل اذا كعدنه سويه لازم يجاكرني ،

من بعد الصار نفسيته تعبت كام يكسر بالبيت ويصيح لدرجه يتقيء وينهار اله يضربوه ابر مهدئات يلا يصحى بوقتها الطبيب عرض على والدي يوديه مستشفى امرض عقليه علمود يتعالج وفعلا دخل للمصح ضل سنه وشويه كالو صار زين هذا هو وطلعناه بعدين......

قطع الحديث  ايمن من دك الباب.. ...

ايمن : كعدت ايفين تعال ويايه اريد احجي وياها  ..

ادهم : شتحجي كلشي عرفنه.

ايمن : لا انه ماسمعت منها اريد هيه تحجيلي..

ادهم : انت عليش تريد تعذب نفسك ازيد وتعذبها عرفنه وكافي لتعيد ضم حيلك لاخوك خلي نشوفه وين راح.

ايمن : لك كلبي محروووووك يعني هيج نذل وخسيس ماشايف والله ماشايف...

حجاها وكام يضرب بالباب ....

طلعت من يمهم ورحت لايفين كعدت يمها بس تتصفن ، سامر يتصل وافصله يدز رسائل ، جاوبته كتبت
اختي مريضه ماكدر احجي هسه بعدين اخابرك راح اغلق الجهاز ليضل بالك.. وغلقته..

ضليت كاعده يمها وراسي يفتر ماعرف شنو اسوي ماعرف بشنو افكر دماغي وكف من التفكير والتعب..

اجه عمو كمت اني وهو كعد ضل يحجي وياها بهدوء بس اعصابه ترجف اعرفه من يتعب ويتأذه من شي اعصاب وجها وايده كلها ترجف ، هيه ساكته ومدنكه راسها ...

ادهم : باجر من الصبح اخذج نروح لدكتوره فهميها حالتج اريد اخذ تقرير طبي ضروري و اعرف صعبه عليج ونفسيتج متتحمل انه دكتور وماعرف شلون اتصرف وياج اول مره تمر عليه مثل هيج حاله ما معالج احد مار بهيج تجربه بس عقلي وكف مامتصور الكارثه القديمه تنعاد وياج ،

انه اسف واعتذر ماكدرت احميج بس انتي هم غلطانه تدخلتي بشي ما يعنيج ماكلج انتي جرمتي لا بس السويتيه خله الوحش البداخل فهد يهيج جان ناسي او شبه متناسي واجيتي حجيتي لصديقته ولكل عزيز عزيز يعني هيه هم ماراح تسكت هم راح تحجي والله يعلم اذا سكت فهد ومنعرف مصير هاي البنيه شنو بسببج راح تتأذه يعني ضحيتين راح تصير بسبب تطفلج اللي الف مره حذرتج منه ،

اللوم مايفيد واساسآ وضعيتج ماتسمح ولا انه الي كلب اعالجج واطول خلك وياج تدمرت نفسيتي الصار مو قليل ،

اللي اطلبه منج تجين ويايه لدكتوره نسائيه ناخذ تقرير طبي ونروح للمركز نقدم شكوى او نرفع دعوه ضده المهم ينلزم لان ماجاي الكاه وين ادوره ومنين اجيبه ،

اعرف صعبه عليج ولوو ميت ولا خالج تعيشين هذا الوضع بس انه مو ذنبي ماجنت ادري انتي تجاكرين فهد جان منعتج وانه محذرج وكلت مخبل مجنون معليكم بيه لا تندكون بيه اخويه ما اكدر اطرده احنه نتجنبه المهم مايفيد الحجي نامي وارتاحي باجر الصبح طالعين..

طلع من الغرف طلعت وراه التفت عليه وكال.

ادهم : عينج عليها وضلي نايمه يمها ...

سيلين : ماشي..

ادهم : تجين باجؤ وياها

سيلين : اكيد شلون لعد..

تنهد وجر نفس قوي غمض عينه وهمس.

ادهم : تصبحين على خير بعد ماكدر اقاوم راح اوكع.

سيلين : وانت من اهله الله يساعدك...

ثاني يوم بدلت لايفين واني هم بدلت واجه عمو اخذنه للمستشفى...صعدنه ليوره خليتها بحضني مثل كل مره ، مشينه سألته..

سيلين : ايمن وين ليش ما اجه.

ادهم : اساسا ما موجود من البارحه طلع يدور على فهد..

سيلين : وين يلكاه اكيد ظام نفسه ..

ادهم : اليوم اجيبه بدون تعب .

سكتت رحنه للمستشفى ادهم دخل للدكتورة علمود يحجي وياها  وضلو تقريب ربع ساعه يتناقشون بينهم بعدين اجه يمي وكال  .

ادهم : دخلو منتظرتكم.

هزيت راسي ودخلنه الدكتوره ضلت تحجي ويه ايفين وتسألها اسئله وايفين تجاوب على شغلات وشغلات تسكت عنها بعدين طلبت تفحصها ، ايفين كامت تدك وتلطم تبجي وتصيح ماريد ماريد لزمت اديها وحضنتها ..

سيلين : كافي ما لازم سكتي هذا هوو هذا هوو حبيبتي اش اش ...

دك الباب وفات عمو حجت وياها الدكتوره...

_ دكتور راح اعتمد على كلامك اكيد انت ثقه البنيه متقبل على الفحص واحنه بدورنه مانكدر نجبرها على اذيه نفسها بس مبينه متعرضه للأغتصاب من تصرفاتها لهذا راح اكتب التقرير وانت اتصرف..

ادهم : شكرا لثقتج وانه شرحتلج الحاله بالتفصيل والصار كله ..

_ صحيح الله يعينكم على ما بلاكم صعبه كلش..

سكت عمو كعد على الكرسي وهيه كامت تكتب اباوع على رجله تهتز ، واني ابجي وايفين ترجف بيدي..

يعني تثلاثتنه يرادلنه علاج بهاي المستشفى خصوصا اني انتهيت وبس الله يعلم شصاير بحالي بيه عيطه اذا عطتها اهز الدنيا هز ....

الصار لاختي لا مسلم ولا يهودي راضي بيه ..

كملنه التقرير اخذناه وطلعنه بالطريق سألته ..

سيلين : وين رايحين؟

ادهم : نقدم بلاغ .

سيلين : اي افضل

باوعلي بالمرايا نضره خطف ورجع باوع للطريق وصلنه للمركز بين سين وجيم بين الضابط وعمو

بعدين دخلو ايفين جنه واكفين بره ، كعدت واحسها مو طبيعيه تباوع بالوجوه ضايعه وترجف بلش يسألها الضابط اسئله وهيه صافنه علينه...

_ بنتي لتخافين اي شي تعرضتي اله ومهمها جان صعب وجبير خلي ثقتج بالاجهزه الامنيه وتأكدي ناخذ حقج من اكبر واحد...

هزيتلها راسي يعني احجي زادت رجفه ايدها رحت يمها مديت ايدي لزمتها ودنكت شاورتها .....

سيلين : احجي للضابط كلشي تعرفيه وشنو حجيتيلي احجيه لتخافين ابد ..

ضليت احجي وياها همس اخر شي كالت ..

ايفين :  ماكدر ماكدر

سيلين : هو شنو متكدرين لازم عليج صور فديوات اي شي عادي نتقبل من شنو خايفه ايمن وخسريته ليش ساكته..

متقبل تحجي رفعت عيني باوعت على عمو متكتف وعينه عليها صافن وحاير بيها ميعرف شيسوي حسيته تعب ،التفت للضابط ..

ادهم : سيدي نكدر نحجي وياها وحدنه لان مثل مدتشوف خايفه البنيه ..

_ عادي اخذو راحتكم ...

طلع وعمو راح يمها حجه وياها بهدوء....

ادهم : ليش متقبلين تشتكين من شنو خايفه اي شي لازمه عليج  احنه قابلين سواء مصورج فيديو او صور عادي احجي كلشي وبس نطلع منا اخذج ونغير مكان البيت نعيش بعيد عنه ميكدر يأذيج بعد بس احجيلي ....

هزت راسها ب لا..

فرك وجها بنفاذ صبر ورجع يباوعلها بنضره يتوسلها تحجي..

ادهم : اذا ماحجيتي ما راح نكدر نجيبه ولا ياخذ جزاته ويضل يهدد بيج ويأذيج من شنو خايفه فهميني  ضامه شي اكبر من الصور والفيديوات وخايفه من عدنه اذا اي ميخالف احجي نتقبل كلشي بس خلينه نحلها ونخلص منه ها شكلتي راح تشتكين....

دنكت راسها كام عمو وصاح الضابط اجه كعد ورجع يسألها..

_ احجيلي مختصر لتتعمقين بس اسجل افاتدج بصوره سريعه واطلعي اني عندي خلفيه عن الموضوع بس اريدج انتي تحجين علمود تثبت على المتهم ونكدر ندينه....

من بعد محاولات وحجي واقناع من عمو والضابط رفعت راسها وكالت ...

ايفين : ممأذيني وماكو شي من الذكرته ...

بهتنه اني وعمو ضلينه صافنين واحد بوجه الثاني تقرب عمو منها وكال..

ادهم : شلون ماكو شي مو انتي حجيتيلنه ، نفس الكلام الحجيتيه لاختج احجيه هنا...

ايفين : عمو ماكو هيج شي كلشي ممسويلي.

سيلين : لج شلون كلشي ممسويلج انت شبيج تخبلتي..

ايفين : اريد ارجع للبيت تعبت وكتلكم ماكووشي ومابيه شي...

كلبي كام يفور وعمو صار اعصاب بعدين الضابط كال ..

_ اخذوها هسه ومن تكون مستعده تحجي جيبوها ضروري ناخذ افادتها....

ادهم : ان شاءالله...

ضل عمو يحجي وياه واخذنه وطلع الطريق كله يضرب بالستيرن ويرفع عينه يخزر ايفين ويرجع يسوق بعدين متحمل طبك السياره والتفت علينه ...

ادهم : بس فهميني ليش ماقبلتي تحجين بشنو مهددج كتلج انه وياج وبكلشي قابل ليش ماتحجين..

غمضت عيونها وسوت روحها نايمه.....

اندار عمو وخله راسه على الستيرن حسيته تعب وراح يفقد اعصابه حتى ماعرف شنو احجي وياه ولا اعرف شلون اقنع اختي تحجي..

رفع راسه شغل السياره ومشينه وصلنه للبيت ونسمع هوسه وعياط ايمن ، طبك السياره ونزل قبلنه يركض دخل للبيت واحنه دخلنه وراه ونشوف ايمن لازم فهد ويضرب بيه وابوهم واكف يفاكك بينهم وامهم تصيح وتبجي...

لزمه عمو تولاه بوكسات بكل مكان وجها صدره ، تعب وعافه ...

كام يتنفس سريع خفت عليه كلش خفت يصير بيه شي وهو الامان النه من بعد رب العالمين رغم الصار بس ما الومه ابد سوه العليه وزايد ليش اني متعرضت لهيج شي لان احترمت نفسي ومتدخلت لا بفهد ولا غيره...

فهد : ها دكتور هاي كل قوتك ضربتني هههههه شنو وين حيلك لازم كبرت..

ادهم :  انجب عار

فهد : ههههههههههه عار حتى بفشارك مثقف...

ايمن كام يبجي فقد وفهد نايم بالكاع سكطوه بالضرب.. رفع راسه باوع لايمن وكال

فهد:  لك لتبجي مثل النسوان صير سبع لتضل جبان هيه مره تبجي على مره وياريتها تسوه..

ايمن : لك هاي حبيبتي ليش هيج سويت بيه فهد ليش بشنو اذيتك انه......

عمو عاط بيه ولزمه من زيكه خنكه....

ادهم :  شلون الك نفس تأذي اخوك بحبيبته ولك هاي حبيبه اخوك متدري بيه كاعد يحضر للعرس بس انت نذل وسا***** وعديم الانسانيه وما متربي ....

ضحك فهد مستهزء...

فهد : هاا حبيبه اخووي وانه انه مو اخوك بس ايمن اخوك ...

حجاها بحركه ويضرب بصدره....

فهد : مرتي من اخذتوها مني و ابني ما كلتو اخونه راح يموت وراهم. حرمتوني من اعز ثنين على كلبي ، تراهنت عليه ويه عمك وبالاتفاق فرقتوني عنهم ، كتلي روح تعالج وبأمانتي ترجع تلكاهم موجودين تالي ارجع الكاهم مسافرين وبعد فتره تزوجوها والله والله لا اشربكم المر الشربته اله اعيشكم بجحيم العشته..

عمو جاوبه بنتر..

ادهم : ليش انت جنت ادمي وياها حتى فرقناك عنها بدون سبب مو موتتها جان صرت رجال حوك وحويت بت عمك ليش فرطت بيهم وثانيا عمك كال لو تصبوه ذهب بعد ماريده...

فهد : انت شعليك انه ومرتي ليش تدخل غلطت وادبتها..

ادهم : شنو غلطها شنوووو ،  انت خنتها وزعلت عليك ولان زعلت وحجت لابوها،، كمت تكول هانت كرامتي 
وبوكتها كتلك تستاهل اذا تحبها عليش تخون ،

وبعدين من تحجي تكعد تعاقبها بأسواء انواع العذاب النفسي رادت تموت بيدك لو ما ايمن يشوفك تعذب بيها استغليت روحتهم للزياره وعبالك وحدك باقي متدري ايمن موجود ، وروايه تصرخ وانت مستلذ بخوفها ورجعت عدتها ويه ايفين...

فهد : مثل ما تراهنت عليه وفرقتني عن زوجتي وابني ما راح تعيشون براحه اله اذا موتتني..

عمو صار عصبي فقد وكام  يضرب بيه وفهد يستفزه بالكلام...

فهد : اضرب اضرب عبالك اتأذه لك انه ميت اكو واحد يضرب ميت ويحس اريد اقوه لك بابه اقوه هاي بالتدريب نعتبره شقه هههههه بس والله ايدك خفيفه..

رغم عمو يضرب بيه وايمن وهوو يدعي ما كاعد يتاذه بس همه من حركه كلبهم على ايفين اذوه كلش وهو يستهزء ويحرك بكلبهم بالزايد كام عمو منه ينهت حجه مهددد..

ادهم:  اسجنك اسجنك بسيطه..

فهد : شنو تكللهم وتسجني ....

ادهم : هواي تهم تثبت عليك وتخيسك بالحبوس بقيه عمرك..

فهد : يعني مثلا تهمه منهن علمود اكدر ادافع عن نفسي هههههعع

ادهم : ليش السويته متتذكره  كلش زين تتذكر ...

فهد : لا ما اتذكر ومامسوي شي .

التفت علينه جنه واكفين على صفحه ايفين ترجف ونسيتها اصلا واني صافنه وباهته باللي كاعد اشوفه واسمعه....

فهد : افونه اذيتج انه سويتلج شي احجيلهم سولفي....

هزت راسها ب لا ...

فهد : شووووف مامسوي شي ظلمتوني..

رجع عمو يضرب بيه احسه يريد يبرد كلبه وابوهم تعب يوخر ب ادهم وادهم فقد اعصابه ،

بنص الهوسه ومنحس اله ايمن جاب سجين وضرب فهد ، صارت الضربه بكتفه ،
لو ما منتبه ومتحرك جان صارت بكلبه ،
كام ادهم جره لايمن ،

وابوهم وفردوس والبنات التمو على فهد والبجي والعياط مالتهم اخذ الدنيا راحت نرمان جابت وصله وشدت ايده بيها صار خدش يعني الضربه جانت مو قويه لان ايمن تعبان واعصابه جانت ترجف مكدر يسيطر ويضربه ابوهم اندار على ايمن وكام يصيح عليه....

يوسف : تخبلت تضرب اخوووك من وره وحده لتخليني احجي واصير مو خوش ادمي هذا اخوك وكاعد يكلك ما مسوي شي جوز تتبله عليه .

ادهم : تتبله عليه وروايه هم جانت تتبله عليه والوشم هم جذب مو هذا اكبر دليل يدين ابنك بس غير هيه رفضت تشتكي عليه الله اعلم بشنو مهددها و هيج خايفه منه  ...

فهد : انت لو ماخذ رأيي قبل لا تروح جان نصحتك زين هيج من فشلت نفسك..

ادهم : انجب نذل انه اعرف شلون اخليها تحجي .

فهد : هلمره ما تكدر لا تسجني ولا تدخلني مصح تعرف ليش لان لاعبها صح ...

ادهم : لاعبها صح مو ، لك تهمه اغتصاب تخيسك بالسجن عدا سوالف التعذيب السويتها بيها وضيف عليها الابتزاز..

فهد : لالا هاي ما مقبوله منك انه ابتز واغتصب زوجتي وين صايره هاي وبعدين طلع جسمها شوف اكو اثر ماكو اذن انه ما مأذيها انتو تتبلون عليه وانه فقير...

كلنا صفنه من حجه هيج الكل سكت وصار هدوء ...

فهد : ها فيفو شتكولين...

اللي صحانه من الصدمه وكع ايمن من طوله ركضله ادهم واني اخذت ايفين وصعدت فوك مادري شصار بعد بس اسمع هوسه وعياط ، دخلتها للغرفه وكعدتها كبالي..

سيلين : احجي صدك السمعته..

هزت راسها ب اي.

سيلين : شوكت عقد عليج قبلها لو بعدها..

ايفين : ثاني يوم من كتلج اخذني لمكان ومكدرت احجي لان مقبل..

سيلين: شلون كدر يعقدلج وانتي ماكو وياج احد..

ايفين : ماعرف بس الشيخ  اللي جايبه مبين يعرفه وجانو ثنين شهود وياه وعقدنه..

كمت اضرب على راسي بعد ماعرف شنو اسوي وشتصرف كمت رحت للحمام ردت اغسل احس راح يغمى عليه وافقد اعصابي اني هم ممصدكه لحد الان اني بحلم لو حقيقه العشناه صعب كلش صعب ، طلعت من الحمام وسمعت صوته يمها يحجي شوكت صعد والباقين وين مادري وكفت اسمع اريد اشوف شنو بينهم تقصدت مدخلت....

فهد : شنو حجيتيلهم ...

ايفين : اللي انت كتلي عليه حجيته...

فهد : والباقي

ايفين : سكتت محجيت

فهد : يعني مازيدتي حرف..

اييفين: لا مزيدت 

فهد : اي عفيه تغدريني اغدر بيج

ايفين : شتريد بعد مني شتريد...

فهد :ماريد بس امشي عدل حتى امشي وياج عدل...

ايفينن : الله لا يوفقك .

فهد : لتدعين ما يحتاج من الاساس انه ما متوفق..

ايفين : لان انسان اعوج وظالم اكيد الله يكرهك..

فهد: قابل صديقه ويكرهني بابه حرام هيج تحجين...

ايفين : الله كريم اله اطلع حقي منك.

فهد : انتي سوي اللي يعجبج بس لتنسين البيناتنه شي سر جبير وتذكري دائما الشغلات العندي اكدر بيها اكلب ادهم واختج عليج لهذا جري عدل وصيري طوع فهد وفهد يصيرلج مي.

ايفين : بس لو تموت ماصير مثل التريده اله ادمرك مثل ما دمرتني.

فهد : التكدرين عليه سويه وشوفي بشنو اردلج..

ايفين : الرجال الصدك ميتقوة على مره

فهد : والبنيه المتربايه ما تندك برجال غريب عنها وتنبش وراه وتفضحه كدام بنيه غريبه ....

ايفين : مريض ...

فهد : كلنا مرضى وانتي اولنه.

ايفين : روح حسبي الله ونعم الوكيل عليك..

فهد : بدال ما تدعين جان ربيتي نفسج وما تدخلتي بخصوصياتي الصارلج درس حتى كل ما تنوين تدخلين بشي ما يعنيج تباوعين للوشم وتتذكريني ....

ايفين : نذل الله ليوفقك...

فهد : فوفتي اشتاقيتيلي انه اشتاقيت وبعدين شلون تنتقمين مني شنو تسوين مثلا...

ايفين : مريض انت انسان مريض...

فهد : اذا مريض شجابج عليه..

ايفين : يعني شنو قابل تستمر الكذبه اكيد راح ننكشف مو اليوم باجر....

متحملت اكثر دخلت عليهم باوعلي وضحك وجها كله ازرك من الضرب مكلوب كلاب..

كمت اصيح بصوت عالي..

سيلين : شنو البينكم انتو الاثنين ، انتي من شنو خايفه شنو الشي اللي لازمه عليج ويهدددج بييييييه احجي وشنو اللي راح ينكشف....

لزمتها وكمت اهز بيها...

يتبع...