شغلت سماعاتي اسمع اغاني و اني اسوق الدراجة مثل عادتي و اسوق بسرعة جبيرة صراحة دست بانزين فرحانه بالشارع الجبير و الفارغ دائماً اجي لهاي المنطقة قريبة من الحي مالتنا و صراحة للزناكين محد يطلع منهم ما تشوف واحد بالشارع ابد تحس حياة الاغنياء تختلف عن البقية شو ماكو لا طلفل لا شي دائماً حيهم صمته و هدوء و صراحة كلش احب هذا الشي اسوق براحتي لا كرايبي هنا و لا غيرها محد يشوفني و يدري بيه و هنا كلها عدها سيارات محد يمشي او يطلع للشارع احس تالشوارع اليه اني كعدت اغني الاغنية الي اسمعها بهمس و متونسة لحد ما اذكرت كلام ابويه هضمني كلش و حسيت بخنكه و دموعي بعيني كلما فكرت بالموضوع اكثر فصرت اسوق ابطئ اباوع للخزان مال الدراجة و احس نار و شاعلة بصدري و تحركني حرك جان يوجع شعور متعب و يخنك و تقود بهدوء و هي تنظر للدراجة و دموعها صارت توكع " ليش ابوية يكرهني لهاي الدرجة و ما يحبني أبداً .. دائماً يكرهني و يحب عسل يموت عليها يسولف و يضحك وياها و اني اصلا ما اعرف احجي وياه و اذا حجينا فهو بس يحجي علية و اني فاشلة ... ادري اني فاشلة صدك بس اكو بنات اسوء مني و اهلهم مدلليهن حتى يرسبن و وضعهم المادي اسوء منه و ما يحجون وياهن ... كل الي حاير بي يحجي علية و يكول لامي هاي الله الي يعلم تحجي ويه ولد بالليل و احنه ما ندري بيها .. اكو ابو يحجي عن بنته هيج.. اصلا ما يعرف اي شي عني .. بحياتة ما حجة وياي و بس يحجي علية... اني ادري بي هو كلش يكرهني و ما يحبني أبداً ... "
صارت تبجي بانفعال و وجع تحس بي يكطعها من الداخل " يكرهني حتى قبل لا يدفع الي فلوس و من جنت اصغيرة كلش جان دائماً يكرهني بينما عسل مدللها من هي وصغيرة و يصيح هاي الملاك مالتي لعد اني شنو القندره مالتك والله حرام عليك اتفرق ابينا هلكد اصلاً عسل فد وحده لوتيه و تنصب على عائلتي كلها بالكلام الحلو و تضحك عليهم لسبالها اني غبية و ما افهمها .. حتى امي الكل يعاملها احسن معامله تكول هي الاخت الجبيرة مو اني و بس احجي وياها كلمه السانها اشطولة و تكوم اصيح علية و امي و ابوية يركضون يدافعون عنها و يحجون علية تكول جنت حاطة مسدس على راسها ... بس اريد افهم ليش هلكد يحبونها .. معقولة كل هذا بس لانها شاطرة بالدراسة و اني لا ... انس شاطرة هم بس ما اكدر اقرة الدراسة تنرفزني احس كاع اتعذب ما ادري شلون اكدر اقرا بيوم الامتحان و انجح والله ما ادري و هي الكلبة تقرا من الصبح لليل الحيوانة شلون تكدر اسوي هيج ... اساس هي احسن مني بكلشي ليش احجي عليها .. احلى مني اذكى مني اعقل مني و هادئة و العالم كله يحبها ماكو احد ما يحبها .. حتى اني ... بينما اني العالم كله يكرهني .. امي شلون تكعدها حبيبتي عسل كعدي اني امي شلون تكعدني حيوانه رغد كعدي و اضل تدعي علية اااااه ليش اني الاخت الجبيرة لو هي جان احسن على الاقل محد يضل يحجي علية و يكول.... "
انفتحت اعيوني بخرعة مو طبيعية حسيت بشي و كمشني ساحبني مثل الحيوانة للكاع و انضربت ضربة من هاي الزينة ظهري صار يلسعني و اسمع صوت الدراجة توكع و تتكسر بالكاع ما احسلك غير واحد شطول شعرضة اني جني نتفه جكاير يمه حط ساعد ايده على رگبتي غير خنكني خنكة من هاي الزينة الدم كل اجمد بجسمي اول مرة اخاف لهاي الدرجة حسيت اشويه و اموت و من وجع الطيحة و ايده شثكلها يخنكني صحت بوجع رغم على كيف مو كلش استحي واحد يسمعني و اني اتوجع كلش اكره هذا الشي : ااااااااه
هو الرجال شو صار يباوعلي بعصبية اكبر جنه يريد يموتني و كاع يحجي وياي بشي بس ما سمعته السماعات لسه بأذاني گلبي صار يرجف متت خوف شكلي راح انخطف و اموت رحت بيها اني اليوم اجيت الموتي اريد اشرد اريد اسوي شي بس ما اكدر و هو فوكاي هيج و جسمي كله يوجعني من الوكعه ما احسلك الا و هو يجرني بقوة و يوكفني وياه من وكف و اخترعت خرعة اكبر و ردت اموت من جر الخوذة من راسي و يعني بعنف و بسرعة بطريقة تخوف ما لحكت ادافع عن نفسي او امنعه كلشي صار بسرعة فنزلت راسي بسرعة و اني صرت اطكطك خوف و السماعات وكعت من اذاني و اني ارفع راسي بخوف مو طبيعي اباوع اله و دموعي على خدودي حسيت راح ابجي اكثر و انفجر بالبجي و اني اشوف مجرم يصوب المسدس اتجاهي و يباوعلي و اني بلا حجاب من الخوف و الخرعة صحت بخوف و اني ارفع ايدي و ضربته براجي مو طبيعي شكد قوي و لا ارادي و اني لسه ارجف : حيوان لا تباوعلي يا كلب
من صدمة يوسف بانها مرأة جان بهتان فمن ضربته راجدي ضغط على الزناد و ضرب طلقة للكاع غير هنا رغد صرخت بخرعة و هي تكمش راسها من الجهتين و تنزله لجوه و شفايفها صارن يرجفن بعد ما صارن بيض من الخرعة و صارت تبجي بأنفعال جبير و وجها صار احمر : اااااااااااااااه
فتح يوسف حلكه بصدمة اكبر و هو يباوع بأرتباك بشلون صارت ترجف هيج و من الخوف خدودها صارن طماطة و شعرها منثور بطريقة كلش حلوة جان ينتبه على نفسه و انه يشوفها و هي ما تحل عليه فنطاها ظهره بسرعة يحجي و هو قلبة تكول داخل بسباق : ما ادري انتي مراة .. اسف مو قصدي والله لسبالي رجال .. لا تخافين ما اسويلج شي
غمضت عيونها بقهر و هي تبجي بحرگة و شهكاتها يسمعهن فانقهر عليها يوسف كلش و منظرها جان يكسر الخاطر من بجت و ما يعرف شيسوي اساس ما جان عنده وقت لان صوت مهند و باقي اصدقائة يسمعه و همه يطلعون لحديقة بيت مهند و واحد منهم يكول : اسمعتها انته هم.. متاكد هاي صوت طلقة
كال ثاني : شنو الي صار يا معودين
صار يوسف يرجع لوره و هو يباوع لباب البيت بخرعة مقترب من رغد و هو يرفع اديه و يصيح بصوت كلش عالي و منفعل : لحد يطلااااااااع
طلع مهند واكف بعتبه الباب و كم رجل وراه يباوعون اليوسف و هو واكف ماد اديه وحده منهن كامش خوذة و دراجه يمه مكسورة واضح انه ضام شخص وراه بس منو محد كدر يشوفه لان جسم يوسف جان كافي حتى يصير سد الرغد و هم يوسف يصيح بعصبية مو طبيعية صار مثل الشيطان لدرجة خوفهم : حيواااان كاع اكلك طب ليجوه تسمعني طبووووو كلكم بسرررعة
باوع مهند بعدم فهم بينما رغد واكفه على حيلها و خاتله وراه تباوع الظهره المعضل و اكتافة و اديه شعرضهن و تكدر حتى اشم ريحتة الطيبة و هي دموعها بعيونها و ترجف من الخوف تخاف واحد يشوفها بدون حجاب اكثر من اي شي ثاني ، مهند كال بأرتباك ليوسف : بس سمعنه صوت طلقة...
صاح يوسف بعيون تخوف و وجهه يخوف اكثر تكول راح يفترسهم فرس خلاهم يعرفون الخوف و هو عاقد حواجبه بخشونة و فكه متصلب : اقسم بالله اذا ما طبيتو و سديتو الباب هسه اشبعكم كتل و العباس و محد يخلصكم مني طبو ليجوه بسرعة قبل لا اتخبل عليكم و الزهرة هسه اشعل سلفا سلفاكم طبوووو
الكل توتراو منه فدار مهند و هو يكمش الثنين الي وراه : يله طبو ليجوه.. ما يصير هيج عصبي اذا مو الموضوع مهم بعدين نفتهم منه طبوا هسه قبل لا يتخبل علينه ما ناقصني غير انضرب من يوسف اني
تنهد يوسف براحة من دخلاو ما كمل تنهيدته و هو يباوع بسرعة للجهتين من الشارع خاف اكو احد يطلع بعد جان رغد اخترعت لسبالها راح يشوفها فصيحت بخوف : لا تفتاااااار
كمش يوسف رأسه بنفس الايد الي كامش السلاح بيها و هو يضغط على سنونه ، يفكر بعصبية و انزعاج " اكو بنيه تلبس ملابس ولد و سوق دراجة بهذا الوقت من الليل ؟ "
كال بهدوء و هو قلبة يدك بأضطراب : انتي زينه خو ما تأذيتي .. ما ادري تمزق او صار كسر عندج
جاوبت بعصبية و هي تاخذ الخوذة منه بعنف : انت مخبل اشبيك هيج هجمت عليه هاااا جسمي كله يوجعني من وراك .. لا تفتار ترى والله هسه اضربك بالخوذة على راسك .. الله لا يطيك العافية اي والله خرعتني و ضربتني هم و شفتني بلا حجاب يا كافر
فتح حلكه بصدمة لانها هاجمته هيج و تريد اضربه فوكاها جان يعكد حواجبه بعصبية و هو يكول بخشونة : انتي الي المخبلة حترمي نفسج فهمتي .. اكو وحدة تسوق ماطور بهذا الوقت من الليل هااا و هماتين لسبالي حرامي انتي .. شمدريني انتي مراة .. اهلج وين يدرون بالي اسوي انتي و موافقين طبيعي ... و هم جان لازم تلبسين حجاب جوه الخوذة .. فوكاها لابسه ملابس رجال ممكن تكليلي شلون اعرف انتي مراه هااا
لبست الخوذة و هي تسمع الحجيه و تمشي اتجاه الدراجة بحزن و تكول بنبرة بجي : الله لا يطيك العافية اي والله ... كون واحد يسوي بيك مثل الي سويتة بيه بس تتكسر انته .. الماطور اجلخ كرار راح يكتلني اذا درة ماطورة صار هيج من وراك انته
جان يسمع بأرتباك و هو يباوع لبيت مهند " ما اكدر اخذها للمستشفى او اصلح الماطور او حتى اباوع الها لانها مره و واضح هذا الماطور مو الها بما انو راح تبجي هسه لان هذا الي اسمه كرار راح يكتلها .. شسوي هسه ... هذا اسوء موقف امر بي بحياتي وين الكلب الي كال اكو حرامي هااااا "
سمع صوت الدراجة و هي تتحرك باوع الها بصدمة : انتظري خلي اطيج افلوس التصليح على الأقل و المستشفى .. خليني اوصلج الها على الاقل
صاحت رغد بأنفعال و حقد و هي ادوس بانزين توخر عنه اسرع : بس ولي عن وجهي
صاح بعصبية : احترمي نفسج يا مراة
ما جاوبت و هي بعيدة عنه صار جسمها كله يوجعها ركبتها تلسعها و تحركها تحس صارت سكراب كلش عنيف جان وياها و الخرعة لسه بجسمها ابدها تبجي من الوجع بس ما بجت و هي تحس حرارتها ارتفعت و ما تدري شنو يوجعها لان ماكو جزء ما يوجعها بجسمها و حتى نفسياً تعبت كلش توقعت راح تنخطف و تنقتل بأسوء طريقة و حتى طلقة جانت راح تجي بيها و شافها بدون حجاب ماكو شغلة ما صارت بيها بس بعدين اطمنت من شافته شلون يدافع عن عرضها و ما خله البقية يشوفوها بس ما تفهم ليش هجم عليها مثل الاسد هيج و جان متحلف الها
يوسف كمش كصته و هو يغمض عيونه بتعب و يكمش خصره بيدة الثانية " هذا اسوء شي يصير بحياتي جنت راح اموت البنية خطية ... خلي تولي و تنجب هم هاي الحيوانة ما مرباية وين اكو بنية اسوق ماطور و بالنجف هم اهلها وين هاي اكيد ما عدها ابو لو عدها ما يخليها هيج تلكي ابوها ميت ... ما اعرف احجي عليها لو انقهر عليها اني هسه .. الله ياخذك مهند كتلك ما اريد اجي يا عار دائماً اجيبلي مشاكل "
طلع من تفكيرة على صوت زلم طلعاو من واحد من البيوت و يكمشون رجال يجروه و واحد بيهم يصيح : خلي نودي للشرطة السرسري هذا همزين كمشناه بأخر ثانية جان راح يطفر على بيت ابو امير السافل
باوعلك يوسف اله بنظرة تخوف واضح متحلف اله عيونه وحدهن كامن يجدحن شرارات و صارلك يركض اتجاهم لدرجة الزلم خافاو و همه يباوعن اله و يوسف يرفع ايده على شكل بوكس و يباوع مثل الشيطان ضربلك الحرامي بوكس بوجهه وكعه بالكاع و هو يصيح بخشونة : كلب ابن الكلب شيخلصك مني اليوم انته منو داعي عليك
نزلك يوسف بالحرامي دك كتل جنزه جنازه و الزلم البقية يحاولون يفصلون بينهم : يمعود عوف الرجال راح يموت صدك تحجي
صاح يوسف بعصبية وره ما وخر هو بنفسه عنهم و يباوع و هو نار : بسبب هذا السافل مريت بأسوء موقف بحياتي
: اي دكافي عوفة راح نودي للسجن
باوع يوسف بحقد و وخر بعصبية و هو بكل خطوة يحس دمة يغلي و عاف الرجال وراه مزورك و يتأوى بوجع ، كمش يوسف باب السيارة بعصبية فاتحها و سده حيل و ساق بسرعة صوت التايرات جان مسموع حواجب يوسف الوقت كلع عاكدهن بعصبية " ما اصدك انها ضربتني راجدي ... يمكن محترمة لدرجة انفعلت لهاي الدرجة من شفتها بلا حجاب و صاحت لا تباوع بس بنفس الوقت هي جامحة كلش .. خاف من غير محافظة هاي و منفتحة اعتقد عدهم عادي همه اسوق ماطور بس بالنجف ماكو هيج شي ... ما كاع اكدر اذكر اذا جانت تعرج او منصابة بمكان لاني درت وجهي بسرعة اااااه شنو من موقف غريب هذا صدك غريب ... بس هي لابسة ملابس رجال .. لحظة ليش ما فكرت جوز هي وية الحرامي اااه لا تفكر بس وكف لا تهتم امسح الحدث من ذاكرتك كأنو ما صار أبداً ... خرب صفات الرجال النبيل الي عدي حقيرة و كاع تحسسني بالذنب جانت تبجي هذا كل الي اذكره اوف لا تفكر بس "
_______
وصلت للبيت و اني ارجف من الخوف الدراجة متجلخة تجليخ من هذا الزين يعني مفضوحة اني مفضوحة اليوم نزلت الدراجة على كيف غليتها منسدحة على الكاع عود الدراجة وكعت وحدهي بلكي هيج يفكرون و طبيت و اني قلبي موتني راح يخبلني اسمع دكاته بأذاني حطيت الخوذة بمكانها ضبط و صعدت لغرفتي و اني احس بالوجع ظهري كلش مأذيني و مخترعة ما اريد احد يشوفني بملابس الولد و اني اصعد الدرج سمعت عسل اصيحلي غير وكف قلبي هنا اني : رغد
: اااااه
باوعتلي بأنزعاج : الغسل اي والله هاي شبيج اصيحين هيج
اني اباوع بتوتر الها : ماكو شي شتردين
: بدلتي ماي السمج مالتج لو لا
باوعت بصدمة : لا ما بدلته .. بدلي حبابة
تنهدت عسل : هو انتي اخرتج راح تكتليهن خطية يعني احنه كل يومية لازم نذكرج تغيرين الماي و تطيهن اكل اذا مو كد المسؤلية ليش تشترين سمج
باوعت الها بحدة : و انتوا اشبيكم ما تعرفون تغيرون الماي مالتهن او تطوهن اكل لو الا اني
: غير انتي الي مشتريتهن و حاطتهن بغرفتج .. اعتني بيهن غبرة
راحت و اني اباوع الها بعصبية : والله حيوانة انتي
: عود روحي نامي مو ساعة نكعد بيج الصبح
: انجبي ليج لا تكعدين تتأمرين علية كلج ١٣ مدري ١٤ سنة ولي انتي نامي
: العمر الجسدي هذا العقلي اكبر منج بالتأكيد
باوعت الها بعصبية و رحت الغرفتي مو وقت اتعارك وياها و تمددت على الفراش اويلي حسيت بتعب جبير و اني منسدحة فد دقيقة لحد ما كمت نزعت التيشيرت و باوعت الجسمي غير نص ظهري زورك و طكع حمرة على زركة باوعت الرگبتي و نفس الحالة اثر احمر عليها و حتى كوع ايدي ينزف دم تنهدت بحزن و تعب القهر لاحكني لاحكني رحت لحوض السمج مالتي اصغير دائري و عندي سمجتين سودة و بيضة فضية : هذا السايب مثل الاسد والله ... جسمي كله يوجعني من وراه شلون كمشني و اني اسوق ما ادري .... الكلب ابدي اشبعة كتل هسه .. حتى شافني بدون حجاب والله فشلة خرب حظي المصخم اي والله فوك ما اني زعلانة أساساً و مختنكة احصلي ضرب بي حظ و الحيوان كلش قوي معضل ... زين ما ضربني طلقة ما افهم ليش هيج هجم عليه ... هاا كال لسباله اني حرامي .. شنو من حجة هاي اشكد جلب الله لا يطي العافية يارب حادث سيارة يكسر عظامة كلهن و يخلي مقعد العمر كلة اخخخ والله راح ابجي جسمي كله يوجعني و من جه باجر الصبح راح تكوم القيامة بعد ما يدرون بالدراجة ... الجانب الايجابي ما راح يدرون جنت اسوق الدراجة اكدر اكول وكعت الدراجة بالخطأ بالممر و اجلخت هيج لانهم اصلا ما يدرون اسوقها ااااااه كرار باجر يحرك البيت حرك و الله اكعد اسوي نفسي كلشي ما اعرف و ما الي علاقة بشي .. الهوة وكعها .. خلي يفكرون هيج ياربي حباب حتى لو الفكرة غبية و محد يصدكها خليهم يصدكوها
كمشت ركبتي امسحها على كيف بتدليك لانها توجعني اريد اخفف الوجع باوعت للحوض ضربت سبابتي بخفة بي اريد السمج يجيني و يواسيني : انتظرن اغير ملابسي و اخلي لزكة الايدي و اغير الماي ولو اني مالي خلك روحي هسه ... صراحة صح انتن حلوات و ظريفات هم بس يعني مسؤلية و طيحان حظ لو ما مشتريتجن احسن .. احس بتوتر عصبي من وراجن كل يوم خايفة تموتن و مخترعة و كلما اشوفجن ما تتحركن كلت ماتن طاح حظجن صدك مثل ما مخرعاتني كل يوم
غيرت ملابسي و نزلت بسرعة ليجوه شفت احمد بالصاله ما هتميت و رحت طلعت لصقة جروح من الصيدلية الصغيرة بالمطبخ و رجعت الغرفتي اخذت حوض السمج و رحت للمغسله انزل مايهن بالحوض اشويه اشويه و افكر" شلون بيه اني هسة اذا اهلي دراو اني اسوق الدراجة ابوية راح يشبعني كتل و العباس و بعد محد ينقذني هو أساساً يكرهني و ما جان ناقص غير هاي... بعد لو تنكلب الدنية ما اسوقها.. بس من اشرد من العراق و اعيش بالخارج هو هذا الحل اروح للخارج احسن .. امشي اكمل دراستي بتركيا اشرف الي .. طلعت بس سقت الدراجة شبعت كتل و راد يكتلني هم بطلقة و انفضحت شاف شعري ... ياربي معقول اطب النار اني ما سويت شي خطأ... اعتقد حتى هو مو بقصدة الولد دار وجه بسرعة بس ما يهم والله اشبعة كتل ... هاي اذا ما علسني اني و اروح بيها .. معضل هو يكدر يكسر ركبتي بكل سهولة اودع بسرعة الملاعب "
اخترعت من شفت نزلت الماي كله و السمج بقى يطفر بالحوض الفارغ راح يموتن امداني فتحت اللوله بسرعة و ترست الحوض : اسفااااااااه لا تموتن حبابات والله اسفة لا تموتن
بالعادة افرغ نص الحوض و اترس النص ثاني ماي نضيف من اتعاجز اغسل الحوض بس حرت بالتفكير مالتي و فرغت الماي كله من انترس الحوض رجعت الغرفتي و اني احس بالذنب خطية اكيد خوفتهن للسمج رجعت للفراش ما اكدر انام على ظهري وجعني كلش فنمت على بطني و قررت انسى كلشي صار لان التفكير تعبني و القادم اسوء اني ادري فحطيت اللابتوب و كعدت اباوع مسلسل اشرد من الواقع بالخيال مثل ما اسوي دائماً لبست سماعاتي و حاولت اباوع بس النومة مو مريحة صرت افتر بالفراش كلسا مكان متعودة انام على ظهري و اخلي اللابتوب على بطني بس شسوي حظي اغبر و بقيتلك كاعد للسته الصبح ما اكدرت انام من التفكير و التوتر احس اعصابي مشدودة كله من وراه ، يارب كون ما اشوفه مرة ثانية يارب كون ما شافني عدل و ما يعرفني معقولة يكول الابوية ياربي شأسوي هسه ، بس الحيوان اعتقد هو حلو مدري اعتقد كلش حلو و لو اني ما اهتم للجمال و اهم شي الشخصية و شخصيتة واحد عار على المجتمع و ادب سيز يارب لا تخليني اشوفة ابد ، ياربي خلي باجر يمشي على خير ... المشكلة ما عدي فلوس لو عدي جان اطيت الكرار افلوس التصليح بس ربع ما عدي ما بيه حظ من جميع النواحي كله من وره ابوية اكله اريد اشتغل ما يرضة ابد جان هسه مجمعتلي فلس مو صايره اكدي ، والله ما اريد باجر يجي أبداً المصيية ياريت اروح للكلية و ما اشوف كرار بس هو دوامة كله صباحي مثلي خرب حظي المصخم وين ما اريد الزكها ما تتلزك : اوووف ما اكدر انام ابد شأسوي راح اموت من الخوف والله ... ما بقى على الدوام بس كم ساعة امبين راح اروح بدون نوم للكلية
يوسف يحاول ينام هم رغم الوقت تأخر جان فجأة صار عصبي و هو يكمش المخدة كاطفها بعصبية اتجاه الحايط و يصيح : مااا اريد غير بس انااااام
انضربت المخدة بوحدة من الصور الي معلكة و وكعت متكسر الكزاز مالتها بالكاع جان يباوع بأنزعاج الها : هو جان ناقصك انت الثاني تنكسر
رجع متمدد على بطنه و هو يخلي المخدة فوك يضغط عليها بقوة ثواني تنهد و هو يوخر المخدة يباوع للفراغ : بعيداً عن كل الي صار .. هاي البنية بالحقيقة حلوة مملوحة و بريئة .. بس اريد افهم شيطلعها وحدهي بالليل ما تخاف تنخطف هو وين اكو أمان بالعراق وحده حلوة مثلها يخطفوها مباشرة... جوز لهذا السبب جانت لابسة ملابس رجالية محد يكدر يعرف انها مراة ... احس بالعار من نفسي خليت مرة غريبة تبجي فوكاها جنت كلش عنيف لسبالي رجال و ما ردته يقاومني لذا ثبتتها.... ام الغباء الي عدي ليش ما عرفت مراة بعد ما صيحت يعني شنو الغباء الي عدي حتى بعد ما صيحت اني ما فكرت انها مراة... بس صراحة هي ما صيحت مثل اي مرة ثانية او كامت تبجي مباشرة اعتقد عدها قوة شخصية و خفت الوجع مالتها بس كامت تبجي من اضربت طلقة خترعت هنا .. اني شبية هم غبي و ضربت طلقة هااا بس هي ضربتني راجدي و اني لا ارادي ضربت طلقة بعد الصدمة احس راسي راح يتفجر فعلياً ما كاع اكدر اوكف تفكير بيها اني بالعادة ما اهتم بس.. اني نذل و خليتها تبجي هاي اول مرة اشوف ابنية تبجي بسببي .... اتمنى ما اشوفها مرة ثانية أبداً لحد ما اموت بعد ما اقرب من هذا الحي أبداً و مهند بس اشوفة الا اضربة الحيوان .. و فوكاها شلون وكحة ضربتني صلافه عدها مشكلة ما اكدر احجي عليها لاني كلب و شلتها و كطفتها بالكاع
تنهد و هو يكمش المخدة يرجعها لراسه و هو يصيح بأمر النفسه : نام يوسف
تابعوني انستغرام اذا حبيتوا