كل العيلة بدت تصل للصالة وشوية شوية المعازيم بدو يجو.. رامي كان مبسوط يسلم علي دا ويستقبل دا والضحكة م فارقت وشو، ألين وران برضو حايمين وبسلمو علي الناس ، وعد جنب امها بسلمو علي قربيتهم ، نسرين ودانة ي داااب وصلو وقعد يسلمو علي حبوبتهم وعبير.. ألين وران مشو لرامي وكان واقف مع صحبو كدا سلمو ووقفو وحدة بيمينو والتانية شمالو ..الراجل استأذن ومشا رامي عاين ليهم وقال:احكو
ران رفعت يدها: شوف منكيري دا حلو؟ألين قالت لي تعمليهو زرعي
رامي عاين لفستناها لقاهو اخضر زرعي ومنكيرها اسود ابتسم وقال: حلو شديد
ألين مدت ليهو يدها: اها يعني بتاعي م حلو؟ كان اعملو اسود؟
رامي عاين ليها الاتنين طبعا كانو لابسين نفس الفساتين ،ابتسم وهو بقول: ألينو ورانو حبيابي انتو لو م عملتو منكير اصلا ح تكونو قمرات عشان كدا مف داعي للحركات دي
ألين ضحكت، ران: حبينا نلفت انتباهك شايفنك مشخت لينا
رامي: م كدا بس مشغووول ..عريس وكدا احم احم
ألين: واحلي عريس بعد
رامي: عارف
ألين وران: ي شيييييخ؟
ضحك وحضنهم ، ألين: ربنا يتم ليك علي خير
ران: ويسعدك ويهنيك
رامي: اللهم امييين.. ايوة كدا قولو كلام بتاع ناس عاقلين شنو منكيري حلو ولا لأ؟
ضحكو التلاتة… في دا فهد جا داخل وعينو وقعت وهي بتضحك ابتسم بحالمية وعيونو لمعو…
احمد كان مع انس بسلمو علي راجل كدا وجنبهم اعمامهم
الراجل اشر علي احمد وقال: دا ولدك الكبير ي عبداللّه صح؟
عبداللّه:اي وعندي الصغير امجد
الراجل: رجال ما شاءالله
عبداللّه:الله م ضراك
الراجل اتلفت علي انس:وصلت وين في القراية ي ابو الإنس
انس: والله اتخرجتا من فترة وقدمتا للشغل في كم حتة…
الحفلة بدت💃🏻 وكانت بحمادة بشير والناس بدو يهججو ..امجد وياسر وانس برقصو مع رامي فهد واقف جنبهم وبصفق ،احمد قاعد جنب حبوبتو مراقب نسرين وكل شوية ببشر ليهم.. ألين وران مستلمين دايرة النسوان ودانة مرة ترقص معاهم مرة تقيف جنب وعد… وطبعا اكيد محمد بشير غنى ليهم الجدي ..والناس ديل بدو يعرضو نادية"ام رامي"واميرة"ام شهد"بدو يرقصو بالرقبة ألين وران فكو الزغاريت لمن الاولاد لاحظو ليهم رامي جا علي امو وهو بعرض ختا راسو في راسها وبقو يعرضو سوا منظرهم كان مؤثر شديد… امجد جرا جنب الفنان وبقى يمليهو
الفنان: ي رامي تسلم لي وين وين؟
الناس دي كوركت
الفنان: عواطف تسلم لي وين وين
كلهم اتلفتو علي حبوبتهم البدت تزغرت رغم بحة صوتها، رامي اتجه لحبوبتو وهو بعرض لمن وصلها دنقر راسو هي ختت يدها في راسو الناس ديل فاااارو بعد شوية رامي جرا يد حبوبتو الفي راسو وباسها هي كمان باست ليهو راسو وحضنها وهو بعمل بيدو كدا👋🏻
الفنان: ي احمد تسلم لي وين وين
احمد بشر ليهم ونسرين فكككت الزغروتة "حقها يخواني🙂👋🏻"… .
فاصل عشان الناس تتعشي "اهم شي😁" يلا اثناء م هم بتعشو ياسر تلفونو دقا ردا وكانت اسيل
ياسر: ألو
اسيل: ياسر دقيت ليك 6 مكالمات مالك م بترد
ياسر: في الحفلة ح اسمعو كيف؟
اسيل: م حنك اطلع لي انا برا
ياسر: برا وين؟؟؟؟!!
اسيل: جنب الصالة
ياسر: برضو عملتي الفي راسك؟
اسيل: ح تطلع تدخلني ولا ادخل براي؟
ياسر: خلاص طالع
ووقف علي حيلو
امجد: علي وين؟
ياسر اتنهد وهو بدخل التلفون في جيبو
امجد عقد حواجبو: في شنو؟
ياسر: اسيل جات برا وعايزاني اطلع ليها
امجد وقف وهو بمسح يدينو بالمنديل: انا بطلع ليها
ياسر: انت جنيت؟ودانة؟
امجد: اسيل دي حبيبتي ولا حبيبتك؟
ياسر: لا حبيبتي لا حبيبتك اسيل صحبتنا الاتنين
امجد: اقعد اقعد وبطل نقة
ياسر: اقيف امشي معاك
امجد لزاهو براحة كدا: م تجي معاي
واتجه علي باب الصالة..
دانة كانت قاعدة بين امها ومره عمها"زينب"ومراقبة امجد وصحبو بعيونها.. دانة جوا نفسها: ي ربي في شنو؟ وصحبو دا مالو قالب وشو كدا؟
ياسر اتنهد وقعد وهو بستغفر ..دانة عقدت حواجبها وهي بتحاول تتذكر شافت صاحب امجد دا وين؟… في دا الحفلة بدت والناس بدو يمشو علي الدايرة نسرين جاتها: دندون يلا
دانة: طيب بجي وراك
نسرين ساقت وعد وألين وران ومشت دانة رجعت تعاين للبوابة ومنتظرة امجد يجي داخل سﻻلت روحها معقول يكون مشا؟!…
برا الصالة… امجد متكل علي العربية واسيل واقفة جنبو
اسيل: هسي حصل شنو ل دا كلو؟ممكن افهم؟
امجد كورك: حصل اني قلتا ليك م تجي وجيتي من غير علمي
اسيل عيونها اتملو دموع ليهو اكتر من 10 دقايق بكورك فيها قالت بصوت باكي: ارجع؟
امجد عاين ليها بخلعة م اتخيل انها تبكي غمض عيونو واتنهد وهو بفكر معقول ارجعها بعد م جات؟
امجد بصوت هادي: لا م ترجعي ..معقول ارجعك بعد م جيتي؟
اسيل نزلت راسها وهي بتبكي
امجد قرب عليها خطوة وقال: اسيل ياخ م تبكي انا كوركتا فيك عشان جيتي من غير علمي
مسح ليها دموعها وقال: يلا ندخل
اسيل بتمسح في دموعها: م زعلان؟
امجد ابتسم بشفقة عليها حتي وهو مزعلها ومبكيها شايلة هم زعلو همس ليها: لا م زعلان
عاينت ليهو مساافة
امجد: يلا
شالت تلفونها من كبوت العربية ..امجد اتقدم بخطواتو اسيل مسكتو اتفلت عليها
اسيل وهي بترجع شعرها ورا اضانها: رايك شنو في الفستان؟
امجد ابتسم وهو بطلع ليها شعرها من ورا اضانها:حلو شديد
ابتسمت بخجل ومشت معاهو ويدها في يدو…
جوا الصالة دانة كانت مشت الدايرة بعد م انتظرتو كتير +البنات نادها كتير عشان تجي ترقص…
دخلو وقعدو في اول تربيزث لاقتهم ،اسيل استغربت وقالت: ح نقعد هنا؟؟
امجد: اي
اسيل بتردد لأنها شايفة مزاجو قالب: م ح اسلم علي خالتو زينب والباقين؟
امجد: ح تسلمي عليهم ي اسيل بس اتعشي اول
اسيل: لا لا م عايزة والله
امجد وقف: طيب اجيب ليك بارد واجي
ومشا…
اما الباقين فكانو مهججين وم جايبين ليهم خبر ..ياسر شافهم وجا سلم علي اسيل وقعد معاها وخاتي فكرة انو يقول ليهم دي حبيبتي انا.. امجد جا وادا اسيل باردها وقعد اتونسو شوية كدا بعدها اسيل هاجت مع الحفلة
اسيل: انا ماشة ارقص
ياسر: ترقصي وين دا عرس ابوك؟
اسيل: وانت مالك.. امجد ارح نرقص
امجد: مصدع والله ي اسيل
اسيل:جد؟طيب اسلم علي خالتو ونرجع
امجد: م ينفع ارجع م ظريفة المهم بقو قاعدين لحدي ما الحفلة انتهت ..فجأة الشباب طبو عليهم
ألين: اسييلووو ازيك؟
امجد رفع راسو وعاين لقى دانة م معاهم
اسيل: سلمت عليهم، امجد: اسيل ي جامعة وي اسيل دا فهد ود عتمي الكانو في دبي
اسيل: اهلييين
فهد: ي هلا بيك
امجد: ودي وعد بت عمي
اسيل سلمت علي وعد
امجد: والباقين طبعا بتعرفيهم
اسيل: اكيييد وخصوصا ألين وران المجنونات ديل
عاينت لرامي: رامي الف مبروك كمان
رامي: الله يبارك فيك وعقبالك كدا
اسيل عاينت لامجد وقالت: اللهم امييين.. نسرين كيفك؟
نسرين: تمااام حمدلله وانتي؟مالك اختفيتي كدا؟
اسيل: والله تقولي شنو بس؟
فهد لأمجد: احم ..بالنسبة لأنك م وريتنا اسيل دي موقفها شنو بالضبط كدا
وغمز ليهو
اسيل بكل جرأة: انا حبيبتو
ياسر حاول يصلح عشان عارف الكلام دا ح يصل لدانة دا لو م جات وشافتهم هسي ،ياسر: اي نحنا اصحاب التلاتة من اولي اساس
اسيل: وقبل 4 سنة كدا ارتبطنا انا وامجد
فهد: والله ما شاءالله ربنا يخليكم لبعض
اسيل: امييين
ران: هسي عليك الله مستحملة امجد دا كيف بنفسنتو دي؟
وعد: ي بت دي حبيبتو اكيد م ح يتنفسن عليها
اسيل: والله قعد يتنفسن نفسنة شديد
امجد يداب فتح خشمو:بحقي
ألين: اي بحقو اخوي المفتري دا..
وضحكو وفي نص ضحكتهم سمعو صوت انثوي وراهم بقول: سلام عليكم
اتلفتو لقوها دانة بتعاين لاسيل وهي عاقدة حواجبها شافتها في حتة بس م قادرة تستحضر الملامح دي اصلا م غريبة عليها… كلهم ردو السلام
دانة مدت يدها لأسيل وهي بتقول: كيفك تمام؟
اسيل سلمت عليها: تمااام والله
ياسر بلع ريقو وهو بعاين لامجد البعاين لدانة
ألين نطت: اسيل دي دانة بت عمتي اخت فهد و ي دانة دي اسيل…
اسيل قاطعتها: حبيبة امجد
ومسكت يدو دانة نفسها قطع بالكلمة دي عقدت حواجبها وعاينت لأمجد بقى يعاين ليها وم قادر يقول حاجة
ران ضحكت: اسيل انتي خطيرة والله
الكل ضحك ودانة لسا بتعاين لامجد وامجد نفس الشي
اسيل: ليه عشان مسكت يدو؟..اتلصقت فيهو زيادة وقالت بدلع: حبيبي ي ناس وانا حرة فيهو
دانة عيونها اتملو دموع
ياسر: اسيل استكيني
الكل ضحك عدا امجد ودانة كان بعاين لدانة وهو بردد جواهو: م تبكي عليك الله م تبكي
وهي بتعاين ليهو كأنها بتقول ليهو قول انها ن حبيبتك… دانة رفعت عيونها للفوق عشان دموعها م ينزلو وقالت بصوت مخنوق: فهد ماما بتناديك
وادتهم ضهرها ومشت من غير م تتكلم انفاسها مضطربة وماسكة روحها بالعافية عشان م تبكي
فهد: جد؟ اتلفت علي اسيل:يلا ي اسيل فرصة سعيدة
اسيل: انا اسعد
ومشا ورا دانة مشا لامو وقالت ليهو يوديهم البيت عشان حجة عواطف القعدة طالت عليها ..بجاي اسيل ودعتهم وطلعت مع ياسر، والباقين كل زول مشا يشوف بيتو بوين…..
امجد واقف مكانو م اتحرك عارف انو دانة ح تكون حالتها صعبة فتش عليها بعيونو م لقاها عرف انها طلعت……
نزلت من عربية اخوها بسرعة بعد م وقفت قدام فلة عمها واتجهت علي جناح شهد ..دقت الباب
شهد فتحت ليها: دندون… اها الحفلة كانت كيف؟
دانة دخلت من غير م ترد وقفت في نص الصالة وبدت تبكي واطلقت العنان لشهقاتها
شهد اتخلعت وجات عليها:بسم الله ي بت مالك؟
دانة: جاابها ي شهد جاابها…امجد جاب حبيبتو الليلة
شهد عاينت ليها بصدمة وهي م عارفه تقول شنو
دانة قعدت في الارض:حيوان متخلف غبي...انا قلتا ليك م عايزة امشي الحفلة ..ي ريتني م مشيت.. ي ريتني متت قبل اشوفها معاهو وماسكة يدو الحقيرة السافلة
شهد حضنتها من غير م تتكلم ..
في النفس الفلة جنب البوابة موقف عربيتو وهي راكبة جنبو
احمد: برضو م عايزة تتكلمي؟
نسرين ضحكت: احمد؟ اتكلم اقول شنو؟
احمد: تقولي الحاجة المضايقاك والغيرتك اليومين دي
نسرين ابتسمت: حبيبي بس عشان تعب العرس وكدا صدقني مف حاجة
عاين ليها وم ردا
حاوطت وشو بيدينها: تمام؟
احمد اتنهد: مع انو م مصدقك بس تمام
نسرين: انزل خلاص؟
ضحك م بقدر يزعل منها:انزلي اي
قرب منها باسها في راسها وهمس ليها: عارفة اني بحبك و ح احميك واسعدك طول حياتي؟
"وحي انا عايزة احمد😔"
نسرين ابتسمت: عارفة
احمد: يلا انكشحي
نسرين حضنتو سرعة وفكتو: يلا
ونزلت عاين ليها لحدي ما وصلت البوابة اتلفتت عليهو رسلت ليهو بوسة في الهوا لوح ليها بيدو ودخلت وهو اتحرك بالعربية… .
في حتة تانية
في عربية ياسر..اسيل: ياسر هسي انا عملت شنو عشان تجوط كدا؟
ياسر وقف العربية قدام بيت ناس اسيل وقال: اسيل الله يرضي عليك انزلي
اسيل: اوكيه بس انت واحد منفسن
ياسر: اتخارجي
نزلت وهو اتحرك….
في حتة تانية.. ألين وران راقدين في جناح ران وبتكلمو
ألين: واااي انا منو
ران: واي انا منك انتي ياخ نومي
ألين: اوكيه اوكيه
ورقدت وهي بتفكر فيهو وبتتخيل كلامو وضحكتو…
في حتة تانية.. قاعد في كبوت عربيتو ومتضايق عارف انو روحها ح تكون بتطلع في اللحظة دي اكيد من رجعت بتبكي واكيد انجرحت من شوفتو مع بت غيرها غمض عيونو وضغط علي اسنانو… رفع تلفونو بتردد شال نفسو واتشجع دقا ليها وبقى منتظر الرد.. اما هي فكانت قاعدة في الارض وضامة ركبها لصدرها تلفونها دقا م اشتغلت بيهو جاتها شهد: دندون كفاية بكى م تعملي في نفسك كدا دانة: حبيبتو ي شهد انتي م شفتيها كانت ماسكة يدو كيف وهو واقف زي الغبي جنبها
شهد: دانة م عارفة اقول ليك شنو بس عليك الله وقفي بكا
دانة: م قادرة ي شهد م قادرة
عاين للتلفون "لا يوجد رد" اتنهد وهو بعيد المكالمة مستحيل يخليها بتبكي دي دندونتو
شهد عاينت للتلفون وقالت:دا امجد البدق بس انا شايفة انو م تردي.. ابعدي عنو كفاية العملو
دانة خطفت منها التلفون وردت
امجد اول ما الخط فتح وقف علي حيلو واتسارعت دقات قلبو وهو سامع صوت بكاها
دانة انتظرتو يتكلم وم اتكلم، دانة: امجد
امجد: عيون امجد
دانة اتفقعت بالبكا وهو غمض عيونو بألم
دانة: عارف انك واحد حيوان؟وغبي وم بتحس؟ جايب لي حبيبتك ي امجد عايزني اعمل شنو يعني عايز تثبت لي انك م شغال بي وكملتا حياتك من غيري؟
امجد بلع ريقو: لا
دانة ببكي: حرام عليك ي امجد والله حرام عليك
امجد: وانتي م حرام عليك؟ لمن زمان كنت بحنسك زي الاهبل عشان تفهميني المزعلك شنو وابيتي؟ لمن اترجيتك اني م بقدر اعيش من غيرك وم تخليني وخليتيني؟
دانة: خليتك لسبب ي امجد
امجد كورك: سببك شنو؟سمعتي كلام عني وحكمتي علي من غير م تسأليني؟
دانة بتبكي: خت نفسك مكاني كنت حتتصرف كيف؟
امجد كمل كأنو م سمعها:وبعد ما عرفتي اني مظلوم وانك المفروض تعتذري م اعتذرتي وكبريائك م سمح ليك انك تتراجعي عن موقفك خمسة سنة كل يوم كنت بموت ألف موتة
دانة بتبكي: وانا كمان كنت بموت مفتكر انو الموضوع ساهل علي اني ابعد عن.. عن.. عن حب حياتي؟
امجد غمض عيونو وهي بكت بحرقة بعد الكلمة دي
دانة: خمسة سنة شوق وتأنيب ضمير واحساس بالذنب خمسة سنة
امجد: طيب ليه م رجعتي؟لمن عرفتي انك غلطانة وانو البت كذبت عليك كنتي ترفعي سماعة التلفون وتقولي انك اسفة ..كلمتين بس لو كنت سمعتهم منك كنت نسيت كل الحصل ..بس انا اسفة ي امجد
دانة بتبكي: انا اسفة.. اسفة ي امجد
امجد اتنهد وم ردا
دانة كوركت: اكيد م ح ترجع وتنسي الحصل.. غرورك م ح يسمح ليك صح؟ غرورك ح يمنعك انك تعترف انك لسا بتحبني وم قادر تعيش من غيري
امجد ابتسم بسخرية: نفس الغرور المنعك قبل 5 سنة من انك تسمعيني وتديني فرصة ابرر صح؟
دانة كوركت: امجد الموضوع م كان متحمل تبرير الموضوع كان محسوم امجد كورك اكتر منها:والحسمو منو؟ حسمتو صورة غبية اخدوها لي وانا م منتبه؟
دانة بتبكي: امجد خت نفسك مكاني
امجد: انتي الختي نفسك مكاني لو عاقبتك 5 سنة علي ذنب انتي م عملتيهو لو اتخليت عنك فجأة وكسرت قلبك حتقدري تسامحيني؟
دانة: انا كمان قلبي كان مكسور واكتر منك بعد
امجد كورك: كسرتيهو براك
دانة بتبكي: طيب وانا هسي قلبي مكسور وكسرتو لي انت المرة دي.. بالزفتة الجايبها معاك دي
امجد بحدة: اسمها اسيل
دانة كوركت: م بهمني زفتة وطول عمرها حتفضل زفتة
امجد كورك: دانة اسيل دي اكتر وحدة وقفت معاي في الوقت الانتي خليتيني فيهو دانة بكت: م خليتك بيدي ي امجد ليه م عايل تفهم وتحس بي
امجد ببرود: يمكن لأنك م حسيتي بي ..عايني مهما اتناقشنا في الموضوع دا م ح نصل ل حل
دانة بتبكي: طول ما انت مقدم غرورك علي مشاعرم نحنا م ح نصل ل حل
امجد كورك: انا م مقدم غروري علي مشاعري بس انا تاني صعب اثق فيك ..بعمليتك ديك كسرتي ثقتي
دانة بتبكي:وانت الليلة بعمليتك دي كسرت ثقتي فيك
امجد ببرود: تمام كدا نحنا متعادلين
دانة سكتت مسافة بعدها قالت: عمرك م ح تخلي افتراك وبرودك دا.. حرام عليك نفسك وحرام عليك قلبي المعذب بين يدينك دا
وقفلت الخط جدعت التفلون وهي بتردد: حيوان حيوان مفتري وبارد
شهد جات عليها حضنتها
في جانب امجد ضرب بيدينو كبوت العربية ونفسو قايم من الزعل امجد:اففففففففف.. ي رب الطف بحالي
دانة وهي في حضن شهد رفعت عيونها: آآآآه ..ي رب الطف بحالي
امجد شوية كدا ورجع بيتهم ودانة اصرت علي شهد الا تمشي تنوم عشان بكرة عرسها وكدا وفعلا شهد بعد اطمنت عليها مشت نامت دانة جرجرت كرعينها وطلعت البلكونة قعدت في الارض وضمت ركبها لصدرها وهي بتبكي كأنها الليلة انفصلت عن امجد..بتحبو وبحبها بس الكبرياء وقف بينهم زمان وهسي واقف ..زمان لو م كبريائها كانت رجعت اعتذرت منو وم كان وصلو لهنا وهسي هو لو م غرورو وافتراهو كان سامحها وبرضو م كان وصلو لهنا….ولكن! ما ذنب الحب عندما يقع قتيلا بين رجل مغرور وامرأة ذات كبرياء…
سوري علي الاخطاء الاملائية😴🖤
#يُتبع…
mosha🌸✨