جذبني فمك البني

البارت الاربعون

عدنا والعود احمد
البارت اليوم كلش مهم لتفوتون منه اي كلمه لان كلها تاخذكم للحاضر
متابعه ممتعه

ادهم

انه شفت وعفت وبكلشي عندي اشباع
بس بحضنج اوكع جني ما شايف

رجيجة رويحتي وطاريها رايد حيل

يا ليت العناق يرسل

____________

مرحبا اني سيلين صح طلعت من هذا البيت وصارت الي حياة جديده وخاصه بس راح اكون الشاهد الاول بهاي القصه واني راح احجيها الكم بتفاصليها المهمه والصغيره. ..

راح اخذكم بجوله نتفرج اني وياكم على المشاهد الكاعد تنحاك خلف الكواليس او بالاصح خلف جدار بيت حجي يوسف نريد نعرف عمق العلاقات بهذا البيت ومدى صحة ترابط هذه العائلة ،

دائما من نكون بداخل الصورة راح نشوفها حلوة لكن لو ابتعدنا راح نلكه الاختلاف وربما راح نشوف مساوء هذه الصورة ...

اترك بيتي وحياتي الجديده ربما اعرضها عليكم فيما بعد لكن بشكل مختصر ونروح للأهم نريد نكشف اللعبه ونريد نعرف محاورها ومجريات الامور...

راح ندخل كلنا للبيت واني من ضمنكم يعني نباوع بس همه ميشوفونه ....

اشرح الاحداث حسب ما وصلتني فيما بعد يعني روحي راح تدخل وتصورلكم حدث بحدثه يله تعالو ويايه..

فتحنا الباب الخارجي ودخلنه البيت هدووووء وبس صوت الصراصر وصداها المزعج دخلت فتحت باب المطبخ وتجولت بلبيت ،

هاي غرفه ايمن مسدود الباب وهاي غرفه فهد تصدر منها موسيقى صاخبه تعبر عن شخصيته الجنونيه تعالوا نصعد الدرج سويه ولتسوون صوت لان عمو ينام بهيج وقت،

وصلت لغرفته لكيت الباب شويه مفتوح
باوعت الغرفه ظلمه ويصدر منها انين لا يعلمه الا الله مع كوب شاي ساخن وعلبه سجائر ومنديل مبلل بدموع رجل حارقه ،

هدوء وانفاس متسارعه مختلطه مع مشاعر محترقه لتخرج بصوره تذكاريه لامرأة مرسومه من دم ومشاعر واحاسيس لرجل احبها من الاعماق لكن حبه كان من طرف واحد.

ضليت واكفه اباوع عليه رحت اني وطيفي حضنته جان تعبااااااان وشبه منهار بيده الموبايل ويتفرج بصوري مال الحنه تفاجأت واستغربت شجابهن يمه بس الصار تذكرت الرساله الوصلتني منه بليله زواجي ،

جانت رساله مبطنه ظاهرها مشاعر ابويه اما داخلها عميق بعمق مشاعر هذا العاشق مضمون الرساله يكول ___
اذا جنتي تريدين تعرفين رأيي بجمالج البارحه ف اكلج كنتي فاتنه لحد قطع النفس اما اذا جانت نيتج تحركين كلبي ف اكلج حركتيه ،

البيت اظلم بلياج وموحش وابد محلو ، انتي خلقتي ازمه بداخلي وفوضه مستحيل بيوم راح تفض وتترتب ،

انتي خربطتي حياتي كلها مو فقط مشاعري ، حلوة لعبه حرب المشاعر اذا جانت متكافئة بين الاطراف بس لعبتي ويايه وانه جنت خسران من اولها ..

بوقتها حرت اني مدزيتله صور شكاعد يحجي ومنين جاب صوري وليش يكول تريدين تحركين دمي زين اني بأي حق ادزله صوري ردت اعاتبه وحبيت احجي وياه واكله منيلك هاي الصور منين اجتك ، بس الصار_________

المهم طلعت من يمه ورحت لغرفه اختي ، انقهرت منها لكيتها سهرانه على الموبايل وتراسل باوعت تراسل بنيه ماعرفها يعني اختي بلشت تسوي علاقات خارجيه طلعت اني منا اخذت راحتها منا...

عفتها ورحت على مريم جانت نايمه مثل الملاك بوستها ونزلت رجعت لبيتي الجديد ، ما اريد افتح هذا الملف واحجي بيه اله لدكتوري النفسي احجيله ونسمع سوه الصار...

كعد عمو الصبح كالعاده راح للحمام غسل وطلع راح للمطبخ خله القوري على النار وصفنه تاخذه والثانيه ترجعه بالضبط مثل موجات البحر هيه تلعب بيه رغم البحر شكد كبير وعميق بس من تجي الموجه تخضه خض او بالاصح تغير ملامحه الهادئه هذا البحر العميق تجي روجه وتهزه هز ،
عمو نفس الشي عمو البحر او المحيط واني الموجه اللي اجيت لحياته وهزيته ، خربت راحته وغيرت نظامه....

واكف بصعوبه وكل شويه ينتجي بمكان حسيته رجل عمره بالسبعين ....

عمو كبر فجأه من بعد وفاه عمه وفراقي جان المرض اللي يجي بعد الكبر يعني هنا الشفاء يكون صعب وربما مستحيل  شبهته بخلايا الدماغ  بعمر السبعين سنه من تتلف ابد ما راح ترجع طبيعيه لو اجتمعوا  اطباء العالم مع علاجاتهم وذكائهم ....

شرب جاي ويه الجكاره ، وكفت ايفين باب المطبخ جانت جدا متعاطفه وياه وهذا الحديث الدار بينهم.

ايفين : صباح الخير عمو..

رفع راسه وباوعلها دنك وهز راسه يعني زين..

ايفين : اسويلك ريوك..

ادهم : لا شكرا..

عافها وكام راح للغرفه نزلت ايفين تدور على ايمن وتلاكت ويه فهد على الدرج جان صاعد وهيه تريد تنزل باوعلها بنفس نضرة الغضب مالته وكأنما عنده ثار وياها شنو السبب منعرف الله وحده اعلم بالخفايا وخصوصا ما يضمره البشر خلف جدران من العظام والدم واللحم يعني بالقلب والعقل ، تدفن غرائب البشر وتكمن الشيطنه البشريه....

صعد وهيه نزلت بس اختي اخ يا اختي متتعض وخلت راسها براس الفهد وحبت تعرف شنو وراه ودائما اهلنا قبل يكولون لا تفتح عليك ابواب انت مو كدها لان بفتحتها راح تبخ عليك نار جهنم من حممها البركانيه لهذا ضل بعيد وسعيد واتفرج ....

صعدت وراه وتريد تسمع ، هو فات لغرفه ادهم وهيه تلصلصت تسترق السمع منهم ....

فهد : صعبه مو بله ؟

ادهم : اطلع بره.

فهد : شكال كلبك من زفيتها بيدي.

ادهم : مقصرت عبالك عرس ابوك هلكد فرحان بجرح اخوك متصورتك هيج نذل..

فهد : هههههههه بس شكد حلوة طالعه بنت الذين اكيد البارحه لعب لعب سامر.

ادهم : لتحاول تستفزني بسلوبك الرخيص انزل واحترم نفسك..

فهد : انه فكرت تتزوجها وتضوك طعمها وبعدين اسحبها منك بس كلت لا اخليك بحسره البني وهيج راح تتأذه اكثر لان اكو قبلك شخص راح يستلذ بطعمها ويتغزل بيها ويتفنن برسم ملامح حبه على جسمها..

ادهم : اطلع بره كتلك ..

فهد : ممممم بس تره وكفتك براس الشارع ابد مو حلوه يعني فكرت لو انت جاي واكف ومسلمها لصديقك افضل هو سأل عليك ليش تخليه يشك بينكم علاقه.

هنا ادهم كاعد يبدي يفقد تركيزه خله ايده على عينه وفركها مرورا بوجها جر نفس وتمدد على الجربايه السمعه هووواي كأنما ملح ورشه على جروحه فهد  جان ظالم بهذا موقفه ...

كمل كلام وبخفيه طلع من الغرفه ويشوف ايفين واكفه تتسنط هنا ابتسم الها ابتسامه من وصفتها الي حسيت يكللها جاي دورج اصبري خلاها تنرعب با ابتسامته ، مرات الضحكه تكون اخطر ومرعبه اكثر من الكلام او الفعل لان تختبئ خلفها سحاب من المخاطر ....

نزل وهيه راحت يم مريم كعدتها وراحت سوت ريوك وتريكو سوه....

راح اتركم ويه ايفين تكمل باقي يومها واني ارجعلكم بعدين..

بعد مرور شهر على زواج سيلين.....

ايفين : يلا مرايم كملتي علمود ننظف اني وياج..

مريم : لا بعدني جوعانه.

ايفين : مو بابا كال بس صمونه مناكل ثنين.

مريم : ما اكدر اجوووع عفيه بس نص وحده.

ايفين : يخرب نظامج الغذائي وتتأذين سوي الريوك ٣ اقسام كل شويه اكلي شي مثل ما بابا علمج وبين قسم وقسم اتحركي علمود ينهضم الاكل.

مريم : داعوف الاكل وما كاعد اضعف.

ايفين : تضعفين صدكيني وتصيرين حلوه وماضل شي على المدارس وتشترين صدريه جديده وحلوه

مريم : ايييي وانتي وسيلي تجون ويانه نشتري.

ايفين : ههههه شو سيلي.

مريم : هذا بابا يصيحلها سيلي...

جريت حسره وكتلها

ايفين : ليش بابا يسولفلج عليها.

هزت راسها بأي وكالت.

مريم : قبل جان يشوفني صوره ماما هواي ونبجي عليها اني وياه هسه يشوفني صوره ماما وسيلين ويكلي هاي من ضمن خسائرنه اني وياج وشكد بعد راح نخسر مندري....

ايفين : زين انتي شلون تعرفين هيج تحجين وشنو بابا يكول تحفضين مو صعبه عليج.

مريم : لا مو صعبه بابا كل يوم يحجي ويايه ساعه اكثر.

ايفين :ممممم حلو

مريم : اي

ايفين : هم تضوجين مرات

مريم : ليش ؟

ايفين: لان بابا هواي يعلمج شغلات واني ادري بيج تحبين اللعب.

مريم : لا ماضوج احب سوالف بابا ميضوجني من يحجي..

ايفين : شكد حلو فدوه الله يحفظكم

مريم : شكرا

وره شويه دخل عمو كال..

ادهم : ايمن منتضرج جوه .

ايفين : اي خابرني هسه راح انزل.

ادهم : اختج مخابرت.

جريت نفس قوي وكتله.

ايفين : لا متصلت خاف بيها شي لوصاير شي لان مستحيل تكطع هلكد ومتسأل علينه..

ادهم : مابيها شي كل عقلج تغيب شهر واضل ساكت.

ايفين: شنو خابرت سامر.

ادهم : لا

ايفين : لعد شلون عرفت بخير

ادهم : عرفت ..

ايفين : تمام براحتك..

ادهم : استعجلي لتخليه ينتظر اكثر.

هزبت راسي ورحت للغرفه بدلت ونزلت اول ما فتحت باب الشارع ضحك اني هم ضحكت..

ايفين : صباح الخير.

حجيتها وصعدت السياره

ايمن: صباح النور والعافيه لعروستي افونتي حبيبتي الحلوه..

ايفين : هاااي شنو سطرتهن كلهن سوه على كيفك شخليت للعرس.

ايمن : اخ عندي شمدريج شعندي وشضاملج.

ايفين : ممممم شو بس حجي كلشي مشفت.

التفت عليه باهت دار وجها باوع ليكدام وضحك.

ايفين : شكو تضحك.

ايمن : شتريدين تشوفين يعني ههههههه.

ايفين : مو البالك يرحم اهلك قصدي تشتريلي تدللني ، توديني لمطعم تفرني وما اكعد بلبيت ابد..

ايمن : هااا عبالي

ايفين : ايييي ، المهم هسه معلينه عمو شوكت ناوي يصحى من السبات مو كافي صارله شهر حزين ..

ايمن : غير اختج كسرته ليش هيه هينه عبالج لو انه بمكانه اطك واموت ما اتحمل.

ايفين : ممممم يعني هيج تحبني مثل حب عمو لسيلين.

ايمن : سألي عن اهل الجنوب من يحبون شلون يحبون بخبال وبعدين نسولف.

ايفين : ادري ادري بدون متحجي..

بعدين ضحك..

ايفين : شكو ؟

ايمن : باعي شمكتوب على هذا التكسي.

قريته ضحكت

امسح مكياج صاحبتك يطلع جبار ابن عمتك

ايفين : شنو قصدك اني وين اخلي مكياج الحمدلله انت شايفني بالحقيقه..

ايمن : اي مخبله وشايف كل خبالج ورغم هذا رايدج وقانع بنعمتي هههه

ضحكت بعدين كتله.

ايفين :  اريد اكلك شغله وخاف تضوج مني.

ايمن : كولي اكيد جفصه من جفصاتج.

ايفين : هههه لا بس جنت طالعه من غرفتي وسمعت فهد يكول لعمو ادهم _______ وحجيتله السالفه ، طبك السياره والتفت عليه عاكد حاجبه ويريد ياكلني.

ايمن : صدك تحجين ؟

ايفين : شكو؟

ايمن : شافج فهد لو لا ايفين..

ايفين : لا مشافني.

ايمن : متأكده احجي.

ايفين : ايدي شبيك يمعود ليش هيج ..

ايمن : انتي ليش تريدين ينتبهلج كوه لج بابا هذا اذا خلاج براسه لا توكف بعينه خوه ولا قنا____انتي ليش تعاندين.

ايفين : مسويت شي والله هو صدفه صارت.

كام يصيح.

ايمن : ياصدفه هاي يا صدفه الخلتج تسمعين الحجي كله لج بابا ادهم بعقليته ورجال وهذا اخوه وحاير لج فهد فرنه فر ومكاعد نعرف بشنو يفكر لج فهد الهدوء اليسبق العاصفه وانتي راح تروحين بيها وكولي كال ايمن وساعتها فلا انقهر عليج يطبج طوووووووووووووب..

ايفين : شيسوي يعني قابل يضربني ميكدر.

ضحك مستهزء...

ايمن : انتي لو تعرفيه جان بوجهة مباوعتي مو توكفين وتتسنطين على كلامه سمعي لج وهاي اخر مره احذرج اذا شفت لو سمعت من قريب لو من بعيد الج علاقه بأي شي يخص فهد اعوفج وانسي بيوم تعرفتي على شخص اسمه ايمن وضلي وحدج خيطي وخربطي..

ايفين : ميكدر يسويلي شي اذا اني مرتك..

ايمن : شوف شوف الثقه يعني واذا مرتي تكعدين تتسنطين على اخوتي والله من وره هاي سالفتج اله أأجل العرس لان انتي مو مال واحد يتورط بيج عبالي صدك تغيرتي بس مادام متسمعين كلامي وتسوين اللي براسج ضلي هيج..

ايفين : صدك تحجي.

ايمن : اي انه ما احب التطفل مالتج ولا احب مرتي يكولون عليها تتسمع للكلام شنو يكون موقفي اذا واحد من اخواني شافج ويجي يعاتبني غير اموتج بوكتها.

ايفين : هذا هو كتلك ماعيدها.

ايمن : كم مره كلتي ماعيدها كم مره خطأتي ونصحت وكم مره عبرت بس انتي تماديتي هوووواي..

ايفين : عليك الله لتزعل مني هاي عندي طبيعه من اني وصغيره..

قاطعني وعاط..

ايمن : بس كبرتي كبرتي جنتي صغيره محد علمج هسه انه وادهم وسيلين كلنه نعلم بيج وماكو فايده شلون بيج فهميني شلووون..

ايفين : كتلك اسفه..

صار عصبي وضرب ايد بأيد.

ايمن : اكلها اخويه واعرفه لتندكين بيه لتحفرين وراه اذا هانج شتسوالج وفضولج بيش يفيدج اريد افهم نزلي يلا ماروح ..

فر السياره ورجع للبيت..

وهنا اختي انقهرت من ايمن بس اني اشوف تصرفه صحيح وهيه غلط شكد نصحتها وميفيد بيها ....

نزلت من السياره دخلت للمطبخ شافتني ام ادهم...

ايفين : صباح الخير

فردوس : صباح النور ها وين؟

ايفين: ويه ايمن على اساس نروح نشوف غرفه وصارت عنده شغله واجلناها..

فردوس: يا غرفه انتي كل عقلج ازوجج لابني ..

ايفين : ليش شبيه واحنه متفقين

فردوس : ويه منو متفقه ويه منو ، انه ياسه لا وراها ولا كدامها استحيفت بيها ادهم تريدين اخذكم لولدي والمن اخذج لايمن روحي صعدي فوك وممنوع تختلطين ويه ايمن ..

صدمتني مكدرت اجاوبها ضليت بس اباوع وهيه تحجي ردت اصعد سمعتها تدردم...

فردوس: اختج وخلصنه منها انتي هم تلحكيها مضل شي.

التفتت عليها وكتلها..

ايفين : شنو قصدج غير افهم..

فردوس : ماكو داعي تفهمين..

صعدت وحايره شلون وشنو اسوي ابلغ عمو لو اخابر سيلين بس شلون احصلها ورقمها مغلق لازم اخابر سامر بس ماعندي رقمه اله اخذه من عمو رحت دكيت الباب صاح تعاي دخلت ...

ايفين : عمو اريد اخابر سيلين شلون؟

ادهم : وشلون تخابريها ؟

ايفين : اتصل على سامر واطلب منه احجي وياها.

ادهم : وليش هيه متطلب من سامر يجيبها لهنا لو يخيلها تتصل بأختها ..

ايفين : ماعرف اكيد عدها سبب مقنع خاف هو ميقبل.

ادهم : ماعرف شنو من كلب عليها لا سألت عليج لا على مريم يعني هيج نستنه بسرعه وهاي صار شهر ...

ايفين : عمو خلينه نروحلها لو انت وديني.

ادهم : لا

ايفين : ليش ؟

ادهم : بدون ليش اذا تريد هيه تجي.

ايفين : خاف مريضه لو بيها شي.

ادهم : لا مريضه ولا بيها شي كلش زينه ومتونسه  اختج عاشت حياتها لكت الراحه بعيد عنه..

يحجي بحركه كلب حتى دمراته برزت..

ايفين : عمو على كيفك هسه راسك يكوم يوجعك.

ادهم : ليش شنو ضل بيه صاحي..

ايفين : هيج تحبها؟

خله ايده على الميز ونام عليها شلون من جنه صغار ونام على الرحله همس بصوت تعبان.

ادهم : مريم تعلقت بيها هووواي وكل يوم تسألني عنها وحاير شنو اكللها..

ايفين : بس اني موجوده يعني احسها تقبلت الوضع..

رفع راسه باوعلي ورجع نام غمض عينه وكال.

ادهم : انتي شمدريج تقبلت تره تمثل بنتي واعرفها.

ايفين : احتمال صح مادري بعد المهم اخذ راحتك..

طلعت وسديت الباب رحت خابرت ايمن مجاوبني دزيتله مسج ..

تعال الله عليك اريد احجي وياك بخصوص عمو راح اموت قهر كل يوم اشوفه يذبل اكثر من اليوم القبله تعال لخاطري اصعد فوك منتضرتك..

مجاوبني نزعت ملابسي ورحت للمطبخ علمود اسوي غده بلشت اسوي وره شويه سمعت حركه ورايه بدون ما اندار كتله.

ايفين : ادري بيك متكدر على زعلي ...

تقرب صار ورايه كلش قريب عليه رفع طرف حجابي وقرب وجها شمني من ركبتي ، تفاجأت ونفس الوقت مصدومه معقوله ايمن بهذا المستوى من التفت انصدم بفهد واكف ..

نزلت حجابي ونترت بيه.

ايفين : انت شكد متستحي..

فهد : تعرفين بالكيمونه احلا من دشداشه الرقص الشفتج بيها..

ايفين: ياكيمونه انت شدتحجي.

فهد : هممممم الكيمونه السوده ، اخ الله من لبس السواد سبي العباد.

نترت بيه.

ايفين : وخر من يمي انت صدك متستحي هسه اصيح عليك عمو..

رجع راسه ليوره وضحك بعدين كال.

فهد : ادهم هو وينه عمج عقله انضرب روحي كليله فهد معجب بفانيلتي هههههههههه اريد اشوف شنو يكلج..

ايفين : انت ليش هيج حاقد بس اريد افهم ..

تقرب مني وعوص تك عينه هاي الحركه كلش اخاف منها رجعت ليوره وهو يتقدم ركز بعيني واني زحت عنه ليغاد..

فهد : ليش تريدين تفهمين سولفيلي شنو تعرفين عني ومنو حجالج.

رفعت راسي وباوعتله..

ايفين : محد حجالي والله انت ليش متصدك.

فهد : راح احاول اصدك بمزاجي بس وداعت روايتي اذا سمعت لو حسيت بيج تتهامسين همس عني اشوفج شي بعمرج مشايفته واحسسج بأحاسيس بعمرج متتوقعين بيوم تحسيها..

ايفين : ماكو داعي تهددني واني كتلك بس ذيج المره وصارت بالغلط..

فهد : اريدج تسمعين كلامي دائما وتبقين حبابه تمام..

ايفين : انت مو وعدتني معليك بيه بعد ونسيت السالفه بعد شكو..

فهد : مانسيت وعدتج صح وانه عد وعدي بس من رجعتي تتسنطين خلفتي بالوعد وانه خلفت يعني هسه رجعتي مطلوبه الي من جديد ودينج هلمره ثكل....

ايفين : انت شو شايف نفسك..

فهد : فيفو انتي خلفتي بالاتفاق ليش تتسمعين على كلامنه مو عيب..

ايفين : فهد حباب عوفني بحالي ..

فهد : ههههههههههههه توسلي بعد توسلي ، انتي وين جنتي عني قبل شلون رحتي من بالي عاشت ايدج فتحتي عيني على هواي شغلات جانت بعيده عني..

ايفين : هسه شتريد.

فهد : هسه ماريد بس بعدين ممكن اريد شنو غداكم اليوم..

حجاها واخذ تفاحه من الثلاجه قضمها بطريقه مستفزه وضحكه شريره عاف باب الثلاجه مفتوح واشرلي عليه ..

فهد : سديه ...

طلع من المطبخ..

هنا ايقنت انو ايفين بخطر والفهد خلاها بحساباته يعني اختي هيه اللي نطته الفرصه يلعب بيها بس السؤال الاهم منين جاب صورها وبشنو هددها ويا اتفاق الخلفت بيه ؟؟؟؟

ومرت الايام وضع ادهم تعب ايفين على اعصابها كاعده يمهم وايمن مقاطعها والسؤال اللي ينطرح بأذهانهم سيلين وين وليش كطعت بينه هلكد ؟؟؟؟

مشت الايام واليوم اليه شهرين من تزوجت وكلبي نار عليهم لا اكدر اروح ولا اكدر اتصل...

اجه الدوام وهاي السنه راح اداوم وحدي بدون عمو ..

فعلا اشتاقيتله واشتاقيت لكعداتنه سويه بس كل يوم يعدي يبعدنه اكثر واكثر وصرت اخجل حتى احجي وياه لان شنو احجي وشنو اكول ....

داومت ورحنه اني وسامر سويه الوضع بيناتنه مشحون شويه توتر على مناوشات بالكلام ليش ماعرف المهم اني متأكده مو مني السبب..

وصلت للقاعه اخذت محاضراتي واتصل عليه سامر ..

سامر : ها سيلين كملتي.

سيلين : اي وانت ؟

سامر : ضلت محاضره وحده تجين يمي .

سيلين : وين ؟

سامر : بالقاعه كعدي.

سيلين : لا مالي خلك اختنكت من قاعتنه اريد اطلع بره اشتم هوى.

سامر : هااا من يمي تختنكين ..

سيلين : سامر رجعنه .

سامر : اخذي راحتج ..

حجاها ومأكد على اخر حجايه سكتت مجاوبته سده وراح طلعت من القسم مشيت للممر واشوف المنظر الكسر كلبي عمو واكف كبال البنايه مالتنه وعينه عليه شافني عكد حاجبه عيونه متروسه عتب واذا رحت يمه راح نضل نحجي ونتعاتب ويجي سامر واصيرلي مشلكه  حرت بين اروح او لا و هو ضل يباوعلي منتظرني دنكت ورجعت للقسم بس كلبي محروك وميته قهر ...

وره كم يوم الصبح جنه بالطريق رايحين للكليه
بعدين تغير مسارنه التفتت على سامر سألته.

سيلين : وين رايحين ؟

سامر : اليوم عدنه ندوة

سيلين : بخصوص ؟

سامر : اكيد بعلم النفس راح تنطرح عده مواضيع ونعالجها وكل دكتور اختار موضوع..

سيلين : انت شنو موضوعك اليوم..

سامر : حضرت بخصوص الشخصيات وشلون نكتشفها من همه وصغار.

سيلين : تمام .

وصلنه للمكان البيه تنعقد الندوه وكلبي كام يدك لان كل مره جنت اجي ويه عمو واكيد راح يكون موجود ويلقي محاضرته اول واحد لان شهادته يعتبروها لان داخل دورات هناك  ومطور روحه يعني مو بس شهاده واكتفى بيها لهذا تميز بينهم دخلنه وكعدنه ثاني سره ،

هواي دكاتره حاضرين بس عمو مشفته كعدنه ثاني سره على اليمين باوعت على مكانه وين ما جنه نكعد اخر سره ونضل نتناقش ونحلل بالحركات ، عمو اختص بلغه الجسد وعلم النفس التنموي اما سامر مختص بعلم النفس التربوي لهذا عمو يعرف هواي امور اكثر من سامر يمكن سابقه ب الف خطوه هاي من غير قرائته المستمره بلبيت سامر ميقره هواي يعني مكتفي بمعلوماته الدراسيه..

لهناك ودخل عمو مشى بهدوء ورزانه وصل للستيج خله جنطته على الميز والتفت علينه القى التحيه و السلام وبلش...

ادهم : دكاترتنا الاعزاء سعيد بحضوركم اليوم وانه ممتن مقدما لحسن الاستماع والانصات بكل ممنونيه لمحاضرتي اليوم اريد اسلط الضوء على موضوع جدآ مهم وهو كيف نعرف شخصيات اطفالنه وميولهم من الصغر او من مرحله المراهقه دائما تطرح عليه نفس الاسئله دكتور كيف اعرف ابني يتمتع بشخصيه نرجسيه او ساديه او مازوخية او السيكوباتيه وهاي من اخطر الشخصيات واصعبها بعلم النفس..

نجي شلون نعرف اولادنه يتمتعون بهذه الصفات وشلون اكدر اميزها عدهم من الصغر واكدر اعالجهم واتلافه المشكله قبل حدوثها ، كل الشخصيات اللي ذكرتها ممكن تتعالج بجلسات عد طبيب نفسي اما السيكوباتيه راح تكول فرصه علاجهم من ضعيفه الى معدومه ليش لان هذه الشخصيه تعتبر من اغرب واخطر الشخصيات اللي تمر علينه ويمكن اصعبهن..

اذا واجهنا شخصيه اجراميه او تتصف بالشر هذه هيه السيكوباتيه اللي تتعمد تلحق الاذى بالاخرين منها ممكن يكذب او يحتال عليهم او يتبع عوارتهم او التدخل الزائد فيما يخص الطرف الاخر ، هاي الشخصيه مصابه بمرض نفسي خطير والخطوره التي تكمن بهذه الشخصيه من الصعوبه التعرف عليها لان صاحبها فنان بالتمثيل ..

يلعب دور الانسان الفاهم والحكيم والمثقف واهم شي يحسسك هو واعي انت هنا راح تأمن بيه بس متعرف هو يريد يوصل للمبتغى الاجرامي البداخله بعدها من يأمنك ينقلب ضدك ويطلع الانسان اللي بداخله ...

سؤال يتردد بأذهان الجميع هاي الشخصيه شوكت تبدي تظهر على الانسان تبدي من الصغر ، اذا شفت طفل يلعب بعنف بالضرب يكذب هواي يحتال هواي يتلذذ بقتل الحيوانات او يتلذذ بضرب طفل اصغر منه ،
السؤال منين تجيهم هاي الافعال وشلون يتولد الفايروس السيكوباتي لدى الطفل للأسف يبدي من الاب والام ..

الاباء والامهات يعنفون اطفالهم او يضطهدوهم هنا كاعد يبنون هاي الشخصيه بدون ميدرون بنفسهم ، بعدها يحبون يأذون الاخرين لان همه كاعد يتأذون ومتعنفين هنا راح تتولد عدهم حب السيطره لان يقلد الاب او الام ..

حب السيطره والعدوانيه تولد شخصيه سيكوباتيه هاي الشخصيه الها اكثر من علامه  توضح النه نوعيه الشخصيه مثلا..

يحب ويكره بنفس الوقت ، يحب زوجته او اخوه او ابنه وفجأه تصيرله مصلحه ويريدها بقوه وتتعرقل من قبل زوجته او اخوه او ابنه او حتى والده هنا راح تتحفز هاي الشخصيه وتظهر ملامح الاجرام عليه ويريد بس يأذيهم ، يعني يكرهم هذا هوو امام مصلحته ينتهي الحب ..

ذوله النوع من الناس يكونون بدون اخلاق يعني يأذي الناس ويتدخل بحياتهم كيف يكون عدهم اخلاق ، ويكونون عديمين الضمير والانسانيه ،

هذا النوع يكون فاشل يعني يبدي بشغله ويعوفها على النص ميكملها ينتقل لشغله ثانيه وهم يرجع يفشل ...

واهم شغله يعادي كل الناس يعني انه صح وهو يكون مضاد اليه ....

هاي الشخصيه العدوانيه والاجراميه ما يهتم لا لاب ولا لام ولا اخ ولا تلزمه رابطه من الروابط الاسريه اساسا متهمه الاسره لان عنده المصلحه تتقدم على حب العائله وممكن يرتكب جريمه ،

واذا راد شي من المقابل يدخل بالحب والود وحتى الرومانسيه الاهم يوصل للهدف من يوصل للهدف يبدي يهدد الضحيه وممكن يبتزهم ، خصوصا مع النساء ممكن يصورها ويبتزها لسبب اما دمارها او عنده سبب معين يريد يوصله من خلاها واذا رفضت يشوفها باب من ابواب الجحيم ....

شخصيته مزاجيه و متقلبه ، يعني يجي ينصحك ويكون عالم وبعدين ينقلب ضدك ويختلف بمعنى شخصيه اختلافيه ، عديم المسؤوليه ، عديم الاخلاص ، شكاك يشك حتى بنفسه ، يعني يصور شغلات من خياله ويصدكها ويريد يوصل للشي اللي يريده برضاتنه او غصب عنه..

يبرر شغلات لخياله المريض اذا خالفه ...

انه ك دكتور نفسي من اجي اعالج هاي الشخصيه الصعبه شلون اعالجها كاعد اواجه صعوبه بالتعامل وياها ليش لان ميقتنع هو مريض نهائيا ومن تكعد تحجي وياه يفر عقلك بالعلم الشايله والامكانيه ويطلع هو الدكتور وانت المريض ...

يدعي الثقافه والعلم وغيرها ، هاي الشخصيه من تريد تعالجهة تستهزء بيك وربما تتوعد الك ، انه اكثر شي مدوخني هذه الشخصيه نريد نوصل لحل...

 خلونه نتناقش اليوم بهاي الشخصيه اللي انه وانت وغيرنه نعاني منها ، شلون نخليه يرجع لأنسانيته...

هذه اخطر شخصيه بالنسبه اليه..

هواي حجوا وتناقشوا بعدين استرسل وتكلم عن الشخصيه الثانيه ....

ادهم : اما الشخصيه المازوخيه او اضطراب الشخصيه المحبطه او المهزوزه
(بالإنجليزية: Self-defeating personality disorder )
حجاها وراح كتبها على السبوره واسترسل بالكلام ...

ادهم : تبدأ مبكرا في مرحلة المراهقة، وتمتد لفترات متباينة، وغالبا ما يتجنب الشخص التجارب الممتعة، ويتورط في العلاقات والمواقف حيث يعاني خلالها، ويمنع الاخرين من مساعدته، ويتميز بواحدة من الخمس الآتيه من خلالها راح اميز ابني او بنتي يتصف بالشخصيه المازوخيه اذا لكيت عنده  النقاط التاليه...

١_ يختار الأشخاص والمواقف التي تسبب اله الإحباط والفشل،أو سوء العاملة، على الرغم من توافر خيارات أخرى أفضل يمكن أن يتجنب بها ما سبق و يرفض محاولات الاخرين مساعدته

٢_ يتفاعل مع المواقف الايجابية بالاكتئاب والذنب أو سلوكيات أخرى تتسبب في أحداث الألم له

٣_ يستجلب الغضب وسوء المعاملة من الآخرين ويشعر بالذنب بعد ذلك.

٤_يرفض فرص التجارب الممتعة، ويعترض على اسعاد نفسه.

٥_عدم القدرة على إنجاز مهماته الشخصية رغم امتلاك القدرة على إنجازها.

٦_يرفض الأشخاص الذين يتعاملون معه بصورة جيدة.

٧_ يتورط في التضحية المفرطة بالذات بدون طلب الآخرين

تتوفر هذه الشروط بطفلك بشرط

أن لا تكون السلوكيات السابقة هي نتيجة مشكلة حالية كالاعتداء الجسدي أو الجنسي.

أن لا تكون السلوكيات السابقة اللي تكلمت بيها هسه تحدث فقط أثناء نوبات الاكتئاب، وإنما بصورة ثابتة.

اذا توفرت هذه الامور اذن طفلي يعاني من
Self-defeating personality disorder

اما الشخصيه الساديه كلنا نعرفها وسامعين بيها

باختصار هي اللذة بإيقاع الألم على الآخرين سواء كان لفظيًا أو جسديًا، فالشخص السادي هو شخص متسلط، عديم الرحمة، عديم المسامحة لمن أخطأ بحقه بقصد أو دون قصد، يسعى بكل الطرق لتحقير وإهانة وإذلال الآخرين، وسحق آدميتهم، وجرح كرامتهم، ويتلذذ بذلك، ولا يشعر بالذنب عند ارتكابه الأخطاء أبدًا، ويتصف بعد الثقة بمن حوله..

عكس الشخصيه المازوخيه

وفيها يقوم الشخص بإيذاء نفسه لفظيًا أو بدنيًا، لذلك يسمى أيضًا اضطراب الشخصيه المحبطة للذات أو اضطراب الشخصيه المهزومة ذاتيًا، ولكي يوصف الشخص بأنه مازوخي لا بد أن يكون الألم حقيقيًا أي مصحوبًا بفعل وليس مجرد رغبة .

اما النرجسيه والاخيره

اضطراب الشخصية النرجسية  إحدى الأنواع المتعددة لاضطرابات الشخصية هي حالة نفسية يتملّك المريض بها شعور مبالَغ فيه بأهميتهم فضلاً عن حاجة عميقة إلى زيادة الاهتمام والإعجاب، واضطراب العلاقات، وانعدام التعاطف مع الآخرين. ولكن خلف هذا القناع من الثقة المبالَغ فيها، تكمن ثقة هشة بالنفس تجعله عرضة لأقل قدر من الانتقاد.

والخ....

انتو شنو رأييكم دكاترتنا الاعزاء...

وكل دكتور ناقشه بشخصيه معينه اله سامر راد ينفجر كل شويه يأفأف حتى اني ضوجني..

سيلين : شبيك ليش احسك ما مرتاح.

سامر : هذا الموضوع اني محضره وردت اناقشه اليوم شنو يقره افكاري ليش هيج ديسوي يعني هسه اذا اكوم شنو اشرح..

جر نفس قوي وراح طلع بره....

عمو مجرد ما طلع سامر باوعلي بنضره عتب وعتب كلش قوي واليوم اليه شهرين ونص لا رايحتلهم ولا شايفتهم ولا حاجيه وياهم ، اخذ قلمه فتحه ورجع سده وكال.

ادهم : اكو فرق جدا مهم ولازم نميز بيه بين الجروح الجسديه والجروح والتشوهات النفسيه اذا ننجرح باصبعنه او اي مكان بجسمنه ممكن بلزكه جروح وينتهى الامر او نغسلها بمي بارد بينما الجروح النفسيه مشكله كبيره لان بكل بساطه منشوفها بس نحس بيها لهذا منكدر نضمدها بسهوله لنفرض اي مكان بجسمي انكسر الكل بالقاعه راح يلاحظون الكسر ،

ومادام انه رجال راح اتحمل هذا الكسر واداري وضعي حتى ما ابين الكم انه متألم لان عضو بجسمي مكسور الرجال خلقوا للألم بس المقابل راح يمد يد المساعده اذا احتاجيت لان الكسر ضاهر الكم ،،،

لكن اذا كسرنا من الداخل بعده كسور مختلفه للأسف ما راح تظهر الكم او مانكدر ندليكم بيها والمقابل ما راح يهتم للكسر ويعاملنا بأننا بخير ونكدر نكمل الحياه وحدنا بدون حاجه لاحد لهذا من الصعب جدا استيعابنه من قبلهم ...

الكل مكسور والكل يعاني ويحتاج للمغفره الحقيقيه اذا خطأنه بحقه مو معناه نتركه ونعاديه لابد بيوم نتذكر شيء جميل قدمه النه بدون مقابل انه حاس ومتيقن ممكن المقابل عدم مساعدته النه يكون بدافع خوف وليس نابع من نوايا الشر النفسي.

كل كلمه يحجيها عينه عليه ويأكدلي بكلامه وبنضرته 
بصعوبه كدرت اسيطر على نفسي ومانزلت دمعتي اخذت جنطتي وطلعت بره لكيت سامر كاعد بالسياره صعدت ضل يسب ويلعن ب ادهم .....

هسه نروح نسلط الضوء على بيت عمو ادهم من بعد موقف اليوم والموقف القديم وشلون استقبله مني..

عمو كاعد بالحديقه واجه ايمن جان بره ورجع اخر الليل ...

دخل للحديقه وشاف عمو كاعد كالعاده يشرب جكاير..

همل صحته وتغير نظام طعامه وحتى نومته تغيرت بالمختصر عمو مات على قيد الحياه..

راح ايمن كعد يمه جر نفس وكال.

ايمن : شبيك راح تموت صار شهرين ونص معقوله ما نسيت.

ادهم : ليش اكدر  انسى هيه لعبه وانساها شتسولف انت..

ايمن : راح تتعب هيج وتتأذه متكلي شبسرعه تعلقت بيها..

جاوبه بصوت تعبان وضعيف حسب ما وصفه ايمن اليه بعدين..

ادهم : جنت انه اكعدها الصبح نتريك سوه ونطلع و
الطريق كله هيه وياي نسولف واشكيلها همي وتشكيلي همها نضحك من موقف وننقهر على موقف ثاني نتأثر ونرجع نضحك لحد ما تدمع عيونه ، ندخل للجامعه سوه ناكل سوه مرات اشتاق الها اشتاق اباوع عليها هووواي بس استحي منها اباوعلها من هيه يمي ، لهذا اروح اخذهم محاضره بمكان استاذهم والقي المحاضره وانه اسرق نضرات حنينه منها..

جانت تنعش كلبي والله يا ايمن تنعش كلبي ...

تخيل انه ماعشت ويه ياسة غير سنه وحده وسافرت ورجعت عشت باقي ايام مرضها وراحت وتدري شلون تدمرت وراها وتأذيت،

بعدها اجتني طفله بريئه مكسورة وبلشت اضمد جروحها جرح جرح ،

كصيت وصل من كلبي وداويتها ، تخيل تبجي يتفتت كلبي عليها..

كمت اتأثر بدمعتها اضحك لضحكتها وانه جنت متصور هاي مشاعر عاديه يعني بيني وبين مريضتي او مثل ما قررت ارد جميل لياسه بس الصار يا ايمن الصار اخ ربي ،

ادمنها ماجنت ادري حبيتها حسيتها شي خاص بيه حالها حال مريم نفس المعزه ونفس كميه الحب ونفس الاهتمام انطيتهم ،

سهرت على راسها وادعي تكوم على حيلها وتضحك واتفرج عليها هذا هوو ما جنت اريد مقابل ابد رغم جانت سافره كدامي وتلبس اشكال الوان بس جنت اغض النظر عنها وشفتها طفله الى ان اجه  اليوم وطيرت عقلي بيه هنا كلبي دكلها ،

كمت ما اسيطر على دكاته ، حركت مشاعري كلها ، لبست احله لون احبه ، اخ اخ يا فمك البني شسوه بيه وشحرك بيه من احاسيس مدفونه..

وفجأه يا ايمن واصير غريب غريب وبعيد بعيد حيل عنها ..

تصور تشوفني منا تدير وجها منا حتى سلام متسلم عليه اليوم صرت وياهم وجه بوجه مسلمت وزوجها وياها...

زين شسويت انه شنو الذنب الرتكبته فهمني ياسيئه السويتها بحياتي حتى هيج اتعاقب معقوله ياسه ماراضيه عليه...

ايمن : لتكول هيج هاي شعليها بهاي المره ماتت الله يرحمها..

ادهم : اعرف ماتت بس احتمال مثل ماذكرت سيلين عمتها روحها تفتر علينه لهذا لا انه مرتاح ولا هيه ترتاح اذا ارتبطت بيه..

ايمن : مادري شكلك حيره ..

سكتوا يكول ايمن بهذا الحديث تذكرت حالته من طلعتي من البيت بيوم الزفه ودعيت ربي ما انحط بموقفه سألته شنو الصار وسولفلي..

ايمن : ادري انت ليش واكف هنا وتحرك بكلبك امشي نروح نفتر ونرجع..

هو عينه على البيت ويهز برجله حيل ساعه يدك بأصابعه على الستيرن وساعه يرجع راسه ليوره يغمض قوي ويفتح عينه بثكل ، الى ان طلعتي وجان واكف يمج فهد هنا احترك بنار جهنم كام يضرب على رجله ويردد ...

ادهم : اخذها ولك اخذها صارت صدك ايمن صارت صدك..

ايمن : يا الله رحمتك اني من يمي اختنكت...

وما احجيلج يا سيلين شصار ب ادهمج من بعدج ...

وانتهى هذا الموقف......

ثاني يوم من كلامهم سوه بالحديقه ايمن راح يم ايفين علمود يطلعون يشوفون الغرف حجه وياها مجاوبته ساكته وتتصفن يريدها تحجي بس نايمه حتى الاكل بدت تكطعه....

طلع منها وراح لادهم ..

ايمن : ادهم منتبه لتغيير ايفين راح اتخبل انتبهت عليها لو لا...

ادهم :ليش شبيها؟؟

ايمن : بس ساكته ومتحجي ومن اريد احجي وياها تتجنبني..

ادهم : لا يابه مابيها شي.

ايمن : والله صدكني ادهم ايفين بيها شي وكاعد تعاني من شغله وساكته..

ادهم : خاف امي مأذيتها بالكلام واحنه بالدوام مندري ..

ايمن : لا هيه تحجيلي كلشي متعرف متضم عليه هاي تبيت حجايه وين تتحمل تختنك.

ادهم : امشي نشوفها لعد..

طلعو وراحو يم اختي الضايعه...

حجه وياها ادهم حاول نفس السكوت والجمود..

ايمن دخل ايده بشعره حركه تدل على القلق وكال..

ايمن : ادهم شلون شوفلي حل ..

راح تقرب يمها كعد بالكاع..

ايمن : افونه عرسنه بعد سبوعين امشي اشتريلج البدله العجبتج ونفتر على الغرف ها شتكولين حبيبتي باوعيلي ايفين يمعوده..

ادهم : شبيك راح تخبلها على كيفك.

ايمن: يا على كيفي ادهم دشوفها شبيها..

ادهم : اشريلي براسج وبس لتحجين..

رفعت عينها باوعت على ادهم وغركت عيونها بالدمع..

ادهم : فهد وياج..

مجاوبت ...

ادهم : ايمن مضوجج..

هزت راسها ب لا..

ادهم : تتزوجين ايمن..

رفعت عينها على ادهم وعليه نزلت دمعتها وسكتت..

تخبلو ثنينهم اقترح ايمن يجيون عليه ياخذوني علمود احجي ويه اختي وفعلا اجوي لبيت عيالي واستقبلهم عمي سمعت صوتهم والله كلبي صار شكبره حسيت اهلي اجوني من بعد غربه...شويه واجتي اخت سامر كالت بابا يكول بدلي تروحين ويه زوج عمتج اختج مريضه..

تخبلت شبيها اختي ركضت بدلت ونسيت اخذ الموبايل ويايه وصلت للهول شفتهم سلمت واني عيوني على ايمن مكدرت اباوع على عمو من فشلتي بس هو سلم عليه.

ادهم : شلونج باباتي مرتاحه ان شاءالله ..

هزيت راسي ب اي..

ابوه كال..

_ طبعا مرتاحه اذا دكتور سامر متزوجها شلون ما ترتاح ..

عمو معلق على كلامه وكال يابه نترخص ورانه طريق..

طلعنه صعدت ليوره وهمه ليكدام ، ضلو يسولفون بيناتهم واني استمع اخر شي حجيت..

سيلين : شبيها اختي شنو مرضها..

رفع عينه عمو وباوعلي مستهزء بكلامي.

سيلين : شكو احجولي شنو الصاير..

ادهم : وينج عن اختج صار اكثر من شهرين متدرين بيها وين ما وين..

سيلين : كلمن واله ظروفه..

ايمن : حتى لو مهما كان ظرفج جبير هاي اختج..

سيلين : اختي ، خلوني ساكته افضل الكل صاحب حق وحقوق وهمه بعيدين عنه وبس سيلين موزينه بس سيلين سيئه..

ايمن : ماكلنه هيج شبيج انتي.

سيلين : لعد لتحجون وتحركون دمي البيه كافيني.

نتر ادهم.

ادهم : كل الصارلج من ايدج لو ضاله يمنه قابل راح نكص راسج وبعدج حتى دراسه ممكمله لو الدكتور مايتفوت..

سيلين : تعرف كلش زين ليش ردت انهزم السبب بيك انت هم مو بس اني جان ضليت ساكت ليش فصحت عن مشاعرك وخبلتني ..

ايمن : كولو يا الله البنيه مريضه نريدلها حل هيه مال مناكر لخاطر الله.

عمو جر نفس قوي وسكت ...

وصلنه للبيت وكبل صعدت فوك دخلت يم اختي حضنتها وابجي وهيه بس تباوعلي ..

سيلين : يمعوده شبيج احجي شنو خرسه

ايمن : مو كتلج راح اتخبل ماعرف شبيها..

سيلين : شكد صارلها هيج.

ايمن : ماعرف جنه متزاعلين اني وياها استمر الزعل حدود اسبوعين اكثر البارحه اجيت اريد اصالحها لكيتها هيج احجي وياها اريدها تجاوبني رافضه ...

سيلين : والحل عمو وينك عفيه اختي شبيها.

تقرب منها وكعد يمها ضل يحجي وياها شلون من جان يحاجيني بس اختي قافله لا تقبل تحجي ولا تباوع بعيونه اخر شي من سألها عمو ادهم على زواجها من ايمن جاوبت جواب صدمتنه وخلتنه صافنين..

ايفين : ما اريده بعد ...

يتبع ....

اذا متقرون شرح الشخصيات ما راح تفتهمون البارتات الجايه لان شي مرتبط بشي بالنسبه للبنات الكاتبين اطفر الشرح مو تجون تكولون غموض وكلشي منفهم