#أنتقام للعشق 🥀
البارت 38
بقلم : نور حيدر
noorhaidar18
مساء الخير عليكم متابعيني 🦋🌿....
- أتحبها ؟
= لا أدري ..
ولكن غيابها يجعل وجوه الناس شاحبة ..
ورائحة الهواء مُغبره ..
-إذاً فأنت تحبها !
=دعك من تضخيم الأمر ..
فقط غيبتها تبدو كثقب أسود يبتلع ألوان الكون حين يطل عليّ ، ثم يعيد ما اختلسه من البهجه حين تعود !
-بالتأكيد أنت تحبها !
=دعنا لا نتسرع في الحكم ، رجاءاً ..
كل ما في الأمر أن غيابُها .. غربتي !!
.......................................
اعتذر جداً على الاخطاء الإملائية غلسوو عود🙂💔
+شكرااا وصلنه لنصف مليون مشاهد ان شاءالله نوصل مليون 😎
.......................................
شهاب/
من صار الحادث و اني ما مرتاح حسيت الامانه الي انطاني اياها أخوي و صديق عمري علي راحت من ايدي
ايااام سوده مرت عليه ماضكت طعم النوم و لا الراحه
و ابني بين الحياة و الموت ..
كله كامت تحاول تهدي بيه بس ماكو كل فائدة ما اهتم لكلامهم يردوني اعوفه و اني ماكدر ..
بس من جنت بلمستشفى ماعرف شلون و ليش اجت على بالي جوري حسيت نفسي كلش محتاجه بهذا الوقت اريده يمي و بجانبي بس ماكدرت اعوف علي ..
اخر شي وصيت شاهر يبقى يمه و مايتحرك من مكانه لحد ما اجي و اي شي يصير يتصل عليه ..
رحت و شفت اهلي و انصدمت من شفت حالتهم لا تقل عن حالتي امي بس تبجي و اخواتي نسوان عمامي اجو عليه يهدون بيه بس عيوني تفتر بينهن ادور عليه ما لكيته ...
عفتهم و ما دخلت جوه رحت للبستان و عرفت هيا راح تكون موجوده و تجي عليه و صدك ظليت كاعد هناك و شوي و لكيته موجوده ...
و من شفته ارتاحيت و بيومه بشروني بعلي هو كعد
و الحمدلله صار زين و الناس ظلت تروح و ترجع عليه
فرحت من شفته كام بلسلامه و الي كمل فرحتي هيا جوري ما صدكت هيا سامحتني ..
اول شي خفت لا تسوي مثل ما سوت ذاك هم تريد تنتقم بس باوعت على عيونه و هيا تحجي و جان اشووف نظراته ..
نظرات الي فقدتهن قبل خمس سنين نظرات بيه حب و خجل و لهفة نظراته الي اسرتني و خلتني تايهه بيهن
ما صدكت على الله انو تسامحني ..
بيومه جنت اسعد شخص بلدنيا حبيبتي و روحي من هاي الدنيا سامحتني و قبلت نبتدي حياة جديدة و وعدت نفسي مراح اكسره مره ثانية و طلبت من الله
يعوضنه عن الي شفناه ..
مرات ايااام على نفس الحال اشوف جوري من اخذ جمارة لجامعه و هيا من تشوفني تبتسم و تروح لو اراسله بليل لان اعرفه هيج وقت تكون فاضية ما مشغولة ..
يوم من الايام طلعت و اتصلت على شاهر يجي لشط
رحت اني بقيت كاعد مرت ربع ساعه و هو يمي اجه
كعد بصفي كال : هاا خير شو رايدني ..
باوعلته بطرف عيني كتله : الناس اول شي تكول السلام عليكم مو ها خير غسل لحد عمرك ما تعرف تسلم ..
: خلينه السلام الك ..
باوعت عليه لكيته عاقج الوجهه و ضايج كتله : شبيك تكول وحده ارمله مات رجله شمالك خايب ليش هيج وجهك معقوج ..
:اسكت مابيه حيل احجي ..
ابتسمت اله كتله : ولك بس لا وي مرتك متزاعل ..
باوعلي بطرف عينه و كال : شو عادي عدك تحجي و مرتك و مدري شنوو ..
ضحكت عليه و كتله : ولك ترى هاي بتي عمي قبل لا تصير مريتك ..
: حتى لو ..
: هاااا تغار عليه ..
جر حسره و كال ؛ ولك شهااب اني تاليتي هيج يصير بيه اسحل روحي وره طفله هسه لو اني معرس من زمان جان بنتي بكده ..
: ها ولك شكوو شصاير بيناتكم ..
كاال : ولك اني طبعي صعب و انت تعرف اني اغااار على شخص احبه و شلون و هيا مريتي الي و بس ماريد احد يشوفه و لا يشوفون ضحكته غيري اني
اريده الي و بس اغاار كلش عليه و صارلي يومين متعارك وياها و ما نتحاجه و مشتاق لصوته بس اني اكابر و طلعت بت الاوادم زعله ثكيل ..
ضربته على كتفه بخفه :خوية نرى اذا نبقه نكابر مراح يفيدنه شي و عوف كرامتك لان بين المره و الرجال ماكو كرامة و اذا تبقى هيج الله وكيلك تسحلك سحل و اني ادري بيك كلبك رجيج ما تتحمل ..
كتله : روح خوية روح اركع يم رجله و اطلب السماح من يمه ..
ضحك و كال : والله ياخوية جني هيج اسوي لان على كولتك كلبي رجيج و ما يتحمل زعله اااخ شلون وكعت وكعه كلبي ميت عليه ...
: كلنه بلهوى سوه يا شاهر ..
باوعلي و كال : شقصدك شهااب ؟
ابتسمت اله : لا تسوي نفسك ما تعرف اني احجيه الك و ما خايف اني بعدني احبه و مستعد اخطبه بس اخاف لا ترفضني ..
: معقولة لحد هاي السنين و سفرتك ما نسيت بيه جوري و ماشفت وحده غيره ..
كتله بهدوء : لو شما تمر السنين محد ياخذ مكان جوري مكانه بلكلب و بس هيا ..
: مادري شكلك بس هيا بعده شايله بكلبه عليك احنه من عرفنه قصتك سامحناك بس ماظن هيا ..
ابتسمت و كتله : بس هيا سامحتني ..
تفاجئ شاهر و كال : شلون و يمته..
رجع باوع بشك : شنوو تلتقي بيه انتي ولك ..
جذبت عليه و كتله : لا بس من صار الحادث و رجعت للبيت من بقيتك هناك شفته ابيتنه يم البنات و حجيت وياها كتله هاي كله يمكن حوبتج و بسبب قهرج لان الي سويته ويااج مو قليل اتمنى منج تسامحيني لان ما مرتاح و انتي بعدج حاقده عليه و البنيه والله سامحتني ..
باوعلي و كال : بس هيج يعني ماكو شي ثاني؟
: لا يعني شنو الشي الثاني هو بس هذا الحجي ..
: خووش لعد ..
كام من مكانه و كال : يلا اترخص اني ..
كمت وياااه: الله وياك اني هم اروح عندي شغل ..
كمنه ثنينه و كل واحد صعد بسيارته رحت اني لشغل ظليت هناك و صار الظهر رجعت للبيت صعدت كبل لغرفتي شفت علي متمدد على الجرباية بعده شوي تعبان مايكدر يكوم يمه جماره كاعده من شافتني طلعت رحت سبحت و لبست تراك و رحت يمه ..
جابوو اكل فوك صعدوه الي و لعلي من صار الحادث كمت اكل فوك يمه لان ما اخليه ينزل مايكدر و مرات يجي غسان يمي يتغده ..
خليت الصينيه على الجرباية و كمت اوكل بعلي ما ياكل وحده اسوي اله لفات و هو ياكل و اني اكل وياه
خلصت و اجت جمارة اخذت الاكل و كتله تجيب الجاي ..
جابته الي كتله : مشكورة..
: العفوو ..
رادت تروح كتله : جمارة ..
باوعت عليه : نعم ..
: اليوم ماكدرت اجيبج بس كليلي جوري داومت لو لا ..
ابتسمت و كالت :يي داومت و تدري شنو هم سئلت عليك ..
تفاجئت من حجت هيج رحت يمه كتله : شلون ؟
: كالت شنو شهاب ما اجه عليج و اخذج كتله مادري..
ابتسمت : بس هيج ..
هزت راسه كتله : روحي هسه اريد انام ..
راحت و عافتني و بقين اني كاعد افكر بيه طلعت موبايلي و اباوع على صوره اااخ منج شنو هذا الحب الي شايله بكلبي الج انتي شنوو و هيج ساحرتني ..
شمسويه الي مسويه سحر لو شنو لان عقلي و كلبي بس بأسمج يصيحن اغمض عيوني الكاج طالعه كبالي افتح عيوني اشوفج حتى بأحلامي ملاحكتني ..
رجيت راسي على حافة الجرباية و كلت بهمس مصحوبة بأبتسامة : ماعرف ياجوري انتي نعمة الي لو نقمة ماعرف شنو تاليته وياااج تصيرين الي لو لا ربي دخيل اسمك لا تحرمني منه ..
مرت ايااام و اني اشوفه فقط من اخذ جمارة هو هذا الشي الي يخليني اشوفه اروح للبستان اكعد لليل و ما تجي ماعرف يمكن هيا متعمده هيج تسوي و تحرمني من شوفته ..
مره ماكدرت رحت اخذت موبايله و راسلته
كتبت اله : هلا جوري شلونج اكلج اني رايح للبستان تعاي هناك اريد اشوفج ..
وره دقايق اجاني مسج منه فتحت لكيته كاتبه : اسفة ماكدر اجي مشغولة ..
: اني رايح و اتمنى منج تجين اريد اشوفج لان صدكي ان مشتاقلج والله لا تكسرين بواهسي و ما الكاج هناك ..
دزيته انتظرت منه رسالة ماكو عرفت هيا قرته بس ما تجاوبني ابتسمت على تغلساته و تكابر هم بس نشووف ..
صاار العصر رحت غيرت ملابسي و تعطرت و طلعت
نزلت شفت زهرة و جمارة كلت لجمارة : اكلج اني طالع ديري بالج على علي لا تعوفيه وحده ..
نطت زهيرة من مكانه كالت : هاا وين رايح ؟
خزرته كتله : هذا مو شغلج مالج دخل تسئلين ..
: لا مو قصدي شي بس كلت شلون تطلع و ابنك بعده مريض ..
ماهتميت اله رجعت حجيت لجمارة : مثل ما وصيتج ديري بالج على علي ..
ردت امشي و رجعت حجت زهراء باوعت و كالت بشك : الي عنده طلعه يروح هيج كلشي ما بيده شي حتى سويج سيارة ماكو ..
: زهراء تسكتين لو اتصرف شي ما يعجبج ..
كلبت خلقته و ماحجت شي اني هم طلعت رحت للبستان ابتسمت و اني اشوف جوريتي كاعده يم الشجرة و منزله العباية على كتوفه و الشال خالته على شعره بأهماال و خصله طالعه من الشال ..
ظليت صافن عليه و مبتسم شكد حنيت و اشتاقيت لهاي ايامنه صرت فتون بهذا الشكل اتمنيت اني رسام و اكعد ارسم بهذا الشكل ..
اقتربت من يمه و ابتسمت كتله بهمس : جوريتي ..
فزت هيا و باوعتلي ابتسمت كالت بهدوء : جوريتك ؟
كعدت و انطيته ظهري سندت على الشجرة فصلت هيا بيناتنه كتله بأبتسامه : شنو نستيي هذا الاسم جنت ما اناديج غير جوريتي و تسئلين شنو السبب ..
كالت: يي و انت تكلي بمنعى انتي الي املكج ملكي تصيرين مو لغيري ..
:ايااام شكد جنت مشتاقله و جنت اكول ماظن ترجع بس الله لطف بيه و رجعني الكم ..
: تدرين جنت احط راسي على المخده و افكر بيج ابد ما افكر بأحد بس بيج و اخبارج توصلني اول بأول و اعرف جنتي حاقده عليه و تكرهيني ..
حجت هيا بهدوء : جنت اتصور اني اكرهك و من اشوفك ابد مراح احن عليك بس طلع غير من شفتك اول مره كلبي انخبص و ظل يدك بسرعه بس توهمت لان سنين مشايفتك و اوهم نفسي بحقدي و كرهي بس هاي طلعت كله اوهاام ..
ابتسمت لكلامه كتله : يكولون الحب الاول عمره ما ينسي لان اول حب بحياتج تذكرين كلشي ..
كملت الكلام هيا : وانت جنت ما مقصر وياي جنت اهلي و كلشي بلنسبة الي حبيت خوفك عليه و اهتمامك عمري ما شفت شي مو زين بس بعدين صار الي صااار و انقلبت الموازين ..
كتله بهم : جوريتي اذا تصدكين بكلامي او لا بس الله شاهد على الي شفته بهاي السنين و الي عشته من صراع نفسي و جسدي ..
: ربك كريم شهاب الله يسامح عباده على اخطائهم احنه منو و ما نسامح ..
كتله : جوريتي ..
حجت بأبتسامه : نعم ..
ابتسمت و كمت من مكاني رحت كعدت كباله صار وجهه مقابيل وجهي كتله : اذا رجعت خطبتج توافقين عليه ؟
باوعت عليه بصدمه كاالت : ها شتكول ..
: الي سمعتيه ما كافي صد و ابتعاد ترى والله كلبي
طاااك اتمنى اليوم كبل باجر اعقد عليج و تصيرين مريتي و ام بيتي ولج و العبااس احبج و اعشكج انتي شي يمشي بدمي انتي مثل الادمان ..
باوعت عليه عيونه غوركت كالت بهمس : خايفة شهااب ..
لزمت ايده باوعت عليه بحنية : من شنو تخافين يا روح شهاب انتي ..
دمعة نزلت من عينه :خايفة هم تعوفني ترى ما تحمل والله ..
: ولج غلطة و سويته و اتندمت عليه و بعد ما اكرره لو يكلولي اليوم تموت هم ما اعوفج .
:تدري شهاب من رحت جنت اكعد و اطلع اسباب رحيلك بس بلنهاية اكول ماكو سبب هيج يسوي الي سواه اريد اعذرك بشي بس ماكو شي يشفعلك جنت يوميه انتظر بلبستان اكول هسه يجي و يكلي شنو السبب و مرت خمس سنين و أنت ماكو ما تعرف شنو الي عشته..
كتله بخنكه :حسبالج رحت متهني لا والله رحت بمرضين مرض الخبيث الي صار بجسمي و مرض حبج و اشتياقي الج ترى اني جنت اتعذب وياج بكل ثانية و دقيقة و ساعة ..
دنكت راسه ما حجت اي شي رفعت راسه كتله : هااا شنو كلتي ..
كالت بهدوء : خليني افكر شهاب ..
ابتسمت اله و كلبي ارتاح من حجت هيج معناه اكو أمل نرجع سوه كتله : فكري براحتج منتظرج اني اصبر شعندي ..
مشيت من يمه و اني شوي بالي مرتاح بس هم خايف لا ترفض او توافق و تسوي مثل ما سوت أول مره
مرت الايااام و الاسبووع و اني منتظر جواب منه ماكو
و الاسبوع الثاني هم ماكوو ..
اني جذبت عليه و كتله اصبر بس والله ماعندي اي صبر اريد الجواب منه بس اعرفه تريد تحرك بكلبي و تخليتي اتشعوط ..
كاعد بغرفتي وحدي و علي نازل جوه يم اهلي و فاتن موجودة هم تبات يمنه شكم يوم فا كله ملتمه جوه الا اني كاعد و صافن منتظر جواب الخاتون ..
واني كاعد افكر رن موبايلي باوعت فزيت من مكاني و اني اشوف جوري المتصله ما حاجي وياها من طلبت مني تنتظر لان ما تقبل اتصل عليه ..
فتحت الخط حجيت بهمس : جوريتي
: شلونك شهاب ..
رجعت اتمددت و سندت راسي على تاج الجرباية
مبتسم كتله : يعني شلوني من اسمع هذا الصوت شريد اصير طبعا بخير ..
كالت : تذكر الي حجيته ..
رفعت حاجبي بأبتسامه : شنو الي حجيته ما اتذكر ذكريني ؟
سمعت صوته بيه خجل كالت : شهااب اذا تشاقه ترى والله اسد الخط ..
كتله : لا بوية اتذكر بس شنو ..
: بعدك على كلامك تريد تخطبني ؟
ابتسمت : يي والله بعدني و منتظر الجواب منج لان شلعتي باب كلبي ..
كالت بهدوء : ها هيج صار الحجي ..
خليت ايدي على راسي و كتله :يي والله احجي الصدك انشلع كلبي من وراج احسج متعمده تقهريني ..
:غير افكر ..
: و هسه شقررتي بشنو فكرتي ..
سكتت ثانية و رجعت حجت كالت : اني موافقة ..
اتسعت عيني من الصدمة كتله : شنو شنو عيدي الي كلتيه .. انتي شنوو ؟
:شبيك شهاب كتلك اني موافقة ..
طفرت من مكاني :تحجين صدك انتي كولي والله ..
ضحكت هيا و كالت : والله شبيك اني موافقة ..
كتله بعدم أستيعاب : ماكدر اصدك ولج بس لا تردين تسوين مثل الي سويتيه قبل ترفضين بيوم الخطوبة
كالت بهدوء حسيته ضاجت : شنو معقولة هيج تفكر بيه ترى اني اخذت حقي منك و هاهيه كتلك ..
: لا تزعلين حجيته هيج من الصدمة ..
: يلا باي عندي شغل هسه ..
ابتسمت : بعدج على كلامج ..
: هههه يي بعدني يلا باااي ..
سديته من يمه و طفرت من مكاني نزلت جوه اركض مثل المخبل فرحان ماصدك الي سمعته نزلت لكيتهم كاعدين بالاستقبال أمي و أبوي و غسان و سما زوجتة ماموجودة يم اهله و اخواتي و زهراء ..
باوع عليه كال أبوي :ها ولك شبيك اجيت تتراكض علينه ..
كتله بفرحة : بووية الك بشاارة و الكم كلكم هم ..
حجت أمي: شنو ولك فرحنه ..
كتلهم بفرحة : ابشركم راح اتزوج جووري ..
وكفوو من الصدمه كال غسان بصدمة : شكلت ولك انته شتحجي ..
: ييي وافقت ولك ..
أبوي حجه : أنت تحجي صدك شنو وافقت و الي صااار ..
باوعتله و كتله بفرحه : بوية مو يكولون المسامح كريم هسه هيا سامحتني و كالت كل شخص اخذ حقه ..
كلنه التفتنه على شهكة زهراء اباوعله خاله ايده على حلكه و عيونه مغوركة تباوعلي مصدومة ..
رجعت باوعتلي امي و كالت بعصبية : شنووو احنه نلعب خو ما نلعب اول شي ترفض تضحك علينه هااي ..
كتله : يمه عوفي الماضي هسه كلشي ماكو بيناتنه و البنية سامحتني و اني اريده..
كالت بعصبية : ماكو كل زواج فهمت لو لا كافي ملينه من سوالفكم الماصخه ..
حجيت بعصبية : اني الي اقرر اخذ منو او لا كافي يمه ترى تعبت يلا سامحتني البنية ..
كال أبوي : ولك صدك سامحتك لو مثل ذيج المره بيوم الخطوبة ترفضك ..
: لا بوية اطمن سامحتني صدك ..
ابتسم براحه : خوش لعد بلمبارك اليوم اروح و امشي عليه ..
ابتسمت و امي كالت : واني شنو مالي راي ..
كال أبوي: اسمعي يا مره القرار اله لا الي و لا الج هو جبير و يعرف يتصرف و يختار احنه معلينه و هم مراح الكه احسن من بت اخوي فا اريد تعدين هاي الايام على خير و ماريد مشاكل ..
: شنو شقصدك اني اسوي مشاكل ..
: استغفر الله..
اني شفته راح تكب بيناتهم كلت بضحك اباوع على اخواتي : ولجن كومن اركصن و اخيرا اخوجن راح يعرس ..
كامت جمارة تهز جتف و تكول : و اخيرا ما مصدكه انفكت جبستكم ..
ضربته فاتن بضحك : عابت ولج لا تحجين هيج ..
ظلن البنات يهوسن و يركصن و غسان فرحان لفرحتي كال : ان شاءالله اتمم عليك هاي الفرحه ..
ابتسمت اله و كتله بهمس : ان شاءالله يارب..
.....................
زهراء /
يوم بعد يوم يزيد حبي لشهاب و هو ابرد منه ماكو
اتمنى منه حتى لو نظرة وحده بس هو مو ويانه ابد
اعرف كلش زين يفكر بيه و بعده شاغله باله ..
ادري بيه لحد هسه يروح يشوفه بلبستان لان شكم مره بمره اراقب حركاته بلبيت و اشوفه هواي من يتقابلون بلبستان اجي للبيت اكعد بلغرفة ابجي من الحركة صدري انمله حقد و كره على جوري ..
و من خطبه و هيا وافقت و اهله فرحوو سجاجين و نبتت بصدري يوميه اغفه و الدمعه بعيني و احلف مراح اخليه تتهنى بيه ..
من سمعته كاللهم راح اخطبه و صدك بيومه راح عمي و غسان و عمي ابو فارس راحو لبيتهم و خطوبه من اهله و كالو ننتظر هاي اليومين ..
دعيت ربي يكون انتقام منه هم و ماتريده لان اتخبل اذا صدك يصير شهاب من نصيبه..
وره ثلاث اياام جنه كلنه كاعدين و اني كاعده يمهم بدون واهس رن موبايل عمي ابو غسان..
كال :اشش اسكتو هذا اخوي ابو محمد يتصل ..
شهاب : جاوب بوية خاف ينطيك الخبر ..
خليت ايدي على كلبي دعيت ربي ما يصير شي
جاوبه شوي بعدين ابتسم و كال : الله يبشرك بلخير حضرو لعد نفسكم الخميس الي يجي نعقد عليهم لأن كافي تعبونا هذوله الاثنين..
من حجه هيج جبل من الهموم صاار على كلبي
عرفت راح يصير زواجهم و هيا وافقت عليه
قطع الاتصال و كال : الخميس خطوبتكم ان شاءالله بلعافية بوية ..
كام شهاب بأبتسامه باس راسه ابوه و راس أمه
خالتي ظلت تباوعلي بحسرة و كالت : ما صارت الي ابالي مع الاسف والله..
عرف قصده شهاب حجه و هو راص على سنونه
:يمه هذا النصيب ..
سكتت ماحجت شي خوف من زوجه اني وكفت على حيلي همه باوع عليه انطاني نظره شهاب و دار وجهه
عفتهم و صعدت فوك لغرفتي سديت الباب و رحت كعدت بلكاع ابجي ..
ظليت اجر النفس كوه و اشهك من البجي
خليت ايدي على وجهي كلت :ليش هيج شهااب ليش أنت ما تحبني شنو الي ناقصني و ما تحبني مو اني والله احبك و أموت عليك ..
:ليش تاخذ جوري و تعوفني الي ..
كمت من مكاني و اني احس نفسي راح ادخل بحالة جنون كمت و ظليت ابجي و اشهك رحت لجرباية ذبيت المخدات بلكاع و الفراش و ابجي بحركة حتى المكياج و العطور طشرتهن بلكاع ..
كعدت بلكاع ابجي شوي و انفتح الباب رفعت راسي شفت خالتي داخله من شافتني شهكت : يمعزاية شبيج ولج ..
دخلت و قفلت الباب وراها حتى لا احد يشوف
اجت يمي و كعدت بصفي باوعتلي و كالت
:كله علمود شهاب هلكد تحبيه ؟
حضنته بسرعه و ابجي : خاله احب شهاب ماكدر اشوفه يروح لغيري ..
ظلت تمسح على راسي حجت بأسف : مادري ابني ليش معمي عيونه و مايشوف هذا الحب كله و ذال نفسه على ذيج ..
رفعت راسي الي ظلت تمسح دموعي كال بحنية
: يمه شهاب ما يستاهل انتي تستاهلين شخص يحبج
والله بعدين يعوضج ..
كتله بحركة: ماريد اي احد اريد شهااب انتي السبب
خليتيه بعقلي و بكلبي كلتي شهاب الج مايصير لغيرج
و اني كبرت و خليت هذا الشي ابالي و تالي هسه تكليلي تستاهلين غيره ..
كالت بأستغراب : ولج ليش هيج تحجين عليه مو تدرين اني اريده الج بس هو شسوي اذا يريده ..
كتله بقهر :لا تسوين شي خاله خليه يتزوجه بس جوري اني اله ..
رفعت حاجبه : شقصدج ..
انتبهت على نفسي : هيج خاله ماكو شي على كلامج
الله يسعدهم و اني استاهل الي احسن منه و اذا ما يريدني اني هم ماريده ..
كالت بشك : شوفي زهراء لا تسوين شي ترى صح اني ماحب جوري بس ماريد ادمر حياة ابني شهاب ..
اتصنعت الابتسامة كتله : لا تخافين خاله شسوي قابل ..
ابتسمت و كالت : الله يعوضج يمه ..
ابتسمت اله عافتني و فتحت الباب و طلعت رجعت سدت الباب وراها ..
اول ما طلعت محيت الابتسامة و رجعت نظراتي حقد و كره لجوري ..
كلت بحقد : ماشي جوري اخذيه بس والله مراح اخليج تتهنين بيه هو مايريدني خوش بس اشوفكم زهراء شتسوي والله ادمركم مثل ما دمرتوني و الايام راح تثبت ..
بقيت اليوم كله كاعده فوك ما نزلت صار الليل سمعت باب غرفة شهاب انسدت ..
رحت بسرعه لابسه تراك و القميص يوصل لركبه طويل
طلعت و رحت لغرفة شهاب لبست حجابي دكيت الباب و دخلت..
لكيته ماكو شوي و انفتح باب الحمام باوعت هو ظل يباوعلي مستغرب بعدين تحولت نظراته لعصبية من شاف ملابسي ..
اقترب و كال بعصبية : شتسوين بهذا الوقت بغرفتي و شلون دخلين بهذا لبسي كدامي لو اجه احد و شافنه يلا امشي طلعي بره ..
اقتربت عليه اكثر و كتله و دموعي تلالي
: شهاب ليش هيج تسوي بيه مو اني احبك اموت عليك ليش تاخذ جوري ..
عصب اكثر : كتلج سدي هذا الموضوع الف مره اكلج اني ما احبج اني احب جوري و مراح احب غيره ..
بدون سابق انذار حضنته بسرعه و ظليت ابجي
و اكله : بس اني احبك فدوة لا تزوجه ..
لزمني من كتوفي و سحبني من يمه بقوة
باوعت عليه ماحس غير راشدي اجه على وجهي
باوعت عليه و ابجي كال بعصبية :طايحة الحظ ماعندج كل كرامة افهمي كتلج اني ما احبج و من هسه شفت الي سويتيه لعبت نفسي منج اكثر حتى ما اتشرف انتي من اهلي امشي اطلعي بره يلااا ..
ظليت ابجي هو صيح عليه :الظاهر ما يفيد وياج الحجي ..
جرني من ايدي بقوة و سحبني وراه فتح الباب
و سحبني بره غرفتة وكعت بلكاع باوعت عليه و ابجي و الشال وكع من راسي كال بعصبية : بعد ماريد اشوفج تعتبين باب الغرفة .. فهمتي؟
الدموع اتجمعت بعيوني كتله بكره و حقد
: مفهووم ..
سد الباب بوجهي كلت بحقد : شهاب والله مراح اخليك تتهنى وياها و هذا اني حلفت ..
كمت من مكاني و ابجي و كرهت نفسي ذليته هواي بسبب شهااب حبي الي راح و كرامتي حلفت الا ارجعه من يمهم و اخذ حقي اني كتله احبك ليش هيج يسوي بيه ..
مرت الايام و كله تحضر للخطوبة و الي يشتري فساتين سويت نفسي اني فرحانة و حتى استغربو مني لان يعرفوني احبه و رحت اشتريت فستان لنفسي ..
و اعتذرت من شهاب كتله :شهاب اتمنى منك تنسى هذاك اليوم صدكني متندمة و الي حجيته خلاني اصحى على نفسي ..
كال بدون نفس : اتمنى تتعلمين من الي سويته ..
بدموع تماسيح مثل ما يكولون نزلتهن و كمت ابجي كدامه كتله : سامحني فدووة و اني غلطت و صحيت على نفسي الحب مو بلغصب و تستاهل أنت و جوري
و الله يسعدكم ان شاءالله و صدك اتمنالك السعادة اني ..
من شافني هيج ابتسم بوجهي كال : يي هيج اريد
زهراء الي اعرفه و اني مسامحج ..
كتله :اتمنى نرجع مثل قبل علاقة اخوية
و لا تشيل عليه و تعتبرني بمثل جمارة..
ابتسم و كال : ولج تبقين اختي انتي يلا هسه اني لازم
اروح عندي شغل ..
ابتسمت اله وسط دموعي : الله وياك ..
عافني و مشه مسحت دموعي بأبتسامة كلت :
اول شي نجحت بيه ارجع ثقة شهاب اليه و يعتبرني اني نسيت كلشي بس الدور وياج جوري ..
صار يوم الخطوبة لبست فستان طويل اسود و بيه لمع فضي و فتحه جانبية طويل يم الساق و الحمالات نازله على الاكتاف رفعت شعري و نزلت خلصه و مكياج لونه صارخ قوي ..
باوعت على نفسي بلمراية مبتسمه طلعت لبست عباتي
رحنه من وكت عود نساعدهن حتى البنات ما بدلن بس اني بدلت ..
رحنه و كالو العروس جوه بلغرفة كاعد يسون اله
خطرت على بالي فكرة ابتسمت بخبث سحبت نفسي
بدون ماحد يعرف شنو الي اسويه ..
صعدت فوك و اني اباوع خاف احد موجود بس محد شافني دخلت لغرفته و سديت الباب وراي ..
باوعت وضحكت اقتربت و كلت بخبث
: ماخليج تتهنين بيه يا جوري ..
......................
جوري /
من اجو عمامي و طلبو ايدي لشهااب اهلي مثل الي استغربو ما عدا شاهر الي اشوفه مبتسم و عادي مو مثل اول مره من خطبني و قبلت ..
كال محمد : بوية احنه عرفنه شنو سبب الي سواه و كلنه سامحناه ماعدنه كل مانع يجي يخطبه بس القرار لجوري ..
كال أبوي : ها بوية شكلتي ..
ابتسمت و كتله : موافقة بوية ..
انطيتهم الموافقة و ما اسمع غير صوت الهلاهل
ابتسمت و رحت ركض لغرفتي خجلانه ..
دخلت لغرفتي و خليت ايدي على كلبي يدك بسرعه
متوترة و فرحانه هم صارلي شكد ما فرحت هيج ..
من صار يوم الخطوبة كعدت الصبح اجت ام الصالون تشتغلي
كعدت خايفة و متوترة خفت لا يصير مثل الي صار قبل خمس سنين خاف هم يعوفني و يمشي ..
اجن يمي فاتن و زينب و الباقيات هناك يحضرن
هذيج الايام شهاب يتصل و اني ارفض اخر شي كتله اصبر لبعد العقد و صدك عافني ..
سوتلي مكياج ناعم و نازك و خلت شعري مفتوح احلى
و الفستان لونه زيتوني البنات ماقبلن اشتري لون ماروني لان كالن نخاف منه بهذيج الخطوبات لبستيه..
خلصت من يمي و رحت اصعد فوك اغير ملابسي
صعدت وياي جمارة و اجت ميامين همين ظلن يشاقن وياي و يضحكن ..
دخلنه للغرفة باوعت و انصدمت من الي شفته
شهكت ميامين كالت جمارة بصدمة : شنو هذا ..
يتبع ..🦋
انتهى البارت اتمنى يعجبكم 💕
لا تنسون الايك +التعليق ✔
~~~~~~~~~~~~~~~~~~~~~~~
اهلا احبتي اخباركم يارب بخير مشتاقين هواي
اعتذر عن الانقطااع لفترة طويلة بس اني قبل و نوهت عندي ظروف و طلبت منكم الدعااء
هذيج الفترة جانت شوي صعبة و الحمدلله عدت
أيام مال الزم الموبايل و الواتباد عفته كله مالي واهس بيه + انقطاااع النت و الكهرباااء بحيث ربع ساعه تجي الكهربااء و خمس ساعات ماكو و اكثره تعرف كلامي صحيح لان قريت تعليقات يجذبوني يكلولي النت كلش زين و شنو هاي الاعذار الي تخلقيه
انتي ما تردين تكتبين على شنو اجذب عليكم يعني صدك مصدومة من كثر الردود و التهجم عليه و انتو كلشو ما تعرفون بس تردون القصة تكمل و ما تهتمون الشخص شبيه مابيه ..
ترى حالي من حالكم هم عندي شي يمنعني اكتب
و ترى الكتابة مو شي سهل حتى اكتبه بسرعه
ترى والله اهلي ما اشوفهم بسبب كتابة القصة
كله اكعد وحدي حتى بس اكتبلكم و البارت يطلع يعجبكم
وكل الاحترام والتقدير للي انتظرني و سئل عن احوالي مو عن الرواية🙂 و قدر ظروفي احبكم نفر نفر و ان شاءالله نرجع نكتب الكم بس راح نرجع بين يوم و يوم لان راح يبدي الدوام يمكن..