برجوع الاثنين من شغلهم كان الاول يشتكي همه للثاني
-يا كاظم خلفتي كلها سكايط(معوقين) وفوك هاي كلهن نسوان ما اجانا لهسه وليد افرح بي ومنو يكول يجيني ولد صاحي يصير عون الي ولخواته وعماته...تعبت سنين اركض وتعبت من نظرة الناس الي ولخلفتي ..اخواني كل واحد حار بدنيته وخلفته ونسوني اني وهالكوم برقبتي ..ما فكر واحد منهم يشيل فلس ويناوشنا مو الي عاد لامي وللبنات خواتهم هم نسوهن
-كول يا الله ..تعال اكعد بالبيت نشرب استكان الجاي ..وين رحت اني وانت حاير بهمك هيج اني اخوك وبس اشر ..محتاج فلوس اني ومالي جوه رجلك
-الحمد لله دابرة ومستورين اني ما احجي لليوم افكر باجر عكبة هاي دنيا واني اذا صار عليه شي منو الهم خواتي وامي وبناتي ولك راسي شاب من التفكير
-عمرك طويل يمعود ومحد مات وره احد يعيشون بس تعال هنا انت تضل على بنت عمك هاي خمس بطون ولا واحد صاحي تضل تدفن واحد بصف واحد تسطرهم للكبور
-بيدي هو يا خوي كلها هاي بيد ربك
-وربك كال اسعى يا عبدي واني اعينك
-يعني شسوي
-تزوج يا خوي شنهي ضال بلا وليدات
-واكسر الحرمه فقيرة وما مأذيتني
-لو تحبك تسكت وتريد الك الخير وهاي انت تكول هي فقيرة يعني تقنعها!!
-لا مو خوش سالفة هاي بنت عمي خطية وبعدين منو التقبل وتاخذ واحد هلكد حلوك وراه
-والله لو عندي اكبر ما اعزها عليك ..بس هاي مريم اختي كبع واخذ اذا تفيدك
صد غاد شافها كاعده بالشمس بحوش اهلها ومخليه لعابة قماش بحضنها صغيرة بكصايب..ضحك ورجع باوع لصاحبه
-ولك هاي جاهل مخبل انت وتشمرها لا تكولها لغيري هالسالفة
-ليش اشمرها ومنو كال الك متعاجز من لكمتها اخيتي هاي ..بس هم انت صاحبي وتدير بالك عليها وهي لا ام ولا اب مثل ما تشوف الوصخ كاتلها وهاي التصطخي من نسوان الحي تاخذها تسبحها وبس اني ونايف لو ندبر نوكلها لو ما ندبرها عالاقل يم امك وخواتك ويراعوها ولو ما اعرفك كدها ما اعرضها عليك
-امها وين راحت
-اجت شمرتها هنا بالبيت وطلعت يمعود هم حاسبها ام هاي حتى الصخول تلد ..ها تقبل لو ارجع بسالفتي
-ههه ولك مو هيج گبل تگلب علي...زين واني ما عندي سياگها(مهرها) مو تدري بالحال وعلى يدك كل فلس يطب ويطلع
-لا تهم بهاي.. سياگها رجال مو فلوس اني مشتريك
-زين وشلون بعدها زغيرة
-كلها سنه وتكبر
-يعني ما بالغة لسه ؟؟
-ولك شني تريد احجيلك ؟؟تاخذها هسه لو لاع
-اخذها ..شبيك بس!!
-شو بعدك تبسبس ما تريدها؟؟ عمي ياحچاية وردي لمچانچ وچن ما سمعتني شحجين
-ول ما كلت ما اريد اني
-شگلت
-انت كرمتني المره واني ماخذها وبسياگها ناطيك اني هم ..
فرح شاكر وكان مفكر يفتح الموضوع وياه بعد ما ينطيه اخته حتى يكسر عينه ومن يخطب خواته يوافق بلا تردد ويضغطون عليه وهنا نصيف سهلها عليه وتورط !!
