رفعته ليجلس على السور، التقطت له العديد من الصور، فالمنظر خلاب للغاية، و بوجود النيل في الخليفة اضاف للصورة جاذبية خاصة.
أعطته القليل من الحلوى و هي تقبله، قائلة:
_ شوفت ان خالتك هند جدعة و قد كلمتها و خرجت زي ما وعدتك.
التوى فمه و هو يتمتمم ببعض الكلمات، ليقول لها في حدة:
_ خروجت ايه دي ان شاء الله، انا كنت عايز اروح دريم بارك، بس انتي اصريتي تجيبيني هنا، و من ساعة ما جينا و احنا عمالين نشوف شوية حيطان.
أنزلته من على السور و هى تقول له بتهكم:
_ أقولك ايه بس ما انت عيل مش فاهم حاجة، دا قصر عائشة فهمي، دا تحفة جدا، بدل ما تشكرني اني بوديك اماكن عمرك ما كنت هتفكر تروحها، تعرف ان عائشة فهمى دي ...
قطعت كلماتها سريعًا عندما أمتعض وجه معاذ، ليقول لها بملل:
_ كملي يا خالتو عارف إنك عندك حكاية و هتموتي و تقوليها فقوليها و خلاص.
تعالت ضحكاتها على نبرته الساخرة، لتكمل حديثها :
_ فعلا انا عندي حكاية و كنت هموت و أقولها، بس حسيت انك زهقان مني، بس طلما انت قولتلي اكمل فأنا هكمل.
بص يا سيدي عائشة فهمي كانت شقيقة علي فهمي و اللي كان شاب ثري جدًا ، و والدهم كان من أثرياء مصر في عهد الملك فؤاد الأول، القصر دا في الأول كان ملك لعلي فهمي ، لكن لما مات عائشة فهمي أشترت نصيب أخواتها في القصر و عاشت فيه و بعدين اتجوزت يوسف بيك وهبي و عاش معاها في القصر دا سنين طويلة جدًا لغاية لما ماتت.
بس بقا القصر دا ليه حكاية انا بشوفها حزينة و مُرعبة، علي فهمي كان شاب مُدلل جدًا و كان مستهتر جدًا جدًا ، و في مرة شاف مغنية فرنسية و أعجب بيها، و أصر انه يتجوزها و طبعًا أهله رفضوا بس هو قرر فعلا انه يتجوزها حتى لو أهله رفضوا فعلشان كدا بنا لها القصر التحفة دا ، و طبعا هى وافقت و اتجوزوا، بس للأسف علي متصلحش حاله و كانوا دايمًا هما الأتنين في خناق علشان خاطر أختلاف الثقافات اللي بينهم، فبعد 6 شهور بس من جوازهم مراته قتلته، و طبعا إنجلترا و فرنسا اتدخلوا علشان يدافعوا عنها بس المصريين كانوا شايفين ان اللي هي عملته دا جريمة و لازم تتعاقب عليها ، بس طبعا كلام فرنسا و انجلترا هو اللي مشي ، و المغنية دي اتبرأت و بقت مغنية مشهورة جدًا.
و يوسف وهبي لما عرف القصة دي، عملها فيلم و كان أسمه "أولاد ذوات*" ، و بس بقا في سنة 1975 وزارة الثقافة ضمت القصر دا الى هيئة الفنون و الأدب و قطاع الفنون التشكيلية، و بس كدا يا سيدي و بقا من اهم الأماكن الثقافية في القاهرة ، خلصنا خلاص، تعالى بقا أصورك صورتين علشان نلحق نروح قبل ما مامتك تتصل.
بالفعل التقطت له بعض الصور، ثم خرجوا من القصر عائدين إلى منزل شقيقتها مرة أخرى، و قد أُنهكت من نزهة اليوم.
____________________________________________
* فيلم أولاد ذوات: هو أول فيلم عربي ناطق ، بطولة يوسف بيك وهبي، أمينة رزق، و أنوار وجدي.
و كالعادة المصادر اول تعليق ♥️
أنت تقرأ
على مر العصور
Historical Fictionالتاريخ بيعيد نفسه و كذلك التجارب، مش بس التجارب الناجحة كمان التجارب الفاشلة ممكن تلهمنا للنجاح. إسكريبتات قصيرة لعدة شخصيات ملهمة.
