#جوليت وأسرها....

بارت 29

خطيه جانت محتاره بي وابو كل شويه وكله...ولك بويه بعد ابووك دروح للمستشفئ ليش هيج ضال

وهو يرد عليهم ...مابيه شئ بس شويه حراره بمعدتي...

واني جنت واكفه بس اباوع عليه واستحي منه جنت هسه عروس واني مو هلكد علاقتي بي بس جنت مقهوره عليه وكل شويه اروح اباوع عليه وأسأله عن صحته...

ومتوتره حييل وافرك باديه وهو نايم بالاستقبال علئ القنفه ليش ما ركض للحمام ديريد يتقيئ ...

وماما رضيه دفعتني بسرعه كالت...ولج اركضي اركضي شوفي رجلج شبي غسليله وبوسي وامسحي وجهه حتئ يحبج ...

اني هماتين ما اعرف طكيتهه ركضه وراه واني متوترة ومتردده شفته لازم المغسله وديتقيئ اتقربت منه بارتباك...

وحطيت ايدي علئ ضهره ولزمته ...هاااا جاااسر بييك شئ خليني اغسلك ..

عود دا اريد اغسله واني مدري شصار بيه معدتي كلبت واني ذبيت شكو ببطني انوب هو ضل يغسلي ويغسل بوجهي...

انطاني الخاولي وابتسم بسخريه كال...شنو لعبت نفسج مني ؟

بلعت ريكي بخجل وفشلة...لااا اءء لا والله مم مااا متعلب نفسي منك والله بالعكس ببب بس

لزم اديه واخذ الخاولي وهو ينشف بوجهه...اي بس شنوو؟

بلعت ريكي بصعووبة...اءء والله والله اني ما احب البيض واكلت بيض واني اصلا نفسي لعبانه من الصبح ...

رد بوقاحه بعد ما انطاني الخاولي...لو نايم وياج جان كلت حامل

حسيت عبالك ضربني راشدي ضليت ارمش بعيوني من خجلي يممه عزا ما اتخيل بتقرب مني رغم ماما رضيه ماكله مخي تدلعي عليه وتقربي منه

وابو من يشوفه يضل يبسمر بي واني مدري شبيه من يحجون هييج عبالك انضرب بوكس ببطني واحس اسخن و وجهي يشتعل نااار ...

رحت اركض وراه واني ابرر موقفي ...اني اءء اني والله هاي مو من هسه من زمان من اكل بيض تلعب نفسي لهيج اني ما اكل بيض الصبح بس اكل جبن لان ما يلعب النفس والله والله...

دار وجهه عليه وابتسم كال...اي ادري والله ادري

نزلت عيوني باسئ...بس والله ما لعبت نفسي منك والله انت زوجي شلون تلعب تفسي منك والله يعني حتئ هسه اني حغسل المغسله والحمام هل شئ مسؤؤليتي

وانت زوجي ومريض،لازم اساعدك واكون بصفك ولا تحسس من موقفي والله لا ارادي ..

ضحك وهز راسه بقبول...ولج والله اعررف اعرف شبيج جنت اشاقه وياج ادري بيج متلعب نفسج مني

فركت اديه بتوتر...اي وداعة ماما اببد متلعب نفسي منك ...اذا تريد تقيئ عليه

ضحك بصوت عالي وكرص خدي وبعدها كال بتنهيده...شكد بريئة انتي تستاهلين الاحسن مني