ﺧﺎﻟﺘﻲ _ ﺷﺮﻳﻔﺔ _ ﺍلحلقهﺍﻟﺘﺎﻣﻨﺔ
ﻗﻠﻨﺎ ﻋﺎﺩ ﺍﻟﻘﻔﻪ ﺍﺗﺴﻘﺪﺕ ﻭﺍﻟﺪﺭﺑﻮﻛﺔ ﺭﺍﺑﺨﺔ ﻭﺍﻟﻐﻨﻲ ﻭﺍﻟﺰﻏﺎﺭﻳﺖ ﻭﻛﻞ ﻣﺮﺓ ﺍﻳﻨﻮﺿﻮﺍ ﺻﺪﺍﺭﺓ ﺗﺮﻗﺺ ﻭﻳﻐﻨﻮﺍ ﻋﻠﻴﻬﺎ .... ﺟﺖ ﻭﺣﺪﺓ ﻣﻦ ﺍﻟﻨﺎﻧﺎﻭﺍﺕ ﻟﻔﺘﺤﻴﺔ ﻭﻧﻮﺿﺘﻬﺎ ﺑﺎﺵ ﺗﺮﻗﺺ !!! ﻧﺎﺿﺖ ﻓﺘﺤﻴﺔ ﻭﺍﺑﺪﺕ ﺗﺮﻗﺺ ﻭﻫﻤﺎ ﺍﻳﻐﻨﻮﻟﻬﺎ ﺑﺰﻳﻨﻬﺎ ﻭﻃﻮﻟﻬﺎ !!! ﻭﻓﻲ ﺍﻟﻠﻴﻞ ﺟﺎﺑﻮﺍ ﻟﻌﺸﻲ ﺍﻳﻔﺤﻔﺢ ﻭﻧﺎﺿﺖ ﺍﻟﻨﺎﻧﺎ ﺣﺴﻨﻴﺔ ﺗﺘﻔﻘﺪ ﻓﻲ ﺿﻴﻮﻓﻬﺎ .... ﺟﺖ ﻟﻔﺘﺤﻴﺔ ﻗﺎﻟﺘﻠﻬﺎ ﺧﻴﺮﻙ ﻗﺎﻋﺪﺓ ﺍﻣﻘﻌﻤﺰﺓ ﻧﻮﺿﻲ ﺑﺎﺵ ﺗﺘﻌﺸﻲ !!! ﻗﺎﻟﺘﻠﻬﺎ ﺑﻼ ﻟﻤﻮﺍﺧﺪﺓ ﻳﺎ ﺍﻟﻼﻱ ﺳﺎﻣﺤﻴﻨﻲ ﻣﺎﻧﻘﺪﺭ ﺍﻧﺤﻄﻪ ﻓﻲ ﻓﻢ ﺍﻧﺤﺲ ﻓﻲ ﺭﻭﺣﻲ ﺯﻱ ﺍﻟﻠﻲ ﺑﻨﺪﻭﺥ ﻭﻛﺎﻥ ﻧﻠﻘﻰ ﺗﺒﻌﺘﻮﺍ ﻟﻜﻤﺎﻝ ﺍﻳﺮﻭﺡ ﺑﻴﺎ .... ﻗﺎﻟﺘﻠﻬﺎ ﺍﻟﻼﻫﺎ ﺍﻟﻠﻄﻒ ﻛﻴﻒ ﺑﺘﺮﻭﺣﻲ ﻭﺍﻟﻌﻴﻠﺔ ﺑﺎﻳﺘﻴﻦ !!!! ﻗﺎﻟﺘﻠﻬﺎ ﻋﺎﺭﻓﺔ ﻳﺎ ﺍﻟﻼﻱ !!! ﻃﻴﺤﺘﻲ ﺍﻣﺒﻜﺮﻱ ﺩﺍﺭﺗﻠﻲ ﻭﺟﻊ ﻓﻲ ﺭﺍﺳﻲ !! ﺍﻋﻄﻴﻨﻲ ﻟﺬﻥ ﺍﻟﻠﻴﻠﺔ ﺑﺲ ﻭﻏﺪﻭﺓ ﺍﻥ ﺷﺎﺀﺍﻟﻠﻪ ﻳﺼﺒﺢ ﺣﺎﻟﻲ ﺑﺎﻫﻲ ﻭﻧﺒﺎﺕ !!! ﻗﺎﻟﺘﻠﻬﺎ ﺧﻼﺹ ﺍﻣﺎﻻ ﺗﻮ ﻧﺒﻌﺖ ﻟﻜﻤﺎﻝ ﺍﻳﺠﻴﻚ ﻟﻜﻦ ﻏﺪﻭﺓ ﺍﻟﺤﻲ ﺩﻳﺮﻱ ﺣﺴﺎﺑﻚ ﺑﺘﻘﻌﺪﻱ ... ﻗﺎﻟﺘﻠﻬﺎ ﺣﺎﺿﺮ .... ﻭﻓﻌﻼ ﺭﻭﺣﺖ ﻓﺘﺤﻴﺔ ﻭﺧﻠﺖ ﻭﺭﺍﻫﺎ ﺍﻟﺴﻬﺮﻳﺔ ..... ﻭﻣﻦ ﻟﻤﺎ ﻭﺻﻠﺖ ﻟﻠﺤﻮﺵ ﻭﻛﻤﺎﻝ ﻳﻨﺸﺪ ﻭﻳﻌﺎﻭﺩ !!! ﻋﻠﻰ ﻣﻦ ﺳﻠﻤﺘﻲ ﻭﺷﻦ ﻗﺎﻟﺘﻠﻚ ﺍﻣﻲ ﻭﺷﻦ ﻗﺎﻟﻮﺍ ﻋﻠﻴﻚ ﺍﻟﻌﻴﻠﺔ ﻭﻣﻦ ﺷﻔﺘﻲ ﻭﻭﻭﻭﻭﻭ ﺿﺤﻜﺖ ﻓﺘﺤﻴﺔ ﻗﺎﻟﺘﻠﻬﺎ ﻗﺒﻞ ﻣﺎ ﻧﺤﻜﻴﻠﻚ ﺑﻨﻘﻮﻟﻚ ﺍﻥ ﺍﻟﻠﻲ ﻗﻠﺘﻬﻮﻟﻚ ﺻﺎﺭ ... ﺍﻣﻚ ﺷﺪﺗﻨﻲ ﺍﻧﺒﺎﺕ ﻭﺳﻘﺪﺗﻨﻲ ﻭﻫﻴﺎ ﺍﺗﻘﻮﻟﻲ ﺍﺗﻌﺎﻟﻲ ﻏﺪﻭﺓ ﺑﻜﺮﻱ ﻭﺩﻳﺮﻱ ﻓﻲ ﺣﺴﺎﺑﻚ ﺑﺘﻘﻌﺪﻱ ... ﻗﺎﻟﻬﺎ ﻛﻤﺎﻝ ﻭﻫﻮ ﻓﺮﺣﺎﻥ ﻭﻫﺬﺍ ﺍﻟﻠﻲ ﻧﺒﻴﻪ ..... ﻭﺗﺎﻧﻲ ﻳﻮﻡ ﻣﻊ ﺍﻟﻀﺤﻰ ﺍﺗﺴﻘﺪﺕ ﻓﺘﺤﻴﺔ ﻓﻲ ﻛﺮﻭﺳﺘﻬﺎ ﻟﻤﺰﻳﻨﺔ ﻭﺍﻭﻝ ﻣﺎ ﻧﺰﻟﺖ ﻭﺧﺸﺖ ﻟﻠﺴﻘﻴﻔﺔ ﻗﺎﻟﺖ ﺍﻟﻠﻪ ﺍﻫﻮ ﺍﻟﻴﻮﻡ ﻗﻠﺒﻲ ﻣﺮﺗﺎﺡ !!!! ﺧﺸﺖ ﻭﺻﺒﺤﺖ ﻋﻠﻰ ﻟﻌﻮﻳﻠﺔ ﺍﻟﻠﻲ ﻛﺎﻧﻮﺍ ﺍﻣﻘﻌﻤﺰﻳﻦ ﺍﻳﻬﺪﺭﺯﻭﺍ ﻣﺒﺴﻮﻃﻴﻦ ... ﺍﻟﻨﺎﻧﺎ ﺣﺴﻨﻴﺔ ﻋﻴﻮﻧﻬﺎ ﺿﺤﻜﻮﺍ ﻟﻤﺎ ﺧﺸﺖ ﻓﺘﺤﻴﺔ ﻭﻫﻴﺎ ﻣﺘﻠﺤﻔﺔ ﻓﺮﺍﺷﻴﺘﻬﺎ ﻟﺤﺮﻳﺮ ﻭﻓﻲ ﺍﻳﺪﻫﺎ ﺑﺨﺸﺘﻬﺎ ﻟﻤﻄﺮﺯﺓ !!! ﻗﺎﻟﺘﻠﻬﺎ ﺻﺒﺤﻚ ﻭﺭﺑﺤﻚ ﻳﺎ ﻟﻠﻼ ﻭﺍﺷﺮﺗﻠﻬﺎ ﻋﻠﻰ ﺩﺍﺭﻫﺎ ﻭﻗﺎﻟﺘﻠﻬﺎ ﻫﻮﻳﻨﺎ ﺩﺍﺭﻱ ﺣﻄﻲ ﻓﻴﻬﺎ ﻓﺮﺍﺷﻴﺘﻚ ﻭﺑﺨﺸﺘﻚ ﻭﺍﺗﻌﺎﻟﻲ .... ﺍﻣﺸﺖ ﻓﺘﺤﻴﺔ ﻭﺍﻟﻠﻲ ﺍﻣﻘﻌﻤﺰﻳﻦ ﻛﻠﻬﻢ ﺍﻳﺘﺒﻌﻮﺍ ﻓﻴﻬﺎ ﺑﻌﻴﻮﻧﻬﻢ ..... ﻧﺤﺖ ﻓﺮﺍﺷﻴﺘﻬﺎ ﻭﻃﺒﻘﺘﻬﺎ ﻭﻟﻔﺘﻬﺎ ﻓﻲ ﻭﺳﻂ ﺑﺨﺸﺘﻬﺎ ﺍﻟﻠﻲ ﻓﻴﻬﺎ ﺣﻮﺍﻳﺠﻬﺎ ﻭﻛﻞ ﻣﺎﻳﻠﺰﻣﻬﺎ !!! ﻭﻟﻤﺎ ﻃﻠﻌﺖ ﻣﻦ ﺍﻟﺪﺍﺭ ﻭﺟﺖ ﻗﻌﻤﺰﺕ ﺑﺤﺪﺍﻫﻢ ﺍﻧﻌﺠﺒﻮﺍ ﺑﻴﻬﺎ !!! ﻛﺎﻧﺖ ﻻﺑﺴﺔ ﻗﻔﻄﺎﻥ ﻋﻠﻰ ﻣﺎﺣﻼﻩ ﻗﻤﺎﺷﻪ ﺷﻴﻔﻮﻥ ﻧﺎﺯﺍﻝ ﻃﻮﻳﻞ ﺍﻣﺘﺒﻊ ﺟﺴﻤﻬﺎ ﻭﺍﻟﻜﻢ ﺍﻓﺼﺎﻟﺔ ﺍﻟﻤﺮﻭﺣﺔ ﻣﺸﺪﻭﺩ ﻓﻲ ﺍﻟﻤﻌﺼﻢ ﺑﻜﺸﻜﺸﻪ ﻭﺍﻟﺮﻗﺒﺔ ﺑﺎﻟﺒﻄﻢ ﻣﺘﺴﻠﺴﻠﺔ ﻭﺣﻮﺍﺷﻴﻬﺎ ﺍﻣﻔﺮﻓﺮﺓ !!!! ﻭﺷﻌﺮﻫﺎ ﻣﻠﻤﻮﻡ ﻋﻠﻰ ﺍﻟﺠﻨﺐ ﻭﻣﺸﺪﻭﺩ !!! ﻗﻌﻤﺰﺕ ﺟﻨﺐ ﺍﻟﻼﻫﺎ ﺍﻟﻠﻲ ﻓﺮﺣﺎﻧﻪ ﺑﻴﻬﺎ !!! ﻗﺎﻟﺘﻠﻬﺎ ﻛﻴﻒ ﺣﺎﻟﻚ ﺍﻟﻴﻮﻡ !! ؟؟ ﻗﺎﻟﺘﻠﻬﺎ ﺍﻟﺤﻤﺪﻟﻠﻪ ﺑﺨﻴﺮ !!! ﻟﻤﺎ ﻗﻌﻤﺰﺕ ﻓﺘﺤﻴﺔ ﺷﺎﻓﺖ ﻟﺠﻴﻬﺔ ﺩﺍﺭﻫﺎ ﻟﻤﺎ ﻛﺎﻧﺖ ﻣﻌﺎﻫﻢ !!! ﺍﻗﻌﺪ ﻓﻜﺮﻫﺎ ﻳﺴﺮﺡ ﺑﻴﻬﺎ ﻛﻴﻒ ﻛﺎﻧﺖ ﺍﺗﻘﻌﻤﺰ ﻭﻛﻴﻒ ﻛﺎﻧﺖ ﺗﻜﻨﺲ ﻭﻛﻴﻒ ﻛﺎﻧﺖ ﺍﺗﺤﻮﺱ ﻭﻛﻠﻪ ﻓﻲ ﻏﻔﻠﺔ ﻭﻗﻠﺔ ﻋﺮﻑ !!! ﻭﺍﻟﻬﺪﺭﺯﺓ ﺟﻨﺒﻬﺎ ﻣﺘﻮﺍﺻﻠﺔ .... ﻓﺎﻗﺖ ﻣﻦ ﺳﺮﺣﺘﻬﺎ ﻟﻤﺎ ﺷﺎﻓﺖ ﺣﻤﺎﺗﻬﺎ ﺍﻟﺼﺒﻴﺔ ﺍﺗﺤﻮﺱ ﻓﻲ ﺍﻟﻜﻮﺟﻴﻨﻪ !!! ﺷﻮﻱ ﻧﺎﺿﺖ ﻭﺧﺸﺖ ﻋﻠﻴﻬﺎ ﻗﺎﻟﺘﻠﻬﺎ ﺧﻠﻲ ﺍﻧﻌﺎﻭﻧﻚ ﻓﻴﻬﺎ !!! ﺣﻤﺎﺗﻬﺎ ﺳﻜﺘﺖ ﺗﻮ ﺷﻦ ﺑﺘﻘﻮﻝ !!! ﺑﺘﻘﻮﻟﻬﺎ ﻻ ﺻﺤﻴﺘﻲ ﺍﻧﺘﻲ ﻣﺎﺗﻌﺮﻓﻴﺶ ﺍﺿﻤﻲ ﻭﺗﻮ ﺍﻧﻀﻤﻬﺎ ﺍﺑﺮﻭﺣﻲ !!!! ﻳﺎﻭﺩﻱ ﺍﺗﺤﺸﻤﺖ ﻭﻗﺎﻟﺖ ﻓﻲ ﺧﺎﻃﺮﻫﺎ ﻫﻴﺎ ﺧﻠﻲ ﺍﺗﺤﻮﺱ ﻭﺍﻟﻠﻲ ﺍﺩﻳﺮﻩ ﺍﻧﻌﺎﻭﺩﻩ ﻭﺧﻼﺹ !!! ﻭﺍﺑﺪﺕ ﻓﺘﺤﻴﺔ ﻓﻲ ﺍﻟﻜﻮﺟﻴﻨﻪ ﺍﻳﺪ ﺑﺎﻳﺪ ﻫﻴﺎ ﻭﺣﻤﺎﺗﻬﺎ !! ﺯﻫﺮﺓ ﻭﻗﻔﺖ ﻭﻗﻌﺪﺕ ﺍﺗﺸﻮﻑ ﻟﻔﺘﺤﻴﺔ ﻣﺼﺪﻭﻣﺔ ﺍﻓﻼﺣﺔ ﻭﻣﻌﺎﻫﺎ ﺍﻧﺸﺎﻃﺔ !!! ﺍﻣﻨﻴﻦ ﺟﻲ ﻫﺬﺍ ﻛﻠﻪ !!! ﻏﺴﻞ ﻭﺗﻠﻤﻴﻊ ﻣﺎ ﻳﻨﻌﻘﺒﻮﺵ !! ﻟﺪﺭﺟﺔ ﺯﻫﺮﺓ ﺍﻟﻘﺖ ﺭﻭﺣﻬﺎ ﻭﺍﻗﻔﺔ ﻭﺍﺗﻬﺪﺭﺯ ﻋﻠﻰ ﻓﺘﺤﻴﺔ ... ﻗﺎﻟﺘﻠﻬﺎ ﺍﻟﻴﻮﻡ ﺑﻨﺪﻳﺮﻭﺍ ﺍﺭﺑﻴﻊ ﻟﻠﺼﻐﻴﻮﻳﺮﺓ ﻭﻧﺒﻲ ﺍﻧﺰﻳﻦ ﺟﻴﻬﺔ ﻣﻦ ﺍﻭﺳﻴﻂ ﺍﻟﺤﻮﺵ ﺑﺎﻟﺰﻳﺎﻥ ﻟﻤﻠﻮﻥ ﺍﺗﻌﺎﻭﻧﻴﻨﻲ ﻓﻴﻪ !!! ؟؟ ﻗﺎﻟﺘﻠﻬﺎ ﻓﺘﺤﻴﺔ ﻭﻫﻴﺎ ﻓﺮﺣﺎﻧﻪ ﺍﻳﻪ ﺍﻧﻌﺎﻭﻧﻚ .... ﻭﺍﻧﻄﻠﻘﺖ ﻓﺘﺤﻴﺔ ﻭﺍﺑﺪﺕ ﺍﺗﺤﻮﺱ ﻭﺗﻌﻮﻝ ﻭﺗﻬﺪﺭﺯ ﻣﻊ ﺳﻠﻔﺎﺗﻬﺎ ﻭﺣﻤﺎﻭﺍﺗﻬﺎ ﻭﺍﺑﺪﻱ ﺑﻴﻨﻬﻢ ﺣﺘﻰ ﺍﻟﻀﺤﻚ ﻭﺍﻟﺒﺼﺎﺭﺓ ﻭﻛﺄﻧﺎ ﺍﻟﻠﻲ ﻛﺎﻥ ﻣﺎ ﻛﺎﻥ ﺳﺒﺤﺎﻥ ﺍﻣﻐﻴﺮ ﺍﻻﺣﻮﺍﻝ !!!! ﻭﺍﻟﻨﺎﻧﺎ ﺣﺴﻨﻴﺔ ﺍﺗﺮﺍﻗﺐ ﻓﺮﺣﺎﻧﻪ !!! ﻗﺎﻟﺘﻠﻬﺎ ﺑﻨﺖ ﺧﺎﻟﺘﻠﻬﺎ ﻗﻮﻟﻴﻠﻲ ﻳﺎﺣﺴﻨﻴﺔ ﻛﻨﺘﻚ ﻓﺘﺤﻴﺔ ﻋﻨﺪﻫﺎ ﺍﺧﻮﺍﺕ !!! ؟؟ ﻗﺎﻟﺘﻠﻬﺎ ﻻ ﺍﻣﺴﻴﻜﻴﻨﺔ ﺍﻣﻴﻤﺘﻬﺎ ﺍﻟﻠﻪ ﻳﺮﺣﻤﻬﺎ ﻣﻜﺴﻮﺑﻬﺎ ﻫﺎﻟﺒﻨﻴﻪ ﻭﺗﻮﺍ ﻋﻨﺪﻫﺎ ﺯﻭﺯ ﺍﻭﺧﻴﻴﻦ ﻣﺘﺤﺎﺩﻳﻴﻦ ﻣﻦ ﻣﺮﺕ ﺑﻮﻫﺎ ﺍﻟﻠﻲ ﺍﻣﺲ ﺍﻣﻌﺎﻫﺎ ﻫﻮﻳﻨﺎ ﺷﻮﻓﺘﻮﻫﺎ !!! ﻗﺎﻟﺘﻠﻬﺎ ﺷﻮﺭﻩ ﻣﺎ ﻋﻨﺪﻳﺶ ﻓﻲ ﺍﻟﺰﻳﻦ ﻧﺼﻴﺐ !! ﺍﻧﺪﻭﺭ ﻝ ﻋﺰ ﺍﻟﺪﻳﻦ ﻣﺎﺯﺍﻝ !! ﻗﺎﻟﺘﻠﻬﺎ ﺳﻠﻔﺔ ﺣﺴﻨﻴﺔ ﻛﺄﻧﻚ ﺗﺒﻲ ﺍﻟﺰﻳﻦ ﻳﺎ ﺧﺪﻭﺟﺔ ﻋﻠﻴﻚ ﻭﻋﻠﻰ ﺍﺑﻨﻴﺎﺕ ﺍﻓﻄﻴﻄﻴﻤﺔ ﻛﻨﻨﺖ ﻣﻨﻬﻢ ﺍﺧﺘﻲ ﻣﺎﺷﺎﺀﺍﻟﻠﻪ ﺍﻟﻔﻌﻞ ﻭ ﺍﻟﺰﻳﻦ !!! ﻗﺎﻟﺘﻠﻬﺎ ﻭﺣﺪﺓ ﺗﺎﻧﻴﺔ ﻣﻦ ﻧﺎﻧﺎﻭﺍﺕ ﺍﻟﻌﻴﻠﺔ ﻭﺍﻧﺘﻲ ﻋﻼﺵ ﺗﺘﺒﻌﺪﻱ ﺍﻫﻮ ﺍﺑﻨﻴﺎﺕ ﺍﻣﻨﻲ ﺗﻌﺮﻓﻴﻬﻢ ﻭﻣﺎﻋﻨﺪﻙ ﻣﺎﺗﻘﻮﻟﻲ ﻓﻴﻬﻢ !! ﻗﺎﻟﺖ ﺧﺪﻭﺣﺔ ﺭﺑﻲ ﻳﺴﺨﺮﻟﻪ ﺍﻟﺤﺎﻝ ﺗﻮ ﺍﻟﻠﻲ ﻓﻴﻬﺎ ﺍﻟﻨﺼﻴﺐ ﺭﺑﻲ ﺍﻳﺠﻴﺒﻬﺎ !!! ﻭﻓﻲ ﺍﻟﻌﺸﻴﺔ ﻛﺎﻥ ﻭﺳﻂ ﺍﻟﺤﻮﺵ ﺍﻣﺮﺗﺐ ﻭﺍﻣﺰﻳﻦ ﻭﻛﻞ ﻣﻦ ﻋﻨﺪﻩ ﻟﺒﺴﺔ ﺧﺶ ﻳﻠﺒﺲ ﻓﻴﻬﺎ !!! ﺣﻄﺖ ﻓﺘﺤﻴﺔ ﺑﺨﺸﺘﻬﺎ ﻗﺪﺍﻣﻬﺎ ﻭﻗﺒﻞ ﻣﺎ ﺗﻔﺘﺤﻬﺎ ﻗﺎﻟﺘﻠﻬﺎ ﺍﻟﻨﺎﻧﺎ ﺧﺪﻭﺟﺔ ﺍﺷﻴﻴﻴﻴﻪ ﻳﺎ ﻓﺘﺤﻴﺔ ﺑﺨﺸﺘﻚ ﻣﺤﻼﻫﺎ ﻭﻣﺤﻠﻰ ﺗﻄﺮﻳﺰﻫﺎ !!! ﻗﺎﻟﺘﻠﻬﺎ ﺻﺤﻴﺘﻲ ﻳﺎﺧﺎﻟﺘﻲ ﻫﺎﺩﻱ ﺍﻧﻲ ﻃﺎﺭﺯﺗﻬﺎ ... ﻗﺎﻟﺘﻠﻬﺎ ﻣﺎﺷﺎﺀﺍﻟﻠﻪ ﻃﺮﻳﺰﺓ ﺍﻗﻨﻴﻴﻴﻨﻪ ... ﻭﻃﻠﻌﺖ ﻓﺘﺤﻴﺔ ﺣﻮﻟﻴﻬﺎ ﻭﻗﻤﺠﺘﻬﺎ ﻭﻓﺮﻣﻠﺘﻬﺎ ﻭﻧﺎﺩﺕ ﻋﻠﻰ ﺣﻤﺎﺗﻬﺎ ﺍﻟﻤﺘﺰﻭﺟﺔ ﺑﺘﻠﺒﺴﻬﺎ !! ﻟﺒﺴﺖ ﻓﺘﺤﻴﺔ ﺣﻮﻟﻴﻬﺎ ﺍﻟﺠﺪﻳﺪ ﻭﻗﻤﺠﺘﻬﺎ ﻭﻓﺮﻣﻠﺘﻬﺎ ﻭﺭﺷﻘﺖ ﺗﺴﺘﻤﺎﻟﻬﺎ ﻭﻟﺒﺴﺖ ﺫﻫﺒﻬﺎ ﺧﻨﺎﻕ ﺍﻟﻤﺠﺎﺭﺍﺕ ﻓﻲ ﺭﻗﺒﺘﻬﺎ ﻭﺍﻟﺪﺑﺎﻟﺞ ﻓﻲ ﺍﻳﺪﻳﺎﺗﻬﺎ ﻭﺧﻮﺍﺹ ﺍﻟﺬﻫﺐ ﻟﻤﺮﺻﻊ ﺑﺎﻟﺠﻮﻫﺮ ﻓﻲ ﻭﺫﻳﻨﺎﺗﻬﺎ !!! ﻭﻛﻤﻠﺖ ﻋﺎﺩ ﺑﻠﺒﺲ ﺍﻛﻨﻴﺪﺭﺗﻬﺎ ﻓﻲ ﺍﺭﺟﻴﻼﺗﻬﺎ !!! ﻃﻠﻌﺖ ﺭﻳﻤﺎ ﺯﻱ ﻋﺎﺩﺗﻬﺎ ﻭﻋﻴﻮﻥ ﺍﻟﺤﺎﺿﺮﻳﻦ ﻋﻠﻴﻬﺎ ﻭﺍﻟﺤﻮﻳﺶ ﺍﺗﻌﺒﻰ ﺑﺎﻻﺣﺒﺎﺏ ﻭﺍﻟﺼﻐﻴﻮﻳﺮﺓ ﻻﺑﺴﻴﻦ ﻭﺯﺍﻫﻴﻴﻦ ﻭﻓﺮﺣﺎﻧﻴﻦ ... ﻭﺍﻟﺰﻣﺰﺍﻣﺎﺕ ﺍﻳﻄﻘﻮﺍ ﻓﻲ ﺍﻟﺪﺭﺑﻮﻛﺔ ﻭﺑﻀﺎﻋﺘﻬﻢ ﻗﺪﺍﻣﻬﻢ ﻣﺤﻄﻮﻃﺔ ﻣﻦ ﺍﻟﺴﻤﻴﻨﺴﻪ ﻭﺣﻠﻮﺓ ﺍﻟﺸﻜﺎﺭ ﺍﻟﻤﺰﺑﻮﻃﺔ .... ﻭﻧﺸﻄﺖ ﺍﻟﺪﺭﺑﻮﻛﺔ ﻭﻫﺪﻳﻜﺎ ﺍﻟﺰﻣﺰﺍﻣﺔ ﺣﻄﺖ ﺍﻟﺒﻨﺪﻳﺮ ﻋﻠﻰ ﺭﺍﺳﻬﺎ ﻭﺗﺮﻗﺺ ﻭﺍﺩﻭﺭ ﻋﻠﻰ ﺍﻟﺤﺎﺿﺮﻳﻦ ... ﻣﺪﺕ ﻓﺘﺤﻴﺔ ﻓﻠﻮﺱ ﻭﺣﻄﺘﻬﻢ ﻓﻲ ﻫﺪﺍﻛﺎ ﺍﻟﺒﻨﺪﻳﺮ ﻭﺍﻟﻨﺎﻧﺎ ﺣﺴﻨﻴﺔ ﻃﺮﺑﺎﻧﻪ ﻭﺑﺎﻟﺮﻗﻴﺺ ﺍﻟﺪﻧﻴﺎ ﺍﺗﻤﻴﻞ ... ﻓﺘﺤﻴﺔ ﻓﺮﺣﺎﻧﻪ ﻭﺍﺗﺸﻮﻑ ﻟﻠﺼﻐﻴﻮﻳﺮﺓ ﻭﻛﻞ ﻣﺮﺓ ﺍﺗﺒﻮﺱ ﻭﺣﺪﺓ ﻭﺍﺗﻨﻴﻦ !!! ﻓﺎﺕ ﺍﻟﻮﻗﺖ ﻭﺍﻟﻔﺮﺡ ﺣﺎﺿﺮ .... ﻭﻓﻲ ﺍﻟﻠﻴﻞ ﻟﺒﺴﺖ ﻓﺘﺤﻴﺔ ﺍﻗﻔﻴﻄﻴﻦ ﺗﺎﻧﻲ ﺍﺣﻠﻰ ﻣﻦ ﺍﻻﻭﻝ ﻭﻃﺒﻘﺖ ﺣﻮﻟﻴﻬﺎ ﻭﺭﺗﺒﺖ ﺑﺨﺸﺘﻬﺎ ﺍﺗﻘﻮﻟﻲ ﻻ ﻓﺘﺤﺘﻬﺎ ﻭﻻ ﻣﺴﺘﻬﺎ !!! ﻗﻌﻤﺰﺕ ﻓﺘﺤﻴﺔ ﺟﻨﺐ ﺳﻠﻔﺘﻬﺎ ﻓﺮﻳﺪﺓ ... ﻗﺎﻟﺘﻠﻬﺎ ﺍﺷﻴﻴﻴﻪ ﻳﺎﻓﺘﺤﻴﺔ ﻗﻔﺎﻃﻴﻨﻚ ﺍﻗﻨﻴﻨﺎﺕ !!! ﻗﺎﻟﺘﻠﻬﺎ ﺍﻟﻠﻲ ﺍﻟﺒﺴﺘﻪ ﺍﻟﺼﺒﺢ ﺍﻣﺨﻴﻂ ﺧﻴﺎﻃﺔ ﻟﻜﻦ ﻫﺬﺍ ﻭﺍﺗﻲ !! ﻗﺎﻟﺘﻠﻬﺎ ﺍﺗﺒﻴﺪﻱ ﺑﺎﻟﻬﻨﻲ ... ﻭﻗﺎﻟﺘﻠﻬﺎ ﻗﻮﻟﻴﻠﻲ ﺷﻦ ﺻﺎﺭ ﻣﻌﺎﻙ ﺑﻌﺪ ﻣﺎ ﻃﻠﻌﺘﻲ ﻣﻦ ﺍﻫﻨﻲ !!! ﺍﻧﻲ ﻭﺍﻟﻠﻪ ﻛﻨﺖ ﻧﺒﻲ ﻧﻤﺸﻴﻠﻚ ﻟﻜﻦ ﺧﻴﺮﻱ ﺍﻳﻘﻮﻟﻲ ﻣﺎﺯﺍﻝ ﻣﺎﺯﺍﻝ ﺍﻫﻮ ﻓﺎﺗﺖ ﻻﻳﺎﻡ ﻭﺻﺎﺭ ﺍﻟﻌﺮﺱ !!! ﻗﺎﻟﺘﻠﻬﺎ ﻓﺘﺤﻴﺔ ﺷﻦ ﺑﻴﺼﻴﺮ ﻣﻌﺎﻱ !!!! ﺍﺟﺮﻧﺎ ﺍﻟﺤﻮﺵ ﺯﻱ ﻣﺎﺗﻌﺮﻓﻲ !!! ﻭﺩﺭﺕ ﺟﻴﺮﺍﻥ ﻧﻤﺸﻴﻠﻬﻢ ﻣﺮﺓ ﻣﺮﺓ ﻣﺶ ﺩﻳﻤﺔ ... ﻗﺼﺖ ﻋﻠﻴﻬﺎ ﻓﺮﻳﺪﺓ ﻗﺎﻟﺘﻠﻬﺎ ﻟﻜﻦ ﺍﺗﻐﻴﺮﺗﻲ ﻫﻠﺒﺔ !!! ﻗﺎﻟﺘﻠﻬﺎ ﺣﺘﻰ ﺍﻧﺘﻲ ﺍﺗﻐﻴﺮﺗﻲ ﻫﻠﺒﺔ !!! ﻣﻨﻮ ﻳﻘﻌﺪ ﻋﻠﻰ ﻧﻔﺲ ﺍﻟﺤﺎﻝ !!! ؟؟ ﺳﻜﺘﺖ ﻓﺮﻳﺪﺓ
ﻭﺗﺒﺎﺩﻝ ﺍﻟﺘﻬﺪﺭﻳﺰ ﻋﻠﻰ ﺍﻟﻌﺮﻭﺳﺔ ﺍﻟﺠﺪﻳﺪﺓ ﻭﺣﻜﺖ ﻓﺮﻳﺪﺓ ﻟﻔﺘﺤﻴﺔ ﻋﻠﻰ ﻗﺼﺔ ﺑﻮ ﻟﻌﺮﻭﺳﺔ ﻭﻛﻴﻒ ﻭﻟﻰ ﻟﺨﻮﺍﺗﻪ ﻭﺧﻮﺗﻪ !!!! ﻗﺎﻟﺖ ﻓﺘﺤﻴﺔ ﺍﻟﻠﻪ ﻳﺎ ﺩﻧﻴﺎ ﻗﺪﺍﺵ ﺑﻨﺎﺩﻡ ﺍﻳﺼﻴﺮ ﻓﻴﻪ ﺍﻟﺤﻤﺪﻭﻟﻠﻪ ﻋﻠﻰ ﻫﻜﻲ ﻣﺶ ﺍﻛﺘﺮ !!! ﺟﺖ ﻗﻌﻤﺰﺕ ﺑﺤﺪﺍﻫﻢ ﺯﻫﺮﺓ ﺣﻤﺎﺗﻬﻢ ﺍﻟﺼﺒﻴﺔ ... ﻗﺎﻟﺖ ﺯﻫﺮﺓ ﻟﻔﺘﺤﻴﺔ ﺣﺴﻴﺘﻚ ﻣﺘﻐﻴﺮﺓ ﻫﻠﺒﺔ !!! ؟؟ ﻗﺎﻟﺘﻠﻬﺎ ﻓﺘﺤﻴﺔ ﺧﻴﺮﻛﻢ ﻛﻠﻜﻢ ﺗﻨﺸﺪﻭﺍ ﻓﻴﺎ ﻓﻲ ﻧﻔﺲ ﺍﻟﻨﺸﺪﺓ !!! ؟؟ ﺣﺘﻰ ﺍﻧﺘﻮﺍ ﻣﺘﻐﻴﺮﻳﻦ !!! ﺍﻫﻮ ﺍﻟﻴﻮﻡ ﺍﺗﻬﺪﺭﺯﻭﺍ ﻋﻠﻴﺎ ﻭﻗﺒﻞ ﻻ !!! ﺍﻫﻮ ﺍﻟﻴﻮﻡ ﺣﺎﺳﺒﻴﻴﻨﻲ ﻭﻗﺒﻞ ﻻ !!! ﻭﻗﺼﻮﺍ ﻋﻠﻴﻬﻢ ﻧﺴﺎﻭﻳﻦ ﺍﻟﺠﻴﺮﺍﻥ ﺍﻟﻠﻲ ﺧﺸﻮﺍ ﺍﻳﺴﻠﻤﻮﺍ .... ﺍﺟﺘﻤﻌﻮﺍ ﺍﻟﻌﻴﻠﺔ ﻭﺷﻮﻳﺔ ﻣﻦ ﺍﻟﺠﺎﺭﺍﺕ ﻭﺍﺑﺪﺕ ﺍﻟﻬﺪﺭﺯﺓ ﻭﺍﻟﻀﺤﻚ ﻭﻣﺮﺓ ﺍﻳﺪﺭﺑﻮﻛﻮﺍ ﻭﻣﺮ ﺍﻳﻬﺪﺭﺯﻭﺍ ﻭﺍﻳﺎﻡ ﻭﺍﻟﻠﻴﺎﻟﻲ ﺍﻟﻔﺮﺡ ﺑﺎﻫﻴﺎﺕ ... ﻭﺗﺎﻧﻲ ﻳﻮﻡ ﺍﺻﺒﺢ ﺻﺒﺤﺖ ﻓﺘﺤﻴﺔ ﻣﻦ ﺍﻟﻔﺠﺮ ﺍﺗﺤﻮﺱ ﻓﻲ ﺍﻟﻜﻮﺟﻴﻨﻪ ﻣﻊ ﺣﻤﺎﻭﺍﺗﻬﺎ ﻭﺳﻠﻔﺎﺗﻬﺎ ﻭﺍﻟﻼﻫﺎ ﺍﻣﻘﻌﻤﺰﺓ ﺍﺗﺸﻮﻓﻠﻬﺎ ﺳﺮﺣﺎﻧﻪ ﺍﺗﻔﻜﺮ ﻓﻲ ﺍﻓﻌﺎﻟﻬﺎ ﻣﻊ ﻓﺘﺤﻴﺔ ﻛﻴﻒ ﻣﺎﺻﺒﺮﺗﺶ ﻋﻠﻴﻬﺎ !!! ﻗﺎﻟﺖ ﻓﻲ ﻧﻔﺴﻬﺎ ﺍﻫﻮ ﺍﺗﻐﻴﺮﺕ ﻭﺍﺗﺒﺪﻟﺖ !! ﻣﺶ ﻛﺎﻥ ﻭﺳﻌﺖ ﺣﻖ ﺑﺎﻟﻲ ﻭﻭﺭﻳﺘﻬﺎ ﺑﺪﻝ ﻣﻦ ﻧﻔﺮﺗﻬﺎ ﻭﺩﻟﻴﺘﻬﺎ ﻟﻠﺼﺢ ﺑﺪﻝ ﻣﻦ ﺣﻘﺮﺗﻬﺎ ﻣﺶ ﻛﺎﻥ ﺧﻴﺮﻟﻲ ﺍﻟﻠﻪ ﻏﺎﻟﺐ ﻭﺧﻼﺹ ﻫﻴﺎ ﺍﺻﻐﺮ ﻣﻨﻲ ﻭﻃﻠﻌﺖ ﺍﻋﻘﻞ ﻭﺍﺣﺴﻦ ﻣﻨﻲ ... ﻭﺣﺘﻰ ﻭﻟﺪﻱ ﺍﻟﻠﻲ ﻛﻨﺖ ﺍﻧﻘﻮﻝ ﻋﻠﻴﻬﺎ ﺗﺒﺎﻉ ﻣﺮﺗﻪ ﺍﻫﻮ ﻻﻳﺎﻡ ﻭﺭﺗﻨﻲ !! ﻭﻟﺪﻱ ﻭﻛﻨﺘﻲ ﺍﻋﻘﻞ ﻣﻨﻲ !!! ﻓﺎﺗﻮﺍ ﺳﺎﻋﺎﺕ ﻭﺟﻲ ﻭﻗﺖ ﺍﻟﻨﺠﻤﺔ ... ﺟﺖ ﻓﺘﺤﻴﺔ ﻟﻼﻫﺎ ﺣﺴﻨﻴﺔ ﻭﻗﺎﻟﺘﻠﻬﺎ ﻧﺒﻴﻚ ﺍﻧﺘﻲ ﻳﺎ ﺍﻟﻼﻱ ﺍﺗﻠﺒﺴﻴﻨﻲ !! ﻓﺮﺣﺖ ﺍﻟﻨﺎﻧﺎ ﺣﺴﻨﻴﺔ ﻭﺍﺑﺪﺕ ﺍﺗﺨﻠﻞ ﻓﻲ ﺣﻮﻟﻲ ﻓﺘﺤﻴﺔ ... ﻗﺎﻟﺘﻠﻬﺎ ﻓﺘﺤﻴﺔ ﺣﻮﻟﻴﺎ ﺟﺪﻳﺪﺓ ﺍﻭﻝ ﻟﺒﺴﺔ ﻟﻴﺎ ... ﻗﺎﻟﺘﻠﻬﺎ ﺍﻟﻼﻫﺎ ﻭﻭﻳﻦ ﺣﻮﻟﻴﻚ ﻻﻭﻝ .. ﻗﺎﻟﺘﻠﻬﺎ ﺻﺪﻗﺘﻪ ﻭﺍﺷﺮﻳﺖ ﻟﺮﻭﺣﻲ ﻛﻞ ﺷﻲ ﺍﺟﺪﻳﺪ ... ﺳﻜﺘﺖ ﺍﻟﻼﻫﺎ ﻗﺒﻞ ﻣﺎﺗﺮﺩ ﻋﻠﻴﻬﺎ ﻭﺍﺗﻘﻮﻟﻬﺎ ﻳﺎﺣﻨﻪ ﺍﺗﻌﻴﺸﻲ ﻭﺍﺗﺠﺪﺩﻱ ﻭﺭﺑﻲ ﻳﺤﻔﻆ ﺍﻭﻟﻴﺪﻱ ﻭﻳﺰﻳﺪﻩ ﻣﻦ ﺍﻟﺮﺯﻕ ﻭﺍﻟﻤﺎﻝ .... ﻛﻤﻠﺘﻠﻬﺎ ﺻﺪﺭﺗﻬﺎ ﻭﻣﻌﺎﻫﺎ ﺍﻟﻨﺎﻧﺎ ﺧﺪﻭﺟﺔ ﻋﺎﻭﻧﺘﻬﺎ.....انتظروني غدا ف الجزء التاسع ...
