ﺧﺎﻟﺘﻲ _ ﺷﺮﻳﻔﺔ _ ﺍﻟﺢﻟﻘﺔﺍﻟﺴﺎﺑﻌﺔ
ﺍﺣﻜﺖ ﻓﺘﺤﻴﺔ ﻛﻞ ﻛﺒﻴﺮﺓ ﻭﺻﻐﻴﺮﺓ ﺻﺎﺭﺕ ﻓﻲ ﺣﻮﺵ ﺑﻮﻫﺎ ﻟﺨﺎﻟﺘﻲ ﺷﺮﻳﻔﺔ ﻭﻫﻴﺎ ﺍﺗﻘﻮﻟﻬﺎ ﻛﻨﺘﻲ ﻗﻮﻳﺔ ﻓﻲ ﻛﻼﻣﻚ ﻳﺎﻓﺘﺤﻴﺔ ﻳﺎﺭﻳﺘﻚ ﺭﻃﺒﺘﻲ ﺷﻮﻳﺔ !!! ﻗﺎﻟﺘﻠﻬﺎ ﻳﺎﺧﺎﻟﺘﻲ ﺍﺭﻃﺒﺎﺗﻲ ﻓﻲ ﻗﻠﺒﻲ ﻟﻜﻦ ﻟﺴﺎﻧﻲ ﺧﻠﻴﻪ ﺍﻳﻠﻄﻌﻲ !! ﺍﻟﻌﻴﺐ ﻣﺎ ﻗﻠﺘﻪ ﻭﻫﻜﻲ ﻧﺒﻴﻬﺎ ﺍﺗﺤﺲ ﺑﻠﻠﻲ ﺩﺍﺭﺍﺗﻪ ﻓﻴﺎ ﻭﺗﺨﻤﻢ ﻣﺌﺔ ﻣﺮﺓ ﻗﺒﻞ ﻣﺎ ﺗﻌﺎﻭﺩﻩ ﻣﻌﺎﻱ !! ﻟﻜﻦ ﺍﻟﺤﻖ ﻳﺎﺧﺎﻟﺘﻲ ﻣﺮﺓ ﻣﺮﺓ ﺍﻧﺤﺲ ﻓﻴﻬﺎ ﺯﻱ ﺍﻟﻠﻲ ﺭﻏﺒﺘﻨﻲ ﻭﻗﺒﻠﺖ ﺯﻳﺎﺭﺗﻲ ﻟﻴﻬﻢ !!! ﻗﺎﻟﺘﻠﻬﺎ ﺧﺎﻟﺘﻲ ﺷﺮﻳﻔﺔ ﺍﻣﺎﻻ ﺷﻨﻮ ﻳﺎ ﺑﻨﻴﺘﻲ ﻣﺶ ﺍﻧﺖ ﺍﺧﺖ ﻭﻻﺩﻫﺎ !!! ﻭﻛﺎﻧﻬﺎ ﺗﻌﺮﻑ ﺍﺗﻔﻜﺮ ﺍﻟﻠﻲ ﻣﺎ ﻛﺴﺒﺎﺗﻪ ﺯﻣﺎﻥ ﻣﻌﺎﻙ ﺗﻜﺴﺒﻪ ﺗﻮﺍ ﺍﻭﺧﻴﺔ ﺍﺣﻨﻴﻨﻪ ﻟﻮﻻﺩﻫﺎ ﺍﻳﺸﺪﻭﺍ ﻇﻬﺮﻫﻢ ﺑﻴﻬﺎ !!! ﻗﺎﻟﺘﻠﻬﺎ ﻓﺘﺤﻴﺔ ﻭﺍﻟﻠﻪ ﺍﻭﺧﻴﻴﻨﻲ ﻓﻲ ﻭﺳﻂ ﻗﻠﺒﻲ ﻣﺘﺮﺑﻌﻴﻦ ﺳﻮﺍ ﻛﺴﺒﺘﻨﻲ ﻭﺍﻻ ﺣﻘﺮﺗﻨﻲ .... ﻗﺎﻟﺘﻠﻬﺎ ﻭﺗﻮﺍ ﻳﺎﺧﺎﻟﺘﻲ ﺷﺮﻳﻔﺔ ﻗﻮﻟﻴﻠﻲ ﺷﻦ ﻧﻠﺒﺲ ﻭﺷﻦ ﺍﻧﺪﻳﺮ ﺑﻌﺪ ﻏﺪﻭﺓ ﻗﻔﺔ ﺳﻠﻔﻲ ﻭﻋﺎﺩ ﺑﻨﻤﺸﻲ !!! ﻗﺎﻟﺘﻠﻬﺎ ﺧﺎﻟﺘﻲ ﺷﺮﻳﻔﺔ ﺗﻮ ﻧﻄﻠﻊ ﻣﻨﻚ ﻭﻧﻤﺸﻲ ﻟﻠﺰﻳﺎﻧﻪ ﻣﺴﻌﻮﺩﺓ ﺍﺗﺠﻴﻚ ﻏﺪﻭﺓ ﺍﻟﺼﺒﺢ ﻭﺍﺩﻳﺮﻟﻚ ﺍﻟﻼﺯﻡ ﻛﻠﻪ ﻭﺍﻟﻴﻮﻡ ﺍﻟﻠﻲ ﺑﺘﻤﺸﻲ ﺍﻧﺠﻴﻚ ﺍﻧﻲ ﻭﺍﻟﺰﻳﺎﻧﻪ ﻭﺑﻨﺘﻲ ﺳﻤﻴﺮﺓ ﺍﻧﻠﺒﺴﻮﻙ ﻭﻓﻲ ﺍﺣﻠﻰ ﺗﺨﻠﻴﻠﺔ ﻧﺒﻌﺘﻮﻙ !!! ﻭﺗﺎﻧﻲ ﻳﻮﻡ ﺟﺖ ﺧﺎﻟﺘﻲ ﺷﺮﻳﻔﺔ ﻭ ﺍﻟﺰﻳﺎﻧﻪ ﻟﻔﺘﺤﻴﺔ ﻭﺩﺍﺭﺗﻠﻬﺎ ﻛﻞ ﻣﺎﻳﻠﺰﻣﻬﺎ ﻭﻗﺒﻞ ﻣﺎﺗﺮﻭﺡ ﻧﺤﺘﻠﻬﺎ ﺣﻨﺘﻬﺎ ﻭﺩﻫﻨﺘﻬﺎ ﺑﺎﻟﺰﻳﺖ ﻭﻟﻔﺘﻬﺎ .... ﺭﻭﺡ ﻛﻤﺎﻝ ﺍﻟﻘﻲ ﻓﺘﺤﻴﺔ ﻗﺎﻋﺪﺓ ﻣﻠﻔﻮﻓﻪ ﺣﻨﺘﻬﺎ ﻗﺎﻟﻬﺎ ﺑﻔﺮﺡ ﺷﻨﻮ ﺍﻟﻠﻴﻠﺔ ﺑﺘﻤﺸﻲ ﻟﻠﺴﻬﺮﻳﺔ !!! ؟؟ ﻗﺎﻟﺘﻠﻪ ﻻ ﻻ ﻟﻐﺪﻭﺓ ﺍﻟﺤﻲ ﻭﺍﻟﻠﻲ ﺍﻳﻌﻴﺶ ﺑﻨﻤﺸﻲ ﺻﺪﺍﺭﺓ ﻭﺑﺘﺠﻴﻨﻲ ﺧﺎﻟﺘﻲ ﺷﺮﻳﻔﺔ ﻭﺑﻨﺘﻬﺎ ﻭﺍﻟﺰﻳﺎﻧﻪ ﻭﻣﺎﺩﺍﺑﻴﻚ ﺍﺗﻜﻮﻥ ﺍﻟﻜﺮﻭﺳﺔ ﻭﺍﺗﻴﺔ ﺑﺎﺵ ﻧﻄﻠﻌﻮﺍ ﻃﻮﻭﻭﻝ ... ﻭﻧﺒﻲ ﻣﻨﻚ ﻃﻠﺐ !! ؟؟ ﻗﻠﻬﺎ ﺍﻃﻠﺒﻲ ﻭﺍﺗﻤﻨﻲ ﻧﻌﻄﻴﻚ ﻋﻤﺮﻱ ﻭﻗﻠﺒﻲ !!! ﻗﺎﻟﺘﻠﻬﺎ ﻳﻄﻮﻝ ﻋﻤﺮﻙ ﻭﻳﻘﻮﻱ ﻗﻠﺒﻚ ﻧﺒﻲ ﻳﺎﻏﺎﻟﻲ ﻭﺭﺑﻴﻌﻲ ﺍﻳﺎﻣﻲ ﻛﺮﻭﺳﺔ ﺍﻣﺰﻳﻨﺔ ﺍﺗﻘﻮﻝ ﻋﻠﻴﻬﺎ ﻛﺮﻭﺳﺔ ﺍﻋﺮﻭﺳﺔ !!! ﻗﺎﻟﻬﺎ ﻫﺎﺩﻱ ﺑﺲ !!!! ﻫﺎﺩﻱ ﻭﺻﻴﺖ ﻋﻠﻴﻬﺎ ﻣﻦ ﻏﻴﺮ ﻣﺎ ﺗﻄﻠﺒﻴﻬﺎ !!! ﺍﻃﻠﺒﻲ ﺷﻦ ﺗﺒﻲ ﺗﺎﻧﻲ ﻳﺎﻗﻤﺮ ﺿﺎﻭﻱ !!! ﺿﺤﻜﺖ ﻭﻗﺎﻟﺘﻠﻬﺎ ﻧﺒﻴﻚ ﺭﺍﺿﻲ ﻳﺎ ﻛﻞ ﺣﻴﺎﺗﻲ !!! ﻗﺎﻟﻬﺎ ﺍﻩ ﻛﺎﻥ ﺗﺒﻴﻨﻲ ﺭﺍﺿﻲ ﺍﻛﺴﺒﻲ ﺍﻣﻲ .... ﻭﺳﻌﻲ ﺑﺎﻟﻚ ﻭﺳﺎﻳﺮﻳﻬﺎ ﻭﺍﺣﻠﻰ ﻛﻼﻡ ﺳﻤﻌﻴﻬﺎ ﻭﺍﺑﺘﺴﻤﻲ ﻓﻲ ﻭﺟﻬﻬﺎ ﻭﺭﺩﻱ ﺑﺎﻟﺨﻴﺮ ﻋﻠﻴﻬﺎ ... ﻗﺎﻟﺘﻠﻪ ﻭﺭﺍﺳﻚ ﻳﺎﻏﺎﻟﻲ ﻳﺎﺯﻫﻮﺓ ﺧﺎﻃﺮﻱ ﻭﺭﺍﺣﺔ ﺑﺎﻟﻲ ﻛﺎﻥ ﻣﺎﺭﻭﺣﺘﺶ ﻣﻦ ﺍﻟﻘﻔﻪ ﻭﺍﻣﻚ ﺑﺎﻟﺨﻴﺮ ﻭﺍﻟﻬﻨﻲ ﺍﺗﺴﻘﺪ ﻓﻴﺎ ﻭﺗﻄﻠﺐ ﻣﻨﻲ ﺍﻧﺠﻴﻬﺎ ﻭﺗﺘﺼﺒﺢ ﻓﻴﺎ ﻣﺎ ﻧﺒﺪﺍﺵ ﺍﻧﻲ ﻓﺘﺤﻴﺔ !!! ﺍﺿﺤﻚ ﻛﻤﺎﻝ ﺿﺤﻜﺔ ﻗﻮﻳﺔ ﻭﻗﺎﻟﻬﺎ ﺷﻦ ﺗﺤﺴﺎﺑﻲ ﻭﺍﻟﻠﻪ ﻣﺎﺩﺍﺑﻴﺎ ﺍﻣﻴﻤﺘﻲ ﻭﺷﺮﻳﻜﺘﻲ ﻋﺴﻞ ﻭﺯﺑﺪﺓ ﻓﻲ ﺻﻮﻧﻴﺔ ﻳﺎﺍﺍﺍﺍﺍﺍﺭﺏ ﺣﻦ ﻋﻠﻴﺎ ﻭﺗﻜﻤﻞ ﺣﻴﺎﺗﻲ ﺍﻫﻨﻴﺔ ﻭﻗﺒﻞ ﻣﺎ ﻳﻘﻮﻝ ﺍﻣﻴﻦ ﻗﺎﻟﺘﻠﻬﺎ ﻓﺘﺤﻴﺔ ﻭﻳﺮﺯﻗﻨﺎ ﺑﺨﻴﺮ ﺍﻟﺬﺭﻳﺔ ﻭﻛﻤﻠﻮﺍ ﻣﻊ ﺑﻌﻀﻬﻢ ﺍﻣﻴﻴﻴﻴﻴﻦ ... ﻭﺗﺎﻧﻲ ﻳﻮﻡ ﺟﺖ ﺧﺎﻟﺘﻲ ﺷﺮﻳﻔﺔ ﺍﻟﺼﺒﺤﻴﺔ ﺑﺘﻮﺗﻲ ﻟﻔﺘﺤﻴﺔ ﺫﻫﺒﻬﺎ ﻭﺣﻮﻟﻴﻬﺎ ﻭﻗﻤﺠﺘﻬﺎ ﻗﺒﻞ ﻣﺎ ﺗﺠﻲ ﺑﻨﺘﻬﺎ ﻭﺍﻟﺰﻳﺎﻧﻪ ... ﻗﺎﻟﺘﻠﻬﺎ ﺍﺳﻤﻌﻲ ﻳﺎﻓﺘﺤﻴﺔ ﺭﺍﺟﻠﻚ ﻣﺎﻓﻴﺶ ﺯﻳﻪ ﺣﺒﻚ ﻭﻃﺎﻭﻋﻚ ﻭﺻﺒﺮ ﻭﻓﻲ ﻗﻠﺒﻪ ﺣﺎﻃﻚ ﻛﺎﻧﻚ ﺗﺒﻲ ﺍﻟﺮﺑﺢ ﻭﺑﺘﻜﻤﻞ ﺍﺟﻤﻴﻠﻚ ﺍﻣﻌﺎﻱ ﺍﺳﻤﻌﻲ ﻛﻼﻣﻲ ﻭﺩﻳﺮﻳﻪ ﺯﻱ ﻣﺎﻧﻮﺻﻴﻚ !! ﻗﺎﻟﺘﻠﻬﺎ ﻓﺘﺤﻴﺔ ﺍﻟﻠﻄﻒ ﺍﻟﻠﻄﻒ ﻳﺎﺧﺎﻟﺘﻲ ﺍﻧﺘﻲ ﺍﻟﻠﻲ ﺍﺟﻤﻴﻠﻚ ﻓﻮﻕ ﺭﺍﺳﻲ ﻣﻦ ﻓﻮﻕ .... ﻗﺎﻟﺘﻠﻬﺎ ﺧﺎﻟﺘﻲ ﺷﺮﻳﻔﺔ ﻻﺍﺍﺍﺍﺍ ﺍﻧﺘﻲ ﺍﻟﻠﻲ ﺩﺭﺗﻲ ﻓﻴﺎ ﺍﺟﻤﻴﻞ ﻣﺎ ﻧﻨﺴﺎﻩ ﻃﻮﻝ ﻋﻤﺮﻱ !!! ﻗﺎﻟﺘﻠﻬﺎ ﻓﺘﺤﻴﺔ ﻛﻴﻒ ﺩﺭﺗﻠﻚ ﺍﺟﻤﻴﻞ ﺍﻟﻠﻄﻒ ﻳﺎﺭﺑﻲ ﻣﻨﻮ ﺍﻟﻠﻲ ﺍﺟﻤﻴﻠﻪ ﺳﺎﺑﻖ ﻓﻬﻤﻴﻨﻲ ﻳﺎﺧﺎﻟﺘﻲ ﺭﺍﻧﻲ ﻣﻨﻚ ﺍﺗﻌﻠﻤﺖ ﻭﻓﻬﻤﺖ !!! ؟؟؟ ﻗﺎﻟﺘﻠﻬﺎ ﻳﺎ ﺑﻨﻴﺘﻲ ﺍﻧﻲ ﻃﻠﺒﺖ ﺍﻟﻤﻮﻟﻰ ﻳﺮﺯﻗﻨﻲ ﺑﺤﺪ ﺍﻧﺴﺎﻋﺪﻩ ﻭﻧﻮﻗﻒ ﻣﻌﺎﻩ ﻭﺭﺑﻲ ﺣﻘﻘﻠﻲ ﺍﻣﺮﺍﺩﻱ ﻟﻜﻦ ﻟﻮﻻ ﻓﻜﺮﻙ ﻭﻋﻘﻠﻚ ﺍﻟﺮﺍﺟﺢ ﺍﻟﻠﻲ ﺧﻼﻙ ﺳﻤﻌﺘﻴﻠﻲ ﻭﻛﻞ ﻧﺼﺎﺋﺤﻲ ﻧﻔﺬﺗﻴﻠﻲ !!! ﻛﻨﺖ ﺑﻨﻨﺤﺞ ﻓﻲ ﻫﺎﻻﻣﺘﺤﺎﻥ ﺍﻟﻠﻲ ﻃﻠﺒﺘﻪ ﻣﻦ ﺍﻟﻤﻮﻟﻰ !!! ؟ ﻫﻲ ﺗﺮﺍ ﺟﺎﻭﺑﻴﻨﻲ !!!! ؟؟؟ ﺭﻳﺘﻲ ﻛﻴﻒ ﺍﺟﻤﻴﻠﻚ ﺳﺎﺑﻖ ﻋﻠﻴﺎ !!! ﺟﺘﻬﺎ ﻓﺘﺤﻴﺔ ﺗﺠﺮﻱ ﺍﺗﻐﻤﺮﺗﻬﺎ ﻭﺗﺒﻜﻲ ﻭﺗﻘﻮﻝ ﻳﺎ ﻭﺍﻟﻠﻪ ﻋﻠﻴﻚ ﺧﺎﻟﺔ ﺍﻣﻘﻮﻣﺔ ﻭﻳﺎ ﻭﺍﻟﻠﻪ ﻋﻠﻴﻚ ﻓﻀﻞ ﻣﻦ ﺭﺑﻲ ﺣﺼﻠﺘﻪ ﻳﺎ ﻭﺍﻟﻠﻪ ﻋﻠﻴﻚ ﺧﻴﺮ ﺍﻧﺰﻝ ﻋﻠﻴﺎ ... ﺭﺑﻲ ﻳﺤﻔﻈﻚ ﻳﺎ ﺧﺎﻟﺘﻲ ﻭﻳﻄﻮﻝ ﻓﻲ ﺍﻋﻤﻴﺮﻙ ... ﻧﺒﻴﻬﺎﻟﻚ ﺣﺠﺔ ﻣﻘﺒﻮﻟﺔ ﻭﺟﻨﺎﺕ ﺍﻟﻔﺮﺩﻭﺱ ﻭﻧﻈﺮﺓ ﻟﻮﺟﻪ ﺍﻟﻤﻮﻟﻰ ... ﻭﺧﺎﻟﺘﻲ ﺷﺮﻳﻔﺔ ﺗﺒﻜﻲ ﻭﺗﻘﻮﻝ ﺍﻣﻴﻴﻦ ... ﻳﺎﺣﻨﻪ ﻭﺑﻌﺪ ﺍﻟﺘﻮﺻﻴﺎﺕ ﻟﻔﺘﺤﻴﺔ ﻓﻲ ﺍﻧﻬﺎ ﺗﻮﺳﻊ ﺑﺎﻟﻬﺎ ﻣﻊ ﺍﻟﻼﻫﺎ ﺣﺴﻨﻴﺔ ﻭﻛﺎﻥ ﻗﺎﻟﺖ ﻫﻜﻲ ﻭﺍﻻ ﻫﻜﻲ ﺗﺤﺬﻑ ﻭﺭﺍ ﻇﻬﺮﻫﺎ ﻭﺗﻬﺪﺭﺯ ﻣﻌﺎﻫﺎ ﺑﺎﻟﺮﻃﺎﺑﺔ ... ﻭﺷﻮﻳﺔ ﻭﺟﺖ ﺑﻨﺖ ﺧﺎﻟﺘﻲ ﺷﺮﻳﻔﺔ ﻭﻣﻌﺎﻫﺎ ﺍﻟﺰﻳﺎﻧﻪ .. ﺍﻟﻘﻮﺍ ﺧﺎﻟﺘﻲ ﺷﺮﻳﻔﺔ ﺍﻣﻮﺗﻴﺎ ﻛﻞ ﺷﻲ .. ﺳﻤﺖ ﺍﻟﺰﻳﺎﻧﻪ ﺑﺴﻢ ﺍﻟﻠﻪ ﻭﺍﺑﺪﺕ ﻓﻲ ﺯﻳﻨﻪ ﻓﺘﺤﻴﺔ ﻭﺩﻭﺭﺓ ﻟﺒﺴﻮﻫﺎ ﻭﺍﻟﺼﻼﺓ ﻋﻠﻰ ﺍﻟﻨﺒﻲ ﻛﻴﻒ ﻃﻠﻌﻮﻫﺎ .. ﺍﻟﻘﺪ ﺯﻱ ﺍﻟﻌﺮﺻﺔ ﺍﻟﻤﺼﺒﻮﺑﺔ ﻭﺍﻟﻮﺟﻪ ﺭﻳﻤﺎ ﻣﻮﺻﻮﻓﻪ ﻭﺍﻟﻘﺼﺔ ﺍﻟﻤﺤﻔﻮﻓﺔ ﻭﺍﻟﺴﻮﺍﻟﻒ ﻋﺎﻟﺠﻨﺐ ﻧﺎﻋﻤﺎﺕ ﻭﺍﻟﻤﻀﺤﻚ ﻟﻮﻟﻲ ﻣﻨﺜﻮﺭ ﻭﻧﻘﺮﺓ ﺯﻳﻨﻬﺎ ﺍﻟﻤﺤﻔﻮﺭﺓ ... ﻭﺍﻟﻌﻴﻮﻥ ﺍﻛﺒﺎﺭ ﺍﻣﻜﺤﻼﺕ ﻭﺍﻟﺨﺪﻭﺩ ﻛﻮﺭﺓ ﻭﻛﻮﺭﺓ .... ﺍﻟﺼﻼﺓ ﻋﻠﻰ ﺍﻟﻨﺒﻲ ﺧﺎﻟﺘﻲ ﺷﺮﻳﻔﺔ
ﺣﻄﺖ ﺍﻟﻮﺷﻖ ﻭﺍﻟﻘﻤﺎﺭﻱ ﻭﺑﺨﺮﺗﻬﺎ ﻣﻦ ﺍﻫﻨﻲ ﻭﻏﺎﺩﻱ ﻭﺩﻫﻨﺘﻬﺎ ﺑﺰﻳﺖ ﺍﻟﺰﻫﺮ ﻭﺍﻟﺤﻨﺔ ﻓﻲ ﻟﻴﺪﻳﻦ ﺍﺗﻼﻟﻲ ... ﻛﻤﻠﻮﻟﻬﺎ ﺯﻳﻨﺘﻬﺎ ﻭﺗﺨﻠﻴﻠﺔ ﺣﻮﻟﻴﻬﺎ ﻭﻇﻔﻴﺮﺗﻬﺎ ﻭﺳﺮﻭﺍﻟﻬﺎ ﻟﺒﺴﺘﻬﺎ ... ﻭﺍﺑﺪﻭﺍ ﻳﺮﺷﻘﻮﻟﻬﺎ ﻓﻲ ﺫﻫﺒﻬﺎ !!! ﻗﺎﻟﺖ ﺍﻟﺰﻳﺎﻧﻪ ﺍﻟﺼﻼﺓ ﻋﻠﻰ ﺍﻟﺮﺳﻮﻝ ﺷﻮﺭﻫﺎ ﺑﻨﺖ ﻋﺰ ﻭﺍﺻﻮﻝ !!! ﻗﺎﻟﺘﻠﻬﺎ ﺧﺎﻟﺘﻲ ﺷﺮﻳﻔﺔ ﺍﻳﻪ ﺑﻨﺖ ﻋﺰ ﻭﻣﺘﻴﺼﻠﺔ !!! ﻭﺩﻭﺭﺓ ﻛﻤﻠﻮﻫﺎ ﻭﺍﺣﻠﻰ ﻣﻦ ﺍﻟﻌﺮﻭﺳﺔ ﺧﻠﻮﻫﺎ ﻭﺑﺎﻟﺼﻼﺓ ﻋﻠﻰ ﺍﻟﻨﺒﻲ ﺍﺭﻗﻮﻫﺎ ﻭﺳﻠﻤﻮﺍ ﻋﻠﻴﻬﺎ ﻭﻃﻠﻌﻮﺍ ﻭﺧﻠﻮﻫﺎ !!! ﻣﺎﻫﻨﺎﻙ ﻣﺎ ﻗﻌﺪﺕ ﺍﺑﺮﻭﺣﻬﺎ ﺗﺘﻔﺮﺝ ﻋﻠﻰ ﺯﻳﻨﻬﺎ ﻭﻗﺪﻫﺎ ﻭﻛﺒﺮ ﻋﻴﻨﻬﺎ ﻭﺧﺶ ﻋﻠﻴﻬﺎ ﻛﻤﺎﻝ ﻭﻣﻦ ﻟﻤﺎ ﺷﺎﻓﻬﺎ ﻗﺎﻝ ﻣﺎﺷﺎﺀﺍﻟﻠﻪ ﺍﺭﻗﻴﻚ ﺏ ﺍﺳﻢ ﺍﻟﺮﺣﻤﻦ ﻳﺎ ﻟﻼﺕ ﺍﻟﻼﻻﺕ ﻳﺎ ﻏﺎﻟﻴﺔ .... ﺗﻠﺤﻔﺖ ﻓﺘﺤﻴﺔ ﺑﻔﺮﺍﺷﻴﺘﻬﺎ ﻟﺤﺮﻳﺮ ﻟﻤﺸﺒﻜﺔ ﺑﺨﻴﻂ ﺍﻟﻔﻀﺔ ﺍﻟﺮﻗﻴﻖ ﺗﻠﺤﻴﻔﺔ ﻣﺮﺷﻮﻗﺔ ﺑﺒﻤﺒﻮﻛﻬﺎ ﻣﻘﺪﻭﺩﺓ ﻭﺭﻛﺒﺖ ﺍﻟﻜﺮﻭﺳﺔ ﺍﻟﻠﻲ ﻛﺎﻧﺖ ﺍﻣﺰﻳﻨﺔ ﺍﺷﻜﺎﻝ ﺍﻟﻮﺍﻥ ﻭﺍﻟﺤﺼﺎﻥ ﺍﻳﺸﻜﺸﻚ ﻓﺮﺣﺎﻥ ﺑﻤﺸﻴﺘﻪ ﻳﺮﻗﺺ ﺍﺭﻗﻴﺺ ﺍﻣﺮﻛﺐ ﺍﻟﻼ ﺍﻟﻠﻲ ﺯﻳﻨﻬﺎ ﻣﺎﻓﻲ ﻣﻨﻪ ﻭﺟﻨﺒﻬﺎ ﺍﻟﺴﻲ ﻛﻤﺎﻝ ﺑﺰﺑﻮﻧﻪ ﻭﻻﺑﺴﺘﻪ ﺗﻤﺎﻡ !! ﻗﺮﺑﺖ ﺍﻟﻜﺮﻭﺳﺔ ﻟﺤﻮﺵ ﺍﻟﻌﺮﺱ ﻭﺻﻨﻪ ﺍﻟﻮﺷﻖ ﻭﺍﻟﻌﻮﺍﻟﺔ !!! ﻛﻞ ﻣﻦ ﻭﺍﻗﻒ ﻓﻲ ﺍﻟﻤﻜﺎﻥ ﻋﻴﻨﻪ ﻋﻠﻰ ﻫﺎﻟﻜﺮﻭﺳﺔ ﺍﻟﻠﻲ ﺟﺎﻳﺒﺔ ﻟﻼ ﻭﺍﻻ ﻋﺮﻭﺳﺔ !!! ﻭﻗﻔﺖ ﺍﻟﻜﺮﻭﺳﺔ ﻗﺪﺍﻡ ﺍﻟﺒﺎﺏ ﻭﺍﻧﺰﻝ ﻣﻨﻬﺎ ﻛﻤﺎﻝ ﻭﻭﻗﻒ ﻗﺪﺍﻡ ﺑﺎﺏ ﺍﻟﺤﻮﺵ ﻭﻣﺪ ﻳﺪﻩ ﻟﻼ ﻓﺘﺤﻴﺔ ﻭﻗﺎﻝ ﻣﺪﻱ ﺍﻳﺪﻳﺎﺗﻚ ﻳﺎ ﻟﻠﺘﻲ ﻭﻗﻮﻟﻲ ﺑﺴﻢ ﺍﻟﻠﻪ ... ﻣﺪﺕ ﺍﻳﺪﻳﻬﺎ ﻭﻗﺎﻟﺖ ﺑﺴﻢ ﺍﻟﻠﻪ ﻭﻧﺰﻟﺖ ... ﻳﺎﺣﻨﺔ ﻭﺧﺸﺖ ﻓﺘﺤﻴﺔ ﻟﻠﺤﻮﺵ ﻭﻓﻲ ﺍﻟﺴﻘﻴﻔﺔ ﺍﻣﺸﺖ ﺑﺨﻄﻮﺍﺕ ﺗﺎﺑﺘﺎﺕ ﻗﺎﻳﻤﺔ ﺭﺍﺳﻬﺎ ﻓﻮﻕ ﻭﺭﺍﺳﻤﺔ ﺍﻟﺒﺴﻤﺎﺕ ﻭﻓﻜﺮﻫﺎ ﺳﺎﺭﺡ ﻓﻲ ﻳﻮﻡ ﻃﻠﻌﺖ ﻣﻨﻪ ﻭﻓﻲ ﻋﻴﻮﻧﻬﺎ ﺍﻟﺪﻣﻌﺎﺕ ... ﻓﺎﻗﺖ ﻣﻦ ﺳﺮﺣﺘﻬﺎ ﻭﻗﺎﻟﺖ ﻫﺬﺍ ﻳﻮﻣﻚ ﻳﺎﻓﺘﺤﻴﺔ ﻭﺑﻌﻮﻥ ﺍﻟﻠﻪ ﺗﻜﺴﺒﻴﻪ !!! ﻭﻫﻴﺎ ﺧﺎﺷﺔ ﺣﺴﺖ ﺍﻧﻪ ﺍﻟﺴﻘﻴﻔﺔ ﻛﺎﻧﻬﺎ ﻭﻟﺖ ﻃﻮﻳﻴﻴﻴﻴﻠﺔ ﻭ ﻣﺎﺑﺘﺶ ﺗﻜﻤﻞ ﻭﻓﻲ ﻛﻞ ﺧﻄﻮﺓ ﻛﺎﻧﺖ ﺗﺴﻤﻊ ﻓﻲ ﺻﻮﺕ ﺍﻟﻬﺪﺭﺯﺓ ﻭﺍﻟﺪﺭﺑﻮﻛﺔ ﻭﺍﻟﻐﻨﻲ ﻭﺍﻟﻀﺤﻚ ﻛﺄﻧﻪ ﺧﻴﺎﻝ ﺍﻭ ﺣﻠﻢ ﺍﻧﻐﺼﺮﺕ ﻣﻊ ﺑﻌﻀﻬﺎ ﺑﺎﻟﻌﺮﻕ ﻭﺣﺴﺖ ﺑﺨﻮﻑ ﻏﺮﻳﺐ ﻓﻲ ﻗﻠﺒﻬﺎ ﻭﺑﺮﻋﺸﺔ ﺧﻔﻴﻔﺔ ﻓﻲ ﺍﻳﺪﻳﻬﺎ ﻭﺣﺴﺖ ﺑﺮﻭﺣﻬﺎ ﺍﺭﺯﻳﻨﺔ ﺍﺗﻘﻮﻟﻲ ﻋﻠﻰ ﻇﻬﺮﻫﺎ ﺍﺟﺒﻞ .... ﻗﻌﺪﺕ ﺍﺗﺸﺠﻊ ﻓﻲ ﺭﻭﺣﻬﺎ ﺧﻴﺮﻙ ﻳﺎﻓﺘﺤﻴﺔ !!! ﺧﻴﺮﻙ ﺧﻔﺘﻲ !!! ﺷﻦ ﻫﺎﻟﺮﻋﺸﺔ ﻭﺷﻦ ﻫﺎﻟﻐﺼﺮﺓ !!! ﺍﻧﺘﻲ ﻣﺎ ﻏﻠﻄﺘﻲ ﻓﻲ ﺣﺪ ﺍﻧﺘﻲ ﻛﻨﺖ ﻣﻈﻠﻮﻣﺔ !!! ﻗﻮﻱ ﺭﻭﺣﻚ ﻭﻣﺎﺗﺨﻔﻲ ﻣﻦ ﺣﺪ !!! ﻭﻋﻠﻰ ﻛﻞ ﻣﺎ ﺷﺠﻌﺖ ﺭﻭﺣﻬﺎ ﺷﻴﻴﻴﻴﻴﻴﻲ ﺍﻟﺮﻋﺸﺔ ﻓﻲ ﺍﻳﺪﻳﻬﺎ ﺍﻛﺘﺮ ﻣﺎﺗﺰﻳﺪ ﻭﺍﻟﻌﺮﻕ ﻳﺠﺮﻱ ﻣﻌﺎﻫﺎ ﺟﺮﻱ ﻭﺍﻟﺴﻘﻴﻔﺔ ﺷﻲ ﻣﺎ ﺑﺘﺶ ﺗﻜﻤﻞ ﻭﺍﻟﺪﻧﻴﺎ ﻓﻲ ﻭﺳﻂ ﺍﻟﺤﻮﺵ ﺭﺍﺑﺨﺔ ﺍﻏﻨﻲ ﻭﻫﺪﺭﺯﺓ ﻭﺯﻏﺎﺭﻳﺖ ..... ﻭﻗﻔﺖ ﻓﺘﺤﻴﺔ ﻭﻫﺪﺕ ﺭﻭﺣﻬﺎ ﻟﻤﺎ ﺍﻗﺮﺕ ﺍﻳﺔ ﺍﻟﻜﺮﺳﻲ ﻓﻲ ﻗﻠﺒﻬﺎ ﻭﻗﺎﻣﺖ ﺭﺟﻠﻬﺎ ﻋﻠﻰ ﻋﺘﺒﺔ ﺍﻟﺴﻘﻴﻔﺔ ﺍﻟﻤﺘﻌﻠﻴﺔ ﻭﺷﺎﻓﺖ ﻛﻞ ﺍﻟﻀﻴﻮﻑ ﻭﺍﺑﺘﺴﻤﺖ !! ﻭﻛﻞ ﻣﻦ ﺟﺖ ﻋﻴﻨﻪ ﻋﻠﻴﻬﺎ ﻗﺎﻝ ﺍﻟﺼﻼﺓ ﻋﻠﻰ ﺍﻟﻨﺒﻲ ﻣﻨﻲ ﻫﺎﻟﻼ ﻟﻐﺰﺍﻟﺔ ﺍﻟﻄﻮﻳﻠﺔ ﺍﻟﻤﻠﻴﺎﻧﻪ ﻣﺒﺴﻢ ﺍﻟﺘﺒﺮﻭﺭﻱ ﻭﺍﻟﻌﻴﻮﻥ ﺩﻭﺍﻳﺎ !!! ؟؟؟ ﻭﻛﻞ ﻭﺣﺪﺓ ﺍﺗﺎﺷﺮ ﻋﻠﻴﻬﺎ ﻭﺣﺘﻰ ﺍﻟﻠﻲ ﻣﺎﺷﺎﻓﺘﻬﺎﺵ ﻟﻔﺘﻮﻫﺎ ﻟﻴﻬﺎ !!! ﺍﻧﻌﺠﺒﺖ ﺍﻟﻨﺎﻧﺎ ﺣﺴﻨﻴﺔ ﺯﻳﻬﺎ ﺯﻱ ﺑﺎﻗﻲ ﺍﻟﻀﻴﻮﻑ ﺑﺎﻟﻼ ﺍﻟﻠﻲ ﻭﺍﻗﻔﺔ ﻣﺒﺘﺴﻤﺔ ﻭﺍﺗﺸﻮﻑ ﻭﻧﺎﺿﺖ ﺑﺘﺴﻘﺒﻠﻬﺎ ﻭﺗﺮﺣﺐ ﺑﻴﻬﺎ !!! ﻭﻫﺪﻳﻜﺎ ﻓﺘﺤﻴﺔ ﻋﻠﻰ ﻣﺎﺩﺍﺭﺕ ﻟﺮﻭﺣﻬﺎ ﺑﺎﺵ ﺗﻬﺪﺍ ﺷﻴﻴﻴﻴﻴﻲ ﻭﺯﺍﺩﺕ ﺍﻛﺘﺮ ﻟﻤﺎ ﺷﺎﻓﺖ ﺍﻟﻼﻫﺎ ﺟﺎﻳﺘﻬﺎ ﺑﺎﺵ ﺗﺴﺘﻘﺒﻠﻬﺎ !!! ﻭﻋﺮﻓﺖ ﻣﻦ ﺑﺴﻤﺔ ﺍﻟﻼﻫﺎ ﺍﻧﻬﺎ ﻣﺎﻋﺮﻓﺘﻬﺎﺵ ﻭﺗﺤﺴﺎﺑﻬﺎ ﻣﺮﺍ ﺗﺎﻧﻴﺔ !!! ﺣﺴﺖ ﻓﺘﺤﻴﺔ ﻣﻦ ﻏﻴﺮ ﺍﻟﺮﻋﺸﺔ ﻭﺍﻟﻐﺼﺮﺓ ﺑﻀﺒﺎﺑﺔ ﻗﺪﺍﻡ ﻋﻴﻮﻧﻬﺎ ﻭﻛﻞ ﻣﺎ ﺗﻘﺮﺏ ﺍﻟﻨﺎﻧﺎ ﺣﺴﻨﻴﺔ ﻛﻞ ﻣﺎ ﺍﺿﺒﺎﺑﺔ ﺍﺗﺰﻳﺪ !!! ﻗﺮﺑﺖ ﺍﻟﻨﺎﻧﺎ ﺣﺴﻨﻴﺔ ﻟﻔﺘﺤﻴﺔ ﻭﻗﺎﻟﺘﻠﻬﺎ ﻋﻠﻰ ﺳﻼﻣﺘﻚ ﻋﻠﻰ ﺳﻼﻣﺘﻚ ﻣﺮﺣﺒﺘﻴﻦ ﺑﻴﻚ ﻭﻫﻴﺎ ﻣﺎﺩﺓ ﺍﻳﺪﻫﺎ ﺑﺘﺴﻠﻢ ﻗﺎﻟﺘﻠﻬﺎ ﺑﻼ ﺍﻣﻮﺍﺧﺪﺓ ﻳﺎ ﺭﻳﻤﺎ ﻣﻨﻮ ﺍﻧﺘﻲ !!! ؟ ﺭﺩﺕ ﻋﻠﻴﻬﺎ ﻓﺘﺤﻴﺔ ﻭﻫﻴﺎ ﺧﻼﺹ ﺣﺴﺖ ﺭﻭﺣﻬﺎ ﺭﺯﻧﺖ ﺍﻛﺘﺮ ﻭﺍﻟﻀﺒﺎﺑﺔ ﻭﺍﻟﺮﻋﺸﺔ ﻭﺍﻟﻌﺮﻕ ﺍﻟﻠﻲ ﺍﻳﻨﺰ ﻣﻌﺎﻫﺎ ﻧﺰ ﻗﺎﻟﺘﻠﻬﺎ ﺍﻧﻲ ﺍﻟﻼ ﻓﺘﺤﻴﺔ ﻣﺮﺕ ﺍﻟﺴﻲ ﻛﻤﺎﻝ !!! ﺍﻧﺼﺪﻣﺖ ﺍﻟﻨﺎﻧﺎ ﺣﺴﻨﻴﺔ ﻭﻓﺘﺤﻴﺔ ﺧﻼﺍﺍﺍﺍﺍﺍﺍﺹ ﻃﺎﺣﺖ ﻋﻠﻰ ﻃﻮﻟﻬﺎ !!! ﻭﻗﻔﺖ ﺍﻟﺪﺭﺑﻮﻛﺔ ﻭﻧﺎﺿﻮﺍ ﺍﻟﻀﻴﻮﻑ ﻳﺠﺮﻭﺍ ﺍﻟﻠﻲ ﺍﻳﺒﺦ ﺑﻠﻤﻴﻪ ﻭﺍﻟﻠﻲ ﺍﻳﻤﺮﻭﺡ ﺑﺎﻟﻤﺮﻭﺣﺔ ..... ﻣﺮﺕ ﺑﻮﻫﺎ ﻛﺎﻧﺖ ﻣﻊ ﺍﻟﻀﻴﻮﻑ ﺟﺘﻬﺎ ﺗﺠﺮﻱ ﻗﺎﻣﺘﻠﻬﺎ ﺭﺍﺳﻬﺎ ﺍﻟﻠﻲ ﺟﻲ ﻋﻠﻰ ﺣﺎﺷﻴﺔ ﺍﻟﻌﺘﺒﺔ !!!! ﻓﺎﻗﺖ ﻓﺘﺤﻴﺔ !!! ﻭﺩﺧﻠﻮﻫﺎ ﻟﻠﺪﺍﺭ ﺳﻨﺪﻭﻫﺎ ﺑﻤﺨﻴﺪﺍﺕ ﻋﻠﻰ ﺑﻌﻀﻬﻢ ﻭﻫﻴﺎ ﺍﺗﻘﻮﻝ ﺧﻴﺮﻧﻲ ﺷﻦ ﺟﺎﻧﻲ ﻋﻼﺵ ﻫﻜﻲ ﺻﺎﺭﻟﻲ !! ؟؟؟ ﺍﻟﺘﻔﺘﺖ ﺍﻟﻘﺖ ﺟﻨﺒﻬﺎ ﺍﻟﻼﻫﺎ ﺣﺴﻨﻴﺔ ﻭﻣﺮﺕ ﺑﻮﻫﺎ ﻭﺯﻭﺯ ﺍﻧﺴﻴﻮﻳﻨﺎﺕ ﻛﺒﺎﺭ ﻓﻲ ﺍﻟﻌﻤﺮ .... ﻗﺎﻟﺖ ﻭﺣﺪﺓ ﻣﻨﻬﻢ ﺍﻫﻲ ﻓﺎﻗﺖ ﺧﻴﺮﻙ ﻳﺎ ﺑﻨﻴﺘﻲ ﺷﻦ ﺟﺎﻙ !! ؟؟ ﻗﺎﻟﺘﻠﻬﺎ ﻣﺎﻧﻌﺮﻓﺶ ﻳﺎﺧﺎﻟﺘﻲ ﻟﻤﺎ ﺧﺸﻴﺖ ﻣﺎﺣﺴﻴﺖ ﺑﺸﻲ ﻫﻜﻲ ﻣﻦ ﻏﻴﺮ ﺍﺭﺍﺩﺓ ﻣﻨﻲ ... ﻗﺎﻟﺘﻠﻬﺎ ﺷﻬﻘﻮﺍ ﻓﻴﻚ ﻳﺎ ﺑﻨﻴﺘﻲ ﺍﻋﻮﻳﻨﺔ ﻭﻃﺎﺭﺕ !! ﻗﺎﻟﺘﻠﻬﺎ ﻣﺮﺕ ﺑﻮﻫﺎ ﻧﺒﻌﺘﻮﺍ ﻟﻜﻤﺎﻝ ﺍﻳﺮﻭﺡ ﺑﻴﻚ !!! ؟؟ ﻗﺎﻟﺘﻠﻬﺎ ﻓﺘﺤﻴﺔ ﻻ ﻻ ﺍﻧﺤﺲ ﻓﻲ ﺭﻭﺣﻲ ﺗﻮﺍ ﻛﻮﻳﺴﺔ ﺍﻟﺤﻤﺪﻟﻠﻪ !! ﻗﺎﻟﺖ ﻭﺣﺪﺓ ﻣﻦ ﺍﻟﻨﺴﺎﻭﻳﻦ ﻧﻮﺿﻲ ﻳﺎ ﺣﺴﻨﻴﺔ ﺟﺎﻳﺒﻲ ﺍﺣﺒﻴﺒﺎﺕ ﻛﺴﺒﺮ ﻟﻜﻨﺘﻚ ﺧﻠﻲ ﺗﻤﺸﻲ ﻣﻨﻬﺎ ﺍﻟﺮﻋﺸﺔ !!! ﻭﻫﺪﻳﻜﺎ ﺣﺴﻨﻴﺔ ﻣﻦ ﺍﻟﺼﺪﻣﺔ ﺟﺘﻬﺎ ( ﻟﻜﻨﺔ ) ﺍﺗﺸﻮﻑ ﻏﻴﺮ ﺑﻌﻴﻮﻧﻬﺎ ﻭﻓﻜﺮﻫﺎ ﺍﻳﻘﻮﻝ ﺍﻣﻨﻴﻦ ﻋﺮﻓﺖ ﻫﺎﻟﻘﺪﻭ ﻛﻠﻪ !! ﺯﻳﻦ ﻭﻟﺒﺲ ﻓﻲ ﺍﺻﻮﻟﻪ ﻭﺗﺮﺷﻴﻘﺔ ﻭﺗﺨﻠﻴﻠﺔ ﻣﻘﺪﻭﺩﺓ !!! ﺗﻮ ﺍﻟﻨﺎﻧﺎ ﺣﺴﻨﻴﺔ ﺍﻣﻘﻌﻤﺰﺓ ﺟﻨﺒﻬﺎ ﺑﻨﺖ ﺧﺎﻟﺘﻬﺎ ﻗﺎﻟﺘﻠﻬﺎ ﺣﺴﻨﻴﻴﻴﻴﻴﺔ ﺍﻟﻠﻄﻒ ﻛﻨﺘﻚ ﻫﺎﺩﻱ ﻋﻤﺮﻱ ﻣﺎ ﺷﻔﺘﻬﺎ ﻓﻲ ﻣﻨﺎﺳﺒﺔ ﻳﺎﺣﻨﺔ ﻋﻨﺪﻙ ﺍﻟﺤﻖ ﻣﺎﻃﻠﻌﻴﺶ ﻓﻴﻬﺎ ﺧﺎﻳﻔﺔ ﻋﻠﻴﻬﺎ ﻣﺎﻟﻌﻴﻦ !!! ﻣﺎﺷﺎﺀﺍﻟﻠﻪ ﻋﻠﻴﻬﺎ ﻫﺎﺩﻱ ﺍﺯﻳﻦ ﻛﻨﺎﻳﻨﻚ !!! ﻣﺎﺯﺍﻝ ﺍﻟﺠﺪﻳﺪﺓ !!! ؟؟؟ ﻭﻗﻔﺖ ﺍﻟﻨﺎﻧﺎ ﺣﺴﻨﻴﺔ ﻭﻗﺎﻟﺖ ﻟﻔﺘﺤﻴﺔ ﻣﺎﺩﺍﻡ ﺣﺎﻟﻚ ﺑﺎﻫﻲ ﺍﻃﻠﻌﻲ ﺳﻠﻤﻲ ﻋﻠﻰ ﺍﻟﻨﺎﺱ ﻗﺎﻟﺘﻠﻬﺎ ﻓﺘﺤﻴﺔ ﺣﺎﺿﺮ ... ﻭﻃﻠﻌﺖ ﺣﺴﻨﻴﺔ ﻭﺍﻟﻨﺴﺎﻭﻳﻦ ... ﻗﻌﻤﺰﺕ ﻓﺘﺤﻴﺔ ﻭﻋﻠﻰ ﻃﻮﻝ ﻗﺎﻟﺘﻠﻬﺎ ﻣﺮﺕ ﺑﻮﻫﺎ ﺍﻟﻼﻙ ﺭﺍﻫﻲ ﻣﺼﺪﻭﻣﺔ ﻭﺍﻟﻠﻪ ﻗﺒﻞ ﻣﺎ ﺗﺨﺸﻲ ﻣﺎﻛﺎﻧﺖ ﻫﻜﻲ !! ﺗﻮ ﺍﻟﻨﺎﻧﺎ ﺣﺴﻨﻴﺔ ﻛﺎﻧﺖ ﺗﻌﺮﻑ ﺍﻥ ﻓﺘﺤﻴﺔ ﺑﺘﺠﻲ ﻻﻥ ﻛﻤﺎﻝ ﻗﺎﻟﻬﺎ ﻟﻜﻦ ﻫﻴﺎ ﻛﺎﻥ ﻣﺎﺩﺍﺑﻴﻬﺎ ﻓﺘﺤﻴﺔ ﻣﺎﺗﺠﻴﺶ !!! ﺍﻟﻨﺎﻧﺎ ﺗﻮﺍ ﻣﺶ ﻣﺼﺪﻭﻣﺔ ﻣﻦ ﺟﻴﺔ ﻓﺘﺤﻴﺔ ..... ﻻ ﻻ ﻣﺼﺪﻭﻣﺔ ﻣﻦ ﺷﻜﻠﻬﺎ ﻭﻗﻮﺍﻣﺘﻬﺎ ﻓﻲ ﻟﺒﺴﺘﻬﺎ ﻭﺯﻳﻨﺘﻬﺎ !!! ﺍﻟﺤﻮﻟﻰ ﺍﺣﺮﻳﺮ ﻓﻀﺔ ﺧﺎﻟﺺ ﻭﺍﻟﻘﻤﺠﺔ ﻗﻤﺎﺷﻬﺎ ﻣﺎ ﺍﺗﻮﺍﺯﻳﻪ ﺍﻻ ﺍﻟﻠﻲ ﻣﻦ ﻳﻮﻣﻬﺎ ﺗﻌﺮﻑ ﺍﺻﻞ ﺍﻟﻠﺒﺴﺔ ﻭﻟﻮﻧﻬﺎ ﻣﻊ ﻟﻮﻥ ﺍﻟﺤﻮﻟﻲ ﺑﻮﺩﺭﻩ ﻓﻲ ﺧﻄﻴﻄﺎﺕ ﻋﻜﺮﻱ ﺍﻳﻼﻟﻲ ﻭﺍﻟﺴﺮﻭﺍﻝ ﻣﻌﺠﻮﻥ ﺑﺎﻟﺘﻞ ﻭﻟﻮﻧﻪ ﻋﻜﺮﻱ ﻭﺯﺍﻳﺪﻫﺎ ﺣﻼﻭﺓ ﻟﻴﻞ ﻋﻴﻮﻧﻬﺎ ﻭﻗﺼﺘﻬﺎ ﻭﻋﺮﺟﻮﻥ ﺍﻟﻔﻞ ﺍﻣﺰﻫﻲ ﻃﻠﺘﻬﺎ !!!! ﻃﻠﻌﺖ ﻣﻦ ﺍﻟﺪﺍﺭ ﻭﻫﻴﺎ ﻣﺎﺗﺸﻮﻑ ﻓﻲ ﺷﻲ ﻣﻦ ﺍﻟﺤﻴﺮﺓ ﺍﻟﻠﻲ ﺭﻛﺒﺘﻬﺎ ... ﻗﻌﻤﺰﺕ ﻓﻲ ﺍﻣﻜﻴﻨﻬﺎ ﻭﻫﻴﺎ ﻳﻘﻮﻟﻮﻟﻬﺎ ﻻﺑﺎﺱ ﻋﻠﻰ ﻛﻨﺘﻚ ﻳﺎ ﺣﺴﻨﻴﺔ ﺍﺗﺤﻨﺤﺖ ﻭﻗﺎﻝ ﻻ ﻳﻮﺭﻳﻜﻢ ﺑﺎﺱ ﺍﻣﺴﻜﻴﻨﻪ ﺩﺍﺧﺖ ﺷﻮﺭﻫﺎ ﺭﻛﺒﺖ ﻣﻌﺎﻫﺎ ﺻﻨﻪ ﺍﺭﺩﺍﻫﺎ !!! ﻫﻴﺎ ﻫﻜﻲ ﻣﻦ ﻳﻮﻣﻬﺎ ﻣﺎﺗﺘﺤﻤﻠﺶ ﺻﻨﻪ ﻟﺤﺮﻳﺮ ﺍﻟﺠﺪﻳﺪ .
ﻗﺎﻟﺘﻠﻬﺎ ﺑﻨﺖ ﺧﺎﻟﺘﻬﺎ ﺣﻖ ﺣﺘﻰ ﺍﻧﻲ ﺯﻳﻬﺎ ﻣﺎ ﻧﺘﺮﺗﺎﺡ ﻛﺎﻥ ﻟﻤﺎ ﻧﻠﺒﺲ ﺣﻮﻟﻲ ﻣﻄﻠﻮﻕ ... ﻗﺎﻟﺖ ﻣﺮﺍ ﺗﺎﻧﻴﺔ ﻣﻦ ﺍﻟﻀﻴﻮﻑ ﻭﺑﺎﻟﻚ ﺍﻟﺸﺎﺑﺔ ﺍﻣﺪﺍﻳﺮﺓ ﺍﻋﻮﻳﻞ !!! ؟؟ ﺍﺗﻠﻔﺘﻠﻬﺎ ﺣﺴﻨﻴﺔ ﻭﻗﺎﻟﺘﻠﻬﺎ ﺯﻋﻤﺎﺍﺍﺍﺍﺍﺍﺍﺍ ﺍﻥ ﺷﺎﺀﺍﻟﻠﻪ ﻳﺎﺭﺑﻲ ﻭﻟﻴﻚ ﻛﺎﻥ ﻫﺬﺍ ﻟﺒﺸﺎﺭﺓ .... ﻗﺎﻟﻮﻟﻬﺎ ﻗﺪﺍﺵ ﻟﻴﻚ ﺍﻣﻜﻨﻨﺘﻴﻬﺎ !! ؟؟ ﻗﺎﻟﺘﻠﻬﻢ ﺍﻳﺠﻲ ﺗﻮﺍ ﺗﻼﺗﺔ ﺍﺳﻨﻴﻦ !!! ﻗﺎﻟﻮﻟﻬﺎ ﻣﻊ ﺑﻌﻀﻬﻢ ﺍﻥ ﺷﺎﺀﺍﻟﻠﻪ ﺭﺑﻲ ﻳﺮﺯﻗﻬﺎ !!! ﻓﺘﺤﻴﺔ ﻓﻲ ﺍﻟﺪﺍﺭ ﻣﻊ ﻣﺮﺕ ﺑﻮﻫﺎ ﺍﻟﻠﻲ ﺳﺎﻭﺗﻠﻬﺎ ﺣﻮﻟﻴﻬﺎ ﻭﺫﻫﺒﻬﺎ ﻭﻓﺘﺤﺖ ﺍﻟﺒﺎﺏ ﻭﻃﻠﻌﺘﻬﺎ .... ﻭﺍﺑﺪﺕ ﺍﺗﺴﻠﻢ ﻋﻠﻰ ﺍﻟﻀﻴﻮﻑ ﻭﻣﺮﺕ ﺑﻮﻫﺎ ﻭﺍﻗﻔﺔ ﻓﻲ ﺟﺮﺗﻬﺎ ﺧﺎﻳﻔﺘﻬﺎ ﺍﺩﻭﺥ ﺗﺎﻧﻲ .... ﻭﻫﺪﻳﻜﺎ ﻓﺘﺤﻴﺔ ﺍﺗﺴﻠﻢ ﺑﺼﻮﺕ ﺍﻣﺮﻛﺢ ﻭﺭﻧﺎﻥ ﻭﺗﺮﺩ ﺑﻌﺰ ﻭﺧﻴﺮ ﺍﻟﻜﻼﻡ !!! ﻭﻛﻞ ﻣﻦ ﺳﻠﻤﺖ ﻋﻠﻴﻪ ﺍﻳﻘﻮﻝ ﻳﺎ ﻣﺎﺷﺎﺀﺍﻟﻠﻪ ﻋﻠﻴﻬﺎ ﻣﺎﺭﻳﻨﻬﺎﺵ ﻗﺒﻞ !!! ﺣﺴﻨﻴﺔ ﻛﺎﻧﺖ ﻣﺎ ﺍﻃﻠﻌﺶ ﻓﻴﻬﺎ !!! ﻧﺎﺿﺖ ﻭﺣﺪﺓ ﻭﻗﺎﻟﺖ ﻫﻮﺍ ﻫﺎﻟﺰﻳﻦ ﻫﺬﺍ ﺍﻳﺪﻭﺳﻮﻩ !!! ؟؟ ﺭﺩﺕ ﻋﻠﻴﻬﺎ ﻭﺣﺪﺓ ﺗﺎﻧﻴﺔ ﻗﺎﻟﺘﻠﻬﺎ ﺧﺎﻳﻔﺔ ﻣﻦ ﺍﻟﻌﻴﻦ ﻋﻠﻴﻬﺎ !!! ﻛﻤﻠﺖ ﻓﺘﺤﻴﺔ ﺳﻼﻣﻬﺎ ﻭﺣﺘﻰ ﻣﻦ ﺳﻠﻔﺎﺗﻬﺎ ﺍﻟﺰﻭﺯ ﻭﺣﻤﻮﺍﺗﻬﺎ ﺍﻟﺰﻭﺯ ﺍﻧﻌﺠﺒﻮﺍ ﺑﻴﻬﺎ ﻭﺳﻠﻤﻮﺍ ﺑﺎﻟﺤﻀﻦ ﻋﻠﻴﻬﺎ !!! ﻗﻌﻤﺰﺕ ﻓﺘﺤﻴﺔ ﺟﻨﺐ ﻣﺮﺕ ﺑﻮﻫﺎ ﺍﻟﻠﻲ ﻭﺗﺘﻠﻬﺎ ﻣﻜﺎﻥ ... ﻭﺍﺑﺪﺕ ﺍﻟﺪﺭﺑﻮﻛﺔ ﻭﺍﻟﻐﻨﻲ ﻭﺍﻟﺪﻧﻴﺎ ﻛﻠﻬﺎ ﻫﺎﻳﻤﺔ ﺍﻻ ﺍﻟﻨﺎﻧﺎ ﺣﺴﻨﻴﺔ ﺍﻟﻠﻲ ﻋﻴﻨﻬﺎ ﻣﺎ ﺗﻮﺍﻃﺖ ﻣﻦ ﻓﺘﺤﻴﺔ !!! ﻭﺍﻭﻝ ﻣﺎ ﺷﺎﻓﺖ ﻣﻜﺎﻥ ﺍﻓﻀﻲ ﻣﻦ ﺑﺤﺪﺍ ﻓﺘﺤﻴﺔ ﺟﺘﻬﺎ ﺗﺠﺮﻱ ﻗﻌﻤﺰﺕ ﺟﻨﺒﻬﺎ ﻭﺍﺑﺪﺕ ﺍﺗﻬﺪﺭﺯ ﻋﻠﻴﻬﺎ ... ﻗﺎﻟﺘﻠﻬﺎ ﻛﻴﻒ ﺣﺎﻟﻚ ﺗﻮﺍ ﻳﺎﻓﺘﺤﻴﺔ !! ؟؟ ﻗﺎﻟﺘﻠﻬﺎ ﺍﻟﺤﻤﺪﻭﻟﻠﻪ ﻳﺎ ﺍﻟﻼﻱ ... ﻗﺎﻟﺘﻠﻬﺎ ﺧﻴﺮﻙ ﺻﺨﺘﻲ ﺷﻦ ﺣﺴﻴﺘﻲ !!! ﻗﺎﻟﺘﻠﻬﺎ ﻭﺍﻟﻠﻪ ﻣﺎﻧﻌﺮﻑ ﻳﺎﺍﻟﻼﻱ ﺍﻧﻲ ﺧﺎﺷﺔ ﻻ ﺑﻴﺎ ﻭﻻ ﻋﻠﻴﺎ ﻣﺎﺣﺴﻴﺖ ﻏﻴﺮ ﺑﺎﻟﻌﺮﻕ ﻭﺭﻋﺸﺔ ﻓﻲ ﺍﻳﺪﻳﺎ ﻭﺍﻟﺪﻧﻴﺎ ﻟﻌﺒﺖ ﺑﻴﺎ !!! ﺍﺑﺘﺴﻤﺖ ﺍﻟﻨﺎﻧﺎ ﺣﺴﻨﻴﺔ ﻭﻗﺎﻟﺘﻠﻬﺎ ﺍﻥ ﺷﺎﺀﺍﻟﻠﻪ ﺭﺯﻗﺔ ﻣﻦ ﺍﻟﻤﻮﻟﻰ ﻭﻓﺮﺣﺘﻲ ﺍﺗﻮﻟﻲ ﻓﺮﺣﺘﻴﻦ ﺑﻴﻦ ﻛﻤﺎﻝ ﻭﻓﻮﺯﻱ ... ﻗﺎﻟﺘﻠﻬﺎ ﻓﺘﺤﻴﺔ ﺍﻳﻪ ﻭﺍﻟﻠﻪ ﻳﺎ ﺍﻟﻼﻱ ﺍﻥ ﺷﺎﺀﺍﻟﻠﻪ ... ﻭﻛﻤﻠﺖ ﺍﻟﻨﺎﻧﺎ ﺣﺴﻨﻴﺔ ﻛﻼﻣﻬﺎ ﺑﻌﺪ ﻣﺎ ﺍﺩﻧﺖ ﺍﻛﺘﺮ ﻟﻔﺘﺤﻴﺔ ﻭﻣﺎﻟﺖ ﻋﻠﻴﻬﺎ ﻭﺷﺪﺗﻠﻬﺎ ﺍﻳﺪﻫﺎ ﻭﻗﺎﻟﺘﻠﻬﺎ ﺍﻧﻘﻮﻟﻚ ﺍﻟﺤﻖ ﻭﺍﻧﺘﻲ ﺗﻌﺮﻓﻴﻨﻲ ﻛﻠﻤﺔ ﺍﻟﺤﻖ ﻣﺎ ﻧﺸﺪﻫﺎﺵ ﻋﻨﺪﻱ !!! ﻟﻤﺎ ﺷﻔﺘﻚ ﻭﺍﻗﻔﺔ ﻓﻲ ﻋﺘﺒﺔ ﺍﻟﺴﻘﻴﻔﺔ ﻗﻠﺖ ﻣﻨﻮ ﻫﺎﻟﻼ ﺍﻟﺒﺎﻫﻴﺔ !!! ﻭﻟﻤﺎ ﻗﺮﺑﺖ ﻣﻨﻚ ﻭﻗﻠﺘﻴﻠﻲ ﺍﻧﻲ ﺍﻟﻼ ﻓﺘﺤﻴﺔ ﻣﺮﺕ ﺍﻟﺴﻲ ﻛﻤﺎﻝ !!! ﺯﻱ ﻣﻦ ﺻﺐ ﻋﻠﻴﺎ ﺍﻣﻴﻪ ﻭﺍﺳﺘﺼﻐﺮﺕ ﺭﻭﺣﻲ ﻭﻟﻮﻻ ﺍﻧﺘﻲ ﺳﺒﻘﺘﻴﻨﻲ ﻭﺻﺨﺘﻲ ﻛﻨﺖ ﺍﻧﻲ ﺍﻟﻠﻲ ﺻﺨﺖ !!! ﺷﻦ ﺑﻨﻘﻮﻟﻚ ﺗﻮﺍ !! ﻭﺍﻟﻠﻪ ﻣﺎﻋﻨﺪﻱ ﻣﺎﻧﻘﻮﻝ !!! ﻗﺒﻞ ﻣﺎﺗﺨﺸﻲ ﺑﺸﻮﻳﺔ ﺍﻧﻜﻠﻢ ﻓﻲ ﺭﻭﺣﻲ ﻫﺎﺯﻳﺔ ﻋﻠﻴﻚ ﻭﺍﻧﻘﻮﻝ ﻳﺎﺭﻳﺘﻬﺎ ﻏﻴﺮ ﺍﺗﺸﺪ ﺣﻮﺷﻬﺎ ﻭﺍﻟﻠﻪ ﻋﻠﻲ ﻗﻠﺔ ﺟﻴﻬﺎ ﻣﺎ ﻧﻠﻮﻣﻬﺎ !!! ﻟﻜﻦ ﺗﻮﺕ ﺍﻧﻲ ﻓﺮﺣﺎﻧﻪ ﺑﻴﻚ ﻭﻛﺎﻥ ﻧﻠﻘﻰ ﻟﻜﻞ ﺍﻟﻨﺎﺱ ﺍﻧﻮﺭﻳﻚ ﻭﻧﺘﺒﻬﻰ ﺑﻴﻚ !!! ﻗﺎﻟﺘﻠﻬﺎ ﻳﺎ ﺍﻟﻼﻱ ﺩﻭﺗﻲ ﻣﻌﺎﻙ ﻃﻮﻳﻠﺔ ﻣﺎﺗﺠﻴﺶ ﺑﻴﻦ ﻋﺸﻴﺔ ﻭﻟﻴﻠﺔ ... ﺍﻧﻲ ﺍﻟﻴﻮﻡ ﺟﺎﻳﺎﺗﻚ ﻓﺮﺣﺎﻧﻪ ﻭﺑﻔﺮﺣﻜﻢ ﻃﺮﺑﺎﻧﻪ !!!! ﻓﻮﺗﻲ ﺍﻟﻌﺮﺱ ﻭﻧﺒﻲ ﻣﻌﺎﻙ ﺍﺗﻘﻌﻤﻴﺰﺓ ﻳﻮﻡ ﺑﺤﺎﻟﻪ !!! ﺍﻟﻠﻲ ﺳﻜﺘﻪ ﻗﺒﻞ ﻭﺍﻧﻲ ﻏﺎﻓﻠﺔ ﺍﺑﻨﺪﻭﻳﻪ ﻣﻌﺎﻙ ﻭﻧﻔﺮﻏﻪ ﻓﻲ ﻣﻜﺎﻧﻪ ﻭﺑﻌﺪﻫﺎ ﻳﺎ ﺗﻘﺒﻠﻴﻨﻲ !!!! ﻳﺎ ﺯﻱ ﻗﺒﻞ ﺍﺗﻠﺰﻳﻨﻲ !!!! ﻗﺎﻟﺘﻠﻬﺎ ﻧﺎﺩﻣﺔ ﻋﻠﻰ ﻃﻠﻌﺘﻚ ﻭﺍﻟﻤﻮﻟﻰ ﻋﺎﻟﻢ ﺳﺒﺤﺎﻧﻪ ... ﻭﻛﺎﻥ ﺑﻨﺤﻜﻲ ﻟﻠﻨﺎﺱ ﻋﻠﻴﻚ ﺑﻴﻘﻮﻟﻮﺍ ﻣﻌﺬﻭﺭﺓ ﺍﻟﻨﺎﻧﺎ !!! ﻗﺎﻟﺘﻠﻬﺎ ﻓﺘﺤﻴﺔ ﻻ ﻭﺍﻟﻠﻠﻠﻠﻠﻪ ﻣﺎﻳﻘﻮﻟﻮﺍ !!!! ﺍﻟﻨﺎﻧﺎ ﺗﻨﻘﺎﻝ ﻟﻠﻲ ﺑﺎﻟﻬﺎ ﻭﺍﺳﻊ ﻭﻗﻠﺒﻬﺎ ﻟﻴﻦ ﻭﺍﻟﺤﻦ ﻣﺎﻟﻴﻬﺎ !!! ﺗﻨﻘﺎﻝ ﻳﺎ ﺍﻟﻼﻱ ﻟﻠﻲ ﺗﺴﺘﺮ ﻭﺗﻌﻠﻢ ﻭﺗﻮﺭﻱ ﻭﺗﻔﻬﻢ !!! ﺗﻨﻘﺎﻝ ﻟﻠﻲ ﻋﻨﺪﻫﺎ ﺻﺒﺮ ﻭﺭﺣﻤﺔ !!! ﺗﻨﻘﺎﻝ ﻟﻠﻲ ﺗﻨﺼﺮ ﻣﺶ ﺗﻬﺰﻡ !!! ﻣﺎﻫﻮ ﻗﺘﻠﻚ ﻳﺎ ﺍﻟﻼﻱ ﺧﻠﻴﻪ ﺍﻟﻜﻼﻡ ﺑﻴﻨﺎ ﻟﺒﻌﺪ ﺍﻟﻌﺮﺱ ﻻﻥ ﻗﻠﺒﻲ ﺭﺍﻫﻮ ﻣﻠﻴﺎﻥ !!! ﺳﻜﺘﺖ ﺍﻟﻨﺎﻧﺎ ﺣﺴﻨﻴﺔ ﻭﻗﺎﻟﺘﻠﻬﺎ ﺍﻥ ﺷﺎﺀﺍﻟﻠﻪ ﺧﻴﺮ ﻭﺧﻼﺹ .... ﻃﻠﻌﻮﺍ ﺍﻟﺼﺒﺎﻳﺎ ﺳﻮﺍﺑﻴﺖ ﺍﻟﻘﻔﻪ ﻭﺳﻂ ﺿﺮﺏ ﺍﻟﺪﻓﻮﻑ ﻭﺍﻟﺰﻏﺎﺭﻳﺖ ﺣﻄﻮﻫﻢ ﻓﻲ ﻭﺳﻂ ﺍﻟﺤﻮﺵ ﻭﺍﻟﻨﺎﻧﺎ ﺣﺴﻨﻴﺔ ﻓﺮﺣﺎﻧﻪ ﻭﺍﻗﻔﺔ ﻋﻠﻰ ﺍﻟﺴﻮﺍﺑﻴﺖ ﺍﺗﺸﻮﻑ ﺳﻘﺪﺕ ﻗﻔﻪ ﻭﻟﺪﻫﺎ ﻣﻊ ﺍﻟﺰﻳﺎﻧﻪ ﻭ ﺧﺸﺖ ﻟﻠﺤﻮﺵ ﻓﺮﺣﺎﻧﻪ ﻭﻫﺪﻳﻜﺎ ﺍﻟﺪﺭﺑﻮﻛﺔ ﺍﻟﺮﻧﺎﻧﻪ ﻭﺍﻟﻐﻨﻲ ﻋﺎﻟﻲ ﻭﺑﺎﻟﻬﻨﻲ ﺍﻳﻜﻤﻞ ﻣﻮﻻﻧﺎ .......انتظروني غدا مع الجزء الثامن
