"အမုန်းတွေ ၊ ရန်ငြိုးတွေကို စွန့်လွှတ်လိုက်ပါတော့ မဒီ ။ ဒီလိုမှ မဟုတ်ရင် မင်းက ဝိညာဉ်ဆိုးအဖြစ်နဲ့ ဘဝအဆက်ဆက် ရှင်သန်ရလိမ့်မယ် ။ ဘယ်တော့မှ ဘဝကူးနိုင်မှာ မဟုတ်ဘူး "
ခန့်မင်းနောင်က မဒီ့ကို နားချသည် ။ သို့သော် မဒီက နားထောင်မည့် အရိပ်အယောင်မရှိ ။ မျက်ဝန်းတွေက စူးရဲ၍ ဒေါသရောင်လက်နေသည် ။
"ငါ့ဆန္ဒ မပြည့်မချင်း ထွက်သွားမှာ မဟုတ်ဘူး "
မဒီက အေးစက်စက်လေသံဖြင့် ဆိုသည် ။
"မင်းရဲ့ ဆန္ဒက ဘာလဲ မဒီ "
ရှိုင်းက အလောတကြီး မေးမိသည် ။ အချိန်ပိုကြာသွားလျှင် အစီအစဉ်က ပျက်သွားနိုင်သည် ။ ထိုအခါ မိုးသောက်ယံ အသက်အန္တရယ် ရှိနိုင်၏ ။ သူ့ရင်ထဲ မီးမြှိုက်ခံရသလို ပူလောင်နေ၏ ။
"ငါ့ ဆန္ဒက မိုးသောက်ယံ သေသွားဖို့ပဲ "
မဒီက ပြောပြီး ခြောက်ကပ်ကပ် ရယ်သည် ။ ထို့နောက် ဘောင်အစွန်းမှာ ထိုင်နေရာမှ ရှေ့သို့ ကိုယ်ကို ရွှေ့သည် ။ နည်းနည်းလောက်ဆို အောက်သို့ ပြုတ်ကျသွားနိုင်၏ ။
"မလုပ်ပါနဲ့ မဒီ ။ ငါ တောင်းပန်ပါတယ် "
ရှိုင်းက ထိတ်လန့်တကြား တောင်းပန်ရင်း ဒူးထောက်လိုက်သည် ။ မဒီက မျက်မှောင်ကြုတ်၍ အံကြိတ်သည် ။ မိုးသောက်ယံ၏ ဝိညာဉ်ကတော့ ရှိုင်းကို ကြည့်၍ ရှိုက်ငိုနေသည် ။
ခန့်မင်းနောင်ကတော့ စိတ်ညစ်ညူးစွာနှင့် သက်ပြင်းရှိုက်သည် ။
"ဘာလို့လဲ ရှိုင်း ။ ဘာလို့ သူ့ကို ဒီလောက်ထိ ချစ်နေရတာလဲ ။ အဲ့ဒီ မိုးသောက်ယံက ငါ့ထက် ဘာတွေသာနေလို့လဲ ဟမ် "
မဒီက ဒေါသတကြီး မေးသည် ။
"ဒါတွေ အားလုံး ကိုယ် မှားခဲ့တာပါ မဒီ ။ ကိုယ့်ခံစားချက်ကို ကိုယ် မသိခဲ့မိတာ ။ အဲ့ဒါကြောင့် မဒီ့ကို နာကျင်စေခဲ့မိတာ ။ ကိုယ့် အမှားပါကွာ ။ မဒီ မကျေနပ်ရင် ကိုယ့် အသက်ကိုသာ ယူလိုက်ပါ "
ရှိုင်း၏ စကားဆုံးတော့ မဒီက ဒေါသတကြီး တက်ခေါက်သည် ။
"အဲ့ဒီလို သိပ်ချစ်ပြနေတာ မြင်တော့ ငါ ပိုဒေါသထွက်ရတာပေါ့ ။ နင်တို့နှစ်ယောက် လုံးဝ မပေါင်းဖက်စေရဘူး "
ESTÁS LEYENDO
ချစ်မိသူ အရှုံး ( Completed)
Romance📣( Season 1 + 2 ) Completed. Boy's Love Story . Own Creation . Thin Zar Moe Oo.
S2 ( part - 8 )
Comenzar desde el principio
