لن اُكسر

البارت الثامن عشر

احاول اقنع نفسي انو عايشة بكرامتي وماهتم لكلشي وراكعة الدنيا جلاق بس وكت الصدك يطلع هذا كلة بس حجي اريد الفعل وكت المفعول بس مدا الكة اريد مااهتم مااشيل هم بس الكة رووحي غاركة بكل هذني وحدي لا معين لا مناصر وحدي اجاهد الحياة واوكف على رجلية لا سند لا عوجية اتوجى عليها اسند نفسي بنفسي ..

شفت استكاين الجاي رحت غسلتهن وصعدت فووك لكيت مَدين تون من ضهرها واني هم رجلية تفصخت تمددت والغفية للعصر نزلت لكيت مراد وامة كاعدين يسولفون شوية مراد رجلة تحسنت صارلة كم يووم يكدر يسند روحة ع محجر وينزل ويصعد وحدة ..

ويمهم مرة و جهالها تلاثة تصير اخت ام مراد الصغيرة

ابنها بدة الجاي على زولية باوعتلي وكالت .. يبنية عفية تعااي مسحي الجاي لا تلكع الزولية ..

صررت اتحسس من كلشي وهيا منتضرتني اجي اشيل وصخ ابنهاا ..

رحت جبت سفنجة وماي مسحتة كلة وهيا تكول اهنا واهنا واني ودي اركع طاسة برراسها رحت كطفتها بلمطبخ ..

انتجيت على مطبخ لا اردي طاحت دمعتي مخنووكة حييل ضيگ بصدرري ذابحني ذبح باوعت لروحي لمراية بلمطبخ مال كاونتر وكلت عندي عائلة ترة والله ابو واخون وام ليش هيج وضعي والله عندي اهل ليش هيج ليش ؟

الابو مو سند بنتة والاخو حزام ضهرها والام شيالة الهموم ليش اني اهلي ماعدهم و لا صفة من ذني صفات ليش اهلي معربدين سكارة كح.. مكتوبلي شلعاان الكلب والذلة والاهانة و عود عدي اهل تهي بهي الله يا الله اهل لا هاهية ..

طلعت اخت ام مراد والهوسة مال الجهال والكلينس والكوابة رحت لميتهن كلهن وغسلتهن ولملمت البيت وكعدت كامشة رجلية ..

ام مراد .. والله تعبتن اليووم بنيتي

ابستمتلها بخفة صدك الواحد من يسمع الكلام الحلوو ينسي كل تعب  ويشمر كلشي ورة ضهرة .. لا خالة تعبج رراحة

بعدين صفنت بسررعة وكلت اكيد دتعطف علية وتكول ماعدها احد خلي افرحها بكم هلحجاية ترتاح شوية والة هيا غصبن عليها تشتغل براتب وفلووس ابني اي اي دتعطف علية اني مجرد خدامة هناا ..

لازم يصيرلي كياني الخاص وكرامة ولا اضل تحت رحمة احد لازم ابني نفسي وحياتي ومستقبلي من جديد باجر اذا زوجت شكوول لاجهالي امكم جانت الناس تعطف عليها وخدامة بلبيوت وبيت جدهم دعاررة والله يمشون ومدنكين راسهم ..

لازم اطور نفسي وابنيها من جديد حتى اطفالي يفتخرون بأمهم من يكبرون ويكولون اي هاي امنا تعبت وجاهدت وبنت نفسها بأيدها ..

اندكت الباب ام مراد كالت روحي فتحيها .. طلعت فتحتها جان صلاح طب وكال

.. مراد ووين ؟

نور .. موجود جوة

صلاح .. هاا خووش اخذيلي طريق بس لحضة

التفتتلة منتضرة يحجي .. اكرم شسوالج؟