بعدما توادعات معاهم رجعات وهي غاطير بالفرحة اول حاجة مشات خبات لاكارط مع حوايجها وخرجات كتشمر لقات زهرة كتفطر
لطيفة بابتسامة : صباح الخيير
زهرة : صباح النور ! شتك فايقة ناشطة فين كنتي ؟
لطيفة بعفوية : مشيت نجيب لاكارط ديالي
زهرة بصدمة : كي درتي ليها ؟
لطيفة هزات كتافها : مادرت والو .. ربي سخر ليا ولاد الناس
زهرة بتاسمات : تستاهلي اختي .. نكب ليك اتاي ؟
لطيفة : كبي كبي تحلات ليا الشهية دابا
زهرة : هههه هاكي الالة فطري انا نمشي نجيب الدراري من لاكريش باش نبداو
لطيفة : سيري متعطليش راه مانتسناكش
زهرة : لا دغياا
ناضت زهرة كتزرب لبسات عليها وخرجات تجيب ولادها اما لطيفة فطرات وهزات الماعن غسلاتهم وجلسات شادة الطيلي ديالها حتى وصلها ميساج من عند سهام
افين الهرابة ؟
لطيفة صونات عليها ابيل فيديو
دغيا جاوبات : اهلا الزين
لطيفة : كيدايرة ؟
سهام : لاباس ونتي ؟
لطيفة : الحمد لله
سهام : فين غبورك ؟
لطيفة : غيير فالدنياا
سهام : امم نتي غبري وانا خليني مني للدق .. اختي خويا فضحني قاليك منك يخلاق وباغي يجيب الدار يخطبوك
لطيفة : ياكما تسطا ؟
سهام : وا من نهار شافك وهو كي المسطي .. شوفي راه خويا والله ماتلقاي فحاالو غير فكري مزيان ..
لطيفة بتفكير: ماعرفتش والله مكنفكرش نتزوج دابا
سهام : احبيبة ماتنسايش راه فايت فيك الزواج ماحدك باقة صغيرة ضربي الحديد ماحدو سخون تزيدي شويا والله ما يبقا مساومة حد
لطيفة زعجاتها بهضرتها ندمات لاش عاودات ليها : نخليك دابا عندي مايدار
قطعات عليها ورمات الطيلي وهي كتفكر .. من جهة عندها الحق ومن جهة قالت مع راسها هي ماشي شايطة باش ترخص راسها هاكا .. لي جا تعطيلو راسها بلا ماتسول .. ماغاطيحش فالغلط الاول لي مادارت فيه لا بيديها ولا برجليها بل باها لي دخلها معمعة الزواج والمسؤلية وهي مازال طفلة
تنهدات ماباغاش تفكر فدكشي لي فات لكن وصلات لواحد النقطة خلاها تسهاا تاني كتفكر ولي هي
"محمد"
اي نعم هو ماعمرو كان الزوج المثالي بالنسبة ليها .. ماعمرو حن فيها ولا عاملها مزياان .. حتى فالعلاقة الحميمية كان كيعاملها كأنها "بائعة هوى " قرفان منها وماباغيش يتمادا معاها بزاف
علاقتهم الحميمة كانت كتنحصر على كيف كيقول هو "قضي الغرض" وكينوض مخليها موراه بدون مايراعي ليها ولا لأنوثتها لي كان كيجرحها فكل مرة
