عندما يعشق الشيطان الجزء الثاني

الحلقة 23

😚
هو يحكي و هي تخزرلو تتمعشق فيه و تتبسم😍قربتلو طبعت بوسة بزربة على خدو و مشات لبست و رجعت تمشي بالشوية و تخزرلو كأنها بدات تستوعب في فكرة انو هو حذاها في بيتها و قاعد على حافة فرشها،انو بالحق توحشها و وحشو قاعدة ترا فيه في عينو و في كل كلمة يقولها و كل حركة يعملها،احساسها بالفرحة فالوقت هذا كان ممزوج بخوف قوي مالمجهول خلا وجيعة كرشها و الاستراس عندها يزيدو،تغلبت على مخاوفها تحاول تتنساها و قدمت ناحيتو وقفت مقابلتو طبعت بوسة اخرى طويلة حارة على جبينو فهم بيها قيمة حبها ليه و معزتو عندها و قداه هي متوحشتو،كان قاعد وراها عالفرش يشيحلها في شعرها و هي هذا الكل تحس في روحها ضايعة و في حلمة محلاها اما مرعبتها في نفس الوقت،قاعدة تستحلا في سخانة السشوار و ملمس ايدو على شعرها و رقبتها و ساكتة،هو زادا ساكت يعرف قداشها حساسة و على اذاكا قاعد يخمم و ينظم في افكارو باش يعرف كيفاه يوصللها الكلام الي يحب يقولو من غير ما يجرحها و يبكيها،سكت السشوار و قربلها باس خدها و قعد معنقها حاط راسو على كتفها،هي كانت جامدة كالعادة احاسيسها ديما غالبتها حتى تراه واقف بعيد عليها تولي ترعش و تدخل بعضها فما بالك توا معنقها،تسمع فيه يحكي
-حبيبي باش نحكي معاك في موضوع و نحبك كيف ما في كل مرة تفهمني و تراعيني و اول حاجة توثق فيا و تصبر معايا خاطر نعرف مليح قيمتي عندك و مقدار حبك ليا اما انت ما ما تعرش قداه جوزيف يعشقك و يموت فيك اما تو تجي اك اللحظة لتعرف فيها حقيقة كل شي..
تخزر للفراغ اما مركزة مليح مع كل كلمة قالها و فهمت بالباهي الموضوع الي يحب يحكي فيه و من طريقة كلامو الجدية عرفت قداش هالموضوع حساس و حلو باش يكون صعيب عليها و اصعب برشا عليه هو و واعية اكثر للتضحيات الي باش يتقدم بيها كل حد معني بالامر و عندو صلة فهالموضوع،رجفت اطرافها لمت ساقها و تكمشت على روحها و حطت راسها على ركبتها و تكلمت بصوت فاشل
-انا ثيقتي فيك كبيرة و حبي ليك اكبر كون متأكد يا جوزيف صاحبك راجل،مهما باش يكون الموضوع و انا فهمت انو مش ساهل و باش يطوال بينا و يطول علينا الطريق و مهما طوال هالطريق والا قصار و حتى كان بعدنا انا ديما معاك قريبة منك و قريبتلك و بإذن الله وقت ما تستحقني تلقاني،ما نعرش ايثار كيفاه دخلتها القدرة في حكايتنا الي ما يعرف بيها حد و كيفاه بعد موت جاد تقلبت حياة الناس الكل و خذات مسار آخر و تشابك كل شي في بعضو،ما انجمش نسألك و الا نطالب بتفسير انت الاول ما بادرتش و حكيتلي عليه يعني الحكاية مزالت مش كاملة حتى عندك انت،دونك ما تنجمش تحكي حكاية ناقصة نهايتها مزالت ما تعاشتش و مازلت انت في حد ذاتك لحد الآن مش مستوعب كيفاه بدات و خذات طريق تفرض عليك تمشي فيه بالسيف عليك،مش كان انت الكلنا في رمشة عين لقينا رواحنا ماشين في طريق بالغصب مفروض علينا لا عمرنا توقعناه و ما لينا حتى حل و لا بيدينا نبدلو مكتوب ربي و لا نعارضوهم..
يخزرلها و يتبسم بوجيعة مخلطة بنوع مالفخر حاسس بوجيعتها و غصتها الي مش منجمة تظهرهم قدامو اما مستقوية و ايمانها قوي و راضية تماما بحكم ربي، قداش حس هالحكاية كبرتلها مخها و حملتها مسؤولية اكبر منها خلاتها تحس احاسيس مش متاعها قلبو وجعو عليها ما تحملش يراها هكا،جبد روحو منها شوية و اتكا عالفرش فوق الغطا هز الكوات و حللها يدو و تبسم
-اي صغرونتي ايجا عندي معادش وقت لازمك ترقد ترتاح
رخات شفايفها و على وجها علامات خوف
-باش تمشي توا؟؟
ضحك و قلها مازلت،فرحت مشات ديراكت تخبات عندو حوطتو بيديها و غرست راسها في رقبتو تقول باش يهرب و فعلا بالنسبة ليها اذاكا لباش يصير اما تعرف مليح انو رغما عنهم الزوز لازم يقتنعو و يتأقلمو مع الي قاعد يصير و يحضرو رواحهم مليح للي جاي..خانسة و ساكتة و هو يمسحلها على شعرها يحاول ينظم افكارو خاطرو لازم يفسرلها نوعا ما كل شي و يحافظ على غموض برشا تفاصيل الي بالنسبة ليه هو زادة مجهولة ما ينجمش حتى يتوقع و الا يتنبأ بشنو باش يصير مبعد،غمض عينو و تقوا قرر انو يبدا يحكي و الكلام تو يجي وحدو يحاول على قد ما يقدر ما يجرحهاش😣
-حبيبي..صغرونتي
-مممم
جاوبتو و هي فاهمة مليح انو العد التنازلي بدا،الليلة هذي باش تكون نقطة التحول و بداية الصبر و الانتظار،بداية الوجيعة الحقانية و البعد و الدموع و الوحش،هذي النهاية و الله اعلم وقتاه باش تجي البداية الجديدة الي وعدها بيها،هبطت من عينها دمعة حارة ساكتة هادية ما تحبش تتكلم و الا تحكي اكتفات بالممممم هاكي باش ما يحسش انها قاعدة تبكي و تزيد توجعلو قلبو عليها و اتدخلو بعضو اكثر من الحالة الي هو فيها،الهدوئ الي حستو فيه الليلة اول مرة تراه في جوزيف المقربع الي ديما ينبر لا يسيب حد ولا يهمو في شي، ما تعرش انو فاهمها و حاس بيها و بالدموع لقاعدة سبالة على خدها اما باش ما يزيدش الطين بلة يحاول انو يتجاهل هذا الكل بالسيف عليه😢