Nakakita ko ug lugar na suok, layo sa uban na mga bisita, medyo ngitngit pero sa kung asa ko nagbarog, makita nako ang kahayag sa pavilion kung asa nagpadayon ang reception sa kasal na akong gitambungan ug madungog ang kaalegre sa mga bisita. Nikuha ko sa akong pakete sa sigarilyo ug nidagkot ug isa ka stick sabay talikod ug miatubang sa maanindot na talan-awon sa mga suga sa siudad ubos sa bukid na akong nahimutangan.
"Albert!", sangpit sa lalake na tingog sa akong likod. Dali kung nilingi paatubang sa kung asa gikan ang tingog.
"Oy Mac, ikaw man diay na! Abi ko'g kinsang abata nangurat oi", tubag ko sa pagkakita nako sa lalakeng naglakaw paduol sa ako
"Ngano naa man ka ngari? Wa man ka moapil sa duwa ngadto?", pangutana ni Macmac.
"Ay dah, tawgon na sad ta ug paapil anang garter toss, wa uroy gaba-i. Maayo ng molikay ta daan ana para wa'y samok."
"Hahaha ka KJ sad nimo oi, di jud ka maminyo ana."
Wala ko na lang siya tubayi.
"Manigarilyo diay ka?", pangutana ni Macmac aron maputol ang kahilom.
"Gusto ka?", dungan ug tunol sa pakete sa sigarilyo
"Unsa man na?"
"Marlboro Black"
"Wa kay pula?"
"Wa dong! Unsa jud ko takatak boy na gadala ug daghang sigarilyo?", tubag ko dunga'g bawi sa pagdunol sa sigarilyo.
"Aw ambi na lang na bi, maayo na lang na kay sa wala."
"Way klaro oi!", tubag ko samtang gatunol sa pakete sa sigarilyo.
Nikuha si Macmac ug isa ug nidagkot, "Ngano arte kaayo ka?", pangutana niya samtang nagtunol sa sigarilyo.
"Wa ra. Nangita ra ug kahilom."
Wala ra pud siya mitubay maong niatubang ko pagbalik sa talan-awon sa siudad. Mitapad si Macmac sa akong walang bahin.
Taud-taud pud na kahilom ang minglabay. Nidagkot pa ko ug lain na sigarilyo. Ang gipangita nako na kalinaw ug kahilom nawala na sukad miabot si Macmac. Gapaniid ra ko sa iyang mga lihok. Taas iyang panglantaw.
"Gusto pa ka?", pangutana ko dungan tunol sa sigarilyo sa dihang nabantayan nakong hapit na mahurot iyang sigarilyo.
"Dili na ko, sakitan kaayo ko anang mentol", tubag niya.
Nilabay ang mga pipila ka gutlo na kahilom.
"Kamusta naman ka, dong?", pangutana ko sa dihang nakamatikod ko na murag mobalikay na siya sa kung asa ang reception.
"Ok lang. Naningkamot mabuhi."
"Maayo nuon", dali kong tubag.
Nahilom na pud mi.
Daghan kung gusto isulti pero walay pulong mogawas sa akong baba. Nahadlok ko na basin ug molakaw na lang siya.
Niatubang pagbalik si Macmac kung asa ang reception. Abi ko ug molakaw na apan gisampak niya iyang sampot sa railing ug nangutana, "Ikaw, kamusta naman ka?"
"Ok ra pud. Padayon gihapon sa pagpanginabuhi sama nimo", tubag ko. Maski unsaon nako pagpaningkamot na mas-engaging akong mga tubag apan lahi jud ang mogawas sa akong baba.
"Grabe jud imong pagpa-datu sa? Kanus-a man ka magminyo?"
"Datu ba oy. Kung datu pa ko eh di wa na lang unta ko manarbaho. Ikaw, pila na imong anak?"
