رجعها خلاها عالرازونه يمي وبصفها بطل لبن باوعت عالاكل الدخان يطلع منه والريحه ضل واكف شوي ومشه وصل للباب
وتذكرت التصوير همست
ديصوروكم
وكف ورد تمشى كم خطوه كبالي صار
منو
مجاوبت
منو مليكه
ماعرفه همست بلا موبالاه
شوكت احجي كالها بتوسل
والله ماعرفه الصبحيه نوبات المح بالسطوح كلتها وماباوعله عيوني عالشباك ومرجيه راسي
تنهد وعافني وراح
بس انسدت باب السطح اخذت اللفات اكلتهن كلهن محسيت على روحي وشربت اللبن
كدرت انام براحه هاليوم
ومرت الايام عاديه. حيل الحمد لله خلصت علاجي وكمت مااتخربط بس بعدني كئيبه ومالي واهس شي وابو قبضه ماعاد صعد
——-
احمد- كملت بيت الحجي ورتبت التصليح وطلعت عالبيت مال حيرانه وهم اشتغلته وهم كلي اخذ راحتك بس ذاك خدمته جانت سبع نجوم
على عد دقايق فاكهه و حلويات عصاير ولفات وصواني تروح وتجي كملته بيومين هم. ورجعت لشغلي. الاسطه ميدري كل العرفه انه اني جنت بالزياره
الفلوس خليتها بسترتي. وماانزعها بس من انام والفها جوايه مثل المخده. وانام
يومين مرت واني تزورني باحلامي
ست نور حتى اسمها نغمه. نورر على نور
كمت اصفن اشرد بخيالي واتخيل تبادلني بنضره بابتسامه احسها حنينننه للاخير ردت اي حجه اروح بيها لذيج المنطقه
خابرت ابو صادق كتله
عمي اي احد يحتاج كهربائي بنه اني موجود
ممنونك عمي تدلل
وراحت ايام جتي ايام توني مكمل شغل دك تلفوني ابو صادق رديت
الو
ها يابه شونك احمد،هله عمي هله بيك
بيك اكثر عمي رادو كهربائي لان الكهربائي الجبته اني لاعب لعب ببيوت الجوارين
اي عمي تومر شوكت تريد اجي
تعال باجر الصبح لان بيتين ابني وتفاهم انت وياهم
ممنون منك عمي ابو صادق
لا ابني هذا عملك وانت انسان نادر
مشمور سديته منه
وكمت سبحت وتحضرت هدومي لباجر والليل كله اكول بلكن المحها هيج وحدي وحدي اتخيلها حتى ماخليها تحس
طلع الصبح وبدلت بهدومي الجديد ه ورحت للمنطقه
لابو صادق جان مبدل ديطلع واخذني وداني عاللي يريد اسوي كهربائه
وراح كعدت اشوف الميزانيه صايره خرطي وايرات ملفلفه مكومه ومحشوره ومسوين غيرها حارين من غير نقطه والنقطه ممتحمله. هيج لود يوووو لاعبين طوبه حكيت لحيتي ابتسم باوعت لابو البيت
عمي هاي صايره هوسه
على كيفك برااحتك اريد تسو يها لوز
باوعت للحايط اكو وايرات دفت محروكه ومخلين ضاهري معلكي تعلك رجال جبير بالعمر خطيه منويسويله
باوعتله
عمي ابلش تفليش واعدل وارد ابني شتكول
