نهوه عباس(عشقي نهوتي)

قبل الأخير

ضحكني واهتز جسمي عباله رجعت ابچي
-يمعووووووده اشاقه وياچ..يابه تصير سوالف شبيچ

وخر مني
- خلي يهدا چم يوم ونروح نصالحة ونستسمح منه
تلگينا فرحان برجعتنا بس چي اخذتچ بدون علمه
والصدگ ما چنت متوقع راح يسوي هيچ .. اسف

عادي ماصار شي
-يلة روحي وانه يم الجهال باقي

عفتهم وصعدت فتحت الباب الغرفة بارده ثلج
والهوى متشبع بعطره كلشي كما هوه كل الغراض بمكانها
ومرتبة..

فتحت كنتوري ملابسي معلگات ومسفطات ..
وملابس فضل هم بمكانهن..

اخذت منشفه وبرنص ودخلت للحمام سبحت لفيت نفسي
وطلعت لگيته بالغرفة .. فاتح الكنتور ومشغل صوبه كهربائية

دخلت التفت عليه
-نعيماً
شكراً.. وين الجهال
-ناموا اثنينهم اجيت اسبح
اي الحمام دافي

احچي ويا وانزع بالخاولي من راسي واحس مسوية شي غلط

طلع للحمام فتحت الكنتور نزلت تراكسود وخليتها
على الچرباية

بدلت ملابسي ومشطت شعري وگعدت البس جواريب..
باوعت لنفسي دشداشة شوية عريضة چنت البس بيت اهلي
ملابس راهيه استحي من اخواني وجواريب ولامة شعري
كله شكلي مال وحدة خمسينية مو عروس ..

طلع من الحمام لبست وگعد يمي
- باچر اروح اجيب جرباية لفضل وهاي خليها لعشق بعد ما تكفي اله

براحتك
-اذا محتاجة بعد شي ذكريني بي الصبح
ميخالف

مشط شعره ونزل صعد عشق نيمها بالچرباية الزغيرة
وجاب فضل على الچبيرة .. حط ايده على راسة يباوعلة
والفرحة بعيونه مبينه..

بعد وكت بس اذا بقيت گاعدة اموت من القهر..
سحبت الغطا من فضل وتمددت يمة..

بس هو مانام اخذ قمصلة لبسها وطلع

هسه شحال امي؟؟ واكيد ابوي مو احسن منهاا
اول مرة يضربني .. بس حيل بية استاهل اني ليش رحت
وياا وحتى لو چان اخذت التلفون وخابرتهم
حقة يتصرف هيچ اذا صار حادث لو شي شراح يسوون
والناس شراح تحچي احنى ناخذ الموضوع ببساطة بس
محد راح يتفهم

احچي بگلبي واحس دموعي نار تچوي وعيوني موتتني
من الوجع ..

غفيت..
وسمعت صوت حركه وصوت علاليگ..
فتحت عيني باوعتله بس هوه ما انتبهلي راح نزع القمصلة
وحط الغراض على الميز نزع الترام باوع لنفسه بالمراية

ابتسمت رغم كلشي بعدني فرحانة برجعتي اله..
واحس گلبي يرفرف .. مثل الزفوها لحبيبها بعد سنين عذاب