وقفت جنب الشباك بتعاين ناحية بيت جيرانهم ... شباك الغرفة المقاصداها مفتوح و في شخص بتحرك .. تاني طلع من الغرفة فقلت الشباك و نزلت تتعشى مع اهلها ... و هم قاعدين على السفرة امها قالت ليها ... خالك علي جاي بكرة عشان نمشي لموضوع العربية و الرخصة حقتك
نغم : بالجد ... واااو انتي احلى ام وربي
عفاف : من هسي ماتنفذي الاتفاق بشيلها منك ... العربية للجامعة بس مشاوير و كلام فاضي مامعانا اصلا ماكنت موافقة لو ما ابوك قال دي هدية نجاحك
نغم : ولا يهمك ماما ماتخافي
سامر : طبعا كل الدلع للست لغم ... اخر تلفون و سيارة ... جينا من الامارات بسببها و لسا مامعروف
نغم : في ناس غيرانة شوية و تنفجر
سامر : تنفجري انتي يالغم
عفاف : كفاية يااولاد و يلا كل واحد على غرفتو
سامر و هو طالع السلم بطنطن ... اصلا البيت دا مافيو احترام للحريات و في قمع واضح للمشاعر
عفاف : واي انا من طولة لسان الولد دا
نغم : على فكرة ولدك دا مشروع معارض ناجح
سامر : لغ ااااا م
عفاف : قلنا بس خلاص
نغم مشت غرفتها ... مسكت التلفون لقت كمية رسايل في الماسنجر ... فتحتها و رسلت ليه
نغم : سلام .... كيفك يحيى
يحيى : السودان نورت والحلة كلها نورت
نغم : يابكاش
يحيى : كده تجي و ماتتصلي
نغم : اتصلت رقمك كان مقفول
يحيى : في الحقيقة تلفوني ضاع من يومين
نغم : طارق كلمك ...صح ؟
يحيى : لا لمحتك قبيل في غرفتك .... اسف ما كان قصدي اتلصص لكن جيت اقفل الشباك شفتك
نغم : ولا يهمك
يحيى : يعني ح اشوفك كل يوم
نغم : بالظبط كده و للابد كمان .... يلا ياصديقي تصبح على خير
يحيى : و انتي من اهلو يا اطيب صديقة و بنت جيران
قفلت تلفونها و نامت .... في اليوم التاني مشت مع امها وخالها يخلصو اجراءات العربية و قضو اليوم كلو لحد ما انتهو منها لكن نغم كانت طايرة من الفرح .... رجعو البيت هي و امها بالعربية الجديدة و لما وصلو صادفو طارق واقف مع يحيى برا .... سلمو عليهم و باركو ليها
طارق : تاني ما اشوف واحده منكم تقول لي وصلني
عفاف : هوي ياولد البنات ديل في رقبتك لحد ما يعرسو
طارق : يااااه لا ماتقولي ياخالتو ...بناتكم البايرات البعرسهم ليكم منو
نغم : باير انت ياشين
طارق : شينه انتي
عفاف انتبهت ليحيى سرحان قالت ليو كيفك ياولدي و كيف ناس امك
يحيى : الحمدلله ياخالة
عفاف : سلم على الوالدة .... يلا يابت ندخل اتأخرنا
بالصباح في الجامعة ...... ربى طول المحاضرة ماسكة تلفونها و بترسل .... نغم مركزه معاها و ساكته لما طلعو سألتها في شنو
ربى : عمار ياخ
نغم : مالو كمان
ربى : من جينا هنا وكل يوم عامل لي قصة ... مره اتأخرتي و مره تلفونك مشغول ليه و اشوفك لابسه شنو ... بالجد زهجت
نغم : تحبي اتكلم ولا اسكت
ربى : بعرف عايزة تقولي شنو ....اصلا انتي ماخده منو موقف من اليوم داك بس هو ماكده والله
نغم : دي حياتك و انتي ادرى على العموم الحب لما يبقى كلو شروط و تحكمات ماينفع
ربى : انسي ياخ
جات رؤى مع شهد قالو ليهم .... اها يابنات نمشي ناكل
شهد : نغمات سوقينا بعربيتك نفطر في حته ظريفة وماتخافي العزومه علي
نغم : ابدا العزومة علي انا احتفالا بالسيارة
لما كانو عايزين يمشو لمحو سارة قاعده براها ... نغم مشت ليها كلمتها و اصرت عليها تمشي معاهم ... جنب البوابة صادفو طارق داخل بنهرة قال ليهم ... على وين يابنات
رؤى : عايزين نفطر برا
طارق : اعتقد التعليمات واضحة و العربية ما للصرمحة
نغم : T خليك كوول ياخ
طارق : كلمتي واحده انتو مابتسمعو الكلام
ربى : تكسر بخاطرنا قدام صحباتنا
طارق رفع راسو عاين ليهم ..... اممم خلاص ماتتأخرو و ارجعو بدري عشان عندي حفلة في نادي الجامعة و حاجز ليكم المقاعد القدام
نغم : حاااضر يا مايكل جاكسون زمانك ...... ومشو
شهد : وااااي من جواي لو ماشفتو لي حل مع اخوكم اموت ليكم هنا وربي
ربى : وينك ياماما تعالي شوفي البنات بنبرشو في ولدك
(ألحان مغتصبة بقلم شيماء عثمان)ركبو العربية و اتحركو عايزه ترجع للخلف فجأة ظهرت عربية وراها قربت تصدمها.... السايق نزل القزاز قال ليها ركزي ياخ .. كده الناس بسوقو
نغم طلعت راسها من الشباك .... اسفين يا استاذ .... هز راسو عاين ليها بطرف عينو و مشى .... بتعاين ليه بإستغراب قالت لصحباتها ... الاشكال دي بتطلع من وين ؟!!
وصلو المطعم .... قاعدين ياكلو ... ضرب ليها يحيى .... صباحك سكر
نغم : صباحك ورد
يحيى : مسيوهات و كده
نغم : بالاكتر و كده كمان
يحيى : مايكون عندك محاضرة
نغم : ابدا .... مع صحباتي بنفطر
يحيى : بالعافية .... ما عايز اعطلك بس عندي موضوع .... فاضية متين اكلمك
نغم : ياسيدي اي وقت أأمرني بس
يحيى : خلاص لما ترجعي البيت و تكوني رايقة رسلي لي
نغم : ظابط
قفلت التلفون لقتهم كلهم متنحين فيها ..
ربى : اووو في تطورات و اخبار ما مصرح عنها
نغم : بتتكلمي عن شنو
رؤى : عن الكنتي بتتكلمي معاه
نغم : يحيى !!! اكيد بتهظرو ... احنا اصحاب و بتعرفو كده
شهد : احلى حاجة الحب بعد الصداقة
نغم : مستحيل طبعا .....اصحاب وبس انتو عارفين
ربى : اكيد عارفين ..... ان كل ما نجي السودان من جنب بيتكم مابتحرك .... انو كل مايشوفك يتبسم و يفضل سرحان ... عارفين انو يخترع اي عذر عشان يجيكم ... مره الكوره وقعت و مره عايز يتأكد من توصيلات الكهرباء و اخر مره السنه الفاتت لما كنا قاعدين في الحوش جا قال لمح حرامي على السور .. كل دا و تقولي اصحاب !!!!!
رؤى : اصحاب مين يا ماما دي عارفة و عاملة هبلة
شهد : على كلامكم الزول دا مكسر لكن ما اعترف
نغم : انتو مكبرين الموضوع وبس
سارة : على فكرة عادي ممكن يكونو اصدقاء و بينهم صداقة بريئة لي كل فهمكم للحياة مرتبط بالحب والعشق
نغم : بالله فهميهم ياواعية
ربى : طيب ماشي ....هسي اتصل مالوو ؟؟
نغم : عندو موضوع
رؤى : ياخبر الليلة بقروش بكرة ب اااا ....
نغم : اصلا طوالي بنستشير بعض ... كبري دماغك
سارة : ولا تتعبي روحك ديل مخهم مركب شمال
نغم : خلصو سريع خلونا نرجع
رؤى : دقيقة انزل سناب
سارة : يازولة !!!!
ربى : اوه نسينا انتي مابتعرفي اختي مجنونة سوشيل ميديا .... الله يعيننا بس
رؤى : يلا بنات ..... say hi
رجعو الجامعة حضرو المحاضرة الاخيرة و الدكتور طلب منهم اسايمنت صعب ... اول ما الدكتور طلع كل الطلاب زعلانين و بتكلمو كيف ممكن يشتغلو الاسايمنت دا .... شهد قالت ليهم الراجل دا جادي
رؤي : انا ولا بعملو ولا بتعب نفسي كلمتكم
نغم : الموضوع ماصعب ما تشغلوها لينا
ربى : ياجماعة طارق ضرب لي ..... الظاهر نسيتو الحفلة
شهد : لا دقيقة نمشي الاستراحة اصلح الميك اب ... ماينفع اقابل طروقي بمنظري دا
رؤى : سجمي ... متين بقى طروقي .... وقعدو يضحكو عليها
سارة : انا اعفو لي
ربى : لا ياخ ماتعملي كده بعدين T حاجز لينا الصف الاول VIP وكده
سارة : ما بحب غنا الراب دا ياخ بعمل لي صداع
رؤى : كلنا مابنحبو لكن اخونا لازم نشجعو
نغم : لكن لما تسمعي T متأكده ح تغيري رايك
سارة : طيب نشوف
شهد : واااي انا طروقي لو غنى بالاوندي برضو عسل
ربى : زول يسكت لينا انسة منبرشة دي بالله
لما كانو ماشين على النادي و عايزين يدخلو سمعو صوت ولد بنادي على سارة و كان بتكلم بلهجة حادة ... سارة ماشة وين ؟؟ ... طوالي هي ارتبكت و مشت عليه
ربى : دا منو !!!
شهد : دا مش اشرف ؟ ... اي ياخ هو زاتو
رؤى : اشرف منو ؟
سارة : فنان .... عندو فرقة برضو حضرت ليو كم حفلة قبل كده
نغم : و مالو و مال سارة
شهد : بتكلم معاها زي البعرفها
بعد شوية سارة جات ... ملامح وشها متغيرة .... ياجماعة مابقدر ادخل معاكم الحفلة
ربى : في شنو
سارة : بس كده ... عن اذنكم
مشت خلتهم محتارين ..... نغم إلتفتت على ربى و بصوت واطي قالت ليها ... شكلو من جماعة عمار
ربى : اووو منك .... خلاص ياخ
نغم : سكتنا خلاص
رؤى : بنات يلا
اول ما دخلو شافو طارق ... اشر ليهم قعدو قصادو و بدأت الحفلة ..... طارق بغني بطريقة إحترافيه و معاه فرقتو بعزفو معاه ..... شال الجيتار و بدا يعزف خلى الجمهور في حالة ذهول من روعة الأنغام .. بعد شوية نزل من المسرح وقف قدام نغم و مد المايك .... بإبتسامة قال ليها اطلعي المسرح ولعيها ..
نغم : لا طبعا ... انت بتهظر صح !!
طارق : قومي ياخ
ربى جنبها لكزتها ..... بليييز امشي بالجد اشتقنا لصوتك
رؤى : اي والله
نغم : مابقدر ياجماعة ... ارجوكم
طارق : شنو مابتقدري كلنا عارفين انتي منو
شهد مستغربة و بتتلفت ....في شنو ... زول يفهمني
طارق : يلا يابت
نغم : T انسى
طارق : مامتحرك قلت ليك .... مسك يدها طلعها المسرح بالقوة
دعاء لسا فاتحة فمها ....في شنو ياخ
ربى : هسي تشوفي
طارق بتكلم مع الجمهور ... اليوم انتو اكتر جمهور محظوظ لانكم ح تسمعو أقوى صوت ممكن يمر عليكم في حياتكم ... أقدم ليكم الموهبة الأسرت قلوب مغتربين الامارات و جايه تشعلها في السودان .. حيو معاي صاحبة النغمات الاسطورية ..... نغم .
مسكت المايك و بدأت تغني أغنية أجنبية بصوت شدي عذب أقرب لصوت أديل او سلين ديون .. مغمضة عيونها كلماتها بترقص مع ألحان جيتار طارق ... بتلعب بحبالها الصوتية و كأنها فراشات ملونه بترفرف بين الازهار .... طارق واقف جنبها بعزف و عيونو بتلمع فرح ...اما الجمهور كانو في حالة صمت و دهشة من عذوبة الألحان و روعة الصوت ... بعد خمس دقائق فصلت الموجودين عن العالم الخارجي انتهت الاغنية ..... وقفو كلهم صفقو ليها بحرارة .... و هي بتعاين لطارق و تضحك ... نزلت ... رجعت قعدت مع صحباتها ... شهد منططة عيونها مخلوعة قالت ليها على فكرة انتي وحدة حيوانة ...
نغم بتضحك فيها .... قالت ليها شكرا .
لنا لقاء أخر .......
