جوان_الشيخ_جاسر

البارت العاشر

جــوان الـشـيـخ جــاسـر

للكاتبة mropanda

الـبـارت الـعـاشـر♥️.

جاسر : انننتييي وووويييين،،..دحكت بالرسالة و رجعت ادحك الهم عقلي وكف
جوان : ليش،،..انتظرت دقيقتين و رد
جاسر : اني شكلت
جوان : حسين اخذنا للصيد
جاسر : مكو... صايره السالفه كليله يوكف السيارة
جوان : تمام،،،....ادحك لحسين و جود فرحانين اكثر مني صارلنا هواي محبوسين اذا اكلهم جاسر هيج كال اخرب فرحتهم سكتت بكل الاحوال ماخذه كتله عاد خليهم يتونسون،،،...ورا خمس دقايق دك تلفون حسين احس راسي داخ من الخوف معدتي گامت تگلب احس السفره طلعت من عيني
حسين : هلا
جاسر : وين انته
حسين : طالعين للصيد
جاسر : وكف سيارتك
حسين : ليش انته وين
جاسر : وراكم
حسين : شلون ورانا شلون لحكت،،،،...اني سمعت حسين كال هيج لو روحي طلعت مني خوووفف ع رعببب كمت اتلفت وراي مثل المخبله
جاسر : وكف السيارة كلتتت
حسين : هاي راح اطبك يم السيطرة
جاسر : خوش،،...وكف حسين السيارة لو وكف گلبي هاي هي جسوري ابو الكتلات راح يكضي بيه التوبه،،..نزل حسين من السياره و هو ينتظر جاسر شويه و اجه طبك ورانا نزل و راح يم حسين يحجون مدري شنو ما اسمع ،،..و ما باوع الي ابدد سلم ع الحجيه و كال
: يلا جوان انتي و جود نزلو
حسين : ليش هاي شبيك قابل طالعين ويا غربه
جاسر : لا خويه اطلع منها انته يلااااا جوان
فيروز : يمه ما بيها شي لو جتي ويانه قابل احنه نرضى عليها العيب و منخاف عليها
جاسر : بيكم الخير حجيه جوووواااان،،،..سمعته عاط نزلت
حسين : خلي جود ويانه
جاسر : خوش
جوان : ليش ليش يعني ما اعوف اخويه خلي يرجع ويايه،،،..تقرب مني جاسر و هو صاك ع سنونه من العصبيه
جاسر : امشي و كصري حسج منا الوادم و السيطرة اصدقائي،،..شسوي ياربي هسه ما اريد اعوف جود و هم ما اريد اخرب فرحته خطيه شنو ذنبه يرجع ويايه مشيت ويا و اني كارهه الدنيا و طالعه روحي حيل اختنكت كرهته ححيييل سجن خوما سجن باقي بس يكطع النفس حتى تكمل لا الي مدا افتهمه حسين ليش هلكد استسلم كدام جاسر و جاسر ليش هلكد صار صديقه و متفاهمين خرا بحظي يا ربي ردت منك واحد بس واحد يوكف ويايه بوجه جاسر ماكككوو دومي فگر
جاسر : فكي وجهج ام العصابات
جوان : رجاءاً لتحجي ويايه كلمة وحده،،،.باوعلي عين يمي و عين ع الطريق و هو معصب
جاسر : ان شاء الله اخذ رأيج لو ردت احجي وياج
جوان : انته فهمني مشكلتك تشك بيه لو بالناس
جاسر : احجي عدل لا اعدلج وجهج هسه دماغ سزز،،...عاد هنا طگيت تذكرت كلشي كلشي صار من توفت امي لليوم شسوا ابويه و كتلت جاسر اول مرا الي و سكوت بيت جدي اهل ابوية ع اذيه جاسر و كتلته الي للمرا الثانيه  ورا ليلة من الكتله الاولى بس لانو حجيت حقي دهكت بجي كمت احس گلبي ينعصر من الوجع كلهم عليه،،حسرة عليه الطلعه حسرة عليه النفس تهسترت كدامه كمت اعيط و اضرب كلشي كدامي
جوان : كاااافففيييي كككككاااافيييي رحمة لدين محمد ككككااااففففيييي جاسسسر لعبت نفسي من هذا الحب لعبببببتتتتتت ننننفففسسسسييييي سجججن هوووو،،...احجي و ابجي و العياط ملى السيارة همزين الطريق مبي ناس هوايه لانو زراعي فـبس احنا حاليا بالطريق هو شافني هيج تهسترت حتى عصبيته نساها يريد يوكف السيارة بس ميكدر الطريق كصيف لو وكفها بس تجي سيارة ثانيه نندعم يريد يهدأني بس اني الله ذب عليه دموع و حجي مدري منين عطت بي لخاطر كل مرا اذاني بيها لخاطر كل مرا اهاني بيها
جاسر : كافي بويه كككافي خلص خلص يمعوده ليصير بيج شي الي تريدي يجرالج حتى دحكي ذولاك كدامنا و احنا رايحين وياهم للصيد
جوان : اني مو بعيني الطلعه و لا غيره اني اريد اعيييشششش جااااسسسرررر دفنتني انته و ما صليت عليه لييييششش هههيييججج
جاسر : يا يابه بس اهدأي نوصل لهناك و نحجي حتى بشيب الخلفني و خرا بأبويه ع هاي الخلفه بس خلي نوصل و اهدأي،،،..شفته استجاب الي و كام يغلط ع عمي عرفت ضربت يمه موقع حساس لان ميسب عمي كدامي و بهيج موقف الا اذا عرف هو اذاني ابتسمت بين دموعي و اني وجهي محتقن و عيوني ورمن طكن من البجي حجيت ويا مثل العوبه دموعي تجري و الابتسامه ع خدي
جوان : سبيت عمي،،،...هو باوعلي بأستغراب
جاسر : اي
جوان : ههههههههه
جاسر : هاي هيج من اسب ابويه ترتاحين و تفكين وجهج
جوان : ههههههههههههه لا
جاسر : ول يابه ضحكيني وياج شكو
جوان : ههههههههههههههه
جاسر : شبيج يولي
جوان : هههههههههه ما بيه شي
جاسر : الا من صدك ضربت فيوزاتج
جوان : بفضلمن؟
جاسر : بفضلي بفضلي بس ارتاحي،،...بعدها سكتت بس بقيت اشهك و مبتسمه خبلني و الله،،هز راسه و مراضي و الضحكه بوجهه
جاسر : مخبلة و الله وكعني بيج،،،،...
وصلنا لكينا حسين دينزل بالغراض جاسر راح يساعده و اني رحت يم الحجيه حضنتها و بعدها رحت حضنت جود جانت منطقه كلها شجر و انواع الزرع تجنن تشبه الجنه عبالك مو بالعراق الي عرفته انو هاي كاع تابعه لواحد من اصدقاء حسين بس صديقه ميجي بيها مجرد مشغل عمال بيها يهتمون بالزرع و الاشجار بس حيل حيل جبيرة هو مستغل المساحه لهواياته و منها الصيد حسين بقى يحجيلنا ع صديقه و يمدح بي و هو و جاسر ينزلون بالغراض
جاسر : هو يجي لهنا
حسين : اي،،،...باوعت ع جاسر عينه صارت بكصته الا شويه يهجم ع حسين
حسين : يعني قصدي الكاع اله اكيد يجي بيها بس اليوم كتله ميجي و لا يدز العمال
جاسر : و انته شمدريك كلامه صح
حسين : افااااا و انه اخوك جا بس انته عندك عرض و اني لا غير هم اخاف عليهم و لو ما الولد ثقه و اعرفه هو شنو ما اامن و اجيبهم
جاسر : اكلتني بكشوري هسه انه شكلت
حسين : مو فهمت قصدك
جاسر : ها شو حدر هنا يمي ساعدني بذني حتى نفرش للكعده،،،...بدوا يفرشون للكعده جوا شجره عاليه و صاير جواها فـّي و الهوا يجنن اموت بهيج اجواء الحجيه كعدت و سندت ظهرها للشجره لان تعبت جود هم بالبدايه كعد يمها بعدين راح يلعب يم حسين و اني كاعده قريب من الحجيه،،..جانوا هو و جاسر واحد يجهز البندقيه مال الصيد و اللاخ يجهز غراض الشوي ادحكله و هيمانه بي اروح فدوة لطوله ييييمممماااي مو بشر حلقوم كيك اصلي ضحكته مبينه طالعه من كل گلبه هو و حسين حيل منسجمين لحد هسه مستغربه بس مدام هم مرتاحين هيج خلص خليهم شعندي غيرهم جود راح يركض لجاسر و جاسر گبل تلكى و شاله و يفر بي و يضحكون حيل حيل فرحانه و مرتاحه شيصير لو حياتي تبقى هيج
فيروز : ها سرحانه
جوان : حجيه الي يسمعج يكول سرحانه بطليان
فيروز : قابل جذب،،،...باوعت الها و ضيكت عيوني مقابله تحجي عليه
جوان : ترا ما اقبل هاااا
فيروز : عشتو هسه صارت متقبل ام الكمل
جوان : ههههههههه حجيه شو گالبه عليه شكو
فيروز : و الله ييمه ما كالبه بس الله يشهد فرحانه بألي ديصير فرحتج انتي و اخوج تسوى عندي كلشي دحكي يولي قبل جنت ضد هل جاسر هذا بس هسه لاااا دا ادحكله و افصل كل تصرفاته الولد ييمه شاريج صحيح امشي وياج عصبي و مينحمل و كلمته وحده متصير اثنين بس گلبه يمج ييمه و لو صرتي ذكيه و تعرفين تكسبي راح تغيري و تغيريين حياتكم
جوان : حجيه حايرة و الله لحد هسه الف سؤال بعقلي اخاف اكعد ويا و متردده من مواجهته احس نفسي اعرف الاجوبه بس ما اريد اصدك ما اريد اشوف الحقيقه و يمكن عاميه عيوني عنها و هي كدامي و متأكدة بيوم نكعد نحجي اني ويا كل الي عامية عيني عنه راح يتوثق
فيروز : يمه الشردة من الحقيقه متفيدج بالعكس تضرج و تضر علاقتكم ييمه نسوان هواي يريدنه و انتي حجيتلي و لو اعرف گلبج ما رايده ما احجي هذا الحجي هاج كدامج الولد عايف شغله و اوله و اخره بس لخاطرج يجتمع بيج رايدج ام بيته هذا رجال تعتمدين عليه و فوك هذا يحبج و شاريج،،...الحجيه تحجي و هو اجه يمشي النا و حسين و جود بعيدين شويه يلعبون و يجهزون راد  يكعد جاسر يمي
فيروز : يمه فدوه قبل لا تكعد عيني حتى اكوم اروح اتوضى هم ياله راح يأذن
جاسر : صار حجيه،،،..ساعدها وصلها لجوا اكو مكان مغاسل و مثل المطبخ و هم مكان صلاة رجع يمي كعد
جاسر : ها يولي ارتاحيتي ام العصابات،،..دحكتله و اني الضحكه ع وجهي فرحانه بي و بالطلعه
جوان : حححيييل،،،...شو هذا تمدد و خلا راسه بحضني
جاسر : خوش مدام مرتاحه فركيلي راسي حيل يوجعني
جوان : تمام،،،..دا افركله تذكرت حجي الحجيه كلت مدام وحدنا و مكان هدوء خلي نحجي صفنت بوجهه و ايديه ع كصته
جاسر : احجيهن احجيهن يبقن يكرصن بيج ادري
جوان : منين دريت
جاسر : مبينات مبينات يولي اقراج ع الغيب اني
جوان : هاااا امممم تجاوبني ع كل اسألتي و بصراحه وعد؟
جاسر : اوعدج و اني ما اعرف الاسئلة؟
جوان : دوعدني فدوه اريدها من شاربك الحلو،،،...شو هذا خرب ضحك غص بأيدي انطيته مي و رجع بحضني مدد
جاسر : هههههههه مدام حجيتي بشاربي يلا اسألي
جوان : شلون اجيت ورانا؟
جاسر : نسيت نظارتي الشمسية الصبح بـبيت حسين و من وصلتج هم نسيت اخذهن رجعت من الطريق اريد افوت لبيت حسين لكيت سيارته طلعت و انتي بيها عصبت حيل الا صدك شلون تطلعين بدوني و بدون علمي؟
جوان : ها تمام دحك ادري اكو شغلات اسويهن و  الك حق تحاسبني عليهن بس هسه دوري بالاسئلة رجاءاً لتشتت افكاري ترا كوه جامعه طاقتي دحك ايديه ترجف
جاسر : خوش مدام كاعدين و نحجي بهدوء راح انتظر سرايه
جوان : شلون تصالحت ويا حسين و انتو البارحه تكاونتوا و صار بينكم دم
جاسر : بـ١٢ حجه وياي البارحه بالبداية مقبلت يتدخل بعلاقتنه و رفضت ينصحني بس حجيه جان مضبوط و عين العقل و اني اعرف ان اني ويا نريد نحميج مو اكثر بس هاااااا ترا اني رجلج و هو خالج فرقي يعني
جوان : طبعاً افرق هو انته منطيني مجال ما افرق
جاسر : اطيح حظج هم
جوان : مو دنحجي بهدوء شبيك گلبت
جاسر : اني الي مخوفني الهدوء الي احنه بي اكول لو هسه نتكاون و نحجي احسن
جوان : صير حضري شويه لازم اكو تفاهم
جاسر : ليش اني همجي؟
جوان : اههوو و العباس اني الهمجيه لان دا احجي وياك
جاسر : اي اي بس لتعصبين بالنهاية كلمن يعرف صنفه و يلا كملي اسألة ادري اكو طامه ورا ذني الكرزات،،،....رفعت حاجبني معاجبني الوضع ههفف بس يلا اهم شي و اخيرا تشجعت و كعدت ويا نحجي
جوان : مريم شنو منو و ليش و اكو غيرها فدوة صارحني من هسه ما اريد تنبني علاقتنا على جذب و نفاق انته اكثر واحد يعرف الالم الي ابويه سببه الي بخيانته الي ما اريد اعيش نفس الخيانه وياك،،...كام من حضني و قطع كلامي و تقرب مني و هو مركز على عيوني بهيام بس الجديه واضحه على وجهه
جاسر : دحكي يولي اني كتلج ليش سويت هيج و اني مزاني وياها مثل ما كلتي اني بالشرع و بالحلال ما خذها
جوان : ش شلوون يعني؟
جاسر : اكو زواج يتمم بالمحكمه و هذا يكون كل العالم تدري بي و حقوقج تكون محفوظه سواء من عيشه ويايه او غيره و تكون املاكي بأسمج و اسم جهالنا و اكو زواج شرعي يعني بس عقد شيخ و هذا ميمشي بالمحكمة يعني معندها اي حقوق انسانيه عليه بس النوم وياهه
جوان : و انته مقصرت من جنت تتأخر جنت توفي حقوق ابو الحقوق
جاسر : غير انتي حارمتني
جوان : زين اكو غيرها
جاسر : ما اكدر اكول لا لان اكو غيرها بس الله يشهد و رسولة بيوم الي عرفتي نهيت كلشي وياهن لعبت نفسي من الدنيا بعدج عني خلاني اكعد من الي جنت اسوي تذكرين بيوم تهسترتي و كمتي تصيحين عليه و تكوليلي انته تزني و كوااا...
جوان : اي
جاسر : بذاك اليوم بالفعل حسيت بحبج اليه بالرغم ما اذيتج بس كأنو اذيت گلبي صحيت على زماني و اني متأخر اعرف بس ما اريد اخسرج و حك ربج احبج اني
جوان : زين و تالي شلون
جاسر : اني صبرت عليج كل هاي السنين ما اصبر عليج هسه و اني ادري گلبج الي؟
جوان : و ذنيج
جاسر : كتلج نهيت كلشي و روح امج
جوان : اصدكك؟
جاسر : كتلج اني اصبر عليج
جوان : تمام،،،.... كرص خدودي ابتسمت اله بالنهايه شي وكع مني جنت حيل شايله هم من المواجهه بعدين حسين صاحه و كام ويا عاف جهازه يمي الشيطان تربع براسي اليوم الا افتح و اشوف لزمت الجهاز دورت بالفايبر ماكو شي دخلت للواتس اب لكيت هاي الحيه مريم محاجيته و تتوسل بي ع سالفه بس شنو ما ادري المهم هو حاذف الرسائل الفوك و باقي بس رسائلها و هي تتوسل و تكله اروحلك فدوة لتسوي هيج لتخليهم ياخذوني فدوه صدكني اصيرلك خادمه جوا رجليك حتى لمرتك ما اوصل و الي تريده يجرالك بس شوفني طولك و انته تدخل الي،،،. هو شايفهن و ما راد بس اني نار و شبت بجسمي شلون لزكه هاي يالله شويه و زين دز رساله اله يمكن مكنك على الرصيد دحكت بالاشعار زين كاتب لجاسر (خويه ماكو شي طلع بيها لا حامل و لا بطيخ تريدك تجيها و بس طمن بالك و لتشيل هم) منو هاي انوب يا الله راسي راح يوكف انوب رجعت مريم دزتله بنفس اللحظه مال رسالة زين هم دحكت من الاشعار بدون ما افوت للمحادثه جانت كاتبتله ( اكيد ابن عمك وصلك الخبر بس فدوة مو قصدي اجذب عليك اني احبك و اريدك ادري بيك تكره الجذب بس شسوي اريدك) عزززااا يا ربي لوين واصله بيها هاي لهل درجه مرخصه نفسها اله،،،...حسيت ع اصابع تهزني من كتفي دحكت عدل جان جاسر گاعد ورايه يا كاع انشكي و بلعيني
جاسر : مو عيب تتجسسين على اجهزة الناس
جوان : ه ه ها ها ها هووو هوو
جاسر : هاي اغنية غزوان الفهد لو دتتعلمين لغة الجراوة
جوان : ما خلصتو الاكل
جاسر : يا اكل هو احنه صدنه شي،،،...اخذ الجهاز مني و عرف قريت الرسايل ابتسم و مشى اجتي الحجيه كملت صلاتها و هم ديصيدون و احنا انباوع عليهم كلنا فرحانين بالرغم اعرفه يختنك من يعوف شغله بالجيش بس مع هذا اجه ويانه اليوم الله شكد حلو هل يوم،،،...جابوا الصيد و جود فرحان لان مخلي يصيد و لازميها اله،،،..هو حيوان مثل الحمامه بس مو حمام يمكن كال جاسر اسمه طبن مدري شنو المهم محبيته حسون جايب ويا لحم معلاك بس ممشوي جان خايف منلكى صيد جايبه احتياط شفتهم يشوون رحت يمهم
جوان : اشوولي معلاك حبابين،،،....واحد باوع بوجه الثاني و حسين غمز لجاسر و يتمضحكون
: لحظه حجيت شي غلط؟
حسين : لا بس من تعرفون جنس الطفل فرحونا عود و خرب من الضحك فحط للكاع و جاسر كوه لازم نفسه صار احمر هلكد كاتم ضحكته يمكن يخاف على مشاعري خاف اضوج
جوان : و انته هم طكها ضحكة شدعوه كتمتها مبينه مبينه ترا
جاسر : هههههههههههههههههاي لخاطرج بس
جوان : تستفزني مو؟،،،،...حسين رفع ايديه مثل الاستسلام و كال راح انسحب اروح اشوف امي شرد بقينا اني و جاسر
جاسر : الا صدك بس تعرفين شنو جنس الطفل كليلي من حقي اعرف اني ابوه
جوان : صاير تضحك هوايه منتبه؟
جاسر : شنو الي يضحك بالموضوع دنحجي عن ابنه،،،..بدا يتقرب الي و صل يمي خله ايده على خصري
جاسر : لو متريدين؟،،،...انثولت هو اني من غير شي انثول من اشوفه انوب يسوي حركات عاد جاوبته بسرعه و اني مغمضه عيوني و قافلتهن حيل
جوان : اريد اريد
جاسر : هههههههههههه شتريدين يولي
جوان : هااااا اكل اكل جعت،،،...تنفست حيل يممماي جان لزمها عليه و الله كملنا الاكل تغدينا بـ٢ و كله ضحك و تصنيف و شربوا جاي و لزموا الحجيه دك تصنيف انوب اني حجيت الهم على سالفة الحجي لو ذوله طكوها ضحك عليها حسين يكلها لو اجيبلج رجال يحويج يمه طالعه عينج و جاسر يكلها حجيه انتي بس كولي اي و اني عليه الزلمه بس المهم بي حيل و حسين رجع عليها ضحك و جاسر يرفع و حسين يكبس متنا ضحك و هي خطيه ساكته بس تضحك متعرف شتجاوب حرجوها صارت بـ٥ جاسر كال يلا تغير الوكت هم ياله نرجع و الطريق بعيد حسين ما عارض كمنا لملمنا الغراض و الحجيه صعدت يم حسين بس هلمرا جود صعد ويانا اني بالصدر و جود لورا،،جانت الدنيا بيها خيط ظلمة و الجو حلو و اغلا اثنين على گلبي يمي شريد من الله بعد اخاف احسد نفسي،،،..جاسر لزم جود و يريد يتشاقه ويا 
جاسر : حي الله الشيخ
جود : لتتدول ثيخ (لتكول شيخ)
جاسر : شكول لعد
جود : دول اثمي (كول اسمي)
جاسر : شدعوه هيج معصب
جود : مو تددتترت ثي (مو تذكرت شي)
جاسر : ول يابه صيري قاموس تعريف لاخوج مدا افتهم و محمد
جوان : ههههههههه يكلك مو تذكرت شي
جاسر : هااا شتذكرت جود افندي
جود : لمن ثحت على جواني
جاسر : ول يابه ما صحت عليها بس صوتي صار عالي عندي مرض بصوتي مو هيج جوانه،،،..جنت دايره وجهي على جود و اباوعلهم شلون يحجون سويه مبتسمه فرحانه بيهم
جوان : اي حبيبي عمو جاسر مجان قصده يصيح عليه
جود : لعد انتي ليث تبثين و تكولين لجده احبه بث هو يثيح عليني،،،....صفرررررييييتتت هنننااا اعرف هو يعرف احبه بس مو عاد يسمعها من جود يبو يالله خلص لزمها عليه،، هل جود كبر و صار فضيحه رسمياً متنظم سالفه بحلكه
جاسر : شوكت بجيتي يولي
جوان : ها لا يجوز بوكتها دخلت بعيني شعرايه،،،...باوع لوجهي عرف ما اريد ابين لجود شي فهو گبل تدارك الموضوع بس عكد حاجبه مراضي ان ابجي
جاسر : معليك بيها يول هاي شغلتها بالحياة لو تبجي لو تصفن لو لسانها يلعلع تكول لسان دلاله
جود : عمو ثنو دلاله
جاسر : من تكبر تعرفها خوش مرا هااا جوانه
جوان : الله لا يكولها الله يبعدنا معليك بعمك هذا يخربك
جود : عمو تبقى يمي اليون
جوان : مو كتلك تكول يوم مو يون جودي كبرت كافي غير هل الاسماء
جود : ما ما مااغير و عمو تبقى اليون
جاسر : لا حبيبي ما اكدر عندي شغل كافي من الصبح لهسه هنا و باجر دوام
جوان : باجر تلتحق
جاسر : لا بس لازم امر لهناك
جوان : ها تمام،،،.....وصلنا للبيت هم بعدهم مواصلين و بقينا ننتظر احنا و جاسر گبال باب المطبخ لان المفاتيح يم حسين
جاسر : بعد لتبجين خوش؟
جوان : يعتمد عليك
جاسر : لان اني السبب ما اريد تبجين تحركين گلبي
جوان : تمام
جاسر : و ضمي هل مشاعر بگلبج يولي حتى الزعاطيط عرفت فضحتينا مو مال حب انتي
جوان : عرفت راح تلزمها عليه
جاسر : لو بيدي حتى انتي الزمج و اكضي بيج التوبه بالغرفه
جوان : عفيه ما بيه حيل كسور و مستشفيات
جاسر : لا يولي لتخافين كسور من غير نوع حتعجبج
جوان : يا متستحي،،،...كام يضحك و هم وصلو فتحولنا الباب و هو سلم عليهم و راح دخلنا للبييت كبل بدون نقاش للغرف نمنا الساعه بـ٧ بس تعبنا حيل و حسين واكف فوك روسنا يكول الله لو كل يوم اخذكم هيج تتعبون و تنامون من وكت و يمشي على رجلينا بس خفيف الحجيه عاطت عليه كام يضحك و طلع اني مغمضه بس متت ضحك عليه نمنا محسينا على شي بعد،،... كعدت ساعه ١٠ و نص الصبح هدوء و اليوم مطولين بالنومة حتى الحجيه نايمه كمت شفت حسين نايم على وجهه من التعب فتت للحمام سبحت و طلعت فرشت و بعدها رتبت نفسي و دا اسويلهم ريوك و منطلقه اليوم خليت الجاي ع النار بعدها اعرف حسين يحب بيض عيون طكيتله ٣ بيضات فتحت الثلاجه اشكال الوان اكل طلعت كيمر و رجعت حميت الصمون دا انتظر الجاي كلت اتصفح بالجهاز شويه فتحت الجهاز لكيت رساله بالفايبر من فاطمة من ١٣ دقيقه هي بنت خالي احمد ذوله شويه احبهم ما عندهم حقد بس امهم نار و شرار تموت مني
فاطمة : هلا جواني
جوان : هلا صباحو،،،...عفتها و بقيت اتصفح ورا شويه دزتلي
فاطمة : ها صباح الخير اكلج كبد اليوم مسوين عزيمه ببيتنا ع العشى امي كلتلي اخابر الحجيه بس ما عندي رصيد فتذكرت انتي يمهم كلت احاجيج و انتي تكليلها
جوان : ها ميخالف اكللها
فاطمه : تجين مو؟
جوان : ما اعرف
فاطمه : تعاي معليج اني وياج من شنو مانعه روحج من الجيه
جوان : تعرفين المشاكل
فاطمة : ها ما كتلج مو امي و ميساء متعاركات فـلتخافين ميساء متجي لا هي و لا خالي ايهم
جوان : لج فطيمة اني ما خايفه منها تولي اصلا متخوف جلبي بس خطيه الحجيه تتحمل مشكلة من ورايه
فاطمة : لعد خاله امينة كالت نجي تعالي وياهم و اني وياها نحميج لتخافين
جوان : هههههههه اي مو كاعدين بجبهه احنا
فاطمه : هههههههاي اي غير انتي مكبرة الموضوع ديلا شوفي جماعتج و اني رايحه انظف لجماعتي
جوان : تمام،،،..عفت الجهاز و رحت رتبت الصينه الله الريحه تجنن ريحه الهيل الي بالجاي ملت المكان دخل حسين فاتح تك عين و يحجي و هو عبالك سكران من النوم
حسين : ها صباح الخير شنو هاي الريحه الطيبة
جوان : اي ريوكم من ايدي اليوم يلا روح غسل و تعال بين ما اكعدهم
حسين : تمام يحلو،،،...راح للحمام كعدت الحجيه و جود غسلو بعدين طلعنا لبرا نتريك
جوان : حجيه فاطمة حاجتني كالت مسوين عزيمه اليوم و يريدوج تروحين ببيت خالو احمد
فيروز : عزيمة شنو
جوان : و الله حجيه ما سألت
حسين : عزيمة مشاكل و حش بالعالم اكو غيرها يموتن ع طيحان حظهن
جوان : و الله لو يسمعنك
حسين : دحكي يمه تكلي تخاف منهن
فيروز : هههههههههه حشاك حشاك ولج جوانه ابني سبع
جوان : ههههههههههههههه سبع ع الزلم مو كدام نسوان خوالي
فيروز : اي و الله هههههه
حسين : تروحين؟
جوان : منو اني؟
حسين : لا عروك اذاني
فيروز : اي تروح قابل شكو يعضون
جوان : تجيج مشاكل حجيه انتو روحو شكو عليه اني اقفل بابي اني و اخويه و انتو كملـ....
فيروز : دحكي يمه احنه اهلج مو غربة عنج حتى تبعدين عنه المروض منج تخلين الغريب هو الي يبتعد عنج و عن اهلج
جوان : بس هن ما اعرف حجيه
حسين : يول لتخافين اني يمج حتى طلعه ما اطلع
جوان : حسون ما اخاف اني بس ما اريد مشاكل اني اجيت لهنا شاردة من مشاكلي انوب اسبب الكم هنا مشاكل فوك تعبكم ويايه
حسين : سمعتيها شتكول حجيه؟
فيروز : كوم يمه كوم اشمرها بالنهر اليمنه
حسين : اييييععع حجيه هو هذا نهر لو خيسه
فيروز : دا اراعي مشاعرك جا هو بزل غير
جوان : صدك تحجين حجيه تشمريني عود؟
حسين : مداينيج جذبه قبل؟
جوان : لا
حسين : خوش يلا كومي اشمرج
فيروز : هههههههههههه كافي عوفهه،،،...دنحجي عبرت علينا خالة امينه سلمنا عليها و كتلها اني انظف و حسين استلمني ها صلوات ع النبي مدت ايدها المحناية و شبعني تقليد و طلع نظفت البيت كله و الحجيه و خاله كاعدين برا يحجون سوالف اهل گبل و جود رجع نايم بحضن الحجيه كد ما تعب البارحه ههههه يمكن اول مرا نطلع برا البيت رحت كعدت يمهن ضجت و جاسر بالدوام يتخبل اذا احاجي يكول فشلة اصدقائي عفطيه گبل يلزمون جهازي و يشوفون حجينا
امينه : هسه تروحين
جوان : خاله ما اعرف و الله
فيروز : يمه ماكو مشاكل يطبهن طوب
جوان : حجيه هي العزيمه بليل عود افكر منا للعشى،،،....اجه خالي ايهم و مرته بالسياره طبكها و نزلو
فيروز : اجتج هسه تاكلج
جوان : شحدها
امينه : عفيه سباعيه صيري
ايهم : هاااا الله يساعدهم
فيروز : و يساعدكم يمه
ميساء : ها حجيه صباح الخير،،،،...سلامها حيل ناشف و تعوج بحلكها
فيروز : صباح النور يمه،،،...بقت واكفه ما كعدت و حتى ما سلمت عليه اني هم اعتبرتها هي و الحايط
ميساء : حجيه جيتج بحجايه
فيروز : خير يا طير
ميساء : حجيه ترضين فيحاء مرت احمد تعزم الكل و انه لا جا انه شمسويه الهه
امينه : خايبه شلج بيها ترا كالو دعوه عامه
ميساء : انتي منو حجه وياج دا احجي ويا عمتي
امينه : ها سكتنه
فيروز : و الله ييمه لتدخلوني بمشاكلكم شعليه بيكم انه مرا جبيرة و صحتي على كدي
ميساء : ها حجيه صحتج بس تكفي مشاكل جوان و اخوهه ترا سمعنه بسالفة جية بيت جدهه و الكتل،،،،...ردت احجي بس خاله مقبلت كرصتني كالت اسكتي معليج الكبار يحجون
فيروز : ها ما دام الحجي صار هيج عجل كلمن و حر بنفسه و روحي منج الهه تمالخن هاك ايهم يل ساكت و خانس اخذ مرتك و ابعد عني
ايهم : يمه شجاج
فيروز : اخذ مرتك يمه
ميساء : عجل حجيه هيج عصـ....
فيروز : ايهههمممم مرتك،،،،....راحوا بدون و لا حجايه شخط السياره و ما بقت غير الترابه وراهم
جوان : دحكي حجيه لسه ما رحت و سون مشاكل
فيروز : شو الا تروحين و اكسرج اذا ما رحتي خوش و الله عليه الزعاطيط انوب خايبه تروحين و رجلي فوك رجلج يلاااا كومن كل وحده لشغلها،،..كمنا اني و خاله وحده تنلطم بالثانيه من الخوف الحجيه حيل عصبت اجه الظهر تغدينا و كملت التنظيف راحوا ينامون كلت احاجي جسور ع سالفه الروحه و اشوف شيكول حاجيته شويه و رد كتله ع السالفه كال روحي بس ديري بالج اسمع حسج طالع لو اكو مشكلة من جوا راسج و تلبسين ملابس عريضه و شالج مينذب لحظه وحده و تلزمين لسانج الي جنه رشاشة و جود متغفل عينج عنه لتخلي يختلط بيهم كتله خوش كملنا و بدلنا طبعا مشيت ع اوامر جاسر بالحرف و اخويه اصلا يموت منهم فما حجيت ويا لان يدري اجه حسين طلعنا رحنا مشي هو بس فرق كاع امي و كاع خالي علي انوب تجي كاع بيت خالي احمد وصلنا سلمنا عليهم الوجوه ثكيله بس فاطمة رحبت بيه و اكلتني بذاك السلام و اجتي خاله امينه،،،..كملنا لو ما كملنا العشى جاي و اكل و تنظيف و منهم الي طلع و منهم الي بقى كاعد و اني خلصت الي عليه و ساكته محد اندك بيه لان حسين يمي يطيح حظهن و حتى ما طلع ابد و اذا اتأخر عليه يصيحني حتى ويا فاطمه ما قبل اكعد و الله اشم ريحه جاسر بالجو مدري ليش احسه محاجي و منبهه المهم خوالي محمد و علي و ادهم و احمد بقوا يتشاقون ويايه و ضحكنا عالي و يقلدون عليه عود ع سالفة من اجوني و اخذوني من جاسر و خالو محمد يقلد على جاسر شلون جان عصبي و راد يكتلهم يكول لخالو احمد الله وكيلك احاجي و ارجف اباوع الوجوه احتقنت حقد لو بيدهن يسمني هسه مهتميت طلعو خوالي بقينا اني و حسين و جود و خاله امينه اما الحجيه بقت بالغرفه تسبح و تقرا قرآن كالت احسن من الغيبه دنحجي حسين كلي روحي شوفي الحجيه حتى نروح كتله تمام وصلت للغرفه سمعت
ميساء : حجيه منو وصلج هذا الحجي
فيروز : يمه مرت علي و مرت محمد معلمات ويا بتج بالمدرسه و حجن كالن لبس بت ايهم كصيف و يا هو الي يجي تكعد بحضنه و متفوت للدروس و تجذب هوايه يمه ديري بالج على بنتج الدنيا مو امان صح بعدهه صغيره بس عيب الناس تحجي،،،،...دا اتسمع و اجه حسين شايل جود لان نايم حجه بصوت ناصي
حسين : ها يولي شبيج
جوان : لحححظظظه اسكتتت اششششش،،...حجيتله السالفه بصوت ناصي و كملنا نسمع
ميساء : حجيه بهذا عقلكم الخرا لو وصلت السالفه لايهم يموتهه و يبطلهه من المدرسه الا و محمد لو سمعتج حاجيه اله الا العب بيج طوبه احترمي شبياتج حجيه عيب عليج تحجين على بنتي هيج،،....حسين سمعها تحجي هيج لو نار شبت بي عيونه صارت بكصته شمر عليه جود بعصبيه كلي گبل تروحين للسيارة ادفنج اذا لكيتج هنا يلااااا اني من صوته خفت طب هو زكح بميساء و لزمها فشاااااررررر من هذا التمام و الحجيه ساكته فشر على اهلها و على خالي و بنتها لزمها غلللططط مسامعته بس من جاسر بعدها كلت خلي اشرد بجلدي شفت خاله امينه كتلها الحكي ترا هيج و هيج السالفه كالت يمعزايه طفري و سوي مثل ما كلج ترا يلفنها عليج اني كبل اخذت غراضنا و طلعت للسيارة جان شباك الغرفه الي هم بيها كدامي صاير و ماكو برده ما اسمع بس اشوفهم الي افتهمته ميساء كايمه ترادد بحسين و تسب بي و هو نار كام و كتلها و سحلها من شعرها و طلعو من الغرفه اني حضنت جود و ضميت راسي
———————————————————————
يتبع،،،،،