مياس قلب الشهم

البارت السابع

ما گدرت انام من التفكير ولا گدرت افسر الشي الدا احس بي حتى لنفسي .. فزيت على صوت موبايلي شفت شهم يتصل

فز كلشي بيه باتصاله وخفت كلش حسبالك هو حبيبي واني دا اخونه بهل تصرف

چنت گاعد اشتغل طب عليه مهيب بس چان وجها ميتفسر

شهم.. خير صاير شي !!

مهيب.. اريد احچي وياك بموضوع ضروري

شهم.. شكو قلقتني ؟؟ د اگعد اگعد

مهيب..  شفت مياس قبل شويه

شهم.. خفت كلش من جاب طاريها : شنو صارلها شي ؟!!

مهيب.. لا لا

شهم.. مهيب لتروحلها كل شويه البنيه تنحرج عوفها بحالها الله يخليك

مهيب.. هاي شنو شهم صدگ تحچي چنك متعرفني

شهم.. ما گلت هيچ بس دا انبهك بالشي التحس بيه مياس كلما تشوفك گبالها

مهيب.. هسه تسمعني لو لا ؟؟

شهم.. اسمعك احچي

مهيب.. اريد اتزوجها

شهم.. سيطرت عليه الصدمه من گال هيچ رفعتله حاجبي باستغراب : صدگ تحچي !!!

مهيب.. اي

شهم.. ليش ؟؟

مهيب.. وليش لا ،،، بيها شي يمنع زواجي منها !!!

شهم.. لا طبعا اصلا هاي امنيتي ومن عرفتها چان يعجبني ازوجها الك لو لجهاد لان بنيه ذهب شريفه وخلوقه والاهم من كل هذا مظلومه بس ما گدرت افتح وياكم الموضوع لان ادري لا انت ولا هو راح توافقون على هالشي

مهيب.. عوفك من جهاد خليك بيه .... ليش چنت تتصور اني مراح اوافق

شهم.. ما اعرف يجوز لان شباب وتفكريكم بهل عمر يكون سطحي يعني تعاينون للأمور من زاوية المظهر الخارجي بدون متتعمقون بجوهرها

مهيب.. شنو تقصد يعني لان فقيره وتشتغل بالشارع ؟؟

شهم.. بالضبط

مهيب.. بس اني ما افكر هيچ شهم

استغربت كلش من كلام مهيب صح ادري بي يختلف عن جهاد لان ارزن منه بس ما تصورته عاقل لهل درجه

مهيب.. شو ساكت

شهم.. متأكد من قرارك ترى اذا انفتح الموضوع بعد ماكو رجعه

مهيب.. طبعا متأكد اصلا اني اخذت منها رقمها وگلتلها عندي وياچ موضوع ضروري بس ما حبيت احچي وياها بدون ما استشيرك

شهم.. مهيب تدري بنفسك انت شهم ،،،، كلش شهم وروح ابويه

مهيب.. هههه انت شهم مو اني

شهم.. هههه لا صدگ دا احچي

مهيب.. واني هم صدگ احچي ،، الشهامه والرجوله والطيبه كلها تعلمتها منك ... انت ابويه قبل لتكون اخويه لان ربيتني وافتخر بتربيتك الي