شيخ البصرة

بارت ١٢

فزيت من نومتي وانه صاير اعصاب .واتعوذ من الشيطان وراسي كل مجاله يوجعني اكثر.

بلسم:- كعدت الصبح وكلبي متلهف لشوفة ضرغام الي ملك كلبي و روحي.
بدلت ملابسي واني اغني اغنية يارا ماادري شجابها على بالي...

ماروم يارايح عن العين
يا مسافر على وين ماروم
اذا ما شفتك اليوم تكعد الدنيا وتكوم ماروم

فجأة دك تلفوني شفت رقم بابا وممصدكة
بلسم:- الوووو بابا حبيبي؟؟؟
الاب :- حبيبة بابا شلوووونج بنتي ؟مشتاقلج.
بلسم وهي ماسيطرت على دموعها:- حبيبي اني هم مشتاقتلك ومشتاقة للكل شلونكم؟
الاب:- حالنا من بعدج مو حال يا فرحة بيتي.
بلسم:- اسم الله عليكم حبيبي اني زينه الحمدلله وكلهم زينين ويايه .
الاب:- اريد اشوفج حبيبتي والله مشتاق لعيونج.
بلسم:- راح احاول احجي وية ضرغام بلكي يقبل يجيبني لبغداد.
الاب:- حتى لو مايكدر يجيبج كليله احنا نجي ونشوفج والله مااتحمل بعد واخاف اموت واني ماشايف وجهج الحلو حبيبة بابا.
بلسم:- وزاد بچيها:- عسى يومي قبل يومك بابا لاتكول هيج ان شاء الله اليوم احجي وياه ونتشاوف.
سديت التلفون واني فرحانه سمعت صوت بابا ومقهورة بنفس الوكت عليه
نزلت ركض دااحضر الريوك وية سهاد وبثينة وشفت الحجية كاعده صبحت عليهم وبست راس الحجية.

الحجية:- شنو هالصباح الحلو؟؟
سهاد:- يممممه الحب وعمايل الحب .
بلسم:- ابتسمت ونزلت راسي خجلانه كلتلهم حجيت وية ابوية واطمنت على اهلي و يريدون يشوفوني.
الحجية:- من حقهم يمه اليوم احجي ويه ضرغام وشوفي شيكول.

فجأة دخل ضرغام للمطبخ بس وجهه مايتفسر وتعباااان
الحجية:- صبحك الله بالخير وليدي تعال اكعد هين اتريك وياي.
ضرغام:- صبحج الله بالخير يمه مااريدن مااشتهي اكل شي.
الحجية:- شبيك يا وليدي مو على بعضك ؟
بلسم:- اباوع على ضرغام لازم راسه ويفرك بي
حتى علينا ما يباوع.

ضرغام:- مالي خلك يمه.
عافنا وطلع وكال من يكعد فلاح خلي يمرني للديوان.

اني بقيت مصدومة البارحة شمحلانه و هسه حتى بوجهي ما يباوع. وشلت هم شلون راح افتح موضوع اهلي وياه؟
اتريكنا وغسلنا مواعين ونظفنا البيت و بثينة خطيه كلساع تروح تتقيء وحامها كلش قوي.
كلتلها :- بثينة وصي فلاح خلي يجيبلج حبوب
B6
يفيد الحوامل الي وحامهم مثل وحامج و امن للحامل.
بثينة:- والله يااخيتي ياريت تعبت وانه كل ماافوت استفرغ احسن روحي تطلع .

صار الظهر و احنا مجهزين الغدا ودخلو فلاح وضرغام بس ضرغام حالته ماتعجب ابد.
صبينا الغدا وهو يادوب اكل لكمتين وكال رايح ارتاح شوي.
عافنا وحتى چاي ما طلب واني بقيت افكر بحالته والحجية تباوع على ابنها الي ماتدري شبي .