رحمة عاطف

بارت 12

كام عاطف وتوجه لبيبي باسها على راسها واخذ ايدهه يبوس بيها ..
_ لا موقصدي بيبي انتِ على عيني وراسي بس متشوفين البنية محابة ترتبط هسه وبعدين اسم الله عليج بيش مفاولة روحج وتحجين هالحجي عمرج طويل ان شاءالله وان يكن احنه موجودين اني ابد ما اتخلى عن رحمة وهذا وعد عليه ..

رحمة ؛ اندار عليه عاطف وكال ..
_ رحمة اني وعدتج اكون سند الج لتضوجين حالج والزواج مو فد شي اهم شي انت الي مقتنعة بي سوي ماشي ، وهسه مسحي دموعج واضحكي ماكو شي يستاهل والي تريدي يصير يعني يصير ..

رحمة ؛ هزيت راسي بقبول وابتسمت واني امسح دموعي ، كلامه لجروحي دوا ، ويبث الاطمئنان بروحي وجوده بحياتي اهم من وجود ابويه ، بابا بذات نفسه ماوكف الي بكد وكفات عاطف اليه فعلا هو طبيبي ..

باوعت لبيبي ضايجة رجعت بنظراتي لعاطف وكأنه قرا افكاري ..
تكلم ويا بيبي بنبرة : يلله بيبي فكيها عاد كتلج رحمة مسؤليتي ومستحيل اسافر اذا ما امن على مستقبلها لتزعلين عليها خطية تضوج تشوفج حزينة ..

بيبي ؛ لا مازعل عليها بنت الغالية هاي ، تعالي لحضني بعد عمري ..
رحت حضنتها ، لزمت ايدها بستها وباستني على راسي ..
كالت ؛ ولا يهمج الي تريدي يصير بس ادعي الله يطول بعمري وابقى بجانبج ..
باوعت لعاطف وكالت ؛ ادري بي عاطف بس تخابره ذيج ام عيون خضر يروحلها يركض خو مايبقى يكابلج ويكعد العمر كله ..

طكاهه ضحكة رجت الغرفة رج بس بصراحة كلش حلوة ضحكته مميزة صوته يثير اوتار قلبي ..
كال ؛ اكابلها شعندي مااكابلهه كم رحمة عندي اني ..

خجلت منه ودنجت مبتسمة ..
بيبي كالت ؛ اني اروح لحميد اكوله رحمة مموافقه ...

رجع عاطف طك ضحكة اكبر من الي قبلها
وكال ؛ اخ الله خوش بوري معدل اكل ..

تخصرت بيبي ووكفت تباوع وخزر بي ..
رفع ايده باستسلام وبعده الضحك مسيطر عليه ..
واني هم على ضحكه هم ظليت اضحك داشوفه فرحان كلش لان رفضته تمنيت اعرف ليش سر فرحه ..

طلعت بيبي وهو طلع وراهه ..

رحمة ؛ ... بعد ما طلعوا عاطف وبيبي بقيت وحدي بالغرفة ، دنكت راسي وعيوني صارت بحضني ، نظراتي بالفراغ متثاقلة ، محملة بألم وعذاب الماضي الي مو راضي يطلق سراحي ، مقيدني بقيوده  ..

اليوم وبعد حجي بيبي وخبر خطبة حميد الي
هيجت جروح بيه ، اني ما اصلح للزواج ابد
ليش يردون يزوجوني لشوكت اني ابقى هيج ياربي لشوكت!!

طلعت من الغرفة حسيت راح انجن من التفكير واني وحدي لازم اطلع راسي راح ينفجر اريد انسى واعيش حياتي خلص اكتفيت لازم اطلق سراح الماضي من روحي وافكر بمستقبلي مدام عاطف بجانبي ..

رأسا طلعت ادور غفران لان ارتاح يمها حسيتها اختي الماجابتها امي ..
شفتها

بالهول تتفرج تلفزيون ، رحت كعدت بصفها
مدت ايدها لكتفي كالت ها رحوم تعالي سويت شامية خلي ناكل ونتفرج هذا حلو الفلم .. والبطل يجنن عيونه زوروق...تستهزء