غلطتي .. الجزء الثاني

٩٦

ممدوح جا الكافي الجمب محلهم اتلاقو فيه ...

-تشربي شنو؟ 

*لالا ولا حاجة مليانة شكرا... 

ما اشتغل بيها ورفع يدو للجرسون طلب المنيو.. اتغاظت من تصرفو دا بس ما قالت لي شي ودخلت في الموضوع طوالي.. 

*انا جبتك بسبب العملتو مع فاتن!!! 

-اهاااا.. شال المنيو منو وبقلب فيه زي ما هاميه.. 

*ممدوح ممكن تنتبه معاي شوية؟ 

رفع راسو وعاين ليها 

-افندم!!! 

مع ان الكلمة استفزتها بس واصلت كلامها

يا ممدوح فاتن بتحبك والله العظيم.. 

-اها بتحبني قلتي لي؟؟ وانت محامي الدفاع عنها جيتي تبرري لي تصرفا والانا شفتو ب عيوني!! 

*ما جيت ابرر ليك نهائي بس بعرف كويس انها بتحبك من يوم اتلاقينا داك!! 

-شنوو اتلاقيتووو وبعاين ليها نظرة استغراب 

*ايوة فاتن اتصلت بي وطلبت تلاقيني وطلبت مني اني ابعد من طريقك وما ادمر ليها حياتا حتى قعدت تحت رجولي بتترجا فيني ابعد... 

-فاتن؟؟!! 

*ايوة عشان كدا بقول ليك فاتن بتحبك يا ممدوح ومستحيل تكون خانتك انت استعجلت بدون تعرف الموضوع مش امكن صديقها وهي كانت بتشتكي ليه من حاجة... 

-هتووون (بضيق نادي اسمها)... حركات المسلسلات والافلام الهندية دي ما تبعنا.. انا زول ما اوبن مايند عشان اتقبل التفاهات دي واقبل على مرتي يكون عندها صاحب ويمسك يدها واعتبر الموضوع عادي... لالا انا راجل ود بلد قلبي حار والعملتو شي قليل كونو اني طلقتها بس كان ممكن اكسر راسها ....

بقت تعاين ليه وهي من جواها وقرارت نفسها عارفة كلامو صاح جدا بس حبت تلطف الجو.. 

-انتِ ترضي ل نفسك حاجة زي دي قيسيها على روحك حا تكون ردت فعلك شنو؟!! 

اتزكرت لما شافت شهاب مع نسمة فعلا ما قدرت تتقبل الوضع وقتها.. خلي دا راجل ويشوف زوجتو ماسك يدها راجل غريب تاني... 

دنقرت راسها وقالت لي معاك حق والله بس انا ما كنت حابة الامور بينكم تنتهي بالطريقة دي خصوصا انكم ليكم فترة طويلة متزوجين... 

-البيوت اسرار يا هتون انتِ ما عارفة الكان بينا شنو.. انا وفاتن عمرنا ما كان زواجنا طبيعي كل زول عايش في عالم... 

انا ما بنكر اني ظلمت فاتن وظلمتها شديد وربنا يغفر لي ظلمها دا بس صدقيني غلبني اتقبلا.. حاولت حاولت يا هتون ما قدرت كل ما كنت اقرب منها بتخيلا انتِ!!! 

حسيت ب قلبي بدق في اخر جملة ليه واتوترته... 

*ممدوح احسن نقفل السيرة دي وانا عندي شغل بعد كدا لازم امشي...