صغار العم

الحلقة 21

03:00 م

اصيل واقف على مراية الحمام يدير في جل لشعره يجهز ف روحه
_

سلسبيل و سنابل ف دارهم يلبسو و معاهم روان

سلسبيل : زعما اصيل طلع ؟
روان : شكله
سنابل تمكيج : لالا ريته خش الحمام
سلسبيل شرين تليفونها شافاته تعفلقت : وووه على امي وووووه
سنابل شبحتلها : خيرك ؟
سلسبيل : البلي اللي لصقتيه فيا معشِشْ انى فديت منه ره شن هذا الزفت
سنابل : ردي عليه و وزعيه قوليله سنابل سافرت

أصيل يصيح من برا الدار : وين درتو السبيدرو ؟؟

سنابل ادير ف ماسكارا : شن نلبسو فيه معاااك ؟؟؟

أصيل تعفلق : تعالي يا حلوفة تعالي 😡

سنابل : مش فااااااضية

اصيل : تعالييييي

سنابل تكنطت : واك توا بيشوفني امبدلة و بيعرف إني طالعة
روان : البسي المصلية فوق حوايجك
سنابل خدتها تلبس فيها
اصيل يعيط : تي وين امه وقت ع الجامعة 😡
سنابل طلعتله : باهي معش تعيط تحساب روحك في حوازة ؟؟
اصيل يشوفلها : بديتي تصلي ؟؟؟
سنابل عوجت فمها : تحسابني زيك !!
اصيل دفها من وجهها : تبي الرباية من جديد يا امسخة ؟
سنابل : ااااي 😩
اصيل ركز فيها : تصلي بمكياجك مصح وجهك !
سنابل سكتت
اصيل : هيا دوريه
سنابل : اما سبيدرو
اصيل حاط ايديه ف نصه : الأزرق
سنابل فتحت دولاب الأحذية تشوف
أصيل يشوفلها : تعرفي كان يفوتني الوقت بتاكلي طريحة
سنابل شبحتله : و انى شن دخلني فيك
و طلعت السبيدرو : اهوا قدام عيونك
اصيل : باهي حطيه
سنابل حدفاته تحت رجليه
اصيل فنص فيها : قيميه و حطيه زي الناس
سنابل حمقت : تحسابني خديمتك !!!
و كيف بتمشي اصيل شدها من عنفقتها : تعالي جاي
و يطبس فيها للسبيدرو : قيميه و حطيه زي الناس
سنابل حامقة و تقول ف عقلها .. ( قيميه يا سنابل باش ينتلف و تطلعي )
اصيل مطبسها : قيميييييه 😡
سنابل قاماته و حطاته كويس
اصيل رخاها : ايوه شاطرة
سنابل مشت للدار و ماردتش عليه
لقت سلسبيل تتكلم ف التليفون
سلسبيل : يعني مصمم تجيب امك و ماتبيش تقدر ظرفنا ؟

سنابل فنصت 😳 و سكرت الباب

ادم : والله معادش خليتي فيها تقدير
سلسبيل : تمام به جيبها غدوا
ادم فرح : بجديات ؟
سلسبيل : ايه امالا نلعب معاك ؟

روان تضحك 😂
و سنابل مصدومة

ادم : مش قلتي امك مسافرة ؟
سلسبيل : ماك مصمم ؛ جيبها تتعرف على امّيمه و خلاص
ادم : مليح بكل ، شن بتلبسيلها 😍
سلسبيل تشقلب ف عيونها : خيشة
ادم ضحك
سلسبيل : هي سكر توا باش نفكر شن نلبسلها 😏
ادم : اوكى تو ف الليل نكلمك
سلسبيل : كلمني ع الرقم اللي اعطيتهولي ؛ اختي فدت منك و انت شادها جرتها
ادم : ماهو معش حصلتك يا سنابل باهي كيف تبيني ندير
سلسبيل : ماما كانت مورقتلي ان عندي تليفون اتضطريت انى ندسه و توا سافرت اتصل عليه و تو تلقاني
ادم : باهي تمام
سلسبيل : باي
ادم : سلام
سلسبيل سكرت الخط : شن هـَ الشـ*** هوا !!
روان ضحكت : ان شاء الله بيجيب امه
سلسبيل : ايه غدوا
سنابل تندب ف وجهها : حييييه حيييه 😱
سلسبيل شبحتلها : بالعكس افرحي ف مكان ماتندبي
روان : علاش بتفرح
سلسبيل تحرك ف حواجبها 😎
روان : كيف ؟
سلسبيل : بندير جو و خلاص ..؛ تو غدوا تعرفو
سنابل : فكينا من العار تو اتضحكي علينا الناس و يقولي مش متربية
سلسبيل تلبس ف وشاحها : باش نفتك منه خلاص معادش فيها
روان ضحكت : ووه شوقتيني
سنابل تلبس ف وشاحها : هيا وقت علينا اطلعو