كل صفنة حزن🍁 تكسر ضلع بالروح💔
صرت بذيج الفتره.. انسان فارغ.. حتى عيني نشفت من الدموع.. بس من تجيني الحاله ابقى اضرب بنفسي.. كنت اصفن ع حالي بالمرايه..
اتشائم من اشوف نفسي.. اكره شكلي صرت.. كرهت كل شي بالحياة.. خلص طلعت الدنيا من عيني.. كنت اصفن واكول ربي المن خلقني.. ليش وشنو الحكمه من تخلق بشر بس للعذاب.. مو اي عذاب.. لا عذاب كلهن..
بي وجع فگد اعزاز.. بي وجع شوگ ومعاتب سنين.. بي هواي اوجاع يرادلي سنين حتى اكدر احجيها..
ايست من جيه سامي الي.. شهرين وهو مامرلي.. وطبعا اني ملزمت نفسي.. صرت اتصل ويرفضني.. كنت ابقى اراقب التلفون اكول هسه يرجع يدك وماكو.. أأيس وابتسم واكوم من مكاني.. ابتسم ع لچماتك يگلبي..
تعودت ع الوحده.. ع دموع وع الوجع.. صرت مثل المخبله.. احجي ويه نفسي.. اتابع تلفزيون يوم بطوله وتنعس عيني وماانام.. ايام حرمت نفسي بيهه من النوم وايام من الاكل.. كنت اتلذذ بعذاب جسمي.. اما عذاب الروح هذا من انخلقت كان مزروع بيه.. واجه كل واحد بيهم سگه هذا العذاب وصار شجره باهته ويابسه ثابته وصعب تنقلع..
وصحيت بيوم صبح.. باوعت ع حالي..شمنتظره.. رجعه سامي؟ اصلا راح ميرجع.. وع شنو حابسه نفسج والمن..؟
كمت تريكت.. اباوع واتصفن.. لبست واخذت حنطتي وطلعت.. امشي ماادري بنفسي وين اروح.. اخر شي رحت للكراج.. خلص اروح لاهلي وارجع منين مااجيت.. اشوف زينه.. اخواني الي ماعرف حتى اسماءهم...
صعدت.. كان همي مكبرني هوايه.. مخفت وحدي.. وكان الوضع كلش موزين بوقتهه.. بس الظروف المريت بيهه للحظه سوت مني شخص بغير گلب.. وصلت لمنطقه اهلي.. بقيت واكفه كبال البيت وصافنه..
حتى الوجع الحسيته صار رماد رجع اشتعل بيه.. ماكدرت ادخل.. صبت دموعي واني بالشارع.. توجهت لبيت عمي مشي.. صح مسافه طويله.. بس كنت محتاجه امشي.. اشتم هوى اتنفس.. اشوف العالم شنو..
وصلت لبيت عمي.. دخلت.. تذكرت سامي من اجه ويايه.. بقيت امشي والوم بي.. ليش عفتني .. ليش بنص الطريق خليتني غريبه بلياك..
دخلت للمطبخ.. شفت زينه دمعتهه بعينهه وع السنك.. كبل طفرت اجت حضنتني.. تشهك وتبجي.. اااااه شكد شهكنه وبجينه.. وماكو حد يمكن للدمع.. من حضنتني انتبهت بطنهه صلبه وعاليه شويه.. لزمتهه .. هزت راسهه بأي يعني حامل..
اني بدون تردد كلتلها جمعي اغراضج وتعالي
زينه:لا .. مااكدر.. يموتوني..
-منو الي يموتج.. تعالي ويايه.. كم موته متنا؟ بقت ع هاي.. يله حبيبتي..
طلعت عمتهه.. محجت شي بس بقت تخازر بيه.. يمكن كانت تظن اني جايه ويه سامي.. وخافت محجت.. رجعت زينه جنطتهه بيدهه ولابسه..
ام راضي:وين! رجلج يدري؟
زينه:عود من يصير ادمي خلي يدري..
رادت تحجي كبل عطت بيهه:اسكتي.. لطلعين صوتج.. زينه انسوهه..
خليت ايدي ع ظهرهه وطلعنه.. ابنهه اني كايدته.. ورجعت اخذت جنطتهه منهه.. ماخطر ابالي شي غير ارجع لبيتي.. ع الاقل سامي يعرف اذا احد يتعرضلنه وهو موجود هناك..
صعدنه بسيارات الكراج.. منكدر نحجي باسياره.. ناس غرب ومصيبتنه اكبر من انها تنحجي كدام الناس..
وصلنه ع بيتي.. زينه وجهه مصوفر.. خفت عليها وع الي ابطنهه.. كعدت شويه ارتاحت.. كنت مصفره مسواك من كل شي.. بس يمي فلوس.. رحت اخذت ابن زينه وطلعنه نتسوك.. كنت مااندل.. سألت ودلوني ع محلات قريبه.. ورا شارعنه .. كان اكو بقال وغذائيه.. وليغاد منه اكو كصاب..
اخذت من كل شي شفته كبالي.. بحيث حرت بالعلاليك..
ابو المحل دز ولد صغير ويايه.. وصلني ع البيت.. انطيته بغشيش الفرحه صارت بنص عيونه.. ابتسمتله وراح..
لكيت زينه واكفه بالمطبخ وتباوع.. ذبيت العلاليك من ايدي.. رحت بوستهه وحضنتهه براحتي.. ذبيت شالهه منهه.. كنت اتأمل اشوف ظفيرتها نفسهه مال قبل.. لكيت شعرها قصير كلش وصاير خشن..
مسحت ع راسهه ..
زينه:رانيه .. شصار بينه؟
-هه كل مصايب الله..
زينه:وانتهت؟
-مادري.. بس خليج يمي.. وعوفي ذولاك الساقطين.
زينه:تدرين كنت شاكه بيهم..
-شلون؟
زينه:ماادري هيج مجرد احساس..
-خل اسوي عشا النه.. والليل طويل ونسولف بكل شي..
زينه:راح ادخل للحمام..
-اخذي راحتج حبي..
يتبع...
YOU ARE READING
وجع ذكريات
Romanceرحت للفندق وداسجل يم موظف الاستقبال مااحس اله ذراعي نلزمت حيل.: التفتت كان سامي.. متت بدمي.. كان ميباوع بوجهي وبس يباوع للشارع وللموظف.. سامي:اخي بطلنا منريد حجز.. رجعلها هويتها.. رجع الهويه.. كبل اخذها منه.. هنا شوصف حالي.. ظلت لازم ذراعي لحد ماوصل...
