تحدي العشق " الجزء الثالث من سلسلة العشق "

البارت الاول

نوفيلا
تحدي العشق
الفصل الاول
**********
ضحكت بصوت عالي والثانيه مبتسمه بهدوء وبتبص ليها سكتت وبصتلها : انتي بتتحديني انا؟؟
ريحانه : ايوه بتحداكي اني هخلي جوزك تنساكي
كارمن بضحكه خبيثه : عجبتني شجعتك وانتي بتتكلمي بكل الحريه دي قدامي من غير خوف .. ماشي وانا قبلت التحدي بتاعك
ريحانه : هتشوفي .. انا هنسيه مين انتي
كارمن : هنشوف .. بس معلومه بسيطه .. قربت من ودانها واتكلمت بفحيح افاعي .. لسه متخلقش اللي يخلي حد ينسي الاميره كارمن مهما كان مابالك بمجرد جاريه في قصري
ريحانه بشجاعه : الجاريه دي هتقدر تمحي اي ذكرى ليكي في قلب سمو الامير وهتشوفي
كارمن : شكلك مش عارفه مين هو سمو الأمير مراد .. محدش بيقدر يخترقه بسهوله بس انا اخترقت حصونه كلها
ريحانه : متجوزك اجبار
كارمن بضحك : قولتلي اجبار هههههه .. محدش يقدر يجبر الامير ع حاجه حتي جلاله الملكه والملك .. هو مختارني بكل ارادته بس معلش هخليكي تجربي بس متنسيش كل شيء مباح بالحب والحرب
ريحانه بابتسامة مستفزه : يبقي انتي شايفه انها حرب يا سمو الاميره .. وماله خليكي بتحاربي وانا بشوف محاربتك بعيني وانتي بتخسري مكانتك وانا إللي باخده منك .. السلام عليكم يا سمو الاميره
وسابتها ومشيت وكارمن بصت مكانها بشر قريت منها علا وهي بتهمس في ودانها بشر : البت دي مش سهله سموك
كارمن بسخريه وثقه : يمكن .. بس هي لسه متعرفش مين هي الاميره كارمن ولا مين هو الامير مراد .. شكلها ناسيه أنه ابن جلاله الملك غيث والملكه عشق يعني مش سهل حد يلعب بيه خليها تاخد جزائها هههههههه
طلعت من عندها وهي ع وشها علامات قلق من المستقبل من نظره عينها عرفت ان تحديها ده مش هيعدي ع الساهل وهي فعلا مش ساهله والكل عارف مين هي الاميره كارمن راحت لأوضه صغيره وقعدت فيها دخلت عليها دعاء
دعاء : ريحانه .. جلاله الملكه عايزاكي
ريحانه برعب : لي حصل مني حاجه
دعاء : مااعرفش .. تعالي وهنعرف
مشيت ريحانه وهي قلقانه لتكون كارمن بلغت الملكه وساعتها كده حياتها هتكون انتهت ان الملكه معندهاش حاجه اسمها هزار وقفت برا ودخلت دعاء الجناح وبعدين طلعت تاني وسمحت ليها تدخل ...
دخلت جوا وهي باصه ف الارض مش عارفه لي حاسه بقلق وتوتر كبير بس ده طبيعي اي حد بيجي هنا لازم يحس نفس شعورها ده وممكن اسوء لأن الكل عارف مين هي الملكه عشق!
عشق : تعالي يا ريحانه
وقفت ريحانه قدامها : امرك مولاتي
عشق بابتسامه : مالك خايفه لي يا ريحانه
ريحانه بارتباك : مفيش حاجه مولاتي
عشق : متأكده
ريحانه : ايوه
عشق : ماشي .. عايزه منك طلب صغير
ريحانه : حضرتك تؤمري يا مولاتي وريحانه تنفذ
عشق : الامر لله وحده وبس يا ريحانه بلاش تقوليلي الكلام ده انتي عزيزه عليا زي دعاء
ريحانه بابتسامه : شكرا مولاتي
عشق : عايزاكي تروحي ف الجهه الغربيه للمملكه ف حداد هناك شغله حلوه عايزاكي تقوليله يصنع سيف مميز
ريحانه : امرك مولاتي
عشق : تاني يا ريحانه
ريحانه بابتسامه هاديه : حاضر يا مولاتي
عشق بضحك : روحي يا ريحانه شوفي اللي قولتلك عليه
ريحانه : بعد اذنك مولاتي
وطلعت برا وهي بتتنفس بارتياح وراحت ع الجهه الغربيه للمملكه زي ما عشق امرتها ودخلت جوا للحداد
ريحانه بابتسامه : صباح الخير سمو الامير
جري عليها بسرعه وهو بيحط ايده ع بوقها وبيتكلم بقلق : الله يخربيتك يا ريحانه امير مين بس .. انا اسمي اليس وبس ماشي
هزت راسها كذا مره وهو بعد ايده واتكلمت : اسفه سموك بس
مسك السيف اللي كان جنبه وحركه قصادها : والله لو نطقتي كلمه كمان لاقطع راسك انتي فاهمه
ضحكت : حاضر يا سيد اليس
رجع السيف مكانه وهو بيبص ليها : خير يا ريحانه .. كان يوم اسود يوم ما عرفتيني ع حقيقتي
ريحانه : محصلش حاجه ولا حد عرف ان انا عرفتك اصلا صح ولا لا
هز راسه كذا مره : ايوه صح .. مقولتليش انتي عايزه اي
ريحانه : جلاله الملكه عايزه الحداد المميز يصنعلها سيف يكون مميز
جحظ عينه بصدمه : الملكه .. عايزه سيف مميز
هزت راسها كذا مره وهي كاتمه الضحك : ايوه .. ولازم يكون عندها ف اسرع وقت
خبط ع راسه وهو بيجري ع مكان شغله : يا حزن الحزن وانا هلحق اعمله ده .. امشي يا ريحانه امشي اقولك قوليلهم مات
ريحانه بسرعه : بعد الشر عليك يا سمو الام .. اقصد سيد اليس
صرخ ف وشها بعصبيه : امشــــــــــــــي
جريت من قدامه وهي بتضحك وهو وقف وبص للحاجه اللي قدامه : الملكه عايزه سيف مميز .. والله انا حاسس انه هيطلع حاجه كده العاق يتقرف منه ده للملكه!!
رجعت ريحانه ع القصر وهي مبتسمه والملكه طلبتها وراحت ليها ووفضلت واقفه
عشق : عملتي اي يا ريحانه
افتكرت منظر اليس وابتسمت بخفوت : قولتله مولاتي .. هيجهزه ف اسرع وقت
عشق بابتسامه : يعني هو متوترش ولا حاجه
جحظت عينها برعب : ها .. اكيد طبعا .. هو اي حد يعمل حاجه للملكه ولا اي
عشق : ماشي يا بكاشه .. روحي يا ريحانه
مشيت ريحانه وهي قلقانه الملكه بتراقبها لا لا مش الملكه اللي تعمل كده اكيد هي عارفه تصرفاته كويس عشان كده عرفت هو بيتصرف ازاي !!
بعد ما مشيت ريحانه قربت دعاء من عشق وقعدت قصادها ع الارض
دعاء : لي مسألتيهاش بطريقه مباشره جلالتك .. وعرفتي منها لي هي مخبيه
عشق : لان ولادي نفسهم مخبيين عني .. فهستني لحد ما حد منهم يجي يتكلم هي ملهاش ذنب هي بتسمع الكلام وبس .. واديني هشوف ابداعاته
دعاء : انتي فعلا ملكه مميزه .. جلاله الملك و سمو الامير مراد راجعين القصر دلوقتي
عشق بسعاده : بجد .. وانتي لسه فاكره تقوليلي دلوقتي يا دعاء
دعاء باسف : اسفه مولاتي بس نسيت
عشق : ودي حاجه تتنسي يا غبيه .. اطلعي بعيد عن وشي عشان مقطعش عيشك امشي
طلعت دعاء من الجناح بسرعه وقامت عشق عشان تلحق تجهز عشان تستقبل جوزها وابنها بس قب ما تعمل اي حاجه لقت صوت البوق دليل انهم وصلوا شتمت دعاء ف سرها اكتر من مره ونزلت بسرعه ولكن بخطوات هاديه ولقت خيال بيجري ف اخر الممر ابتسمت بخفوت لأنها عارفه صاحب الخيال ده وكملت نزول تحت ووقفت عشان تستقبلهم ..
دخلوا من بوابه القصر وهما رافعين راسهم كالعاده وزاد الفخر بانتصارهم علي اعدائهم قربت عشق منهم بابتسامه مميزه مبتظهرش غير ليهم وبس
عشق : مبروك ليكم ع الانتصار المميز وده كان المتوقع من ملك وامير مملكه الفرس .. بالمناسبه دي هيتوزع دهب ع كل الفقرا وكل صاحب مال ف المملكه هيطلع نسبه منها عشان ميكونش ف تفرقه بين غني او فقير .. اي رايك جلالتك
غيث بابتسامه محببه لقلبها : رأيك مفهوش شك يا جلاله الملكه .. عن اذنكم
ومشي والهتفات كلها بالدعاء للملك والامير قرب مراد منها وباس ايدها وهي حضنته بمحبه صادقه
وقرب اخوه منه وهو ع وشه ابتسامه بعد عن الملكه وقرب منه وحضنه
مراد بهمس : كنت فين يا سمو الامير
خبطه ف كتفه : اسكت خالص
مراد بجديه : هتكلم معاك لما نطلع
ابتسمت عشق بخبث عليهم وهي عارفه هما بيتكلموا عن اي بعد عن اخوه وراح للاميره كارمن حياها بهزه بسيطه من راسه وهي ابتسمت ومشيت عشق ووراها مراد وليث والاميره كارمن وطبعا ريحانه اللي كانت متابعه الموقف من اوله وهي بتفكر ازاي هتقرب من الامير مراد زي ما هي عايزه ودخلوا كلهم للقصر والكل بيدعي بطولت بالهم وراحتهم
دخلت الجناح الخاص بيهم ولقته واقف زي ما اتعودت منه ومستنيها قربت منه بابتسامه عاشقه وحضنته وهو حضنها بعشق
عشق : وحشتني يا غيثي
غيث : مش اكتر مني يا عشق الروح
ابتسمت ع اللقب اللي اخدته من فتره وحنضته تاني بقوه اكبر وهو ابتسم واتحرك بيها وقع وقعدها ع رجله
غيث : وحشتيني اوي اوي اوي يا عشقي .. كنت قلقان لتروحي لمراد وتسبيني لوحدي
عشق : طول ما عشق لسه عايشه انت مش لوحدك .. بس ده ميمنعش اني اروح لابني بردو
غيث بتذمر طفولي : وقاعده ليه .. روحي يا جلاله الملكه
ضحكت بسعاده ع ملامحه وباسته من خده بهدوء : محدش يقدر ياخدني منك يا غيثي .. غير لو انت اللي عايز كده
غيث : انا لو عليا مش عايزك تبعدي عني نهائي واخدك ونبعد عن المملكه دي كلها وابقي انا وانتي وبس
عشق : لسه زي ما انت يا غيث بتقدر تسعدني بابسط كلماتك
غيث وهو بيطبع قبله حنينه ع شفايفها : لان انتي متستحقيش تكوني زعلانه ولو لدقايق وسعادتك بتسعدني وانتي عارفه كده
قامت عشق بهدوء وهي بتضحك ع منظره اللي اتغير تاني : معلش يا جلاله الملك بس ورانا مسؤليات
غيث : اه طبعا طبعا .. الله يسامحك يا عشق الروح امشي يا عشق شوفي ابنك اللي بتألفي عشانه
عشق : متزعلش بقي ويلا عشان تشوف مسؤلياتك يا مولاي
قام وهو بيبتسم واخد قبله سريعه وطلع بسرعه وهي ابتسمت ع حبيبها اللي بعد مرور عشرين سنه وهو لسه زي ما هو بيبسطها بأقل حاجه
&&&&&&&&&&&&&
دخل مراد جناحه وقعد ع السرير بتعب وطلع برا تاني ووقف قدام الحرس
مراد : اي حد يجي تبلغوني فورا
الحارس : امرك سموك
دخل مراد من تاني وقلع الرداء بتاعه وبان الجرح اللي ف كتفه وجاب معقمات هو محتفظ بيها وابتدا ينظف الجرح ويعقمه وحس بايد ع كتفه بص بسرعه وراه لقي عشق وهي بتاخد منه القطن بهدوء وبتنظف هي الجرح
مراد بارتباك : جلاله الملكه .. انتي جيتي ازاي
عشق : من الباب
مراد : احم مش قصدي اقصد انتي جيتي لي
بصت له بهدوء : عشان اطمن ع سمو الامير اللي مانع اي حد يدخله .. بس اكيد الملكه لا ولا اطلع؟َ
مراد : لا طبعا .. وبعدين اي حكايه سمو الامير دي انا ابنك ع فكره مراد وبس
عشق : وانا والدتك ع فكره ماما وبس
مراد : اسف يا ماما نسيت
حركت راسها بهدوء ولفت الشاش ع جرحه وهو استغرب انه محسش بأي حاجه من اللي هي عملته
مراد بابتسامه : ما شاء الله ايدك فيها سحر يا ماما
عشق : طبعا يابني امال انا مسيطره ع والدك من شويه
ضحك جامد وهي ضحكت معاه ودخل الحارس وهو موطي راسه ف الارض
الحارس : اسف جلالتك اسف سموك بس الاميره كارمن عايزه تدخل لسموك
مراد : خليها تدخل
بصت عشق لمراد ووقفت : اهتم بنفسك يا مراد وياريت متخبيش عليا حاجه لاني بحس بيك
مراد : انتي هتمشي لي .. اقعدي معانا
عشق : مش بايدي مبحبهاش .. وبعدين واحد ومراته عايزني اعمل اي شايفني عزول يا ولا
ضحك مراد وهي ابتسمت وطلعت قابلت كارمن اللي حيتها بابتسامه مزيفه : اهلا مولاتي
عشق : اهلا سمو الاميره .. مش محتاجه تبتسمي ابتسامه زايفه اتعاملي بطبيعتك
بصت ليها كارمن بتوتر وعشق ابتسمت نص ابتسامه ومشيت وهي لفت راسها ليها بضيق وراحت لمراد وقعدت جنبه ولمست كتفه
كارمن : حبيبي سلامتك حاسس باي
مراد : انا كويس يا سمو الاميره
كارمن : اي سمو الاميره دي يا مراد .. انا كارمن مراتك يا حبيبي
ابتسم بهدوء : خير يا كارمن
كارمن : اخص عليك يا مراد .. يعني لازم يكون ف سبب عشان اجيلك
مراد : انتي مراتي وانا فاهمك كويس
كارمن بابتسامه : وده اللي بحبه فيك .. كنت عايزه اروح المملكه بتاعتنا
مراد باستغراب : حصل حاجه؟!
كارمن : لا محصلش حاجه .. بس عايزه اقعد مع اهلي
مراد : بس هو مش هيبقي لطيف انك تروحي لاهلك من غير جوزك
كارمن بسرعه وهي بتحرك ايدها ع دراعه : حبيبي انت لسه راجع من حرب وتعبان مش هيقولوا حاجه
مراد : ماشي يا كارمن هتمشي امتي
كارمن : الصبح .. موافق
سكت شويه وبعدين اتكلم بهدوء : موافق
باسته من خده وقامت وقفت : شكرا يا سمو الامير
وطلعت برا وهو رجع ضهره ع السرير بتعب : كانت نقصاكي .. معرفش انا اتجوزتك ازاي اكيد كنت تعبان عشان وانا تعبان بعمل حاجات كتير مش طبيعيه
دخل الحارس عليه : اسف سموك .. الخادمه ريحانه عايزه تقابل سموك
مراد باستغراب : ريحانه .. خليها تدخل
واتعدل تاني وهو بيزفر بضيق لانه مش عارف يرتاح دخلت ريحانه وهي باصه ف الارض
ريحانه : اسفه سموك ع الازعاج
مراد : خير يا ريحانه
ريحانه : احم .. يعني .. هو .. اصل
مراد بجديه : ف اي يا ريحانه
ريحانه : انا اتحديت الاميره كارمن
مراد بتساؤل : اتحدتيها .. ع اي وبعدين انا مالي؟!
ريحانه بارتباك : مهو الموضوع يخص سموك
مراد بحده نوعا ما : ما تنطقي يا ريحانه مره واحده هو انا هشحت منك الكلام
انتفضت ورفعت راسها بهدوء وهي بتبص ف عينه ف رعب : انا اتحديتها ع قلبك
مراد : يعني اي
ريحانه : اتحديتها انك .. انك تحبني
ضحك مراد بصوت عالي وهي خافت اكتر من الاول بس مينفعش تتنسحب دلوقتي ابدا بطل ضحك وهو بيبص ليها جامد
مراد : وهي طبعا وافقت مش كده
ريحانه : ايوه
مراد : وانتي اي سبب اللي انتي قولتيه ده
ريحانه : عشان اكسر غرورها
مراد : مش فاهم
ريحانه : الامبره كارمن متكبره ومغروره ع الكل وانا عايزه اوريها ان الجاريه تقدر تاخد قلب امير
مراد بجمود : وانتي مش خايفه اني اقطع راسك او اقل حاجه ارميك ف السجن ومتعرفيش تخرجي
ريحانه بشجاعه : لا لان لو هتعملي كده كنت عملت مش لسه هتقولي يا سمو الامير
بص ليها باعجاب وابتسم بسخريه : وبتقولي ان الاميره هي اللي مغروره
ريحانه : ولي متقولش ثقه ف النفس
مراد : لا وشجاعه كمان .. محدش قدر يتكلم معايا بالطريقه دي
ريحانه : لان محدش يقدر يتكلم مع الملك المستقبلي بالطريقه دي
مراد : وانتي بقي اللي قدرتي
ريحانه : ايوه بدليل اني بكلمك .. سموك قولت اي
مراد : ع تحديك التافه ده
ريحانه : اه ع التحدي التافه ده
مراد : بس سؤال انتي لي قولتيلي
ريحانه : لان اكيد لو وقعنا ف الحب حد تاني هيجي يقولك انما كده انا مكشوفه قصادك
مراد بضحكه سخريه : وكمان وقعنا ف الحب انتي بتحلمي .. انتي مجرد جاريه هنا
ريحانه بتحدي : والجاريه هتقدر تكسب قلب الامير
مراد : هتقفي وتقعي ع فشوش
ريحانه : وهقف تاني مش مشكله
مراد : اطلعي برا عشان زهقت
ريحانه : يعني اي
مراد : يعني اللي سمعتيه .. برااا
طلعت ريحانه بسرعه وهي خايفه من عصبيته وهو ضحك بسخريه : ده من اول كلمه ومرعوبه دي مش هتقدر تكسب قلب عصفور مش قلبي ناقصه هم هي
ونام بتعب وكسل وهو بيتوعد للي هيجي يقطع راحته بعد ما ينام
&&&&&&&&&&&&&&&&
علا باستغراب : هتمشي ازاي سموك .. وريحانه
كارمن : يا غبيه ما انا همشي عشان ريحانه
علا : ازاي
كارمن : غبيه .. لما امشي انا معني ذلك اني سايبه الطريق فاضي قصادها وده قصدي بس مش عشان تكسب قلب مراد لا لأن مراد بتاعي انا وبس
علا : امال عشان اي
كارمن : عشان تعرف انها مش هتقدر توصل لقلب مراد وان محدش يقدر يسيطر عليه غيري انا وساعتها انا اتصرف معاها ع اكمل وجه
علا بابتسامه : انتي مش سهله سموك
كارمن بضحكه شر : كل شئ مباح ف الحب والحرب
&&&&&&&&&&&&&&&
طلع من القصر وهو بيتسحب كالعاده وماخدش باله من جوز العيون اللي بتراقبه وبعد ما مشي راحت لوجهتها
دعاء : مشي مولاتي
عشق : كنت عارفه انه هيمشي تاني طبعا عشان يلحق يعمل السيف
دعاء : والله حرام اللي بيحصل يعني هو كل مره يتسحب كده
عشق : هو مبسوط كده خلاص يعمل اللي هو عايزه
دعاء : بس الغريبه انك يا مولاتي ملمحتيش حتي انك عارفه
عشق : لأن هما نفسهم محدش فيهم اتكلم هتكلم انا!!
مشي من القصر وراح ع مكان شغله وابتدا يشتغل ودخلت عليه بنوته هو عارفها جدا
همس لنفسه بصدمه : هااااراسوح وعد .. يا سواد ليلك يا ليث يا اخويا
خطت بخطوات واثقه جوا المحل وهي بتبص لليث بجمود
وعد : انا سمو الاميره وعد .. بنت ملك مملكه النصر
هز راسه بخفوت : تحياتي سموك .. اسمي اليس
وعد : انا مش جايه اتعرف عليك .. انا عايزاك تعملي سيف ويكون قوي وحاد وميكونش اتعمل زيه قبل كده
ليث بسخريه هامسا : سيف يا بنت عمر !!
رفع صوته : امرك سموك .. هخلص اللي معايا واعمله لسموك
وعد بحده : انت تعمل اللي انا قولتلك عليه الاول وبعدين تعمل اللي معاك
ليث بحده : وانا بقولك هعمل اللي معايا الاول وبعدين هعمل السيف لسموك
وعد : انت ازاي تكلمي بالاسلوب ده
جز ع اسنانه بغيظ : اسف سموك بس الشغل الشغل
وعد : انا مليش دعوه .. انا عايزه حاجتي تتعمل الاول
ليث بعند : طب اي رايك بقي اني مش هعمله غير لما اخلص اللي ف ايدي واللي بعده واللي هيجي بعده
وعد : انت عارف انت بتتكلم معايا ازاي عارف انا ممكن اعمل فيك اي
ليث : لا مش عارف .. عرفيني
وعد : انا مش هخليك تفضل ف المملكه هنا دقيقه واحده
ليث : انتي تقدري تتحكمي هناك ف مملكتك انما هنا القوانين بتاعت الملك غيث وبس
مشيت وعد من عنده بغيظ وهو بيبص عليها بضيق : كتك نيله معرفش مش طلعه لاهلك لي بومه!
&&&&&&&&&&&&&&
وصلت ع المملكه ودخلت بعصبيه شافها عمر وراح وراها ع الجناح بتاعها لقاها واقفه وبتاكل ف ضوافرها بعصبيه
عمر: مين معصب اميرتي الحلوه
وعد : واحد حقير غبي
عمر بهدوء : اتكلمي عدل يا وعد
وعد بخفوت : اسفه جلاله الملك
عمر : حصل اي
وعد : سمعت عن حداد ممتز ف الجهه الغربيه لمملكه الفرس روحت هناك عشان يعملي سيف مميز بم اني هتضرب ع المبارزه بس كان واحد قليل الذوق ووقح مع اني قولتله انا مين كويس
عمر بانتباه : انتي قولتي فين
وعد : ف الجهه الغربيه لمملكه الفرس
عمر بدهشه : الجهه الغربيه الجهه الغربيه
وعد باستغراب : اه يا جلاله الملك
عمر بهمس : الله يخربيتك يا ليث
ف الناحيه الثانيه صرخ ليث بالم من الالم اللي ف ايده بسبب النار : بركاتك يا شيخ عمر لحقت حكتلك بنت ال ولا بلاش
وعد : ف اي جلالتك
عمر : يعني انتي ملقتيش غير ده وتروحيله يا وعد
وعد : وفيها اي واحد وشغله حلو .. بس انا مش عايزاه يكمل عايزاه يوقف اللي بيعمله ده
عمر : الود ودي يا حبيبتي بس كله الا قطع الارزاق
وعد : ده كان بيتكلم معايا باسلوب مش محترم وقليل الادب
عمر : مهو تربيتي
وعد : نعم
عمر : اقصد مهو تربيتي فيكي طمرت وانتي متخططيش حدودك معاه صح
وعد : ايوه صح .. خلاص جلالتك مفيش مشكله انا هعرف اتصرف معاه
عمر : لا اوعي حاكم ده دماغ ضايعه ومش هيعمل صله قرابه اصلا
وعد : قرابه اي
عمر : انتي وقفالي ع الواحده ولا اي يا وعد .. انا همشي
وطلع عمر بسرعه وهو بيهرب من بنته اللي بصت مكانه بزهول واستغراب : ماله ده!!
عمر : منك لله يا ليث هتجنني وتجنن البنت اشوف فيك يوم
رمي ليث البتاعه ع الارض بحده وهو بيحط ايده ف مايه وبيشتم : الله يخربيتك يا عمر انت ووجه البومه .. بطل دعا محدش غيرك بيدعي عليا انا عارف .. كنت عارف ان اليوم ده هيتنظر عشان شرفت البومه ع المكان .. والله ما انا مكمل شغل كتكم القرف
ومشي بسرعه ع القصر تاني وهو بيدعي ع عمر وبنته وهو واثق ان مفيش غير عمر اللي بيدعي عليه عشان بنته وانه مش هيقدر يعمل حاجه فمفيش قصاده غير الدعا وده انيل
&&&&&&&&&&&&&&&&&&&&&&&&
وصل ع القصر ودخل بسرعه وغير هدومه وطلع برا ومن سوء حظه مر من قدام قاعه التدريب وكان فيها غيث ومراد  اللي وشه باين عليه الغضب وبشده
غيث : ليييييييث
وقف ليث مكانه وهو بيبص ع ابوه واخوه وعرف ان اكيد الملك صحاه من النوم لان مفيش غير ده بيزعج مراد .. دخل جوا وقدم التحيه
ليث : نعم جلالتك
غيث : تعالي اتدرب معانا
ليث : لا مش قا..
مكملش لان مراد حدف له السيف التقطه بسرعه وهو بيبص لمراد بغيظ وضيق بص غيث لمراد وابتسموا بمكر وهو قلق من ابتسامتهم لانهم محدش يعرف بيفكروا ف اي وف ثانيه كانوا منزلين سيوفهم ع سيف ليث اللي طلعه بسرعه قبل ما السيوف تخترق صدره
ليث : هي فيها من كده
مراد : العب وانت ساكت
زق ليث السيوف بسرعه وابتدوا ينهالوا عليه من كل ناحيه وهو بيحاول يصدهم لحد ما وقع ف الارض وغيث ومراد نزلوا السيف عليه بس قبل ما يقرب كان ف سيف تاني مناعهم بصوا ع صاحب السيف ومكنش الا عشق اللي ابتسمت بثقه ومدت ايدها لليث اللي ابتسم بمرح : والله مافي حد بيحبني ف المكان ده غيرك يا ست الكل
ورجعوا تاني للمنافسه ليث وعشق مع بعض وغيث ومراد مع بعض وكانت المنافسه حاره واتجمع اللي ف القصر ع المنافسه دي وهما بيشوفوا بشوق ومش عارفين مين اللي هيكسب
غيث وهو بيلعب : مكنش له لزوم تنزلي جلاله الملكه
عشق وهي بتصد ضرباته : مينفعش اشوفك انت وابنك ع ابني الثاني وافضل ساكته
مراد : احنا بنعلمه مش اكتر واشمعنا انا بس اللي يستلمني جلاله الملك
ليث : ده انا قطع رقبتي هيكون ع ايدك انت يا سمو الامير
وكملوا لعب بس وقفوا لما سمعوا الصوت : السلام عليكم يا جماعه
بصوا ورا لصاحب الصوت وصرخ ليث بدون وعي اتفاجئ عليها اللي واقفين : لا والله كده كتير وكتير اوووووي مش هناك وهنا
*******************
... يتبع
#Nemo