مالڨري راني عيانة مي لازم...
حبطنا و فطريق سقسيتو علا لي اڨزامان كيفاه نديرولهم قالي هو يديرهملنا....
رحنا للاستعجالات....
كان الغاشي كبير.... بدينا نخدمو كي العادة....
كانت مرا داخلتلها شاقورة فراسها مور وذنها معجزة مزالها عايشة كانو كامل يجاراو ليها... وحنا تان كنا مطروشين دكتور عبد الوهاب هو مستكلف بيها بسكو هو جراح دماغ لوحيد لي كان فالاستعجالات ...
د. عبد الوهاب: الاء اطلعي قوليلهم يوجدولنا بونك فتصوير برنين بش نشوفو وين راهي الشاقورة فراسها اڨزاكت
يوسف ارواح شد هنا بش مايخرجلهاش الدم بزاف
منال! جيبيلي ***
مافهمتش وش راهو يهدر... وليت نشوف كلش فلو... و حسيت رجليا ماشي قادرين يشدوني
دعبد الوهاب ،*بلعياط*: منال؟؟ وشبيييك قتلك اجري جيبيلي الطابلة لي راهي قدام لباب.... اجري!!!
كنت حاندور ....حتى نشوف لبلافو ...و نسمع لعياط مناللل!!! ...
فقدت الوعي و كي فطنت لقيتهم يجرو بيا فالكولوار فوق الطابلة... دخلوني شومبرا تع الرنين المغناطيسي...
ماقدرتش نرفد راسي شفت دكتور عبد الوهاب ميت بالرعب عند راسي و يقولي منال ماتخافيش ماكاين والو ...راني معاك...
منال : د... ك... تور
لساني ثقيييل مانيش قادرة نهدر....
تمتم حسيت لقيا طلعلي و حايخنقني درت على جيه و بديت نتقيا حشاكم ...
بقا دكتور عبد الوهاب يشدلي فراسي كي كملت تقييت حكمني وقالي : منال انا ستهزيت بيك بزااف كنتي تباني عيانة انا ماسيفتش عليك ديري فحص انا لغاط كون كشما يصرالك علاجالي...
مانحكيلكمش على الخوف لي شفتو في عينيه و مانيش اصلا قادرة نهدر معاه و نفهمو.... كان يترعد و باين مطروش بزااف...
جا طبيب وحدوخر جبدو وقالو : استغفر ياخو بلعقل كابابل ماراهيش تسمعك اصلا... خلي نديرولها تصوير و نشوفو وبالاك مكاين والو...
انا كنت نسمع مي كنت مذبذبة كامل راسي يوجع الدوخة صداع رؤية مشوشة مافهمتش وش راه يصرالي كي شغل الاعراض لي عندي تكلاطاو على ضربة....
بقيت نستغفر في قلبي و غمضت عينيا....
دخلوني فغرفة التصوير... وريحت كالم حتى نسمع لعياط برا مافهمت والو بديت نخبط حبيت نخرج تقلقت كنت بديت نسترجع القوة تعي....
فتحلي طبيب و خرجني... قالي : اصبري ماتنوضيش مالبونك
وين راه عبد الوهاب!
درت لوين لعياط حتى نشوف اطباء يشدو فدكتور عبد الوهاب لي كان يعيط و يخبط فروحو فلحيط حتى بدا يسيحلو الدم فجبهتو...
تشوكيييت.... عيطت فوور
منال : دكتووور!!!! ؟
غزر فيا شافني فاطنة طبع الاطباء و دخل ليا عنقني و بصوت يترعد ووجه صفر قالي : منال ماتتقلقيش نواعدك غير نداويك اناجراح... يك علابالك قريت مليح و نقدر نداويك
وش راه يهدر... كاشما صابولي حاجة فراسي سور و مع رياكسيون تاعو نقدر نستنتج لمرض تعي وحدي....
منال : قولي وش عندي
د. عبد الوهاب : نبداو العلاج ماليوم ياك منال توعديني
منال: تقولي ولا نروح نشوف وحدي
بقا دكتور عبد الوهاب يغزر فيا كي طفل صغير لي يخاف على يماه كي تمرض....
كي شفت لغزرة فعينيه لي بداو دموع يتعمرو فيهم عرفت بلي ماشي حاجة ساهلة
دكتور صالح : وهاب اخرج نهدر معاها
ماحبش بيان سور حتي خرجوه لفراملة...
د. صالح : يابنتي نتي طبيبة و تعرفي مليح وش حانهدرلك و نتي بلا هذ الشي طفلة قوية بزااف الله يبارك....
منال : ايه....
د. صالح : عندك ورم أرومي دبقي ...
تعرفيه ياك؟
حسيت لتم دم حبس فلعروق فمي نشف كيفاه مانعرفوش مشي هذا لي مات بيه بابا!! الله يرحمو حكاتلي عليه امينة فآخر مرة تلاقيتها فسبيطار و حوست عليه مليح
شريتلو براسي تع ايه
د. صالح : مالا بش مانكذبش علا بنتي عندك عالاكثرية من 4 ل 6 شهور تعيشيهم بلا علاج و عام و نص فحالة لعلاج بصح راكي تعرفي لعلاج... كيماوي يعذبك كثر....
منال :...
...مالفة نقول لناس بقالكم 6 شهور تعيشوهم و نروح نكمل خدمتي عادي.... بصح هذي اول مرة نحسلها كيما دك *نتبسم* سبحان الله صعيبة....
حكمني لبكا. و ماحبيتش نبكي قدامو بسييف شديت روحي...
د. صالح : ماديريش علا وهاب راه فصدمة نفسية... ساعفيه يا بنتي...
مسكين غاضني كثر من خوف لي لازم يحكمني دك... ماخممت فحتى وحد من غيرو.... كنت حابة نعيش معاه و نعوض وش فاتني فحياتي من حب... قلت دك نعيش كانسانة طبيعية... بصح الله غالب.... حتى هو تعلق بيا بزاف دك راني خايفة عليه ...
منال : دكتور ...معليش تعيط لدكتور عبد الوهاب نهدر معاه!
د. صالح: وي بيان سور..... و ربي يصبركم
خرج و سمعتلو يعيطلو....
...يتبع
part 28 ^^
ابدأ من البداية
