ريحنا... كانو هوما يڨسرو باركتلنا... و كملت وجدتلنا كلش درنا ليزاناليز خرجو ملاح ماعندي حتى مرض ينتقل ... حمد لله زاد د. عبد الوهاب دارهم كيف كيف ماكاين حتى مشكل حمد لله...
قاتلنا دك نسڨملكم دوسي و نمدهولكم كملت خدمتهولنا شفت الساعة كانت 8:55
جاز لوقت تمتم..
عيط د. عبد الوهاب لشهود جاو زوج اطباء كبار...
باركولي و شكروني قالولي شفناك شحال شاطرة..
عيطت لماني قتلها نجوزو عليك وجدي روحك...
اما بابات د. عبد الوهاب عندو طونوبيل و قالنا يجي وحدو...
رحنا فطونوبيل تع د. عبد الوهاب ركبت مالقدام بيان سور... طريق كومبلي وهوما يڨسرو عالعمليات ...وانا مافهمتش علاه بديت نحس روحي ندوخ....
فتحت تاقة و بقيت نشم لهوا....
رفدنا ماني و كملنا للبلدية.... جازو الاجراءات كامل ملاح.... سنينا دالتنا و خلاونا ندخلو بسكو بابات د. عبد الوهاب عندو معريفة تما تهلاو فينا... سقساو علا والديا.. شفت فد. عبد الوهاب هو فهمهم كلش.. .
...دخلنا وعقدنا... زغرتولنا نسا لي تما...كان د. عبد الوهاب ميت بالفرحة ... عنق باباه و بقاو يضحكو.. . كي شفتو هكاك حسيت قلبي تقبض... يعني يحبني تع الصح... جامي توقعت وحدة كيما انا بهذ العقلية حانوصل لهذ البلاصة و نعقد مع واحد يحبني هكا.... وانا تان نحبو...
خرجنا من تما بابات د. عبد الوهاب هو وصل ماني لدار...
و حنا ولينا لسبيطار عيييت بزااف.... عندنا ما جرينا ليوم كانت الساعة 14:30
غير وصلنا لسبيطار خلصلنا د. عبد الوهاب فطور.... كنا ناكلو حتى تتقلب لكافيتيريا بالزغاريت ...و نشوف الاء و يوسف جاو يسلمو علينا و اطباء و لفراملا كامل يعنقو و يسلمو علينا و قلبوها بالزغاريت.... وزادو دخلو پاتيسري كبيرة جابوها لطابلتنا
حسيت النفس تقطعلي مالشوك ماتوقعتش حايديرلي اي انسان هكا ...
كان د. عبد الوهاب فرحان بزاف تبانلي لي وجدو هكا هوما صحابو كيما دكتور صالح لي جا معانا...
احتفلو معانا و قسمت لباتيسري ووكلت د. عبد الوهاب و هو وكلي مورصو و عمرلي وجهي بلاكريم... ..ماتو عليا بضحك لتما حتى انا كنت نضحك...
حوست على دكتور فؤاد مالقيتوش متأكدة يكون مشغول...
كي كملنا كلينا مدينا لفراملا وش بقا...بسكو پاتيسري كبيرة بزاف...
بداو يتفارقو بقيت انا ويوسف و الاء و كاميليا و دكتور عبد الوهاب
part 28 ^^
Start from the beginning
