عذرا على التأخير وفصل اليوم نبي رايكم في القصة لحد تو وعلى فكرة معاش مازال واجد على النهاية
#بنت_خالتي (الجزء الثاني من سلسلة اقرباء ولكن )
الفصل الرابع عشر
امي تبكي .. تعال ياعبدو
انا بخوف .. كنك تبكي يا امي
امي ومازلت تبكي .. الصافي
انا.. كنه
امي .. ازوج بنت عمه
انا بصدمة .. شنو وكيف صار
امي .. مش عارفة شئ تعال خايفة على وتين
انا بخوف وصوت اهتز .. كنها
امي .. ردت فعلها غريبة هادية وواخذة الامر عادي ولا كأن خطيبها تزوج حتى قبل ما يتزوجها
انا بعصبية .. هي جاي تو
وسكرت من امي والتفت لقيت اوس مدخل عمتي كريمة للحوش ورد ليا
انا .. بنعدي يا اوس تو نجيك
اوس جاء جيهتي .. تحرك للكرسي لاخر مستحيل تسوق بعصبيتك هذي
انا .. خليني يا اوس
اوس فتح الباب .. هيا بدون نقاش
وفعلا تحركت للكرسي الثاني اصلا نا ماعنديش اعصاب اني نسوق بيهن ونا نفكر في وتين لو يصير فيها حاجة موت الصافي حيكون على ايدي ومانندريش على روحي ضغطت على ايدي لدرجة سلاميات ايدي بانن واوس يخبط عليهن بشوي بيش نرخيهن
اوس .. اهدى يا عبدو مش كويس ليك التوتر والضغط على روحك
انا نفتح في درج السيارة خذيت منه حبة مسكن لان الصداع بدا ومانبيشي يزيد عليا
اوس .. هضا اللي نحكي عليه غير فهمني شنو اللي صاير
وحكيت لاوس اللي قالته ليا امي
اوس .. وبه شنو بدير
انا بعصبية وصوت عالي .. والله لو تصير حاجة في وتيني لموته على ايديا
اوس يحاول يهدي فيا.. به اهو قريب نوصلو اتصل بموسى واسئله على مكان الصافي وين شنو بتخش عليهم هاد ادور فيه
انا .. به
واتصلت بموسى وقالي جوه خارب ومقمعز وراء الحوش في الجنان الخلفي وقلت ليه انه يفتح الباب الخلفي ودرس بيا اوس من جيهة الحوش من لوراء ونزلت بسرعة حتى قبل اوس مايدرس السيارة كويس ولقيته مقمعز ولاول مرة مانعرفش نكون هادي زي ما معروف عليا وجيته ثاير وضربته على وجه ضربة نين طاح وصبيته من رقبة سوريته
انا ونحكي بكل عصبية .. انت كيف ادير هكي
الصافي ببرود .. وانت شن دخلك
انا وننفض فيه .. كيف شن دخلني وانت ماشي متزوج على وتيني كيف ادير فيها هكي
الصافي ونفض ايديا ودفني ومازال يحكي ببروده اللي بيجلطني .. معاش تمت وتينك وبعدين هذي حاجة بيني وبينها انت مالكش دعوة
انا وخلاص اي ذرة عقل فيا طارت وقعدت نخبط فيه على صدره .. كيف مالياش دعوة بيها نا اللي كبرتها على ايديا ونا اللي حبيتها واهتميت بيها ونا اللي كنت نستنى فيها
الصافي دفني شوي .. وانت اللي سيبتها رغم انها مازلت لتو متمسكة بيك وين كنت لما هيا تكلم فيا تقولي مش قادرة تنساك وين كنت وهي كل ليلة دموعها يغرقن مخدتها ( وبصوت عالي ) رد عليا وين كنت
انا بوجع وقهر بان في صوتي .. كنت نحارب في الموت نحارب في الوقت
الصافي ببرود.. واهو شايفك حي ممتش يعني
انا .. وهو الموت غير بدفن الجسد في التراب الموت بحاجات واجد واولهن اني تو بنص عين وبعد اقل من شهر ممكن نخسر النظر بكل او حتى نموت
الصافي وبعد مافهم وتأثر من كلامي .. قصدك شنو
انا وهديت شوي .. عندي ورم في راسي وجاي قريب من منطقة العين ودرت العملية الاولى نجيت من الموت لكن خسرت النظر في عيني اليمين ومازلت عملية ثانية والله اعلم يا ننعمى بكل يا تنجح ونحافظ على النظر في عيني السليمة يا نموت
والتفتنا على شهقة و سفرة طاحن طواسيها
VOCÊ ESTÁ LENDO
(سلسلة اقرباء ولكن) الجزء الثاني بعنوان بنت خالتي
Contoسلسلة أقرباء ولكن هي سلسلة متصلة ببعض وعشان تفهم الجزء الثاني لازم من قراءة الجزء الاول منها بعنوان (بنت عمي) التنزيل يومي باذن الله اسعدني الوسام كثيرا وحتى قبل ان تنتهي.. حياة #7ابداع 9#ابداع 5#ابداع 6#ابداع #4ابداع
