سقساوني شوية على قرايتي ...ماجبدوش على والديا سور د. عبد الوهاب فهمهم كلش...
يماه قاعدة غير تغزر فيا و تتبسم
مام باباه كي شافني مع لول سمعتو قال : الله يبارك
تخنقت راني حابة نهرب راني حاساتو منام برك....
جاز شوية وقت ...نطقت خالتي : اه دك يدخل يشوفها شوفة شرعية!
يماه : اوو يا بنتي ياك شافها وش حايزيد يشوفها حنا ماجيناش على الشوفة جينا نخطبو ليوم ونقطعو الشرط
ماني : اوو مافهمناش هكا...
بدات تتعنكر فيا ماحبيتش ڨع نغزر من جيهتها...
ماني : ماعليش... مادامكم واجدين حنا تان رانا واجدين
يماه : يعطيك الصحة... قولولي ياناس الخير وشنوهم شروطكم؟
ماني : يا بنتي حنا نشرطو لهنا برك...
هذي ماني؟... اواه وقيل صح منام... ولا بدلوهالنا
يماه : مرسي ربي يهنيهم هذا مكان...حتى حنا شروطنا تتهلايلي فمومو عيني .....و وليدي يحبك و انا لي يحبها وليدي نحبها و نحطها فوق راسي
بقيت ساكتة و شريتلها براسي ايه. حتى انا لحشمة هذي مافهمتش منين جاتني راني حاسة روحي بوتفليقة قاعدة غير نشرلهم براسي...
باباه : ايا مالا مبروك عليكم يابنتي ربي يتمم عليك باالهنا و البراكة
منال : امين...
جبد باباه تلفون و عيطلو قالو ايا ارواح
قلبي بقا يخبط فووور حسيت روحي حابة نهرب هذا وين حسيت بهانية...
طبطب فتحولو الباب كنت قاعدة شفتو كي دخل غزر فيا و انا نغزر فيه... كان لابس حطة كان بزااف شبااب... و مام هو بقا يغزر فيا حتى حشمني حبطت عينيا للارض...
لبسلي الخاتم و بدات خالتي تزغرت كي السردوك صرعتني...
خرجت يماه مع باباه للباب و خالتي مع ماني تبعوهم و مدولهم ڨاطو وردولهم نص تع لا بياس مونتي...
انا بقيت فصالون شفت د. عبد الوهاب وقف عند راسي وقفني و باسني في جبهتي قالي : راكي شابة بزاف قلبي حسيتو ماولاش يخبط كي شفتك...
منال :*حشمانة* حتى نتا راك شباب
وش راني نهدددر
وليت حمرة
د. عبد الوهاب : ههههه والله نحبك يا منال...
خرج... وخلاني قاعدة فصالون.... كي راحو خملنا الحالة... نحيت ماكياج... لبست بيجامتي و تكسلت فبلاصتي... شفت تلفوني يصوني رفتو لقيتها هانية... رفدت وحكيتلها وش صرا صدعتلي وذنيا بسوغان تعها.... مام هي حكاتلي كيفاه راهي مع حبيبنا جواد لي راه يشطح بلا محارم سور راه ميت بالسعادة قريب عرسهم ان شاء الله...
كملت معاها ضربتها برقدة صباح كي العدة رحت خدمت فالريسطورون جاز نهار عادي...كي رجعت لدار... كنت ميتة بالعيا دوشت... وجيت حانرقد بعثلي د. عبد الوهاب ميساج قالي فيه : منال ليوم علابالي راكي خدامة و تعياي ماحبيتش نعطلك حبيت نقلك برك بلي راني نخمم غير فيك نحبك بون نوي
منال : بون نوي...
بعد ثانيتين
منال : انا تان نحبك
....
دعبد الوهاب : ههههه....
...يتبع
..................€.........€............€...........................
سمحولي على الروطار خياتي مي كيما قتلكم رمضان مانقدرش ڨع فيه نكتب براحتي... وقتي ضيق فيه مي كيما راكم تشوفو مانسيتكمش ونحطلكم فأقرب وقت ان شاء الله ماتنساوش تدعو لخويا راه مريض و ان شاء الله يعجبكم البارت... ماتنساوش فوط و كومونت سلام ^^
part 26 ^^
Start from the beginning
