منال : وتفاهمتو على لادات؟
هانية : وي على شهر
منال : اوووو بلخف؟ ماشي تسرعتو شوية ؟
هانية: ياختي لوكتاه نسنا و واش راني نسنا بش مانتزوجش بيه فاقرب وقت هذو هوما الرجال كون نبدا نطول عليه ونسمط يبذلني نورمال و مانلوموش بشكو هو جايني بالحلال و انا نربط فيه معايا في باطل...
حسيتها تهدر عليا...
منال : بصح كيفاش عرفتي بلي راكي واجدة؟
هانية: واجدة لزواج؟ ههههههههه منال ختي مكاش منها واجدة ولا ماشي واجدة نسنا 100 سنة مانوجدش لازم لواحد يقرر و يتصرف مي اذا يسنا روحو يوجد هذي مكاش منها توجدي دراهم للعرس بالاك هههه
منال :*حشمانة* احم.... قالي د. عبد الوهاب اذا تحبي نجي نخطبك من داركم قالي خمي ورديلي....
هانية : هههه قتلك ماشي مسألة توجدي ولا......... وشنووووووووووووووووووووووو!!!!!! ااااه قالك نخطبك... ددد عبد الوهاااب؟
منال : شششش علاه راكي تعيطي بهدلتينااا!!
هانية : تحرشي بياااا منال هذا وين تقوليلي...
منال : صرات لبارح برك...
هانية : منال مانيش مامنة وش رايك نديرو عرسنا كيف كيف جي طوووب
منال : بركاينا من هذ الخرطي... يرحم باباك راني سيريو
هانية : خرطي! علاه ماراحش تقبلي! ؟ نقتلك علابالك
منال : لالا مانيش حانرفض بصح مانيش متأكدة اذا حانقدر نعيش معاه فدار وحدة... ونكونو عايلة مارانيش تع هذ العفايس
هانية : هههه وانا زدت من كرش يما تع هذ لعفايس؟ يرحم باباك بركاينا من هذ السبايب ماقستيهاش ڨع.... منال ختي مانيش حابة نخلعك مي.... كون طولي عليه ينساك وهذي حاجة طبيعية ماتلوميهش عليها... و اذا نساك وين حاتلقاي انسان كيما هو... يڨسر... حنين... شباب... عندو لي فوسات هههه و فوق هذا ڨع استاذك فالطب... يعني يعاونك و يفهمك مليح و مستحيل يحبسك مالخدمة... وش تزيدي فوق هذا ڨع؟
منال : ....ماعندي بابا و لا يما يحضرولي فالخطبة وهو قالي نخطبك من داركم... يجي باش تحاوزو ماني ولا تجوز بيه لوقت خالتي حميدة...
هانية : علاش هو مايعرفش حكايتك... كي صرات ضربة سعاد كان معاك و ياك جا لداركم و شاف مانك ولا راني غالطة؟
منال : ...
هانية،: منال ماتصيبيش سبايب كل الامور راهي تشرلك بش تقبلي اذا رفضتيه اعرفي بلي غلطتي غلطة تندمي عليها حياتك ڨع... سورتو على يمات تسمعيه تزوج و نتيا ماقدرتي تحبي حتى واحد موراه بسكو نتي عقليتك مميزة وقلال لي يعرفولك و لي منهم د. عبد الوهاب هو كي عرفك لي طاح فيك
part 25 ^^
Start from the beginning
