منطوية

part 24 ^^

د. عبد الوهاب :  احم... مسيو دك جي فرملية ديرلك ليزاناليز... بش نعرفو وش عندك...

زعمة غار؟... بدل السوجي حتى مسيو رؤوف و بدا يكوف في روحو حس كاينة حاجة و الاء و يوسف كانو لاتين يتمعشقو بيناتهم مزية ما انتبهوش.. 

جات الفارملية دارتلو ليزاناليز تع الدم و البول حشاكم وداتهم بش يعيروهم فالابو ...

قالنا د. عبد الوهاب ديرو وش تحبو مابيدما تخرج ريزولطا...

كانت الاء مع يوسف واقفين عند التاقة يڨسرو و د. عبد الوهاب متكي على الحيط تع الشومبرا  يهدر فالتلفون...

منال : مسيو رؤوف معليش نسقسيك

رؤوف : اتفضلي

منال : احكيلي عندك كاش اعراض حسية يعني كاشما تحس حاجة توجعك ولا عفسة قلقاتك...

رؤوف : سي كيما راكي تشوفي راني مشيان بزااف و عندي تان مشكل ماعلاباليش اذا عندو علاقة... نرعف بزااف و ديفوا يخرجلي القيح حشاك من نيفي... و وذنيا يصفرو قالولي يسموه طنين الاذن و مايبراش و بعثوني عند بسيكاتر علاجالو قالولي بالاك عندك فصام مي مارحتش بسكو علابالي مانيش مهبول... .. و الدوخة و التعب الدااائم علابيها درت اكسيدون كي سڨت الطونوبيل وحدي... مانقدرش نهدرلك ڨع وش صرالي فحياتي مي هذو اكثر لعفايس لي قلقوني هذ اليامات...

(...الرئتين بانو متضررتين فالراديو...زعمة يكون... ؟)
غزرت فشكارة تع البول تاعو... المرضى لي نشكو عندهم مشكل فالكلاوي ولا مايقدروش ينوضو نديرلهم هذ الشكارة...

  شفت لون تع البول تاعو يولي لونو حمر... ماتقولوليش....

دنيت ليه وبديت نقلبلو فالجسم تاعو...

منال : مسيو عندك كاش طفح جلدي ولا كدمات يجوك وحدهم؟

ماكان فاهم والو د. عبد الوهاب انتبهلي كووپا وجا قالي : وشبيك

منال : دكتور... حوس معايا اذا عندو كاش كدمات و لا طفح جلدي....

مام يوسف وألاء جاو عاونونا ماعندو حتى طفح ولا...

اه راسو فحصتلو راسو لقيت عندو طفح في راسو... مخبي بشعرو...

منال : دكتور بنسبة 80% عندو مرض ويغنر  (الورم الحبيبي)  شوف البول تاعو...و زيد يرعف و طنين... كامل هذو يدونا لهذ المرض سورتو مع الراديو لي شفناه...

كانو كامل مشوكيين... و سي رؤوف مافاهم والو ...

د. عبد الوهاب : اصبري كي تخرج الريزولطا تعو نتأكدو ...و نبداو العلاج ...برافو منال...

رؤوف : ياناس وش عندي

د. عبد الوهاب : ماتتقلقش مسيو اذا عندك هذ المرض نبشرك بلي عندو علاج و تبرا و تولي لاباس بيك خلينا برك نتأكدو بلي هو...