د. عبد الوهاب : منال لحقت الاومبيلونس الدوزيام...
خرجنا لقينا بزااف لي اومبيلونس جاو
ماشي قالي دوزيام برك هذو ڨع....
بداو يحبطو فيهم مانقدرش نوصفلكم مجزرة وخلاص لاول مرة حسيت روحي حابة نتقيا مالڨري فضربة تع التونال شفت حالات كثر ...
كنا نجرو نعاونو د. عبد الوهاب. و د. فؤاد و كامليا و بزاف اطباء كانو يلحقو و يحبطو فالجنود و لحقو طونوبيلات كبار تع العسكر حبطو بداو يحرصو فالسبيطار... ولي فامي تع الجنود بداو تان يلحقو ...
دخلنا للداخل و بدينا نديرولهم اسعافات اولية... د. عبد الوهاب راح مع شوية اطباء يديرو عمليات للحالات الحرجة بسكو كاين بزاف لي تكسرت رقبتهم ولي خذا ضربة فراسو و كاين لي تكسرو و لي دخلولهم حدايد فكرشهم ... و انا بقيت مع د. فؤاد و كامليا....
زادو دخلو الاء و يوسف و بداو يعاونو....
تعبنا بزااف معظم المصابين كانو جنود صغار... مي ماكانوش بزاف ياربي 30 بنادم و لي ماتو بزاف بسكو بومبا قوية هذو بالاك كانو بعاد شوية خدموهالهم فبلاصة عرفو بلي حايكونو فيها غاشي كي تطرطق... ربي يرحمهم ....
كنت نجري من ومن مامدولناش حالات ڨراف كنا نسعفو الحروق الخفيفة و الجروح... الحالات المستعصية لتاو بيهم اطباء مختصين بسكو لازملهم عمليات جراحية مستعجلة... وحنا مزالنا متدربين مازال لحال بش نبداو نحضرو عمليات جراحية... اذا كملنا تخصص جراحة بيان سور...
كان السبيطاار مغلوق بالغاشي مادام السبيطار تعنا هو الكبير ڨع فالعاصمة حنا لي يجو لينا هذ الحالات..
المهم جاز الوقت و د. عبد الوهاب مزال فغرفة العمليات لحقت ال 10 كان السوغان و البكا يلحق من برا بسكو كانو يمدو اسماوات لي ماتوا لعايلاتهم كانو فرزو شوية لي ماتو الله يرحمهم وكاين لي ماتعرفوش عليهم بعثناهم لقسم الطب الشرعي و لابو بش نتعرفو عليهم الحصيلة لحقت حتى ل 200 وزيادة تع الموتى...
.
.....
يوسف : منال ليوم جيتي روطار
منال : وي تعطلت شوية فالدار
الاء : انا مع السيركيلاصيون قلت مانلحقش مي حمد لله كوپا پاپا من وحد طريق لحقت فالوقت سواسوة
(مزالها تهدر بزااف )
يوسف : ممم مزية حتى انا وصلت فالوقت مي غير وصلنا عيطولنا رحنا للكازيرنة هذيك
الاء : شحال خفت كي وصلنا تما قلت دك يطرطقو علينا بومبة وحدوخرا
منال : بصح شكون لي دار البومبة؟
يوسف : مازال مابانش شكون ماقالو والو
الاء: بالاك حكموه و لا مات معاهم هو تان يعني طرطق روحو
part 23 ^^
Mulai dari awal
