منطوية

part 23 ^^

خرجت نجري ....لحقت 8:15 روطار بربع ساعة جريت لشومبرا لقيتها فارغة لبست طابيلتي و جيت خارجة نجري حتى يحكمني د. عبد الوهاب عند الباب  و ردني ليه قالي :  وين كنتي يالالة *يتبسم*

منال: ماني كانت مريضة شوية...

نحَّا يدو وراح يمشي.... : ممم ربي يجيبلها الشفا اذا ماريحتش قوليلي نجي نشوفها

منال : راهي مليحة ...

خرجنا من تما وقلبي كان يخبط راه يتصرف معايا بطريقة غريبة شوية ولا انا راني نتحسس فوق اللازم؟

د. عبد الوهاب : تبعيني!

رحنا لقسم الاستعجالات كانت لحالة تصفر

منال : وين راهم ؟

د. عبد الوهاب : بقينا غير انا وياك و شوية فراملة لهنا... لباقي راحو عال8 لبلاصة لي صرات فيها ...

منال : وش صرا ؟

د. عبد الوهاب : طرطقو بومبا داخل كازيرنة تع العسكر كانت معمرة بليزاپلي ماتو كثر من 100 واحد فحصيلة اولية و لي سلكو راهم فحالة جروح وحروق متفاوتة الخطورة... يعني دك لازم انا وياك نوجدو الحالة بش كي يلحقو نبداو نسلكو الناس كل ثانية تع تأخر تتحسب موت روح بين يديك...

الله اكبر ربي يرحمهم... بصح علاش راه يخلع فيااااا

منال : اوكي...

بديت نوجد لبناك لي كانو تما فرغنا قسم الاستعجالات وبدينا نبعثوهم للاقسام لخرين و لي كانو يجو بعثناهم لسبيطارات لي قدامنا الا الحالات لي ڨراف بزااف...

سڨمت كلش مع لفراملة و دكتور عبد الوهاب.. مافهمتش علاش ماراحش بسكو يسحقوه تما بزااف..

كملنا خرجنا برا وقفنا نسناوهم بسكو عيطلنا د. فؤاد قالنا قريب يلحقو...

كان دعبد الوهاب ساكت غزرت فيه بسكو ماشي من عوايدو ...غزر فيا وقالي :منال نسحقك قوية ياك ؟

منال : اوكي...

لحقت الاومبيلونس الاولى حبط منها د فؤاد حبّط 2 جرحى واحد ڨراف محروق ڨع حاجة ماتبان فيه اذا عاش نقدرو نحسبوها معجزة

والدوزيام كانت عندو حروق على مستوى اليد و الرجلين و شوية فالرقبة حبطناهم و مدلنا د. فؤاد حالتهم طلعنا الاول لقسم الحروق بسكو حالتو خطيرة راه كوما

و الدوزيام كان فاطن مي كان يعيط درنالو تشكا تع التخدير ...و بدينا نعقمولو فالجروح تاوعو ونحينالو حوايجو لي لصقو فاللحم... درنالو دوا و ضمدناه و خليناه للفراملة يستكلفو بيه كان د. عبد الوهاب يهدر فالتلفون و يمدلي فلي زورد....