#عيناك_واللحن_القديم

ثاني

#عيناك_واللحن_القديم
بقلمي :فردوس عبد اللطيف
الثاني
وإن جاءكم الليل يسأل عني قولوا له أنهكه التمني، رحل أبي فرحلت روحي عني، وفقدت جزءاً مني. لا تفارق تفكيري
شجاع : يايمه لحكيني ابوي راح انكسر ظهري يابوي ليش عفتنا مو بعدنا محتاجيك عفتهم بركبتي امي واخوتي يابوي اشلون راح اكدر احقق حلمك ؟
اشلون راح اصير ضابط وانت عفتني نص الطريق ؟
فريال ام صفاء : ولك شجاع امك تخربطت بسرعه دا تنزف خلي ناخذهه للمستشفى
شجاع : صعدنا امي بسياره عمي محمود وطلعنا كبل على مستشفى الراهبات دخلوها كبل بغرفة العمليات
ام صفاء : يمه شجاع الحمد لله على سلامه الوالده جانت حامل ووكع الطفل من صدمتها ماتحملت انت روح للبيت خليني الليله يمها ابات روح للبيت حضرو للفاتحه ودفنت ابوك ميصير تعوفهم وتبقى هنا انت الجبير واخوتك صغار ميعرفون يتصرفون روح اوكف ويه عمك
شجاع : خالتي ابوي راح وما بقالي بهالدنيا غير امي اخاف اروح وتعوفنا وتموت
ام صفاء : لا ابني فال الله ولا فالك روح للبيت وخلي عمك يدزلي ملابس تبهذلت بهذه هدومي
شجاع : طلعت من المستشفى بدون حتى ما اشوف امي رحت طول الطريق تايه ما اعرف دربي امشي وعقلي بغير مكان يعني معقوله بيتنا الي جان مملي ضحكات ابوي وامي
يصير وحشه وحزين اخ يابوي استعجلت الرحيل بعدك شباب معقوله تروح والي قتلوك يمشون بالشارع ويرجعون لبيوتهم ويتلوكوهم اطفالهم وينامون بفراشهم وضميرهم مرتاح ... وصلت للبيت لكيت الشارع متروس زلم جايين من العشيره وناس اعرفهم وناس ما اعرفهم بس رؤس تارسين الشارع ولد يحضرون للفاتحه ودا يتناقشون
بعدين عمي محمود حسم الموضوع وكال الفاتحه بيت جدي
قفلنا بيتنا ورحنا لبيت جدي الكل حزين والكل تبجي
باوعت بالزويه اوووف الماس مدنكه ومغطيه راسها وتبجي بحركه كلب مقهوره على ابوي لان جان يحبها ويداريها
بجيها ذكرني بمصيبتي
اني اكثر واحد الي حاتوكع عليه المسؤليه صح وجود عمي خلال الفاتحه هو الجبير وهو الي يتصرف ويتخذ القرارات
*********
طلعت امي من المستشفى ومرت عمي كانت مزعوجه لان الفاتحه صارت بيتهم والهوسه نسوان واطفال والدنيا شتاءوالفرش انداست نسوان واطفال
امي طول فتره الفاتحه مريضة ومن الصدمه بس ساكته
اصعب شي هو الموت المفاجئ يمكن اذا مريض تتوقعه يموت بأي لحظه واذا رجال جبير هم تتوقعه يموت باي وقت  لكن ابوي بعده لا مريض ولا عمره جبير
صدمة الموت تركت اثر على امي جسمها ضعف حزينه على طول متكدر تشتغل بالبيت
ام صفاء : خيه هذا قدر رب العالمين انت لازم ترضين بأمر الله وقدره
مريم : ياخيه لو بأيدي اكوم واشتغل بس مابي ماعرف شصار بي جسمي نحل ما اكدر والطبيب يكول عندج فقر دم من النزيف والطروح
خيه ام صفاء اريد تعوفين الماس عندي هالفتره اريدهه تساعدني بشغل البيت
ام صفاء : خيه هي فاهيه بس ادزهه الج هم تخدمج شنو لعد شغلها غير تخدمنا اشو خلفوها وتخلوا عنها وبلونا بيها بلوه
انوب ولا وحده من عدنا خلفت بنيه خلفتنا ولد وهاي بيناتهم تفتر مبتلين بيها انوب عمها يحبها يموت عليها
مريم : صدك ابتلينا بيها بلوه انوب هذا شجاع ميقبل نجيب سيرتها ويريد يخلي راسها براس اخوته هسه خلي نربي ولدنا بعد نحتار بزر غيرنا
فريال : اي خيه والله ياخذ اللكمه من صفاوي ويحطها بحلكها عمها محمود مدللهه دلال وصفاء يغار منها يكول هي مو بتنا شنو جايه عايشه ويانه وابوي يشتريلهه
مريم : انوب امها اشلون كلب دارت وجها وراحت تزوجت ماصدكت تخلص من مسوؤليتها
فريال : انت كربي عليها اني معتمده عليها بشغل البيت
**********
شجاع : وليد شتسوي هنا بالمطبخ شو مكابل البيت اليوم
وليد : اوووو صار محقق براسي جيت اشرب ماي
شجاع : وشعندك صافن على بت عمك الماس امانه عدنا ولازم تحترم وجودهه بالبيت
وليد : اشو انت بس تريد تتهمني شنو قصدك تريدني اطلع من البيت واهج علمود الخاتون عمي طالع رايح يم اصدقائي وخليها بس الك
شجاع : تعال قبل ما تطلع درست دروسك لو بس وكتك لاصدقائك اشو انت فلتت عبالك محد يحاسبك بعد وفاة ابوي اني اخوك الجبير
وليد : اخوي على راسي بس كافي تحسسني اني اباوع على بت العم هي طفله جميله كانها لعابه يعجبني اباوع عليها لو بس انت الك الصلاحيات
شجاع : اخوي العزيز اني مسؤل على الماس والي يمس شعره من راسهه اقتله لو اعرف انعدم
وليد : صار بيها قتل واعدام اني طالع
مريم : يمه شجاع دا تشوفني مريضة وتعبانه عوفه اخوك لا تلح وياه هي هم بت عمه مثل ما انت ابن عمها ومن حقه يسولف وياها مثل اختكم هي مو انت تدرسها وتجيبلهه نساتل وحلويات وتوصيني عليها
شجاع : يمه وليد نظراته مو مريحه ما مرتاحلهه وانت تعرفين شكد عزيزه عندي الماس وما اقبل احد يأذيها
واني اعرف انت ومرت عمي ماتحبوهه بس مخليهه للخدمه كل وحده منكم تريدهه تخدمها بدون ماتفكرون انها انسانه وبشر وعدهه احساس ومشاعر ومحتاجه كلمه طيبه وحنان منكم لانها انحرمت من حنان الام وعطف الاب ولوما عمي محمود ملتزمهه جان البنيه ضاعت بالرجلين
مريم : يمه اخوك ماوصيك عليه انت جبيرهم من بعد ابوك
شجاع : يمه اخوي بعيني بس ما اسمح لاحد يأذي الماس
مريم : شدعوه عليك
********
شجاع : تعالي الماس خلي ادرسج
الماس : ماريد اشغلك عن دراستك انت وراك بكلوريا
شجاع : ميخالف مو انت ملتهيه مابين شغل البيت هنا وترحين لبيت عمي هم تشتغلين وين يبقى عندج وقت
الماس : اني مرتبه وقتي وراح احضرلك اسئلة المواد الي مفاهمتها اجمعهن وانت اشرحلياهم
شجاع : تدللين
******
بعد مرور سته اشهر
شجاع : يمه اعرف ظروفنا الماديه تغيرت خلي اعوف الدراسه واشتغل شدكولين
مريم :لا يمه لا انت ابقى بمدرستك
شجاع : زين لعد راح اشتغل العصر اتفقت ويه ابو المولده جبار استلم شفت من ال ٤العصرلحد ١١بالليل واخذ كتبي وياي وادرس هناك
مريم : اخاف ماتلحك تدرس وترسب
شجاع : واذا رسبت اعيد السنه
داومت يم جبار ينطيني راتب بسيط بس على كد مصرف جكاير واجيب للبيت يوميه صمون وبيض وطماطه وبطاطا
صحيح عمي محمود ماقصر ويانه لكن صعب علي امد ايدي لعمي واني رجل واكدر اخذ من وقتي واشتغل
*******
كالمعتاد رجعت للبيت ب ١١وربع وصعدت لغرفتي ادرس
الساعه ب ١٢ ليلا
اندك باب غرفتي (منو )
الماس :اني
شجاع : تفضلي هاي بعدج كاعده ليش منايمه
الماس :جبتلك شاي
شجاع : هاي اشبيها ايدج  ؟ ليش حمره
الماس :ها لا هيج وكع علي ماي حار
شجاع :هذا صفاء الكلب مو كولي ؟
الماس :عفيه شجاع لاتحجي وياه ترى عمتي فريال تموتني ضرب اذا عرفت كايلتلك الله يخليك لا تسويلي مشاكل وياهم
شجاع : الحقير الكلب اني اله  .... الا اندمه شنو انت لعبه بأيده
       دا يضربج اعرف بي نذل
الماس :عفيه شجاع لا تحجي وياه ولا دكولهم انت تعرف ترى يأذوني
شجاع : زين لعد ديري بالج على نفسج ولا تطلعين بره واي شي يصير كوليلي
الماس : انت اكعد اقرى ولا تفكر بشي واريدك تنجح
شجاع : شعرها نازل على عيونها وبدت تكبر يوم وره يوم تغيرت ملامحها راحت لغرفتها وبقيت افكر بيها اشلون اخلصها من ايد صفاء
********
مريم :ها يمه بشر شطلعت ؟
شجاع :راسب يمه
مريم : شفت التهيت بالشغل وهاي تاليتهه ربي يعوضك وتنجح السنه الجايه
ومرت السنه الي بعدهه وهم رسبت وكملت بالسنه الثالثة
ونجحت ووصلت مرحله الرابع والخامس ادبي
وكل سنه تمر من عمري حبي لالماس يكبر وياها وبدت تحلى واتمنى يجي اليوم الي اكدر احجي وياها واكولهه الي بكلبي بس اخاف تخجلني لو تنصدم لان الكل طمعان باستغلالها الي طمعان يخليها تحبه وتسمحله يبوسهه اخاف حسبالهه اني مثلهم عندي غايه باستغلالهه خلي اصبر وانتظر الوقت المناسب
الله يكون بعونج الماس جم ليله دمعتج على خدج وانت تنامين وحيده والام والاب تخلو عنج وملتهين بحياتهم الي التهو بيها
*************
شجاع :  يوم اروح اسلم على عمي محمود رايح للعمره تردين شي ؟
مريم : جيب وياك صمون مو تنسى
شجاع : لا ما انسى
اشلونك عمي تروح وترجع بالسلامه توصيني شي ؟
محمود : اوصيك بأمك واخوتك وخالتك فريال مرعليهه خاف تحتاج شي ولو صفاء بعمرك بس عقله مو مثلك كوله بسبب امه دللته وخربته بدلالهه ماوصيك الماس امانه تدير بالك عليهم وانت مر كل يوم
شجاع :صار عمي امرلهم واعتبرني اقوم بكل واجبات البيت
******
شجاع :وره ماسافر عمي اتردد على بيت جدي يوميه اشوف طلباتهم وبنفس الوقت اشوف الماس ومرات بالعطل اخذهه لبيتنا عالاقل عيني عليها
******
شجاع : كنت رايح لبيت عمي مثل يوميه واسمع صياح
هذا صوت الماس اشبيها
الماس :اخ يابه عوفني صفاء ولك عوفني
شجاع :دخلت للبيت واشوف صفاء لازمهه من شعرها ويضرب بيها
فريال :اي عفيه صفاء ادبها واكسر خشمها  هالبنت الشوارع  وهو يضرب والماس لاحول ولا قوه
شجاع :من غير شعور ضربته بوكس ونيمته عالارض واضرب بي واباوع على الماس واشوفها كاعده عالارض وترجف وتبجي وهدومها ملخه وشعرهه مكفش
ولك شسويت بيها حقير فقدت اعصابي وكعدت على صدره واضربه بوكسات موته ضرب لان منظرها استفزني
عفته ورحت عليها كاعده عالارض ودموعها على خدها وتون (اخ يابه وينك يابه ليش عفتني )
شجاع : هش لا تحجين اني يمج
فريال : انكسرت ايدك كلب حقير اني اعلمك خلي يجي عمك من العمره والا احجيله شسويت بابني نذل علمود هالساقطه تضرب ابن عمك كافي كافي
شجاع : انتو كافي ظلم  احسبيها بنتج ليش تاذوهه مو كدامي دايضربها ويأذيها انتو هوايه ظلمتوهه
وكعت واغمى عليها
الماس اكعدي سمعتها تون
لا عفيه صفاء لا تنزعني هدومي حرام عليك وخر عني اني اختك عوفني
شجاع :شنو انت شتحجين ؟ وهي فاقده وتهذي
حملتها واخذتها للغرفه خليتها عالسرير
ورجعت على صفاء
وضربته راشدي ولك انت شمسويلهه رجع هو ضربني
صفاء :لاتصير شريف براسي
شجاع : من جوابه افتهمت ضربته ورجع ضربني اخر شي
طكت فيوزاتي وضربته ضربه وكعته بالارض طلع من خشمه دم
بعد الماس ماتبقى دقيقة يمكم ... كومي الماس كعدي كومي امشي وياي لبيتنا
اخذتها واجرت تكسي ورحنا لبيتنا
دخلنا للبيت والماس تصرخ اخ يابه وينك وهذه كلماتها تكطع كلبي
مريم : ولكم هاي شكو اشبيها الماس
شجاع : هذا صفاء الجلب ضاربها ومأذيها
مريم : مسكتها من ايدهه كومي يمه كومي امشي اغسلج
من كامت شفت اثار دم بملابسها تخبلت
شجاع : ولج الماس شنو هذا الدم
هي وكعت بالارض من خوفها وتبجي
مريم : هاي اشبيك اخترعت لا تخاف هذا دم الدوره اشبيك
شجاع : برد كلبي وحسيت شي بداخلي ارتاح واطمنت عليها يم امي اخذتها وعاملتها بحنيه
حتى هي مجانت تعرف شنو الدوره الشهريه
من يومها عرفت الماس كبرت وصارت مراهقه واكدر اصارحها بحبي الهه لكن قبل هذا كوله لازم ادور على اهلها امها وين ابوها وين ذولي الي خلفوها معقوله نسوهه نسوا عدهم بنت عايشه ويه ظلام وحوش بدون رحمه
للحكايه بقيه
*******بقلمي فردوس عبد اللطيف *******