#عيناك_واللحن_القديم

اول

#عيناك_واللحن_القديم
بقلمي فردوس عبد اللطيف
اول (حقيقية )
لِعَينَيكِ ما يَلقى الفُؤادُ وَما لَقي *** وَلِلحُبِّ مالَم يَبقَ مِنّي وَما بَقي وَما كُنتُ مِمَّن يَدخُلُ العِشقُ قَلبَهُ *** وَلَكِنَّ مَن يُبصِر جُفونَكِ يَعشَقِ ......

كعدت الصبح مثل كل يوم ...لكن اليوم مختلف اسمع هوسه والكل مخبوص ويباركون لعمي مهند مبررروك على ماجاك بنيه مثل فص الالماس عيونها زرك وشعرهه اصفر بيضا ثلج
مهند : الله يبارك بيج ام شجاع
مريم ام شجاع : شحاتسميها ؟
مهند : انت كلتي الاسم (الماس )
مريم : الف مبروك ربي يجعلها من الذريه الصالحه ويبارك بيها
مهند : الله يبارك بيج
شجاع : يمه اريد اشوفهه
مريم : تعال شوفهه محرومين من الاخت والماس حاتصير احلى بنية بالعائلة
دخلت لغرفة مرت عمي وشفت ملاك او قمر مضئ من اول لحظه دخلت لقلبي بوقتها عمري سبع سنوات بس العائلة مابيها بنيه فرحت بيها عيونها واسعه ولونها ازرق
شجاع : ماما خليها بحضني اريد اشيلهه
مريم : يمه اخاف ماتعرف اشلون يشيلون الطفل وتتاذى بعدهه زغيره
شجاع : يمه عفيه خليها بالملحف وانطينياها
مريم :ههههه عباله لعابه لاتبوسهه الا من راسها توهه جايه للدنيا اخاف تلكط امراض
شجاع : خليتها بحضني وحضنتها وبستها من راسها اخذت كلبي من ذيج اللحظه صحيح اني طفل وهي طفله بالكماط لكن مشاعر مختلفة مو الحب الي نتكلم عنه بين عاشقين لا
الماس دخلت لقلبي من اول لحظه جتي بيها للدنيا
*******
عايشين بيت جدي ابوي الصغير وعمامي اثنين ثلاث اخوان بيت الجد وعمتي جمعنا بيت واحد
عمي محمود / الكبير ابو صفاء عنده ولد واحد  ومدلل
عمي مهند   / الوسطاني ابو الماس
وابوي اسعد / اصغر اخوته
عمتي / جنان عايشه ويانه بالبيت مامتزوجه
والدي ضابط بالدوله وكل كم سنه ياخذ رتبه ويترفع منصبه
حياتنا بيت جدي حياة بسيطه عايشين على حب الله ماكو بينا تفرقة نلعب سوى ونتعارك ومجان اكو بينا حقد كل الي بكلوبنا ننسى من نروح ننام ونتحلم نكبر ويصير براسنا خير
اني الكبير واخوتي وليد ولؤي اصغر مني
والدي سماني شجاع : لان كال اريدك تصير ضابط مثلي وتصير شجاع وتحمي الوطن حلمت البس النجمات واصير ضابط مثل ابوي ويكون عندي سايق وجنود تحت ايدي
حتى الالعاب الي كنت اشتريهه جنود وارتب ارض المعركه وساحة القتال
والالعاب الالكترونيه كذلك كنت العب قتال وافرح من انتصر بالمعركه وكأني بساحه قتال
شجاع : مواليد ١٩٨٥ ابيض عيوني خضر
طولي ١٨٥ جسمي معضل
ربينا بيت جدي وكل يوم اول ما اكعد الصبح اروح يم الماس واملي عيني بجمالها واشوفها تكبر يوم وره يوم المشكله امها امل مهمله بس تحب تنام
من تكعد الصبح اسمعها تبجي لانها جوعانه واكيد حفاظتها ناكعه وامها بس نايمه ولا تهتملهه
شجاع : يوم الطفله تبجي روحي لغرفة خالتي  امل جيبيها خطيه
مريم : يمه ميصير ادخل عليها وهي نايمه
شجاع : يوم خطيه دا تبجي اسمع بجيها وكلبي مينطيني اسمع صوتها
مريم : ماما ميصير ندخل عليهه للغرفه
**********
مهند : هاي بعدج نايمه امل لحد يمته تبقين على هالوسخ اشو الغرفة هوسه والطفله ناكعه حفاظتها مدكوليلي انت شنو دا تسوين من الصبح لحد ما ارجع من الشغل
امل : مو اسهر بالليل ويه بنتك مجاي اشبع نوم اعوضه بالنهار
مهند : الليل كوله انت نايمه كلما افز اشوفج خامده هو انت خايسه خو مو كوه تصيرين ام بيت
امل : اهووو عاد كام يتفلسف والله هذا الموجود اني مدلله بيت اهلي ومامتعوده على شغل البيت
اصلا انت دا تعبني بطلباتك
اليوم الثاني
مهند : ولج امل كومي كعدي وين قميصي الجوزي مو كتلج غسلي واكوي اريد البسه
امل : نسيت اغسله بعد لاتشتري قمصان اشتري تيشيرتات متحتاج ضرب اوتي واني ملتهيه ببنتك محتاره بيها لو احير بملابسك
مهند : ولج لا لكمتي مثل الناس لا هدومي مثل العالم وغرفتنا كلما اجي هوسه ومزعبله وريحه الحفاظات بالغرفه مدكوليلي ليش تزوجتي ؟ مو لعبتي نفسي من البيت حتى مايعجبني ارجع واشوف الخيسه
امل : انت ساعدني الزم بنتك واني اشتغل
مهند : ولج صدك جذب كاعده تنتظريني ارجع من شغلي تعبان حتى الزملج البنيه وحضرتج تأدين واجباتج
مو ذولي نسوان اخوتي مرتبات ونظيفات اشو بس انت
امل : جهالهم كبار ويساعدوهن
مهند : لج بابا عدهم ولد وحركين ويزعبلون بس هن نظيفات ومرتبات مو مثل حظي وانت بنتج نايمه بالكماط
شوفي ولج راح انطيج فرصه لخاطر الماس اذا ماتعدلين من تصرفاتج الا اطلكج ولاتلوميني
امل : اوووي واذا طلكت اروح لبيت اهلي اشبع نوم وانت احتار ببنتك
مهند :الله واكبر عليج وعلى كلبج حتى بنتج تردين تذبيها
*********
شجاع : بقوا عمي وزوجتها على هالوضع يوميه عركه ومشاكل وامل نفس وظعها ماتتغير وسخه ومبهذله
اما الماس كنت اباوع عليها يوميه تكبر كدامي وهي مثل الورده المفتحه ضحكاتها كلماتها لما تنطقها اول كلمه كالتهه بابا بعدين صارت تعرف اسمائنا
اني تسميني( تاع )لان صعب تنطق اسمي
********
مهند : امل وينج صبيلي غدا
امل : ماتشوفني ملتهيه اسبح بنتك انت صب لنفسك
مهند : انت تعرفين هذا وقت رجعتي يوميه ارجع بهذا الوكت متوازيه تسبحين بنتج لو متعمده حتى ماتحمين الاكل وتصبيلي غدا
امل : اهووو كام يتفلسف
مهند : ولج كلبه حقيره صارلي سنين واني صابر على خيستج وقذارتج
ترى اني صفيت شغلي وراح اهاجر بعد ما اتحمل العيشه هنا
امل : طلكني وروح
مهند : هذا جوابج وبنتج ؟
امل : انت ابوهه تتحملها اني راح الم هدومي واروح لاهلي وانت حير ببنتك عود اخذهه وياك
مهند : امل انت طالق طالق طالق
امل : هذا الي كدرت عليه ابو المراجل اخذ بنتك واني رايحه لاهلي
*******
شجاع : عمي مهند طلق زوجته لان ماتحمل وظعها واهمالهه اله وكره يبقى وقرر يهاجر بس بنته احتار بيها
محمود : روح خوي سافر وبنتك امانه بركبتي اني عندي ولد واحد وحالهه من حالنا انت شوف مستقبلك ولا يأخرك اي شي لان صفيت شغلك وحضرت جوازك
ميصير تتراجع وبعدين بقائك شراح تسوي لالماس بلكي وره ماتروح تسحبها يمك
مهند : اشكرك اخوي انت اخوي الجبير ومواقفك جبيره مثلك
خلي افكر فد يومين
محمود : اكيد تحتاج وقت تفكر بي تريد ترجع زوجتك اني حاضر اروح على اهلهه وارجعها
تريد تسافر لا تفكر ببنتك اني موجود وراح تكون بنتي وحالها من حال صفاء
مهند : خوي الماس عمرها ست سنوات اخاف تتأذى لا ام ولا اب وبعدين سالفة ارجع امل لا تحجيها اني ماصدكت اخلص منهه خوي لاتذكرني بأيامها الله يحفظك
محمود : طيب اخذ وقتك وفكر واني حاضر وتدلل انت والماس
*********
بعد مرور اسبوع ومهند محتار مابين يسافر ويبدأ رحله جديده بحياته ومابين بنته الماس الي كلما يباوع عليها ينفطر كلبه ويفكر اشلون تعيش بدون ام واب
الماس : بابا انت حاتسافر ؟
مهند : حضنهه ...انت شدكولين باباتي
الماس : سافر بابا واشتغل وجيبلي هدايا والعاب اني ابقى انتظرك لحد ماترجع واوعدك اصير عاقله وما أأذي احد
مهند : والله خايف عليج بنتي بس مضطر اسافر واعوفج وان شاء الله عمج محمود ميقصر
عام ١٩٩٨
غادر مهند وترك قطعه من روحه وفلذه كبده الماس امانه بيد اخوه محمود وزوجته ايمان
ودع الاهل وحبيبته بدموع وألم وحسره عسى ولعل يجد مستقبل افضل بالغربه مثله مثل اي شبابنا الي حلمهم الهجره الى المجهول لبناء مستقبل افضل
الماس : ذات العمر ٦سنوات قضت الليل تبجي لفراق ابوهه وحتى الام تركتهه بدون ماتسأل عنها
شجاع : مسح دموع الماس ...لاتبجين اني يمج راح ادير بالي عليج وما اخلي احد يأذيج
الماس : شجاع عفيه لا تعوفني كلهم عافوني وبقيت وحدي لا ام ولا اب المن اشكي همومي ليش هيج شنو ميحبوني تيتمت واهلي موجودين ليش بس اني وحيده حتى اخ لو اخت ماعندي
شجاع : كافي كطعتي كلبي تعالي اليوم بغرفتنا نامي حتى لا تخافين وخلي نلعب اني وياج
الماس : لا شجاع ميصير اجي يمكن انتو ولد بابا وصاني انام يم عمه جنان  وميقبل العب ويه الولد
شجاع : بس اني ادير بالي عليج وما اسمح لاحد يأذيج
الماس : انت متعرف كلهم يأذوني صفاء ووليد يأذوني من العب وياهم يضربوني ويجروني  من كصيبتي
شجاع : راح اروح اكتلهم
الماس :لا عفيه شجاع هم راح ياذوني من تطلع اني راح ابقى يم عمتي وماخليهم يضربوني
شجاع : دكومي لعد غسلي وجهج وخلي هالعيون الحلوه تبتسم واعتبري ابوج وامج موجودين اشو احنا وين نشوف ابونا مكضيهه بالعسكريه ويجي بالشهر ٧أيام منشبع منه
الماس : امكم موجوده شجاع اني اثنينهم عافوني
شجاع : دروحي يم عمه جنان
**********
اسعد : مريم حضري اموركم اشتريت بيت وراح نتحول الشهر القادم علما اهله يتحولون
مريم : اخيرا اسعد والله الغرفة ضاكت بينا والولد كبرو صح عدهم غرفة بس الواحد مهما كان بيته لوحده غير شكل هم استقلاليه وهم كولشي تكدر ترتب بي لان ملكك
اسعد : شنسوي صارلي سنين اجمع هالجم فلس يالى كدرت اشتري هالبيت وعود اني ضابط جبير ومسوؤل
لك شجاع لازم تصير ضابط انت طولك وشخصيتك تستحق تصير ضابط وتتحمل المسؤليه واني سميتك شجاع لان اعرف حاتكون شجاع والك صولات وجولات
شجاع :صار بابا مثل ماتريد بس عندي طلب يمك
اسعد : كول شجاع
شجاع : خلي الماس تجي تعيش  ويانا بيتنا الجديد
اسعد : ياريت تجي بس اعرف محمود مراح يقبل لان هو تكفل بيها وتعهد امام عمك مهند يكون هو المسؤل عليها وانت تعرف كولش زين شكد هو يحبها ومداريها
شجاع : صح بابا بس صفاء يأذيها من عمي ماكو وانت تعرف امه مدللته ومستغله هالطفله مخليتها خدامه لصفاء وللبيت  روحي ودي فلان شي وكنسي ومسحي والماس بعدهه صغيره شتتحمل تصدك ذاك اليوم شفتها مخليه طبله وتغسل مواعين عالسنك
اسعد : اوعدك شجاع اجيبها يمنا كل شهر بوقت اجازتي وانسيها التعب انت بس شد حيلك وانجح بدروسك
شجاع : صار بابا راح اهتم بدروسي لخاطرك وانجح ان شاء الله واحقق حلمك
**********
شجاع : تحولنا بيتنا الجديد صح المسافة مو بعيده بس هم احتاج وقت اروح لبيت جدي واشوف الماس
كل يوم تكبر وتحلى بالزايد وتعلقي بيها وحبي الهه مختلف
صح هي طفله بس اخذت كلبي
مريم : اوووف لوعندي بنيه مجان تعذبت هيج مدري اخدمكم مدري ارتب اغراضنا والله الواحد لازم يجيب جم بنيه يساعدونه هسه انتو ولد ماعدكم روح التعاون ولك لؤي جم مره كتلك لاتزعبل الملاعيب بالصاله رجلي راحت من الميكانو امشي وادوس وعبالك بسامير
وليد : هذا ماعنده غير يزعبل اني طالع عود سوينا عشا
مريم :وين مولي وليد طلعاتك مو طبيعيه
وليد :ويه اصدقائي وين اروح وشتردين مني ابقى بالبيت انق بكلبج
شجاع : انت مو زغير بس لازم نعرف منو اصدقائك واهلهم منو وبيا صاله تلعبون بلي
وليد :حضرة الضابط بعدك ماصرت ضابط وجاي تحقق ويانا وتريد اجيبلك شجرة العائله لاصدقائي
مريم : ولك يجي ابوك ونفتهم وين تطلع
وليد : اهووو بدت التهديدات
شجاع : يوم اليوم يجون بيت عمو محمود مو صحيح ؟
وليد :اويلي انت مو ميت على عمو محمود انت مشتاق لام عيون الزرك
شجاع : ولي ولك لا اهفك بوكس
*********
مرت الايام والماس تكبر كدامي وتحلى اكثر مع كل  الشغل الي يكلفوهه بي بس هي ترفة ونازكه ومن تجي يمنا ادرسها وهي شاطره بالدراسه وذكيه وتستوعب بسرعه ومرات اروح يمهم ادرسها بس ما تعبني
من يجي ابوي باجازته يجيبها يمنه
شجاع : ادرس بغرفتي وجتي الماس
الماس :عفيه شجاع ليش طلعتوا من يمنا اني اضوج بلياكم
عفيه تعالوا رجعو ليمنه عفيه
شجاع :ياريت تجين يمنا بس عمي محمود ميقبل تعرفين شكد يحبج ومتعلق بيج
الماس : هو لو ما عمو محمود جان صدك عشت بتعاسه بس وجوده بحياتي عوضني غياب بابا وماما
تدري شجاع ماما تزوجت عافتني لحمه طريه وفكرت بنفسها وراحت تزوجت لعد ليش خلفتني مافكرت شنو مصيري
شجاع : هي لازم تتزوج خو ماتبقى جوه الايدين انسيها احنا اهلج لاتفكرين بأمج فكري بمستقبلج بحياتج
الماس : وجودكم انتو هو الي مصبرني
*********
اليوم الاحد بشهر ١٢ سنه ٢٠٠٠
عمري ١٥ سنه واخوي وليد ١١سنه ولؤي ٦سنوات
مريم :ولك شجاع سمعت انفجار وابوك طلع للمنصور
شجاع : يمه صدك جذب مو حياته متهدده ويعرف مستهفينه ليش يطلع رايح اشوف
اخ يابوي انكسر ظهري ولج يمه لحكيني ابوي .....
للحكايه بقيه
******بقلمي فردوس عبد اللطيف ******