انا بقيت احضر قناة الأخبار كتير وكل يوم بشوف الحاصل في التلفزيون وبقيت اعرف مواعيد المظاهرات من التلفزيون لانو بجيبوها مباشرة وبتحمس معاهم حماس لدرجه اني بتمنى اكون في نصهم،وبقيت اقعد براي اكتر شي لانو امتثال رجعت الشغل،وكان طلعته قعدته بقعد مع حبوبه لانو عمتي عواطف تعاملها معي من يوم موقف الكف بقى م زي زمان بقت تختصرني على طول وم بتتكلم معي خالص اي هي م اتكلمت معي ولا عاتبتني لكن ردة فعلها ظااهر في وشها ،وهيا بتها برضو م مقصرة طبعا💔في يوم امتثال م كانت مداومه وانا زهجته من القعدة براي قلت خلاص امشي اقعد معاها في اوضتها مشيت اول من قربته من غرفتها سمعتها بتقول"طالعه والله طالعه هو الموكب متين؟لكن ي جوجو الساعه ي دوب12الوداك بدري كدة شنووو؟اهاا يعني مشيتي تشوفي الوضع،اها لقيتي كيف؟في امن كتير يعني؟طيب لو جيت عربيتي ابركنها وين؟طيب ،نتلاقى في صينيه القندول،لمن اصل بتصل عليك يلا تيك كير،دقيت ليها الباب وفتحتو لقيتها لابسه ،قالت لي شهدون،قولته ليها على وين الليله،قالت لي ضربو لي اسي ناس المستشفى قالو في عمليه مستعجله عايزة امشي،طبعا استغربتهةهي كزبت علي لييه وهي اساسا انا سمعتها ماشه المظاهرة،قلته ليها اهاا طيب،قالت لي كيمو حقي وين؟قولته ليها مع حبوبه تحت ،قالت لي خالتي لقت ليها موضوع بي كيمو دة غايتو يلا ي شهد بايات😻قولته ليها يلااا💜بعد م طلعت بقيت اكل في ظفوري،رجعته اوضتي قعدته وشغلته التلفزيون تحديدا قناة الحدث،فضلته قاعدة وقاعدة قريب الساعه بعدها جابو احداث الموكب وكميه الحشد الكانت هناك و..فجأهه لقيت نفسي غيرته ملابسي ولبسته ولدي وشلته لي قروش وطلعته وم وريت اااااي زول بس طلعته،وقفتهه كداا م عرفته اتجه على وين،جا بتاع ركشه ماشي وقفتو،قال لي ماشه وين،قولته ليهو ماشه العربي،قال لي العربي؟؟العربي بمشوهو بي ركشششهه لكن ي اختي؟قولته ليهو سمح بمشوهو بشنوووو؟؟قال لي الا تلقي ليك امجاد ولا حاجه لو دايرة تركبي عربيه خاصه توصلك ولا دايرة تركبي مواصلات؟قولته ليهو اي شي بس يوصلني العربي،قال لي سمح اركبي،ركبته إتحركنا مشى بي مساافه وصلنا مكان فيهو عربات كتيرة ،وقف قال لي خليك هنا م تنزلي،مشى وجا راجع قال لي يلا ي اخت،نزلته قال لي بتاع الامجاد دة بوصلك مكان م ماشه فتح لي الباب ركبته،عايز يتحرك قولته ليهو هي استنى هاك قروشكم،قال لي لا خليها اصلا المسافه قريبه وانا زاتي كنت جاي هنا،قولته ليهو شكرا،،سواق الامجاد قال لي ماشه وين بالزبط في العربي ي بتي اسي قالو فيهو جوطه عجيبه خلاص،قولته ليهو صينيه القندول،قال لي ماشه لشنو انتي؟قولته ليهو ماشه اجيب لي حجات ،قال لي اهااا سمح ي بتي،قال لي غايتو البلد دي اليومين دي ربنا بس يجيب العواقب سليمه الواحد بطلع ومتكل على الله وم عارف نفسو برجع ولا لا لكن ياخي والله نحن حاكمنا نظام امرو غريب خلاص،يعني انا طالع بقول سلميه وجاي اعزل م شايل غير روحي سبب واحد يخليك تستخدم معي اساليب الضرب بالسلاح مافي،خصوصا انو التظاهر الشلمي دة حق بيكفلو ليهم الدستور،شباب تعب من وضع البلد دي قدامو خيارين ي يعيش وسط البلد ويتحمل كل الضغوطاتودي ويشتغل اي شي بعيد كل البعد عن دراستو،ي اما يلجأ للسمبك ي يموت في نص البحر ي وصل ،ليييه نعاني يااخي ونحن في بلد خيراتها اكتر من سبيبات شعر نسوانا ليييه بس؟حاكمننا كلاب يااخي والله ديل م بشر،هو بتكلم وانا بعاين ليهو ساااي والراجل شغال يردح ويردح لغاايه م فجأهه اللمح ليك كميه من العربات فيها ناس مغطين وشوشهم،وناس لابسين ملابس شرطه مبرقع باللون الكحلي,قال لي ي بتي انا م بقدر امشي قدام انتي انزلي هنا لمن تحصلي التقاطع القدامك دة ياها صينيه القندول بقى يكح ومسح وشو بقطعه وختاها في مناخرو قال لي ديل فاكين بومبان مالي الوطى كلها الله لا بارك فيهم ،انا زاتي وشي وعيوني بقو شطه شطه ،قولته ليهو كم؟قال لي 300جنيه ي بتي،حسبتهم ليهو سرعه واديتو،قال لي الله يكون في عونك ي بتي امشي اشتري حجاتك سرعه واطلعي دة كان لقيتي محل فاتح💔شايله صهيب ولدي وحاضناهو علي وماشه واتلفت وجايه ماشه في نص عربات العساكر ديل والتوب شبه وقع مني ودموعي بقت جاريه عشرة عشرة وبقيت م شايفه قدامي بس سامعه صوت زول بتكلم بالمايكرفون و بقول يلا اتحركو من هنا بسرعه وفجاهه اسمع صوت طااااخ مع الصوت دة لقيت نفسي جاريه،مشيت مساافه وصهيب دة بقى يبكي بصوره خرافيه. انا م عارفه اعمل شنو ولا اقول ي منو وم فاهمه اي شي انا في حته م بعرف فيها اي شي وم كنت عارفه انو الوضع حيكون كدة،وانا ماشه وبترتح وبسكت في ولدي في راجل قال لي ي مرة م تتقي الله؟شافع زي دة جايه بيهو السوق وسط الحاصل دة كبو لييه؟انتو نسوان مطاليق ورجالكم مطاليق منكم لو م مطاليق م بخلوكم تطلعو بشفع زي ديل في اجواء زي دي،اسي الشافع دة كان مات من البومبان دة تقولي ي منو؟قولته ليهو البومبات دة شنو ي عمي،عاين لي مسااافهه طلع حاجه من وشو قال امسكي ختيها في نخرة ولدك نحن الكبار م متحملين خليهو هو ياخي،ونحن واقفين سمعنا اصوات ناس بتقول"حريه سلام وعداله الثورة خيار الشعب"
قال لي شوفي ي بتي لو مشيتي باتجاه الصوت دة تتحملي مسؤليه البحصل ليك الناس دي م بتتفاهم بتقبض من طرف وبتضرب وبتكتل كمان،حاولي على قدر م تقدري تمشي عكس اصوات الهتافات دي فهمتي ،انا زاتي عمك دة اسي خليت شغلي وطالع لاني عندي الازمه وم جايب لي بخاخ يلا ،مشى خلاني واقفه،خليتو يختفي من قدامي طوالي مشيت على اتجاه الناس بتهتف قولته اسي بلقى امتثال هنا ،كانو كتاار شديد دخلته في نصهم وانا شايله ولدي وبتلفت وصهيب دة يبكي وبقيت م قادرة اشيلو وهو تعب خلاص لدرجه انو بقى يتنفس بي خشمو ويصرخ ووشو بقى زي الطماطمهه،في بري قالت لي ي بتي لكن معقوله؟شافع زي دة البخليك تجي بيهو شنو؟طلعت طرحتها وكبت فيها مويه من باقه شايلاها في يدها وادتني ليها قالت لي ختيها في مناخر ولدك ومناخرك و...قبل م تتم كلامها فجأهه اشوف جزؤ جاري وجزؤ بقول م تجرو م تجرو دة بومبان عادي عاينو فوق بس م تخربو الصف ،وبعدها فجأهه اسمع صوت الضرب زاد كأنها قنابل ،بعدها بثانيه بس اشوف حاجه واقعه قدامي ومطلعه دخان،عاينت وراي شوفته ليك ناس مكمكمين وشوشهم نزلو من العربيه وشايلين خراطيش وجاين جارين بإتجاهنا،وجهتي اليمين بتاع عربيه بفك في القنابل دي م عندي طريقه ي إما اجري وانط القنبله الواقعه قدامي دي،ي إما اقيف وانا شايفه الناس دي كلها جاريه،لقيت نفسي جاريه وناطه القنبله ديك وانا بعدها بقيت م شايفه اي شي بس جاريه وسامعه صوت بقول لي الناس ديل وراك م تقيفي اجري،وصوت واحد سوري بقول لي "تعي ادخلي هووون،وتوبي وقع وسامعه واحدة بتقول لي جيبي الولد وقلعتو مني وانا م شايفه شي بقيت اصرخ واقول"ولدي ،في زول شال ولدي ي ناس ولدي واااي،حسيت بمويه بتتكشح في وشي بعدها وشى حسيتو كانو كاشحين فيهو مويه شطه،فتحته عيوني شايفه بت جاريه من قدامي وانا جمبي زير،بقيت اقول كريم ولدي ،ولدي شالو مني ولدي وين م لايقاهو😭😭😭جا واحد قال لي الناس ديل بعتقلو من طرف اسي بجو بالشارع دة والناس كلها قفلت محلاتها ماف زول بدخلك اجري ي بت الناس ها،قولته ليهو انا م لاقيه ولدي في زول شالو مني هنا ايي دة في زول شال ولدي ،قال لي دقيقه م تصرخي صراخك دة بجيب لسنا الهوا ولدك رميتيهو وين انتي؟قولته ليهو انا م رميتو ،في زول شالو مني انا م كنت شايفه شي انا دايرة ولدي، 😭😭قال لي عمرو كم ولدك؟قولته ليهو عمرو سنتين،عايزة امشي على اتجاه الشارع الجيت منو مسكني قال لي انتي مجنونه تمشي للناس ديل
قولته ليهو م تمسكني قولته ليك في زول شال مني ولدي هنا ماشه اشوف ولدي وين قولته ليك فكني وبقيت اجوط واصرخ فيهو حتى في كذا نفر بقو واقفين،جات واحدة مسكتني ولبستني توبي قالت لي عايني لي هنا دة م تتجنني الغلطه غلطتك انتي جايبه معاك شافع صغير موكب لشنوو؟؟الناس دي م بتتفاهم فهمتي بعني لو مشيتي ليهم حيرجموك لمن تكبي الدم دة اسلوبهم ،عشان كدة اهدي بالطريقه دي ولدك م بتلقي اسي تكوني مع الخلعه رميتيهو في مكان،قولته ليها انا م رميتو قولته ليكم انا جاريه في واحدة ق...قبل م اتم كلامي احسها بتجرني وبتدخلني حته كدة ودخلو معانا كل الكانو واقفين،وفجاهه اسمع اصوات القنابل،قولته ليهم واااي ولدي بكون مات ،واااي ولدي حيكونو كتلو لي،قفلت لي خشمي قالت لي بتضيعي نفسك وبتضيعينا اسكتي هسس وبقت تقول حسبي الله حسبي الله فيهم الناس قالت لواحد شنطتي دي فيها ماسكات وباقه خل شيل وادي المعاك ،واخد منهم قال ليهم خليكم هادين صوت واحد حيدخلو لينا هنا حاولو م تتكلمو،وانا ببكي ،البت قالت لي جيتي براك انتي؟قولته ليها اي لكن في واحدة بتبقى لي جات قبليني،قالت لي متواعدة معاها تتلاقو يعني؟قولته ليها لا،قالت لي طيب م عندك تلفون انتي؟قولته ليها م جايباهو معي😭قالت لي دي عوجهي طيب اتصلي على راجلك كلميهو خلي يجيك او اي زول بتعرفيهو،قولته ليها م حافظه رقم انا،قالت لي رقم راجلك م حافظاهو؟بالغتي ،الراجل قال لينا الناس ديل قراب من هنا م سامعنهم بفكو في البومبان كيف تاني يطلعنا الجليل من هنا ،واحد قال ليهو الساعه كم اسي؟قال ليهو 5الا،فضلنا قاعدين وقاعدين وانا كل م ابكي يسكتوني،قولته ليهم خلوني اطلع افتش ولدي خلوهم يمسكوني م بوريهم مكانكم والله،الراجل قال لي نحن خايفين عليك انتي زاتك منهم نحن م غالبانا الطلعه والاعتقال لكن انتو ديل بتتمسكو معانا ،اسي لو دايرة ارح نطلع انا م عندي مشكله،البت قالت ليهو بطل تهور م كدة ي اخوانا انتي حاولي إتزكري رقم راجلك او زول من اهلك يجي عليك بدل م تبكي كدة البكى م بحل مشكله بتلقيهو إن شاءالله ولدك اعصري مخك دة وورينا الرقم واهدي طول م انتي بتبكي كدة م حتقدري تتزكري،بديت اتزكر رقم صهيب لانو قبل فترة كان بتصل علي كتير لما يكون برة بتصل يشوفني عايزة حاجه ولا لا وكذااا،قولته ليها كدة ،طلعت لي تلفونها دخلته الرقم اتصلته الرقم طلع غلط،قولته ليها غلط،قالت لي كدة حاولي اتزكري تااني،سكتته مسااافه بعدها قولته ليها كدة دخلي الرقم دة،دخلتو واتصلت ،بعدها قالت لي م برد،تاني اتصلت برضو م رد،وكررت المكالمات قريب ال20مكالمه ،قالت لي الا كان بعيد او كدة م برد نهائي ولا م برد على ارقام غريبه؟قولته ليها م عارفه والله💔قالت لي اسمك منو انتي ؟قولته ليها شهد،مسكت تلفوها مساافه بعدها نزلتو قالت لي بعد كدة إن شاءالله يرد،قعدت رب ساعه كدة رجعت اتصلت بعد مسااافه فتح الخط قالت لي هاك ردة،قولته الووو،قال لي وعليكم السلام منو معي؟قولته ليهو صهيب اللحقني دي انا شهد كريم اتشال مني ي صهيب وبقيت ابكي😭قال لي شنوو؟م فاهم ،شهد ؟وين انتي؟كيف يعني اتشال منك،قولته ليهو م عارفهه وبقيت ابكي بصوت،البت شالت مني التلفون قالت ليهو الو السلام عليكم،اي معاك نحن في السوق العربي،والله م عارفه نحن زاتنا لقيناها تبكي وحالتها بالبلا ،الليله كان في موكب والسوق العربي كلو محاصر وبفكو بومبان تقيل يعني خطر شديد نحن زاتنا م قادرين نطلع من المكان النحن فيهو،نحن في شارع السيد عبدالرحمن طيب تمام،م بخليها تطلع والله إن شاءالله يتلقي،اعمل حسابك وانت جاي السوق العربي دة كلو خطر،طيب تمام،فصلت قالت لي راجلك قال جاي،انتي م كلمتيهو انك جايه السوق ولا شنووو؟قولته ليهم عليك الله خلوني اطلع ي جماعه الزول الشال ولدي م بكون مشى بعيد شديد خلوني افتشو ولدي اتقلع من يدي وانا م شوفته القلعو😭😭😭مسكتني قالت لي راجلك قال م يخلوك تطلعي افهمي،واحد من الرجال قال لي انتي القلعو منك راجل ولا مرة م شوفتيهو،قولته ليهم انا م شوفته شي انا سمعته صوت زول بقول لي جيبيهو م عرفتو راجل ولا مرة😭😭😭قال لي يعني قلعو منك قلع عديل ربنا بس💔شويه كدة الراجل قال في هدؤ حاصل دقيقه فتح باب المحل براحه طلع راسو يمين في شمال م شاف شي،قال ليهم شكلهم مشو الشارع فاضي وفي ناس ماشه،على طول طلعته وبقيت اسال في الناس واوقفهم واقول ليهم عليك الله م لقيتو ليكم زول شايل شافع صغير لابس فنيله بيضاء ورداء اسود م شوفتوهو،بقيت لافه والبت ماشه معي وتمسك فيني وتقول للناس ولدها رايح عشان كدة لفينا كدة لمن راسي لفه وانا ببكي وبقول ليها ولدي خلاص راح م بلقاهو تاني،قلعو مني من يدي ،وانا في الحاله دي شويه كدة جاتها مكالمه قالت ليهو متاخر شويه؟يعني قريب؟داخل برجولك ولا بعربيه؟لا م بخليها بس انت استعجل لانو الزمن وكدة،طيب نحن جمب صحيفه الرأي العام،شوفته شارع السيد عبدالرحمن؟بتلقاك عمارة تحتها في صيدليه يلا الصحيفه جمب العمارة دي،،فصلت قالت لي راجلك ياهو قريب هنا اسي بجي،بعد 10 دقايق كدة قالت ليهو ايوة طيب تعال نحن قاعدين جمب الصحيفه زاتها انا لابسه طرحه بنفسجيه ارفع يدك لما تصل علشان مرتك دي م بتتفاهم،انا قاعدة وخاته يدي في وشي ودموعي جاريه عشرة عشرة وبقول ليها ولدي،فجأهه عاينت لي وقالت لي الرافع يدو دة راجلك،ولا إشتغلته بيها انا للحظهه حسيت خلاص انو حتى كريم انا فقدتو بقيت م مستوعبه شي وجواي شي واحد كريم ضاع خلاص،كريم م حتلقيهو،كاني دخلته في حاله بتاعه هيستريه،شويه كدة اسمع صوت صهيب وهو بقول لي شهد،شهد قاعد في الارض وبتكلم معي قال لي الجابك السوق العربي شنو انتي ها؟كريم وين الشالو منو،اتكلمي،هزيت ليهو راسي بمعنى م عارفه وانا دموعي جاريه،قال لي بصرخه شهد انا بتكلم معاك ردي الجابك هنا شنو انتي؟قولته ليهو م عارفه انا م عارفه،انا عايزة ولدي،عايزة ولدي صهيب شالو مني من يدي م عارفه الشالو مني منو انا انا عايزة ولدي جيب لي ولدي ي صهيب😭😭😭قومني من الارض بقيت اقول ليهو عايزاهو انا عايزاهو جيب لي ولدي شالو مني م شوفته الشالو منو انا ،بقى يقول لي اهدي قولته ليك اهدي،في راجل قال ليهو م تجوط فيها هي زاتها م مستوعبه حاجه البت مخلوعه وديها حته هديها عشان تقدرو تفتشو برواق م كدة،بقى سايقني اتفكيت منو قولته ليهو م بمشي بخلي ولدي انا اتشال مني هنا اتشال م بقدر امشي لو م لقيتو انا مسكنيي وقال لي ولدك بجيبو ليك تمام وضماني عليهو وبقى سايقني،في واحد قال ليهو م تطلع بجاي الكجر ديل واقفين بعرباتهم ماف طريقه طلعه ضرب و إعتقال من طرف،صهيب م وقف بقى سايقني وماشي وانا بقالع فيهو،وصلنا الشارع الرئيسي شوفناهم واقفين فكاني ومشى عليهم ورفع يديهو فوق ،بوكسي كامل نزل ليهو وهو ماشي عليهم وبقول ليهم اسمعوني دقيقه بس ،وانا شوفتي ليهم وهم جاين عليهو وشايلين خراطيشهم واشكال وشوشهم بقيت اصرخ واقول ليهو صهيييب،صهييييب م تمشي بكتلوك صهيييب جريت عليهو قال لي م تجي خليك مكانك بقيت واقفه في حتتي وبصرخ وهو وصلهم من غير اي تفاهم دخلوهو وسطهم وبقو يضربو فيهو بالخراطيش وبقولو ليهو اقعد وارفع يديك فوق ،اقعد قولنا ليك واحد اداهو بالمسدس في ضهرو وانا هناك م خليت صرخه م صرختها ،بقيت م عارفه اقول صهيب ولا كريم،وصهيب في النص بقول ليهم ولدي ضايع جاي افتشو انا م متظاهر ولا اي شي،وهم بقولو ليهو اسكت وطاخ بضربوهو بعصاياتهم ديلك وبقولو ليهو ولدك بروح في السوق الجابو السوق شنو،وانا في الحاله ديك وقف قدامي دفار بتاع بتاع عساكر لما شفتهم انا هبطته بس ابدا م بطلته صراخ،واحد قال ليهم دي مالها؟نزل بي عصايتو اول م شوفتو جاي علي بقيت اقول ليهو م تقرب مني م تقرب مني صهيييييييييب 😭واحد قال ليهم خلوها ادى العصايه لواحد تاني وجا علي قال لي في شنو ي بت الناس مالك؟قولته ليهو ولدي شالو مني والناس ديلك بضربو في راجلي ،بضربو فيهو الا بالعصى والمسدسات ،مشى عليهم مستعجل لغايه م وصىلهم ودخل في النص بعد مسافه جريت عليهم واحد قال ليهو م تدخل انت ي جنابو دي شغلتنا نحن م شغلتك انت،قال ليهو اسمع الناس ديل ولدهم رايح نحن حنشوف الحاصل شنو بس،واحد قال ليهو يلا اتحرك بيهو من هنا سرعه م نشوفو هنا يلاا ، ساق صهيب منهم على طرف،قال ليهو ولدك عمر كم انت؟قال ليهو سنتين،الدفار جا وقف جمبنا قال لينا اركبو،مسكته في صهيب ،العسكري قال لي م تتخلعي ساي نحن كان خليناكم لناس الجهاز ديل بجيبو اجلكم اركبي،صهيب ركبني وركب ،اتحركنا مسااافه بقو يسألوني الجابني السوق شنو،واتشال كيف وشوفته الزول الشالو ولا لأ وكدة كانو إستجواب عديل،واحد قال لي دة خطف عديل لغايه م وصلنا حته كدة فيها عربات امن كتيرة كانو لابسين حجات في روسينهم وشايلين عصايات وواقفين،نزلنا وصهيب دة من الضرب ماشي منحني وبعرج💔واحد من القاعدين قال ليهو ديل مالهم كمان معتقلين؟قال ليهو لالا ديل عندهم شافع ضايع عمرو سنتين اظن خطفو منها لحظه م كتمت ،قال ليهو دقيقه انت ي جدو مش في شافع لقوهو في عربيه ناس جنجحهه؟قال ليهو اي جابتو واحدة ختتو ليهم ومشت حيرتنا زاتو بكى كدة لمن الله غفر ليهو،صهيب قال ليهو وين شكلو كيف انت شوفتو؟العسكري قال ليهو م عارف بس تقريبا لابس فنيله بيضاء،قولته ليهو ولباس اسود اصفراني صحتو كويسه كدة؟قال لي بس يااهو ،قولته ليهو صهيب دة كريم ياهو زاتو والله ياهو،صهيب قال ليهو ودوهو وين الشافع دة؟قال ليهو قسم السوق العربي هنا،بتاع الدفار قال لينا والله دي عوجهه دي اركبو ،ركبنا وانا ماسكه في قميص صهيب من خوفي منهم،شويه كدة قال لينا دة القسم انزلو،نزلنا وهو مشى دخل قدامنا دخلنا مستعجلين وراهو لقيناهو بقول "ي جنابو في شافع...قبل م يتم كلامو قال لينا انتو اهلو؟ صهيب قال ليهو اي،قال لينا لا حول ولا قوة الا بالله،لييبه الاهمال دة يااخي لييييه؟الشافع دة الليله اليوم دة كان مات كان حيكون بسبب كميه البومبان الاستنشقها الشافع اسي في المستشفى جابو لينا م قادر، يتنفس،صهيب قال ليهو اي مستشفى؟قال ليهو مستشفى...طلعنا جري مشينا دخلنا المستشفى الضابط هو الكان بسال لغايه م وصلنا ليهو لقيناهو نااايم في غرفه كدة في سابع نومه جريت عليهو وشلتو وبقيت ابوس فيهو م مصدقه طبعا ،الضابط قال لينا والله حقو الواحد يقفلكم ياخ معقوله ياخي؟الدكتورة جات قالت لينا قدر ولطف بجد نحن جابو لينا م قادر يتنفس لو اتاخرو شويه م جابوهو وظ ادوهو الأوكسجين كان خلاص،هم بتكلمو وانا كنت معاهو في عالم تاني،صهيب شالو مني قال لي يلا،طلعنا وهو ماشي خطوة خطوة م قادر يتحرك،عايزة اشيلو منو لزاني و قال لي يلا قدامي بس،طلعنا اجر تكسي قال ليهو وصلني برج البركه،التكسي وصلنا البرج نزل وهو شايل كريم جيت احاسب التكسي قال ليهو بنهرة م تشيل منها دخل يدك في جيبي الطلع ليك شيلو،الراجل دخل يدو طلعت ليهو50 صهيب اتحرك،قال ليهو الباقي،م ردة ليهو واصل لغايه م وصل عربيه كدة وقف جمبها فتح بابها رقد كريم معاهو قداك وركب،جيت انا ركبته ورا واتحرك ،مشى بينا بأقصى سرعه عندو وغضبااان وشو م بتفسر،بقيت اقول في نفسي واجعو الضرب الانضربو دة بس يستاهل الكريه اب وش قبيح عجبني ليهو،كان سايق لدرجه انو كان عايز يعمل حادث مع واحد وفجاهه نزل القزاز وبقى يشتم ي حيوان ي زفت م شايف انت الزفت دة و...اتكلم فارغ كداا بعدها وصلنا البيت ضرب بوري شدييييييييد الحرس فتح الباب قال ليهو مليون مرة قلنا ليكم ندق الزفت دة مرة واحدة افتحو ي بجم ودخل باقصى سرعتو،وصلنا قريب للمدخل نزل وشال صهيب وهو لسسهوماشي اعرج ومنحني لغايه م دخلنا،لقيناهم كلهم قاعدين في الهول،اول م شافوهو قالو ليهو صهيب،في شنو،امو قالت ليهو الحاصل شنو عملته حادث ولا شنو دايرة تشيل منو الولد قال ليها خليهو،امتثال قالت لي شهد في شنوو؟م رديت عليها مشيت ورا صهيب،وهو نهائي م وقف مشى غرفتو على طول بي كريم ،دخلته وراهو قولته ليهو اديني ولدي انا ماشه اوضتي انومو، رقدو في سريرو وهو ساكت ،مشيت عليهو عايزة اشيلو صهيب اتلفت ومسك يدي منو وبكل غضب اداني كف...💔
#نتلاقى®
