منطوية

part 17 ^^

الاء: مممممم ذوق شباب!

يوسف : ههههه شوفو هذ الغيورة

الاء : انا!! حشاك جامي نغير...

راني نشوف عصافير الحب يطيرو فوقهم ...مارڨة بلي راهم كيف كيف....

يوسف : هههه لالا ماتغيريش نتي كامل

الاء : مممممم رقع رقع...

يوسف : حقااا فكروني الله يسطركم وصاني د. عبد الوهاب نجيبلو واحد لكتاب ونديهولو...

منال : واش من كتاب ؟

يوسف : تع anatomie général بسكو حايبدا يدير عمليات جراحية تع المخ و كلش راه يقرا على يد جراحيين كبار يسحق شوية كتابات...

منال : اه مليح حسبتلي يدير جراحة الامعاء برك...

يوسف : لالا راه يكمل قرايتو تان باش يزيد حتى يولي بروفيسور ان شاء الله

الاء : حالة يولي استاذ تعنا بروفيسور

منال : ان شاء الله

كون يولي بروفيسور يولي مشغول بزااف نولو مانشوفوهش بزااف....

لحقنا للجاميعة رحنا حوسنا على لي بروف لي قراونا ڨسرنا معاهم فرحو بينا... وزدنا تلاقينا بشوية صحاب يوسف و صحابات الاء قسرو معاهم شوية...

... رحنا للمكتبة لقينا الغاشي بسكو جابو كتابات جدد...

بدينا ندورو مابين الصفوف...ونخيرو كتابات كنت نخير كل حاجة متعلقة بامراض نادرة ...

لمينا بزاف كتابات ريحنا فطابلة وحدة و بدينا نقراو ولي تصيب حاجة تشبه لحالة محمد توريها...

الاء : لازم نصيبولو مرضو ليوم بسكو قالنا د. عبد الوهاب ليوم اخر فرصة كون مانعرفوش مرضو يستكلفو بيه أطباء مختصين...

يوسف :ممم كون نصيبوه باينة حانكسبو استحسان المدير و قادر يمدلنا كاش شهادات...كيشغول نجحنا فالاختبار...

منال: وي لازم نحوسو بيان...

كملنا حوسنا صبنا بزاف امراض نادرة عندها اعراض متشابهة... لازم ندرسوهم مليح المهم ضيقنا مجال البحث و دك بقالنا نحددو واحد من الامراض المقترحة...

شفت الساعة لقيتها 12:15 هذاك هو نروحو نفطرو ونكملو

منال : نروحو نفطرو...

الاء : اه نست كامل لفطور

يوسف : انا جعت مانكذبش هههه

رحنا فطرنا وڨسرنا على الامراض لي رانا شاكين فيهم... كملنا لفطور ولينا للمكتبة

كملنا نقراو