ثار العشگ

البارت 19

البارت 19
#ثار_العشگ
ملاك الصمت

كمال .. باقي اسبوع واسافر وقررت اخذ نيران وياي هم سياحه وهم ترتاح يمي شكم شهر ..
الحقيقه من شفت امي واخواني الصغار وردود فعلهم ع طلاگ نيران قررت اهربهه من بطش لسانهم ..
صح جمال موجود بس هو نفسه ممقتنع بصحة خطوة طلاقهه بس مساندهه لان هو محطوط بنفس موقف لواء فماخذ موقف الحياديه ..

اعرف اختي قويه بس كسرتهه قويه طلاگ وخسارة طفل جانت تنتظرة 6 سنوات بيومين مو سهله فالسفر كان افضل حل حتى ترتاح ..

فيزتلهه فيزة سياحيه لمدة 4 اشهر وكملت باقي اوراقهه والاجراءات وطلبتلهه اجازة شهر بدون راتب وگلت اذا حبت تبقى اكثر نجددلهه الاجازة ..

بهاي الايام بدت نيران تستعيد صحتهه شويه شويه كلت اذا وصلنه لتركيا اوديهه لطبيبه اختصاص حته تجيكهه واتطمن عليهه لان وجهه اصفر وكالت طبيبتهه عدهه فقر دم ..

كل يوم جنت اروح للمكتب عادي وبعدها اسرح بكائنة مشاغبه عنيده اسمهه مرام والگى روحي تلقائيا اقفل مكتبي واصعد سيارتي وبوجهي للجامعه ..

اظل هناك واكف انتظرهه تطلع من محاضرتهه ودائما وليد يوكف وياي ونسولف سوة لو يعزمني ع كهوة او غده واظل وياه مشوار ساعه وارجع للبيت بس مااتقرب منهه من بعيد لبعيد اشوفهه .. مرات تنتبه لوجودي ومرات لا بس ابد ماتجرأت اتقرب واحجي وياهه بعد ذيج المرة ..

اخير شي قبل يومين من سفري قررت اروح واحجي وياهه وجنت خجلان كولش ومامرتب الحجي بداخلي واصلا ماعرف شنو اريد اكوللهه وماعرف اريد منهه بس الي اعرفه انو هي ع طول شاغله تفكيري .. 

بيني وبينهه فرق عمر كولش هواي هي 19 واني 35 يعني 16 سنه من غير الظروف الي ضدنه امهه وخوفك من طبيعتهه الي احتمال تكون تشبه طبيعه امهه وخواتهه وطلاگ اختي من اخوهه لواء ..

كل هالظروف واكفه بوجهي بس شي بداخلي ماكدر اقاومه .. ولا اكدر امنع نفسي عنهه .. مثل مغناطيس وتجذبني الهه ..

شفتهه من بعيد واكفه ويه صديقتهه ..
تقدمت وتقربت لمكان وکفتهه ..
السلام عليكم ..
التفتت مرام عليه لان جانت مطيتني ظهرهه ..
ردت وهي رافعه حاجبهه بأستغراب ..
وعليكم السلام ..
ممكن دقايق من وقتج ست مرام ؟
باوعت لصديقتهه بنظرة وانسحبت صديقتهه بثكل ..
من رخصتكم ..
وراحت ..
تفضل شنو رايد ؟
استفزني اسلوبهه وياي رغم بعيونهه لمعه غريبه غير عن كل المرات ..
مارايد شي بس اجيت اودعج ..
تغيرت نظرتهه وعقدت حواجبهه ..
ليش راح تسافر ؟
بلي ..
وين ؟
لتركيا .. اني اصلا مستقر هناك وصارلي شهرين من اجيت زيارة لاهلي وهسه خلصت اجازتي ..
اهاا .. زين .. توصل بالسلامة ..
عرفتهه راح تظل تحجي بثكل واني کلبي خلصان منهه ..
شوفي يابنت الناس .. اعرف كل الظروف الي تخليني اتقدملج ضدي من فرق العمر بيناتنه لحد طلاق اختي من اخوج .. بس شي بداخلي ديجذبني الج ..