ثار العشگ

البارت 8

البارت 8
#ثار_العشگ
ملاك الصمت

انهجمت علينه الباب من الدگ بحيث مو بس اخواني گاموا يشوفون منو حته احنه النسوان لبسنه شالاتنه وطلعنه من شبابيك المطبخ نباوع منو هذا الي هجم علينه باب البيت من كثر الدگ ..

بس فتح سجاد الباب انهد علينه واحد لابس عسكري من سمعت صوته عرفته لواء ..

جان يتعارك ويه اخواني بصوت عالي ويحجيلهم انو ميصير رأسا توصلون الشغله للمحاكم لازم نتفاهم ونحاول نصلح الي صار ..

جانوا اخواني واحد يباوع بوجه الثاني ميعرفون عن شنو لواء يحجي يمكن بس جمال ربط كلام لواء ويه كلامي وياه قبل شكم يوم ..

جنت واكفه يم الشباك باوعلي جمال بشك ..

اشرلي بأصبعه اجي ..
وگفت بباب المطبخ من بعد مالفيت شالي عدل متقصده استر نفسي وشعري گدام لواء وغرضي اهينه ..

خير .. شرايد جاي وگاعد تتعارك ؟
رافعه عليه قضيه تفريق ؟
اي نعم وكلت محاميه رفعتلي قضيه تفريق .. عنك ..

باوعولي اخواني بصدمه .. امي ضربت ع صدرهه ..
سجاد اخويه .. وليش ماحجيتي ليش ما استشرتينه احنه مواخوانج لو مو بعينج .. ؟؟

انت وينك عني .. صارلي اسبوعين هنا ببيت اهلي ماشفتك اجيت وسألت شلونج شمحتاجه وادري بيك تدري اني هنا وتدري ليش اجيت زعلانه واليوم لوما عزيمه جوان ويزن جان ماشفت وجهك وهالكلام ينطبق عليك انت هم وائل ..

باوعت لجمال بترجي وحجيت ..
جمال اني گتله راح ارفع قضيه تفريق ..

بنظراتي ترجيته ميفشلني ويوگفلي .. اني صح من حجينه بذيج الليله گتله بس مارجعت خبرته من وكلت محاميه وصارت الشغلة صدوك ..

دنگ جمال ورفع عينه عليه يتوعدلي بعيونه بس مافشلني ..
ساندني كدام لواء وكدام اخواني ..
التفت ع سجاد ووائل وگاللهم .. اي اني جنت ادري ..

لواء .. ورضيت بهذا الحجي ؟
صار لواء مقابل جمال وحجه هالكلام .. عدل جمال وگفته وصار ينطق الكلام وجه بوجه ويه لواء وهو يباوع ومركز حيل بعيونه ..
جمال .. اختي واجتني روحهه مفرفحه زوجهه مزوج عليهه من سنتين ومخلف ومستغفلهه شتتوقع شسوي .. اطبطب ع ظهرك من تجيني هاد ليش اختي رافعه قضيه تفريق عليك ؟؟؟

اسألك بالله لو وحده من خواتك هيج مسوي وياهه رجلهه شنو تصرفك وياه ..؟

شويه لواء هدأ وجر بوش من سمع كلام جمال وشاف ردة فعله ..

لواء .. بس الطلاگ مو حل ..
جمال .. ماجاوبتني ع سؤالي ..
عرف لواء قصد جمال وجاوب ..
لواء .. اسويه نصين ..

جمال .. وانت لسه واكف ع طولك ماصرت نصين .. جاينه هاد بملابسك العسكريه تخوفنه خويه .. ترة احنه ماعايلين بيك .. اصحى وارجع حاسب نفسك ..