ثار العشگ

البارت 6

البارت 6
#ثار_العشگ
ملاك الصمت

من عافتني امي نمت بفراشي وعيوني تعلگت بالسگف ماجنت اباوعله بگد ماجنت افكر .. ماعرف ماكو شي محدد افكر بي .. هواي موضوع هجمت ع دماغي دفعه وحده ..
اول هالمواضيع شراح اسوي ويه لواء .. الاكيد مراح ارجعله .. فكرت بالطلاگ كحل لان اني ماستحمل اعيش هيج .. الغيرة تكتل .. نار وتشب بصاحبهه وتحركه وميموت .. يمكن كل طلعه ل لواء من بعد ماصرت اعرف هو متزوج عليه كل طلعه هيج راح يصير احساسي واني ادري بروحي ماتحمل لذلك اختصر ع نفسي طريق العذاب واتطلگ ..

متأكده اخواني راح يوگفولي سجينه خاصرة ويعارضون طلاگي اولهم جمال لان هو ولواء نفس الموقف وهو مصارله سنتين من متزوج ويريد يتزوج ع زوجته وهم عمره عبر التلاثين فميشوف بزواج لواء مشكله ..
اما البقيه يمكن ميدخلون لان كلمن ملتهي بعائلته وكلمن همه شكل ومحتار بهل هموم الي شاغلته ..
اما امي فمن كلامهه عرفت الموضوع عادي عدهه فهم احسبهه ع المعارضين ..

فكرت بمرة خالي رقيه تصير بنت عمه ل لواء وبأختي جوان لساتهه عروسه ..
يمك ذني اكثر ثنين راح يتأذن لو رفعت قضيه تفريق عن لواء ..

شنو الحل .. عيشه ويه لواء بعد مو حل وارد .. مصممه ع الطلاگ اني ..

مر هذا اليوم واني حابسه نفسي بالغرفه ماتغديت ولاتعشيت مو اعاقب نفسي بس ماشتهي العسل مو بعد اكل عادي ..

تلفوني ابد ماسكت ومن يضوجني اغلقه .. كولهه اتصالات من لواء ومن ارفضه يلح لان معناهه اني موجوده يم المبايل فاغلقه ورة ساعه افتحه ومن يرجع يتصل ماانطيه رفض فميلح ..

مادري شيتوقع مني احن واشتاق .. اغفر واسامح ؟؟
ليش شنو الناقصني .. مو صرت حامل ليش ماصبر .. صح توقيت حملي غلط بس هاي هم عقوبه من رب العالمين ل لواء .. يگولون رب العالمين مايطگ بحجار .. طگه بخبر حملي وشوكت من عرفت بي متزوج عليه .. الله ..

بالليل كولش نزلت جوعانه دورت بالثلاجه ماكوغير الجبن والفاكهه ..

فتحت الفرن لگيت مبقيلي اكل .. شكم قطعه صاج حميتهن وطلعتهن وزلاطه وفاكهه وحته الجبن طلعته وخبز ..

حسيت بشهيه مو طبيعيه واكلت بشراهه جنت حيل جوعانه من اهد ريوگ الفجر من سويت الريوك اله قبل لايطلع للدوام اكلت وبعد ماحطيت شي بمعدتي ابد ..

رجعت الاكل الزايد ونظفت المكان وردت ارجع لغرفتي ..
حسيت برغبه بالتقيأ .. ركضت للحاويه وذبيت من راسي ..
كولشي اكلته ذبيته ..
حسيت روحي انسحلت مو بس تقيأت .. حسيت اريد اطلع معدتي همين ..
ماعرف شبيه الاكل معقوله لان سخنته مرة ثانيه والجو حار اتحسست منه معدتي ..
البيت هدوء كولهه نايمه الظاهر ..

رجعت لغرفتي اسحل بروحي .. اباوع بالمرايه وجهي اصفر كركم ..
طلعت غسلت وجهي ورجعت لغرفتي ..
طفيت الضوة وفتحت مبايلي ..
كومه مكالمات من لواء ..