حين يزهر الحجر

الاخير

من اجيت وتطمن ع زبوني حجيتلها المختصر عن وضعي ..
كابلتني وكعدت تبجي..
سلتني وحجت وياي حجايات محتاجها من امي...
بس كالت لا تضغط عليها خليها براحتها مكسورة ومهضومة منك...
كتلها وزيوني شلون اشوفه...

كالت خابرني واشوفكيا بس لا تضغط على مهرة رويحتها ممرودة وتعبانة...
الله يخليها خيمة وسند النا ماكو بحنانها...
الله يحفظها احبها لان خلفتلي كائن من الجلي...
ياا هههههه....

بقاني شجاع عدهم وكال بالليل ارجعلج...
تجمعنا سوالف ووناسة ..اولاد ورد وابن زهرة واولاد عاطف يلعبون..
ثريا اخذت زيوني يمهم وتلعبه وياهم ..
كعدنا نسولف وصبا تحجي عن تماضر وسمها...

تكول عاطف بقى يروح يمها بس مو يوميه..يعني ميبات فوك ..
بس من يصعد وينزل يمي روحه بخشمه ويعارك...
بس اخر مرة كتله رح اروح لاهلي واحجيلهم كلشي اسوف يقبلون بلة..
عصب وطلع بس من رحع اعتذر وكال متطلعين وراضاني..
كلتلها امي انت عاقلة ويحبج وتماضر مكرها يرد عليها...

بعدين كتلها عرفت من شجاع مخابرته لعد ليش كتيلي صبري ورجعي ومانطيتي بي...
كالت يما مانطي بي لان اعرف معدنه ذهب ورجال كفو...
يما باجر احط راسي واتوكل منو الج واخوج براسه ثنين نسولن ودايخ بحياته...
واعرفه اخوج بسرعة يقتنع وادري ببراق رجع يحوم عليج...
واخوك نطا كلمة وكلة اطلكها غيابي من ذول الهمج ..
وهو كله طلكها وعيد عيناك اخذها بت عمي واسترلها من الغريب...

يما لو مخليتج ع مايج وانت منا مقهورة يمكن تغلطين وتخسرين بساعة الاعصاب...
بس الحمدلله هالرجعتي واريدج حوك وتدارين رجلج...
ترى ابن اوادم واحه وداس بيتنا رغم اخوج وجهه ثكيل...
ماكو حياة صافية ولا اكو رجال تمشينه بريموت...

بس صيري سبعة وعرفي تحافظين عليه...
ارجع واكلج الحماج من ابن عمج وانت غريبة عليه...
والخطبج مرات مو مرة وسوا المحد مسوي واخذج هذا لا تفرطي بي...
مدامه هايم بيج وماعنده مكسرات شغلي بيج وصيري سبب سعادته بالدنيا بحسن تبعلج...
وسبب سعادته بالاخرة لان حصنتي من الذنوب...
انشالله يما ادعيلي انت وانشالله اسعده شكد ماكدر....

بالليل اجه عليه شجاع ورجعنا...
يوم ثاني طلعنا وصلنا بيبي فليحة وانوب رحنا زرنا...
شجاع اخذ زيوني ويا هو يزوره...
واني زرت واندعيت ويا الله شنو من شعور حلووو...
بقيت كاعدة اباوع الناس شلون تمشي وتناجي وكانها بعالم مفصول ...
مايهتم لليمه من يدخل ويحجي...
درجه حبهم الي خلتهم يحسون بس هم وحبيبهم بهالعالم خلتني ادمع من الفرح..لان اني تولد عندي هالشعور...

اخذنا شجاع لكل المراقد...
زرنا ورجعنا....
وقرر بالكرسمس نسافر نشوف على يا دولة نستقر بالاختيار...
مرت الاشهر...الحمدلله يوم حلو وصافي ..
يوم زعل وبعده رضا...
بس التعلمته ابد ماناقش شجاع من يتعصب...
ابقى ساكته بس بداخلي اقرا ايات بوجهه وشوي ويسكت...
بس احسه هواي تغير مو نفس اعصابه قبل...
سماح تكلي ادعيلج بكل صلاة لان رجع اخوي لحياته الطبيعية...

مرت مؤيد عمي كال مدامني عايش ماتطب بيتي...
وصدك من وقت المشكلة لهسه ابد مااجت...
ميسون تجي باستمرار وحبابة ماعدها مشاكل...
حياتنا نوعا ما هادئة..
بس اني ورحاب بالبيت...
نخلصها الصبح سوالف ووناسة ووحدة تستفيد من خبرات الثانية...
وصلت شهر السابع وجابت...
صار عدها فطومة...اجت بشهر السابع وبقت فترة بالمستشفى...
بس الحمدلله وضعها طبيعي ومابيها شي....

اني صار عمر زيوني سنة والشهرية ماكو...
بس لاحظت تغييرات بجسمي وكذلك اشتهي اكلات وبالذات الموطا...
شجاع لاحظني كل يوم اخابره من تجي وياك موطا...
كال ولج بس لا حبلتي...
كتله هيج احس ...
راح جابلي كم اختبار واجه...

دخلت اسوي الاختبار وهو شايل زيوني وواكف يمي وينتظر...
يشيل ايد زيوني ويكله ادعي كون دادا...
وهو يضحك ويكول دادا بابا داد ..
شال شجاع الاختبار وصلى على محمد وال محمد...
حضني وباس راسي...
لك الحمد يااارب....
مبروك رويحتي..
اخذني وكال امشي نصلي شكر....

وكف كدامي واني ورا...
نو مسبل ايديه والتربة ع السجادة وبصفها السبحة...
واني السجادة بيها السبحة...
واكفة ومكتفة ايديه ولابسة احرام الصلاة...
متوجهين للقبلة بقلب صادق ونية خالصة ونقية مثل حبنا....
زيوني يفتر من يم ابو يرجعلي...
واحنا نركع ونسجد يصعد فوك ظهرنا...
اخر ركعة باك تربة ابو حطها كدامي...
ووكفت كدامي وسجد عليها....
دنكت وركعت...
وسجدت عليها....

ركعت لربي وسجدتله...
سجدت ع شي طاهر بقلب طاهر...
حبيبي يسبح ويباوعلي بنظرات حلوة..
ابني بحضنه ويسبح ويمسح وجهه بالدعاء...
خلصت صلاة واجه يمي..
واحنا ع السجادة حضني وباس راسي...
وزيوني يباوعلي ويباوعله ويبوسنا....

فرقتنا الظروف ..العقول المنغلقة...النفسيات المريضة...
لكن ارادة الله اقوى من كلشي...
وجمعتنا تحت سقف واحد..بموقع صلاة واحد..
وعلى سجادة وحدة...
طلبنا من ربنا يرضى عنا وينطينا اليرضينا...
ودمتم في رضا الله دوما....

تمت ..الساعة 1:10
الثلاثاء..2018/12/4
اختكم شقراء(قمر كانون)