منطوية

part 10 ^^

كان الغاشي كبييير لي يبكي و لي مجروح ...و لي طايح هذو غير لي خرجوهم مزال لي مزالهم حاصلين الداخل....

لابوليس و الحماية المدنية كانو يسيو يسيطرو على الحالة... بدينا نمدو الاسعافات الأولية للناس لي خرجوهم ...

حمد لله مكاش حالة وفاة لحد الان بصح كاين بزاف مجروحين gravement نقلناهم لسبيطار تمتم و لي عالجناهم سور بلاص زدنا بعثناهم تان لسبيطار باه يديرولهم لي راديو و يتأكدو بلي مكاش ضربات فالراس و لا ...نزيف داخلي..

كنت انا ودكتور فؤاد نخدمو كيف كيف، هو يوريلي واش ندير...

كي كملنا عالجنا لي برا ...بداو الناس لي فطنو يحوسو على عايلاتهم لي مزالهم حاصلين الداخل...

جازو قريب 2H ومزال ماقدروش يفتحوا الطريق باش تدخل الاومبيلونس مع رجال الحماية للداخل يخرجو الجرحى و بلاك حتى الموتى...

كاين احتمال كبير بلي كاينين ناس عندهم نزيف ولا صدمات... ولا كسور... وهاذ le genre من الاصابات لازملهم اسعافات فأقرب وقت وحنا رانا طوّلنا....

زاد الحَس تع الناس لي يحوسو على عايلاتهم كثر بسكو سمعو بالاكسيدون فتليفيزيون جاو يحوسو على العايلات تعهم... و بداو يضاربو مع لابوليس....

انا ماحملتش هذاك الضغط و تقلقت بسكو كان لازم تدخل الحكومة وجيب ماشينات كبار باه يخرجوهم تمتم مي ماكانوش سامعين كامل خلاو تع الحماية حاصلين بامكانيات قليلة ماتكفيش باش يفتحو الطريق مام پا...رفدت كابة تع الإسعافات و جريت للدخلة الصغيرة لي كانو يخرجو منها تع الحماية...

دخلت...الظلمة وزيد ريحة ليصونص تصرع ...تغميت... الله يستر الحالة دونجي قادرة نار صغيرة دير ديڨة هنا....

مادام واحد ماتبعني باين واحد مافاقلي حتى لابوليس كانو يسيو يشدو العايلات لي برا علابيها ماشافونيش... و د. فؤاد راه لاتي مع الجرحى لي مزالهم عندوا...

دخلت مليح لقيت وحد 3 طونوبيلات مكسرين طايح فوقهم الحجر تع ال tunnel ..

*صوت بيبي يبكي*

كان يجي الصوت من واحد الطونوبيل جريت ليها... لقيت مرا تكون فالثلاثينات مجروحة بزاف... وحاكمة البيبي فحجرها .... ماقدرتش نحدد نوع الاصابة تاعها بسكوا le corp ديالها كامل دمومات ...عيطتلها : madame ... Madame !!

ماجاوبتنيش... راهي فحالة صدمة شفت فلي كان يسوق حطيت يدي فرقبتو باه نتفحص النبض...
"إنا لله و انا اليه راجعون"
السيد ميت لازم نزرب نخرج المرا ووليدها منا... بلعقل مسيت كتف المرا ماحبيتش نحركها قتلها : madame اذا راكي حابة تخرجي منا و تولي لحياتك نتي ووليدك لازم تعاونيني...