هانية : ياك ماقالولك والو والديك ؟
منال : نعيش مع ماني...
هانية : *حلت عينيها مالشوك* اه... فهمت
منال : علاش ما قلتيليش بلي د. فؤاد خوك؟
هانية : اه... ههههه بسكو ماسقسيتينيش... ديجا ماحبيتش نقلك خويا باش ماتحشميش كي ترفضيه... مانحبكش تسيفي على روحك...
حاجة باينة مانسيفش على روحي -_#
منال :...
هانية : قالي فؤاد بلي دارلك مشكل مع د. عبد الوهاب...
منال: واش من پروبلام؟
هانية : قالي على الضربة تاع ليزاناليز ....
منال : اه... لالا مادارلي حتى مشكل وهو علاه...كانت باينة بلي ماشي انا درتهم مي كي د. عبد الوهاب غلق راسو ماحبش يفهم...
هانية : هههه وي وياك فريتوها!!
منال : oui, c'est bon
.....وصلنا لدارهم ...عندهم فيلا شابة الله يبارك استقبلتني يماها طاطا (رحيمة) تبان فالخمسينات...
وجها منور باينة عاقلة ورزينة... سلمت عليها ودخلتني للصالون ....
ڨسرت مع هانية ويماها...واحد النص ساعة هكاك على القراية و كيفاش راني مع السبيطار...
.
.
ناضت طاطا رحيمة توجد الطابلة و انا بقيت مع هانية... حتى سمعت الحس فالكولوار و شفت دكتور فؤاد دخل يجري للصالون ويغلق فالباب بالزرب بان واحد يجري موراه...دار شافني وجهو تلون وبان مشوكي سور ما قاتلوش هانية بلي راني جاية...
هانية : واش الزين ؟ سور بابا راه يجري موراك كي العادة...
فؤاد : هههه بعثني نشريلو بطيت مع صحابي جا ليا من تما و هو يضرب فيا بعصاه حتى لهنا...
غزرت فيا هانية وقاتلي : هههه شتيه شحال بهلول ...
فؤاد*شنف* : هانية!!
هانية : ههههه عنداك... خويا شباب و هايل
علابيها دال تقوليلي لصقة...
منال : -_- الله يبارك ...
ناضت هانية فتحت الباب دخل راجل كبير فلاج باين باباها (عمو عبد الكريم ) فؤاد بدا يرجع للور و باباه رافد عصا ويجري موراه غير شافني حشم و قالي : مرحبا بيك بنتي...
منال : الله يسلمك...
عيطتلنا طاطا رحيمة للطابلة تعشينا... تهلات فيا عطاتلي المورصو تاع اللحم لكبير ليا... حسيت حاجة في قلبي تتزير كي شفتهم هكاك يضحكو و يڨسرو...
تمنيت نكون وحدة منهم... تمنيت تكون عندي ماما حنينة كيما طاطا رحيمة...بصح الله غالب...
كي كملنا وصلني فؤاد و هانية جات معانا تان....
فالطونوبيل ...قالي فؤاد : منال ! قالي عبد الوهاب بلي علاجالي صرالك مشكل....
منال : ماصرالي حتى مشكل.... غير ماكلاه تكسر راسك...
فؤاد : لالا... سمحيلي اذا عيط عليك عبد الوهاب علاجالي
منال : ماعيطش عليا...
فؤاد : *تنهد* مزية..
هانية : هههه ماتخافش مزال ماكرهاتكش
فؤاد : هانية تزيدي كلمة نحبطك فالطريق ونروح ونخليك
هانية : اه... هكا تقول لختك لكبيرة زعمة انا لي.. *قاطعها فؤاد*
قاللها : خلاص! اسكتي ماقلت والو خلاص...
هانية : ههههه شفت كيفاش...
هاذ الزوج خاوة ولا مهابل !؟ يهدرو بالالغاز... بصح هانية كبيرة عليه حسبتلي العكس ...الدنيا معمرة بالمفاجات
وليت لدار شكرتهم على العشا... عيطتلي ماني قاتلي راهي بايتة فدار خالتي حميدة ...حتى انا عرفتها...
تكسلت في فراشي و عطيتها برقدة حتى فطنت على صوت الرافاي على ال 6:00 نضت صليت شربت قهوة ووجدت روحي 6:30 ديماريت... وصلت لسبيطار على 7:55 دخلت لشمبرا لبست طابليتي كانت الاء ويوسف تما ...
يوسف : صباح لخير منال..
منال : صباح النور
الاء : واش صافا؟
منال : حمد لله ونتوما صافا؟
يوسف والاء : حمد لله
وحنا نهدو هكا حتى سمعت الدقديق فالباب درت لقيت دكتور عبد الوهاب قالنا : صباح لخييير ...
حنا: صباح النور !!
دعبد الوهاب : كيما العادة صباح عندكم قسم الإستعجالات و عشية تبداو حالات جدد فقسم الحالات المستعصية *يتبسم* ولي يمدلي تشخيص صحيح نكافؤا مليح
يادرا واش يكافئنا هذ لبنادم...
سبقوني الاء و يوسف لبرا وانا كملت خبيت دوزاني فالخزانة ندي غير التلفون فالجيب كنت هكاك نستف فدوزاني داخل الخزانة حتى نسمع دكتور عبد الوهاب قالي : ليوم فرصة باش تبينيلي بلي نتي صح طبيبة شاطرة
خلعني درت ليه نجري طاح وجهي في وجهو سواسوة.. . رجعت نجري للور حتى دخلت فالخزانة و هو غير شافني هكاك حشم ورجع للور قالي : ماتنسايش هذ المرة ماراحش نسكتك....هذ المرة انا لي حانوقف معاك واحد ما يقدر يسكتك...
قلبي راه يخبط وحسيت حاجة سخونة في كرشي وشنو هذ الاحساس؟ بقيت نشوف فيه هكاك بلا ماهدرت والو...تبسملي ومشا للباب... دار ليا غمزلي وخرج... وااشبيه هذا بنادم دوكا!! خطرة مشنف وخطرة يتبهلل... ماقدرتش نفهمو ...
غلقت خزانتي وخرجت لقيتهم بين ثلاثة يسناو فيا عند الباب...
.
.
.
يتبع...
🌹🌹🌹💗💖
part 09 ^^
Start from the beginning
