منال : *شنفت*..قتلك ماطلبتهومش !
د.عبد الوهاب : *خبط يدو فلحيط فور * صاحا وين كنتي دوك ..
منال :......
د.عبد الوهاب : اهدري!!!!
منال : فلابوراطوار ...
د.عبد الوهاب : هيه ...ووعلاش كنتي فلابو ؟
علابالي بلي حاتبانلو هكاك بصح ماشي انا....قتلكم مانعرفش ندافع على نفسي دايمن الضربة تع الاستاذة كي عاقبتني فلپريمار تتعاود ....
منال : ك...باش ...نشوف ليزاناليز ...بصح...
د.عبد الوهاب : بالنسبة ليا راكي مطرودة بصح علاجال لوپيتال مانقدرش نحاوزك تاع الصح ...
راح وخلاني مالقيتش واش نقولو ...ديجا دايمن تصرالي هكا من بكري تخلاص عليا لغالطة جامي فرحت بحاجة دايمن تروحلي قبل ما نفرح بيها...
كملت النهار هذاك بسيف ماشفتش د.عبد الوهاب كامل و جاو داو هيثم للتصوير بالرنين المغناطيسي فهمنا يماه بسكو كانت مشوكيا وخايفة حتى هيثم مالڨري صغير بصح فهم وقالي عندي مرض يقتل بسيف باش قنعناه بلي مجرد فحص روتيني
...
لحقت 4:20 خرجت من تما...وصلت لدار على ال 7 مزية غدوة ويكاند نريح شوية...
دخلت لدار لقيت ماني تتفرج فتليفيزيون غير شفتها مشنفة تفكرت بلي غدوة ماكان لا راحة لا ويكاند غدوة نبدا نخدم....
-----------------------------------------------------------
7:00am
نضت ولبست حوايجي صليت شربت قهوة وخرجت ....
بديت نسقسي على الخدمة فالحوانت...عييت رجليا حفاو وكامل مايسحقوش خدامين...
دخلت واحد الحانوت شوية بعيد على الدار و كبير ...بديت نسقسي فيه
قالي: مكاش خدمة عندي مي عندي صاحبي حل ريسطورون جديد يسحق لي يساربو و يغسلو لماعن وقالي معليش مرا ...تحبي نعيطلو و نقولو عليك ...
منال : اوكي
عيطلو قالو قوللها جي...
مدلي لادراس بعيد لازم نركبلو ...معليش ركبت ورحت ليه...الريسطورون كبير و شباب زعمة يقبلني فيه...دخلت هدرت مع مول الشي ...حمد لله قبل نخدم لي ويكاند ... ولخلاص صافا قيسما نبلعط ماني تسكت شوية ...
بديت سور پلاص نخدم...جاز النهار نورمال فيه النسا كثر من الرجال لي يساربو ...بصح يبانو كبارات عليا ...
صباح نخدم فالكوزينة لماعن وعشية نساربي ويغلق مور لعيشا ...
لحقت لدار فلييييل ....
ماني : واش تبانلي خدمتي
منال : ايه خدمت و غدوة يخلصني تاع ويكاند ...
ماني : مممم مليح خلاص روحي كولي عشاك وارقدي
ههه اه يا وحد المصلاحجية درتيلي لعشا ...
منال : اوكي....
غدوة مينداك كي لعادة رحت و خدمت عادي...
كي لحقت لعشية بديت نساربي كان كلش كالم....
عجبت مول الشي بسكو شافني خاطيني الهربة و الهدرة فالتلفون فوقت الخدمة كيما يديرو لوخرين...شافني سيريو حللني باه نخدم معاه كامل الايام بصح فهمتو بلي راني نقرا طب....
زاد فرح بيا قالي: مدابيا تخدم معانا طبيبة شحال من خطرة يسراو حوادث ...ونحصلو فيهم دوك مانخافش هههه ...
منال : بيان سور ...
كنت نساربي حتى نسمع مواحد الطابلة اكثر صوت نكرهو ...
صوت المصفارة
ط.كامليا : ڨارسون !!
وكي كنت انا لقريبة كنت حا نهرب شفت مول شي يغزر فيا ....اه
رحت ليها كانت مع د.عبد الوهاب داك الزهر !!! بصح راه يبان مقلق...
ط.كامليا : مناااال؟
رفد راسو غزر فيا مشوكي مانكذبش عليكم حشمت بروحي شوية مالڨري مانيش ندير حاجة عيب...
ط.كامليا*كَيلْتني مالفوق للتحت* : وش راكي ديري هنا ؟ *تتبسم*
اه لكلبة هذي راهي تحرش بيا
منال : واش راني نبانلك ندير ؟
ط.كاملية : هههه ديزولي ماقصدتش هكاك...مممم وش عندكم ماكلة هنا ؟
منال : ال menu تحت يديك ولا متعرفيش تقراي ؟
د.عبد الوهاب ماهدر والو حسيتو ماشي كيما كان كامل هذا ڨاع علاجال ضربة ليزاناليز ؟
ط.كاملية : بففف ماشفتوش برك وشبيكي تشنفي...هكا تخدمو الزباين تواعكم
حسيتها حابة ديرلي مشكل
د.عبد الوهاب : كامليا ..خلاص !
حرڨها سكتت و وجها تبدل
منال : كي ديسيديو واش تاكلو قولولي
رحت وخليتهم وشفتهم يهدرو بيناتهم....
وانا واش دخلني استغفر الله ....
رحت كملت خدمتي مادرتش كامل من جيهتهم ...
...يتبع
عجبكم البارت تاع اليوم ؟ خلولي رايكم فالتعليقات....
😘😍😍😍 سلام
part 07^^
ابدأ من البداية
