#في_طرفة_عين
في طُرفةِ عينٍ
بارت 3
بالماضي وعيت ع الدنيا واني طفله حالي حال اليتامى رغم وجود امي وابويه عايشين مو ميتين بس مو يمي .. ربتني بيبي ام ابويه ..
امي منفصله عن والدي .. وهو بدوره متزوج بغير محافضه.. امي مااعرف عنها شي سوى انها تخلت عني بعد الولاده .. كبرت بيت عائله كبيره عمامي وزوجاتهم واولادهم .. البيت جان بسيط واغلب عمامي جانوا بلا شغل او يشتغلون عماله يوم يحصلون عشره لا .. وبما انه اني مالي ام ولا اب يحميني .. تعرضت للاستغلال من قبل نسوان عمامي جان البيت عباره عن باحه كبيره بدون سقف او حوش وجان اكو حوض صبه بالحوش والشمس بالصيف تصكع بي اني هنا جنت لو اغسل مواعين العائله كلها لو اشطف الملابس لذلك اكتسبت بشره سمره .. وتصبغات من الشمس وبثور .. بالاضافه الى هذا جنت اعاني من زياده بالوزن .يعني جنت محلوه ابد. وصلت للثالث متوسط وبطلوني كعدت بالبيت بيبيتي متكدر تحميني جان ابويه يدز الي مصرف كله ينلكف وميبقى منه ولا شويه ..
عمامي جانوا بالبيت 4 فقط ابو عمار جان طالع بيت وحده .. بعدهه ظلوا عمامي شويه شويه يطلعون من البيت بقت بس مرت عمي الزغير الي هي خالت عمار اخت امه ..
شوفتني نجوم الضهر من الاذيه والعذاب جهالهه كله شامرتهم عليه اني انضفهم اللبسهم اوكلهم واذا مسويتهه تكلب الدنيا عليه ..
أما عمار اخخ عمار .. جان احلى واحد من بين ولد عمي كلهم عيونه خضر، بشرته برونزيه ،اكتافه عراض مفتول العضلات. .،شعره بلا مشط سارح كل البنات معجبات بي وهو شلونه مبقت وحده مسوه وياهه علاقه بالمنطقه
جان گلبي أسير يم عمار مو بيدي حالي حال هالبنات واحب وهم عندي مشاعر واحس بيهه .. حبيته من زغري حتى من يحجي عليه احبه كلما يجي لبيت جدي يكولي اييييع لتصيرين مقابيلي شكلج يطرد النعمه ويسد الشهيه ..
جنت اكيف لان حجه ويايه عمار حتى لو ذم ..
كبرت وصار عمري 16سنه وعمار بالعشرينات عمره
ظل يجي لبيت جدو بالليل وحالته غريبه عرفت جان يجي سكراان وابو يطرده او يبسطه وينهزم يجي البيتنه وتلفي خالته او بيبي .. اني جنت اكعد بالليل اكل هوايه جان هذا طبعي الليل كله اگررش شنو گبالي اكله اذا غدا زايد من الظهر تمن ومرك او اذا لكيت خبز اكل اكثر من خبزه حتى لو وحدهه اكل اشبع بطني امليهه وانام .. بالنهار يحجون عليه عمي وجهاله ومرته من اكل يكولولي دبه شكد تاكلين عاد اني اكل كدامهم شويه بس من وراهم كومه .. تكعد مرت عمي الصبح تدور ع الاكل تظل تدك على راسها وين راح الاكل ؟؟؟ اكوللهه هاا يمكن عمار بالليل من يجي ياكله وميدري بروحه .. هي تصدك وتسكت .. كل مره اخاف انلكف بس مانلكفت. . وياريت لو ملكوفه ع اقل جان تبت من هالسالفه وضعفت شويه بس بقيت ع هذا حالي ..
بفد ليله من ليالي الصيف الحاره .. وكالعاده جنت انام يم بيبي .. بس بليلتهه مرت عمي كلتلي راح انوم الجهال بغرفة الخطار نامي يمهم كتلهه ماشي بدون ماعرف ليش نومت الجهال عدهه ولد اثنين واحد عمره سنتين والثاني 4 ونمت بصفهم ع الگاع .. وعيت مفزوعه ع صوت مرت عمي تصرخ باوعت النفسي بالاول ملابسي مرفوعه وعمار بصفي وتطلع منه ريحة المشروب .. جفلت وغطيت نفسي وصارت هوسه هجم عمي عليه وظل يضرب بيه بوكسات بوجهي واني ماعرف شنو صار اسمعه يكولي ادبسز ساقطه هو سكران انت شبيج طايحة الحظ
وظل يضرب بيه احس عظامي تنعنعت من الضرب
الحد ما بيبي ومرته فكوني اخذتني مرت عمي كلتله رايحه اشوفها بغرفتي طببتني واني الدم يصب من حلكي .. دفعتني ع الكاع وظلت لازمه الباب شويه وطلعت اسمعها تكول يبووو هذا يمكن مخربها لان داشوف دم .. واسمع بيبي تكول يبووو شيفكنه من امير (ابويه)
عمي .. خلوني ادخل اموتها واخلص من عارها
مرته .. لا يمعود شتموتها تريد تفضحنه حتى ابوها يكول ماحافظوا ع الامانه اني باجر اخذهه للدكتوره ونجبره هم يتزوجها انت بس اهدأ .
وهدأته مجنت فاهمه على كلشي اني بلحظتها جنت صغيره ومنطويه ومعندي صديقات محد يحبني كاضيه يومي كله بالشغل والاكل .. مافهمت شنو الي صار .الليله كضت على اعصابي .. جنت ميته خوف
لايجون يقتلوني نمت والدمايه يبست عليه ..
الصبح كعدت ارجف رغم الحر وبقيت بغرفة عمي رحت للمرايه باوعت واحد من اسناني الاماميه مكسوره بالنص يعني نص منه معلك باللثه والنص الخ واكع اني اصلا اسناني مخربطات ومامسطرات عدل ونوب هذا زاد الطين بله !!! متت قهر ليش اني هيج ليش ماعندي احد يحميني ليش عافتني امي لو كل ام تعرف شيصير البنتهه من تتركها مجان تخطوا هالخطوه وتترك فلذة كبدها بس للاسف بعضهُنَ من دون احساس من دون ضمير تخلف وتشمر ضناهه ومتعرف شحيصير بي بعدهه المهم مصلحتها وخلاصها هي !!!
بعدها جتي ام عمار وظلت تدك النايحه سوتها علينه مناحه وظلت تدعي على عمار اني من يمي قلبي انقمت ابنها هيج تدعي عليه !!
ام عمار ... صخاام صخمك عميران ولك انت من بد خلفتي كلهه شالع گلبي ومأذيني الله يطيح حظك على هي العمله
سمعتها تصايح ويا عمار بعدها انركعت باب البيت الرئيسي حييل
يمكن هو طلع .. اجوني اثنينهن للغرفه هي واختها وكالن روحي غسلي خل نطلع ..
رحت غسلت ولبست ورحت كعدت يمهن وام عمار كضتهه بس بجي تكول لبيبي
دعواتج لانهار عمه رجلهه يريد يطلكها ويتزوج ويتصخم وجهنه
