كفاح

ون شوت

مرحبا اسمي سرى عمري 19 طالبة كلية مرحلة اولى تربية قسم انكليزي عائلتي ماما وبابا واخوية سيف ماعندي غيره لان بابا و ماما كووه حصلو علينه سيف متخرج ومتوظف وهوه اللي ديصرف علينه ماما ربة بيت وبابا جان يشتغل بمحل بس تركه واجرة لان يرادله حيل وعايشين الحمد الله قبل سنتين تعرفت عله لؤي حبينه بعض والولد تقدملي بالبدايه اهلي مقبلوا عليه لان كاعد ما يشتغل ومصروف ع اهله بس اني لان جنت احبه موتت روحي عاندت بأهلي لا اكل ولا شرب لحد ما تخربطت وضليت بالمستشفى ايام ف انجبروا يقبلون بي بشرط ماكو زواج لحد ما يشوفله شغل وصارت خطوبتنه العام واحنه يوميه نسولف سوه ونطلع سوه بالجامعه لا دراسه ولا تحضير انجح بس مقبولات....
عندي هواي اصدقاء من الجنسين بس اكثر اثنين احبهم نور وحسين نور جوارينه واهلها واهلي اصدقاء وحسين عرفنا بالجامعه من العام سوه بس السنه تقدملها وانخطبوا دائما وياهم مخربه لحظاتهم الرومانسيه خطيه اتعودوا عليه بحيث صار عادي الحبجيات كلها كدامي...
_يوووو انتي متولين لرجلج ابتلينا بيج
_هههههه نايمه ع كلبك
_ههههه عيفها حسين بدون مشاعر هاي ضلعتي واعرفها
_فديت اليعرفني 😏
مرت حياتي عادي لحد هذاك اليوم جنت بالجامعه ودك عليه بابا
_الووو هلو بابا شلونك
_ انتي سرى ياسين؟...
_اي نعم منو وياي؟؟
_ياريت تشرفينه بمستشفى(....) والبقاء في حياتج....
من سمعته هيج كال مدري شصار بيه كعدت بالكاع مصدومه لا بيه ابجي ولا بيه اكوم ونور وحسين ظلو يسألوني وما ارد كالت نور
_حسين جيبلها مي واني راح اخابر خالتي ام سيف عليها من سمعتها كمزت وركض للشارع اجرت تكسي للمستشفى وادعي كون امي متدري لان اكيد تموت... مرت دقايق وصلت وركض للطوارئ اباوع ماكو احد دكيت ع رقم بابا وشاله نفس الرجال اللي خابرني سألني عن مكاني وكتله كلي تعاي للعمليات رحت لكيت رجال متوسط العمر لازم موبايل بابا بإيده سلمت عليه ورد عليه شافني حيل ضاغطة ع نفسي كلي استريحي واهدئي بالاول كعدت وهوه كعد بصفي انطاني مي شربت وحسيت نفسي هدأت شويه وحضرت نفسي للمصيبه اللي حسمعها
_تفضل دكتور
_شوفي بنيتي الاعمار كلها بيد الله منعترض ع حكمه
_شنو اللي صار بالتفصيل
_الوالد و اللي اسمه سيف تعرضوا لحادث بالسيارة الوالد بهاي الغرفه ديسووله عمليه بس ابنه سيف وصلنه ميت اتصلنه ع الوالده و وقعتلنه ع تعهد العمليه لكن للأسف صارت بيها سكته قلبية لما شافت ابنها وتوفت بساعتها ما لحكنه عليها عدكم احد يستلم الجثث ويكمل شهادة الوفاه؟؟
_بس اني
_عمام خوال ماكو ابد؟
_ماعدنه
_اتفضلي وياي لعد....
رحت وياه بس لا تتوقعوني قويه لا اصلا جنت ممستوعبه ومصدومه وكأنه الله جلد مشاعري حته ما انهار وابجي واموت حالي حال ماما.... طلعت شهادة وفاة لماما ولسيف وخبروني بعدين انه عملية بابا نجحت بس حيضل تحت المراقبه لان وضعه حيل تعبان... رحت بزاويه فارغه وخابرت لؤي وكتله ع اللي صار
_البقية بحياتج حبيبتي اسف لاني مو يمج بس والله اني يم عمامي بالناصريه... اعتذر مني وراح اني عاد من كد الصدمات حضرت رقمه وحضرته من كل البرامج... عمامك بالناصريه وانت يمهم مووو... عرفته جذب لان ميريد اطلب منه فلوس هذا طبعه من زمان منتبهه عليه ابن فكر مع العلم شكد عدهم فلوس المهم حطيت عليه اكس وخلص ماله مكان بحياتي بعد ما عافني بأسوأ لحضاتي اللي ميريدني تاج عله راسه ما اريده نعال برجلي... خابرت عله عم ابويه وخبرته باللي صار وخابرت خالي هم... اجاني الدكتور حجه وياي ع حالة بابا شويه وطلب مني اراجع حسابات المستشفى رحت كصولي وصل بالديون رحت للبيت جانت ماما دائما من تضم الفلوس ادليني بمكانهن تكلي خاف يصير ما يصير حته مضلين حايرة اخذتهن ورجعت للمستشفى كملت كلشي بس شنو اعصابي مدمره... كعدت يم غرفه بابا بالعناية المركزه وبس اريد راسي يخف الوجع منه سمعت صوت واحد يصيحني شلت راسي جان خالي وعم بابا ووياه ولد اثنين ما اعرفهم... خالو حضني ودموعه عشره عشره
_ولج صدك رحتي ناديه... شكد جنت مقصر بحقج يخيتي سامحيني شلوون كلليلي شلون انطاج كلبج ترحين يبعد روحي انتي ويبجي...
وعم بابا واكف يباوعلنه بقهر والي وياه واحد مدنك راسه والثاني جسر عينه بعيني ولا كأنه عندي مصيبه....ما ادوخكم بالصار سوينه الفاتحه 3 ايام خالو وعم بابا وعمي ابو نور ع الزلم واني ونور وخالتي ام نور ع النسوان والجوارين خطيه ويانه اول بأول خلصت الفاتحه وبابا بعده ماصحه راد خالي وعم ابويه يباتون يمي بس مقبلت بحجه اني حضل يم بابا بالمستشفى وما ارجع للبيت كوه قبلوا وراحوا وره اسبوع صحه بابا وفحصوا... للاسف الضربه بعموده الفقري ورجليه سببتله مثل الشلل ميكدر يحرك رجليه وهالعاهه مستديمه وسدوها بوجهي متنفعله حته العمليه... جيكوا حالته وشافوا انه ممكن اطلعه وصدك جهزتله غرفته والبيت كله حته تسهل حركته واشتريتله كرسي متحرك من يتحسن يصعد بي... وصلنه عمي ابو نور للبيت وحط بابا ع السرير وضبط اموره وطلع شويه ورجع جايب علاليك متروسه اكل معلاك ولحوم وبقوليات وخضورات وفاكهه ومعلبات اشكال حته نساتل وجباسه مشتري يمكن تطلع بال200 الف متسوك خطيه اخذتهن وشكرته وهوه سلم ع بابا وطلع... رتبت المسواك ورحت يم بابا سوده عليه وجهه كركم وصافن ع السكف ما حجيت وياه بس دموعي صارن شلال واشهك واصيح والطم ع وجهي اشرلي تعاي رحت يمه خليت راسي ع السرير وابجي وهوه يمسح بيده ع شعري ووجهي ويبجي...
_لا تجزعين بنيتي حرام الجزع الي دسوي يأذيهم... سكتت ودموعي مترضه توكف
_بابا اني حهتم بيك... لا تخاف ماحجه وره شويه كلي جيبيلي القرءآن اخذه وكلي اطلعي مقبلت بالبدايه بس شفته حيل مكسور ف عفته ينام وحده وكل ساعه اروح اتفكده واشوفه لو يقرأ لو ينعى ويبجي...ثاني يوم خابرت ع عمي ابو نور استفسر منه ع راتب سيف فهمت منه انه المعامله طويله ويرادلها اشهر يله يطلع ف خطيه اتبرع هوه يسويها واجه اخذ مستمسكاتنه وراح... حسبت الفلوس الباقيتلي والواجبات وتكاليف العلاج وحسبت حسابي لازم اشوف حل لبابا... طلع لازم اشتغل شي شغله لان ايجار المحل يادوب يكفينه مصاريف البيت بس وعلاج بابا ولازم اجمعلي مبلغ محترم اضمه اخاف يصير ميصير يعني حته راتب سيف ميكفي خابرت نور كتلها تخابر حسين ويدبرولي شغل ضروري... وجامعتي قررت أأجل هالسنه والله كريم... وره كم يوم اجه خالي وعم بابا وياه هذا ابو عين الجسره يحجون شنو كاعده وحدج كتلهم بابا وياي شنو وحدي كامو يحجون ع بابا عاجز وين يفيدج ميكدر يدافع عن نفسه انوب انتي لا ومتفقين يزوجوني لهذا الجسر حيل انقهرت وعطت بيهم
_لا والله هيه هاي الناقصه ابوي عايش ويجي غيره يتحكم بيه لا عيوني لا انتو ما تعرفوني وحتلو اسم الله صار بابويه شي ف محد اله دخل فاهمين مو جايبيلي هالصلف تردون تقشمروني بي هذا بيت ابويه وابويه بعده عايش واني كاعده بي وخلي مخلوق يحجي همه حيل انقهروا وراحوا... مخبله اني اروح يم واحد منهم خالي مزوج اثنين ومضيع فلوسه وصحته وكرامته عليهن وع بزرهن وعم ابويه بزره كلهم ولد وسمعتهم طايح حظها... رحت يم بابا حطيت راسي يمه وهوه يلعب بشعري
_شلونج بالدوام؟
_هاا اي زينه الحمدالله
_الحمدلله خفت لا يأثر عليج الي صار
طبعا جذبت اني عايفه الدوام من زمان وسألته ع الشغل اعترض بس قنعته بالاخير
مرن اسبوعين واني كاعده خلصت كل فلوسنه.. خابرت ع حسين دا اشوف بلكي دبرلي شغل
_هلا حسين شلونك؟؟
_الحمد الله انتي شلونج؟
_والله لحد هسه تمام... مالكيت شغل؟
_لا والله ماكو
_هااا اوكي شكرا تعبتك
_عادي صدك جذب
_بيباي
_الله وياج
دا اسده واسمع حسين ونور يحجون يمكن نسه يسد موبايله
_كتلها ع الشغل؟؟
_يا شغل... مخبل اكلها تروح تخدم ناس حتلو ماعدها خوما تنزل لهالمستوى
_بس محتخدمهم بس تنظف
_حتلو... سدي الموضوع نور اني اشوفلها شغله بيها خير
_بكيفك انت اعرف
سديت التلفون ولسه كلامهم بأذني صح اني ما اتقبل ع نفسي هيج شغله بس شلون نموت احسن؟
ثاني يوم خابرت نور وكتلها ع الشغل ووعدتني تجيبلي التفاصيل وره فتره حصلت الشغل ابيت رجال عمره بالاربعين ووحده خفت الصراحه بس اللي مصبرني انه مخليه شرط البيت كون فارغ او ع الاقل مابي زلم حته اشتغل بي ...وصدك التقينه وصار الاتفاق كل يوم خميس اجي انظف البيت كله... طبعا الرجال اسمه اسامه وابد ممبين عليه العمر مرتب وانيق واهم شي محترم ما اعرف شنو يشتغل بالضبط بس عنده خير من الله ثراء فاحش اشتغلت ابيته سنه ابد ما غلط وياي ولا اتجاوز حده بحجايه او نظره هوه يجي اني اطلع دبرلي شغل ببيوت اصدقاءه اثنين هم فلل مو بيوت كل بيت يوم بالاسبوع واحصل 25 الى 50 بكل روحه... محمد اخو حسين جان صف خامس اعدادي وراح للسادس لازم شغل بمطعم واهله كايليه يبطل عمود دراسته حسين كلي ع الشغل واستلمته اني لحد ميخلص محمد سادس كيفت لان شغله سهله ومريحه بس تاخذ وكت كمت اجمع شكو فلس زايد اي شي مومهم ما اشتري قترت ع نفسي شكد ما اكدر بدون ميدري بابا طبعا.. هوه اصلا ميدري بشغلي الصبح عباله بالدوام ومرت سنه ونص واحنه ع نفس الوضع لحد ما يوم من الايام صادف يوم اربعاء بابا تخربط بنص الليل اجته رجفه شلون البي صرع واخابر ع عمي ابو نور ومايرد دمي نشف من التفرفح وما اكدر اودي للسياره ضليت مكابلته وابجي وره ربع ساعه هدء قستله ضغطه انطيته مي شربه ونام ثاني يوم رحت لبيت استاذ اسامه نظفته شلون مجان وبالي يم بابا وكل ساعه اخابره اطمن عليه خلصت شغلي وكعدت بالحديقه اتذكر اللي صار البارحه وابجي سمعت طبكه مال باب شلت راسي لكيت استاذ اسامه مطبب سيارته ديباوع عليه مسحت دموعي ورحتله قبل لا احاجي كلي تعالي وياي... طب للبيت نزع سترته وكعد بالصاله اني ضليت واكفه مكاني بالباب مطبيت صاحني واشرلي اكعد كباله مو من عوايده بس رحت كعدت
_خيرج سرى صاير شي؟؟
_سلامتك استاذ ماكو شي..
_ليش جنتي تبجين لعد؟؟
_خصوصيات استاذ... حجيت بنتره حته يبطل يسأل بس مفاد
_ممكن اساعدج لو حجيتي... باوعتله شكله مثلا ابوي مقعد واني جاي اشتغل مكانه نزلت راسي...
_ماكو شي استاذ بس بابا البارحه شويه تخربط...
_سلامته ان شاء الله عمره طويل بس اني عبالي ابوج ميت...
_لا استاذ غلطان...
_زين انتي اللي تشتغلين اعتقد المفروض هذا شغل الوالد او الاخ اذا عندج مو صح..
_بابا مريض ميكدر يشتغل واخويه توفه من سنه...
_ الله يرحمه... شبي الوالد مريض؟؟ سكت شويه وحس بيه ما اريد اجاوبه ف كمل
_عندي اصدقائي هواي دكاتره بالعراق وخارج العراق احجي لان ممكن افيدج...
_عنده شلل بسبب حادث وكالوا ما ترهمله حته العملية... شفته تغير وضعه ما اعرف ليش صفن شويه..
_خلص ما راح اسألج بعد بس جيبيلي تقاريره وفحوصاته كل شي يخص حالته جيبي عندي صديقي بتركيا اختصاص خلي اعرض عليه التقارير وهوه يردلج الخبر اليقين..
_بس استاذ كتلك الدكاتره هنا كالو ما تنفع العمليه..
_لا تصدكين... هنا اليجيهم عدل يموتوا خلي نستشير صاحبي ماخسرانين شي كلج ما تفيده خلص انتي عندج علم واذا ترهمله العمليه حته تشوفين دربج وياه ليش خطيه سنه مقعد ها شكلتي هسه؟؟
_والله ما اعرف شكلك...اخاف انتعبك؟؟
_لا تعب ولاشي هنه صور راح ادزهن لإيميله وخلص
_اشكرك استاذ اسبوع الجاي اوراقه يمك..
_لا كومي هسه هم اوصلج واخذهن واني اصلا عندي شغل..
_لا استاذ لتزحم نفسك..
_دا اكلج بطريقي لتعاندين...
رحت وياه وكتله ينزلني براس الشارع واني اجيبهن واجي رحت ركض لبابا اخذت اوراقه كلهن وهوه يسأني شسوي بيهن كتله محتاجتهن وطلعت قبل لا يلح وياي... انطيتهن لأستاذ اسامه وهوه اخذلهن صور وانطانياهن وكلي ع اسبوع الجاي يشوف شنو رد صديقه... رجعت للبيت بابا ضل يسأل خطيه مشغول باله عليه ضليت اطمن بي وابوسه... شهور حسيته الاسبوع وما صدكت يجي الخميس نظفت البيت وكعدت متحمسه لحد ما اجه استاذ اسامه كلي لسه مارد الظاهر ماشايف الرساله ان شاء الله اسبوع الجاي اذا مارد اخابره ورجعت مكتئبه هم لازم انتظر اسبوع ثاني ومر الاسبوع بطلعان الروح كملت شغلي بسرعه وجان باقيلي 3 ساعات ع رجعة اسامه رحت توضيت وصليت ركعتين ودعيت ربي كون الها حل هيج ويمشي بابا من جديد والله لاوزع ثواب 3 ايام يارب لا تتركه مكسور يارب.... رجع استاذ اسامه وبشرني
_سرى حظج حلو مصارله نص ساعه من حاجاني
_شكلك استاذ؟..
_تعاي هاج انتي اقري المحادثة... طلع المحادثه وانطانياه
(_ازاد شوفلي ذني التقارير
_ملات منو ذني؟؟
_صديق الوالد....
_اهااا خير ان شاء الله.... شوف حسب ذني التقارير ممكن ترهمله عمليه بالظهر لان رجليه سليمه مابيها شي بس المشكله الحادث صار من سنة يعني احتمال الاعصاب هسه تلفت هالتقارير لو واصلتني من وكت جان بكل سهوله سويتله عمليه ويرجع يمشي طبيعي..
_يعني شنو هسه اكله يتوكل ويسافر لو ماكو امل
_كتلك احتمال يمشي واحتمال لا بقت يمكم
_ازاد انطيني حجاية وحده مو يسافرون ومصاريف واخر شي ميمشي الرجال
_حبيبي اللي عليه سويته وتره ماكو مريض ينتظر تصير نسبة نجاح عمليته 100% يله يسويها ناس تجينه 10% نجاحها... خلي يجون وان شاء الله تنجح
_لعد اذا هيج انتظر مني مكالمة بالتفاصيل وطبعا رحم الله والديك تعبناك
_تعبك راحه وتدلل )
شلت راسي ما اعرف اضحك ابجي...
_اا استاذ مفهمت شنو اسوي هسه؟؟
_ديكلج احتمال يمشي اذا سوو العمليه بقه القرار يمج واني افضل تسووها
_اسويها اكيد اسويها ابيع عمري لخاطره بس استاذ اني ما اعرف بهالسوالف يعني وين نروح شنو نسوي والاهم شكد لازم اخذ وياي فلوس؟
_100 مليون تكفيكم سفر واقامه وتكاليف العملية وكلشي واحتمال يزودلكم مبلغ زين..
_ما عندي هالمبلغ...
_شكد عندج؟
_20 مليون بدون السيارة ومحل بابا والبيت
_البيت تحتاجونه بس السياره والمحل ممكن ينباعن دبري امورج والباقي مني
_لا استاذ شنو القضية والله ما اقبل
_حلفتج بروح غالييج وبطلي عناد اعتبريهن هديه مني الج
بعد شد وسحب كوه قنعني وصدك بعت السياره والمحل وطبعا هوه اللي اشتراهن وجمعت كل غراضنه واستاذ اسامه هوه اللي تكفل بالحجز وقبل يومين من السفر خبرت بابا عصب مني وضاج لان ما كتله وحلف ميروح بس اني لعبتها قبله وخليت عمي ابو نور يقنعه كوه قبل وسويت وكاله لعمي حته يفسخ خطوبتي ويه لؤي الخاين... قبل لا نطلع من البيت للمطار خابرني اسامه
_سهى طلعتوا؟
_هسه حنطلع..
_اسمعيني زين لكيتلج شغل هناك بشركة حوالات راح ادزلج المعلومات اللي تحتاجيها وهمه هناك حينطوج وظيفه ع خبراتج مدحتج الهم كومه لا تفشليني ماشي بلكت الراتب يساعدج...
_استاذ خف عليه شلون حردلك ذني كلهن
_ههههههه ارجعوا بسلامه وهاهيه مرايد شي
_اشكرك استاذ وخلي ابالك لوما موقفي صعب ولا اقبل
_ولانج بهالموقف دا اساعدج لو اختي بمكانج اتمنى يساعدها احد
_رحم الله والديك ومشكور والله فضلك مغركني... بس ليش دسوي هيج؟؟
_سرى اخوية مات مشلول وجان ممكن بعمليه بسيطه مو بس يعيش ويمشي هم
_اعتذر....
_يله سرى توصلون بالسلامه ولتنسين اللي وصيتج عليه
_ان شاء الله
_مع السلامه...
_الله وياك....
رحنا للمطار ومن المطار طرنه لتركيا نزلنه بإسطنبول اخذنا تكسي لعنوان اخذته من اسامه وصلنا لفندق محجوز النا جناح كامل كعدنه بي واستراحينه... الخطوه الثانيه جانت انه ننتظر صديق اسامه يجينه ويفهمنه ع الوضع مر اسبوع وهوه ماكو وراها بيوم اندكت الباب عبالي واحد من الموظفين يريد بقشيش مثل كل يوم صحت بي
_وللللي من كداامي لا اطلع حركة كلبي كلها بيك ما انطي ولا فلس عفيه ناااس همج بدون كرامه جم مره طردتكم وبعد....... انتبهت عليه شكله مو شكل موظف
_العفو انت منو؟؟
_هاي هيج مهججه العالم خطيه لعد انتي شكد عص..
حجه عراقي تفاجأت بس مبينتله باوعتله صفح واجيت دا اطبك بوجها دفع الباب ودفعني وياها وطب
_منو انت وشلون تسمح لنفسك تدخل لشقة بنيه وحدها.....
صفن بوجهي وضحك
_عود تريديني احس بالذنب واطلع... الله عليج لتحجين هالجمله بعد لا يدكون بيج الناقصه بنيه حلوه بشقه ووحدها حلم وتحقق ... ع العموم وين الحجي؟؟
_دا اكوولك اني وحدي اطلع براا
مشه يم الباب وفتحها وضل يعاين ع رقم الباب ويرجع لموبايله التفتلي وكال
_هذا يا طابق؟؟
_8
عقج خلقته
_متأكده هاي شقتج لان المفروض بيها رجال جبير وبنته سرى
_اني سرى....
رفع حاجبه وضل يباوع عليه واني اخيرا ربطت...
_عزااا بس لا انت الدكتور صديق اسامه..
_اني الدكتور صديق اسامه.. <<قلد عليه>>
_شكد دمك ثكيل....
_شكد عرمه انتي....
اجيت دا ارده بس صاح
_عمممي ابووو سيييف
بابا جان بالغرفه فصاح
_منو هذا بويه.... سرى بنيتي وينج
عفته ورحت لبابا
_ها بابا اجيتك
_بنيتي منو هذا اللي صاحني ومنو ع الباب؟
_بابا اجه الدكتور...
طب الدكتور ورايه وسلم ع بابا وضلوا يسولفون رحت جبتله مي وجاي وعصير وكيك وفاكهه هذا طبعنه اللي يجينه نقدمله كلشي عدنه قدمتهن وكعدت ساكته اسمع حجيهم وره ساعه كمد دا اوصل الدكتور للباب بعد ما انطانه عنوان المستشفى اللي حيكعد بابا بيها دا امشي وراه وفكري يم العمليه وجان انضرب بي...
_ليش وكفت؟؟
_هاي تكرهيني وهيج قدمتي....
_دكتور تره اني ما اكرهك بالعكس انت واسامه الكم فضل بركبتي ومراح انساه بس انت شفت بعينك جنت ضايجه لان عبالي مراح تجي وصرت كبالي ف.... تعرف صار اللي صار اسفه مو قصدي اتجاوز ولا طبعي هذا اعتذر
_انسي يمعوده سالفه متسوه...
_دكتور كتقييم اولي بابا ممكن يرجع يمشي؟؟
_اولا اسمي ازاد ثانيا احتمال جبير يمشي خصوصا بعد ما عرفت منه كم معلومه خلتني اتفائل بي
_اشكرك وان شاء الله اجيبه ع الموعد
_ان شاء الله...
ودعني وطلع سديت الباب واني ميته من الخجل اول تالي هيج اسوي وكدامه شلون فشله هسه شيكول عليه
مر الوقت عادي واخذت بابا لمستشفى اسطنبول للجراحة صايره بمركز اسطنبول بمنطقة نيانتاشي منطقه سياحيه حلوه خلو بغرفه خاصه وبات يومين بيها سووله بيها كومه تحاليل وفحوصات واني وياه اول بأول واطمن بي وصار موعد العمليه وطب بابا لصاالة العمليات ووره شويه اجه ازاد لابس بدله عمليات زرقه غسل ايده بمحلول ولبس القفازات وعقم نفسه ولبسوا مدري شنو رداء فوك اللي لابسه وطب...
ازاد شخصيته تختلف هنا عود مثل اول لقاء بس يتمضحك ويرادد...شخصيته قوية وكلامه كله بالمختصر المفيد ابد ميحجي حجايه زايده... ضليت يمكن 3 ساعات واكفه وادعي لبابا واقراله سورة ياسين واية الكرسي ربي رجعه سالم مالي غيره بهالدنية... طلع ازاد من الصاله وركضتله ودموعي تجري اخاف من رده
_دكتور... بشرني الله يخليك
_سويت اللي عليه والباقي يمه هوه واستجابة العصب حنراقبه 72 ساعه بعدها نكدر نحكم نكمل العلاج الطبيعي او اصلا العصب ميت وماكو امل...
_شكرا دكتور ربي يوفقك ...
راح وبعد دقائق طلعو بابا لغرفه ثانيه بيها اجهزه ربطوهه بي وعافو واني طبعا ما اكدر ادخل.... رجعت للشقه سبحت وبدلت واخذت ملابس لبابا و سويتله شويه اكل ورجعت للمستشفى لكيته كاعد كعدت يمه وباركتله نجاح عمليته وطمنته ورفعت همته وان شاء الله يمشي ... ماكتله بشغلة العصب حته لا ينحبط ... مكدر يبدل ف عفت الملابس يمه وطلعتله الاكل كمت اوكله بيدي واسولف وياه لشويه وجفت علينه ازاد ضل يباوع وضحك اقترب من بابا يحاجي..
_عمي حمدالله ع سلامتك
_الله يسلمك وليدي رحم الله والديك
_اكول عمي انت ما ناوي اطيب ابسرعه
_اكو واحد يريد العذاب لروحه وليدي
_لعد بطل تاكل اكل بنتك الدسم هنا الاكل صحي وراح يطيبك بسرعه
رديت عليه
_خمسه وخميسه يا حسود شكلك ملاكي اللي يطبخلك
ضحك هواي وما رد رجع بحجي ويه بابا واني استأذنت وطلعت اخذت تكسي لعنوان الشركه مال الحوالات وصدك خلوني ع قسم الترجمه لان انكليزيتي قويه ودوامي يبدي من باجر ولانه الشركه اهليه فالدوام يبدي من ال9 لل5 هواي بس شسوي رجعت لبابا وكتله ع الشغل وهوه فرحلي كلش ... مجنت ناويه اشتغل بس من شفت العملية اكلت نص الفلوس تشائمت والحمدالله باليوم الثالث بابا حس برجله خدرت عبالي شي طبيعي بس ازاد كال هذا معناه انه الرجل رجعلها الاحساس وهذا تقدم كلش جبير وخلال ايام حيبدون بالعلاج الطبيعي...ازاد جان عنده عاده يوميه يطلع بابا العصر للحدائق يفره ويسولف وياه بعدين عرفت انه هذا من ضمن العلاج انه يعدلون حالته النفسية وكل الاطباء هناك هيج يسوون واحنه جماعتنه بدون ميفحصك يكتبلك علاج.... وعادي كرف الفلوس مستمر.... كمت اشوفلي بمعارفي بالشركه اي شغله اشتغلها مره غسل مواعين مره تنظيف حديقه او حته رعاية طفل اي شي حته احصل فلوس كمت اتأخر بالليل واجي ميته تعب ادهورت صحتي كلش بس ما بينت لبابا شي واشوف الفرحه بعينه كلما يخطي خطوه... صارلي اكثر من مره اختنك ويغمى عليه بالشغل ما اعرف السبب فقررت اسأل ازاد كتله ع الاعراض اللي بيه صداع عنقودي وصداع ضغط وضيق نفس و الاغماء دومي تعبانه ومرات احس بألم بالصدر ماعدا اطرافي صايره زرق فحصني وجانت الصدمه اليه من كلي انه عندي اعتلال بعضلة القلب ولازملي عمليه انطاني مجموعة ادوية ع امل تنفع واذا ما نفعت لازم اسوي العمليه بسرعه لانه حسب كلامه اني معرضه بأي لحظه للسكته القلبيه... التزمت بالادويه عمد بابا مو علمودي وتركت شغل الليل بقيت بس ع الشركة واللي للأسف وبعد فترة غلقوا فرعهم بتركيا وراح عليه الشغل بس كتبولي رسالة توصية وشهادة كفاءة كالو حتساعدني اقترح علية ازاد مجموعة من الشركات الاجنبية وقدمت الcv مالتي وقبلوني بوحده منهم الحمدلله انه الشغل بس بالنهار... بديت افلس من مصاريف المستشفى ف رجعت ادور شغل اشتغلت فترة وهم تعبت واغمى عليه كم مره ف منعني ازاد من الشغل بالليل وصرت اشتغل ويه صديقه بصيدلية يعني نوعا ما احسن رجعت اجمع ولو مبلغ بسيط وصحتي من اسوأ لاسوأ الى ان فد يوم رجعت من الشركه دا اشوف بابا ولكيته فاير دمه ومعصب ومبين حته جان يبجي عرفت انه ازاد سولفله ع مرضي والادويه اللي دا أخذها ومدتفيد بعد كوومه حجي ورزايل من بابا صار الاتفاق انه لما يطيب تماما اسوي اني العملية وصدك وره 3 اشهر بابا كام يكدر يمشي شويه وتحسن واني من شفته يمشي انتهيت بس بجي اللي يشوفني يكول مدري منو ميتلها عوضت الدموع اللي ما نزلت وكت الفاتحه... رجعوا يسوولي فحوصات وازاد وصه واحد من الدكاتره عليه رجال جبير هوه حيسويلي العملية ودخلت صالة العمليات اول مره بحياتي والضوه اللي فوك السدية موتني احس روحي راح امووت ما اعرف ليش توسلت الهم بس اشوف بابا اخر مره وطلعتله ودعته وكتله يبريلي الذمه اخاف اموت وابوسه واشبك بي ودموعي يجرن حته ازاد شبكته...رجعت للصاله ارجف يريدون يخدروني ما اقبل كوه حطوا الجهاز ع خشمي وره شويه وبعد محسيت.....
.
.
.
سواد كلشي اسود واحس نفسي ثكيله مثل اللي نايم ويكعد تعبان بالضبط فتحت عيوني بالكوه احس نفسي بعدني بحلم او بعدني مصاحيه ما اعرف شلون اوصف شعوري... ضليت فتره صافنه ع السكف بعدين درت عيني ع الغرفه اللي اني بيها اول مره اشوفها شفت جهاز شلون التلفون بي نقاط اتذكره جان بغرفة بابا اذا راد ممرضه او دكتور يضغط عليه مديت ايدي بثقل عليه وانتبهت ع المغذي المركب بالكانوله ضغطت عليه ورجعت ايدي احس نفسي كربت بهالحركه ماكو مامرت دقيقة وكوم مال اطباء يحاوطوني مفهمت شي جان ازاد بينهم بس واكف بعيد شويه عيني عليه واتذكرت بابا صحته هوه اجه يمي وكلي اتصلت بي هسه يجي لتخافين...
_ليش هوه وين حته تتصل بي؟؟
_بالشقه غير
_وعلاجه شلون؟؟
ماحجه ودار وجهه
_ازاد باوعلي شكو؟؟؟ بابا بي شي؟؟
_لا مابي....
_احجي لعد ش......
طب بابا للغرفه وعيونه دم اتقرب مني وشبكني ويبجي مثل النسوان!!!
_حتخبل فهموووني شصاير؟؟؟
_الحمد الله ربي الف الحمدلله والشكر رجعتلي بنيتي سالمه....ولج يا سراوي جان وكفتي كلبي عليج يابعد كلبي والله ردت اموت لوما رحمة ربج....
_عسى يومي قبل يومك بابا لا تحجي هيج بس شكو غير افهم... جاوبني ازاد
_سرى ارتفع ضغطج بنص العملية واضطروا يوقفوها.... ساعتين عله ما رجع ضغطج طبيعي وخدروج مره ثانيه لان صحيتي بنص العملية الظاهر جسمج متحمل هالجرع ودخلتي يغيبوبه.... هالحجي قبل 7 اشهر
فتحت عيوني من الصدمه معقوله!! بس اني ما حسيت بشي بابا يا حبيبي طلعت صدك مأذيتك... مر الوقت واني رجعت تحاليل وفحوصات ديجيكون وضعي حته اطلع والحمدلله كلشي طبيعي وطلعت اني وبابا للشقه وازاد وصلنه بسيارته كأنه بزفه الله وكيلكم علكت اغاني ومعليتها واتمركص ازاد يذبله حجي ع ابو انه دكتور وفشله وتراج بتركيا مو بالكراده ومن هالسوالف وبابا يستغفر وكلساع يريد يطفي طبينا للشقه كأنما طبيت قاعة ركض شغلت سبيكر جبته وياي من العراق واعله شي ووو
والحلو يغازلني كاعد
الله يعين والله يساعد
خمسه وخميسه ياحاسد
ابعد خلي نعيش براحه
وهلا باليلعب جوبي
هلا برجال الجوبي
انوب انوب انوب انوب
واجر بابا من ايديه واتمركص هوه يمووت من هيج خفيه بس مامنعني ولا حته بين انه ضايج واني عايشه الدور شفت ازاد واكف يم الباب مصدوم رحتله وجريته من ايده وصار هوه من جهه وبابا من جهه ونركص جوبي بابا ابتعد لان ميعرف وعافني اني وازاد والافندي خبره ولا عبالك دكتور وثكيل... حييل اتونسه وازاد سجل اسامينه بسفره تفرنا كل معالم تركيا لمده 3 ايام جاانت فد شييي وصدك عدلت نفسيتنه وبعدين عزمنه بمطعم المدينه اسطنبول حيل مشهور كوداعيه لانه بعد اسبوع ونرجع للعراق.... جنت دا اشتري شغلات الي ولبابا من الاسواق وبالاخص انه 3 سنوات هنا خلتني اعرف الاماكن اللي تبيع رخيص اشتريت كوومه شغلات ملابس واكسسوارات وساعات وعطور وحته موبايل جان اكو مقابل السوق حديقه عامه وبيها بحيرة بالنص كعدت ع مسطبه استراح من الفرفره والدياحه وجان اكو رجال كاعد بالكاع كدام البحيره نص نايم مرتكز ع عكسه ويكرز حب ويشمر بالكاع الحركه مو غريبه حركه عراقيه بحته حقدت عليه شلون يوصخ الحشيش مد ايده دياخذ بعد حب لكه الجيس فارغ ابتسمت لاتلقائيا اشمت بي وجان يمد ايده ليكدام ويطلع جيس ثاني فتحه ورجع يكرز ويذب بالكاع كمتله وتخوصرت...
_كشور الحب ذبها ابيتك يا وصخ هذي ملكيه عامه واني ما اسمحلك تخربها يا....
_عمي ابو طبع اسأل عن سلامته وتكولين اني مو هيج....
_هاااااا عزه ازاد هذا انت؟؟
_لا ابويه..
_ليش هيج يا قذر هاي عود انت الدكتور الجبير...
_اكول كعدي واكلي نعل...
_لا راح اكل حب خليها النعل الك
خرب من ضحك وكال
_ولج انتي شنو هاللسان تره مو حلو البنيه هيج اسلوبها... ادلعي خلينا نحس بأنوثتج مو جنج إياز صاحبي
_خليت الانوثه الك
_رحم الله والديج يله ميخالف مقبوله منج الظاهر اليوم حاميه
_امممم ازاد سؤال..
_جوااب
_انت شكد عمرك؟؟
_38 سنه
_يااااا عجووز ليش لسه ممزوج؟؟
_منو كلج ممزوج؟؟
_محد كلي اني حسيت... ليش انت مزوج؟؟
_لا وليش ما ابالي الزواج
_هممممم من شوكت وانت بتركيا؟
_7 سنوات
_ما شفنه احد من اهلك هنا شنو عايشين بغير منطقه؟
_اني وحدي بتركيا اهلي كلهم بأربيل
_ليش عايفهم لعد؟
_مشاكل وياهم يلحون ع زواجي وامي حلفت ما ترضه عني اذا ما اتزوج...
_وعفت امك ما راضيه عنك ع مود زواج هاي وانت رجال!!!
_لا طبعا تزوجت اللي رادتها وحجزت لتركيا عبالهم رايح اني ومرتي شهر عسل
_اجيت وحدك وعفت مرتك؟؟ مو جنك ظلمتها
_جانت تدري مالي نفس بيها وسوتها عناد بيه والا تكدر من البدايه ترفضني
_و7 سنوات مو هواي تعاقب مرتك واهلك ع شي ميسوه
_بالبدايه جان قصدي اضل فد شهر وارجع بعدين عجبتني الوضعيه هنا ولكيتلي شغل بالمستشفى فقررت استقر خبرت اهلي وحجزتلهم حته يجون وما اجه ولا واحد منهم
_ليش؟
_لان عروستهم كالت ما اروح وعيب يعوفوها
_لا والله!!
_وداعتج
_وهاي صارلك شكد ماشايف اهلك؟؟
_يجون هنا سياحه واشوفهم قبل سنه يمكن اجوا
_ومرتك؟؟
_اطلكت من المحكمة غيابي قبل 6 سنوات
_شتسوالها هسه صارت مطلقه والعين عليها
_شعليه بيها اهم شي اني افتكيت
_همممم
_هسه اجه دورج بالتحقيق لو لا؟
_ههههه يلا براحتك
_شكد عمرج؟
_23 سنه
_يااا طلعتي بنتي
_هههههههه كمل بابا
_شمخلصه؟
_ شمخلصه يحضي مرحله اولى وصار الحادث يعني عندي بس شهادة الاعدادية
_مرتبطه؟
_اممم جنت مخطوبه قبل بس فسخنه
_ليش؟؟
_ طلع مو رجال وميستاهل
_ليش انتي هيج قوية؟
_الصدمات تخلي الانسان اقوى
راد يسأل بس دك تلفونه طالبي بالمستشفى ف ودعني وراح... خلص الاسبوع وصار وقت سفرنه ازاد وصلنا للمطار وضل ويانه لحد مصعدنه بالطياره وطبينه العراق شعور حلو كأنما رجعت لحظن امي مع العلم شكد تركيا حلوه وتخبل اخذنه تكسي للبيت جان كله تراب ووصخ ما اهتمينه نمنا مباشرة...كعدت الفجر نظفت قبل ليكعد بابا وطلعت تسوكت كومه شغلات عمود الثواب وجبت كيمر وكاهي وعسل وسويت جاي واشتريت صمون حار ريوك مثالي كعدت بابا وتريكنه هوه كعد ع التلفزيون واني نظفت غرفته ورتبت غراضه يجوز تستغربون ليش هيج وضعنه ومحد اجانه الجواب سهل عمامي بالكوت مقاطعين ابويه لان اخذ ماما وخوال ماعندي بس واحد وهم قاطعه لأبويه من صار الحادث... صارت تقريبا ب10 بديت اطبخ ثواب دا اوفي نذري سويت تمن وحشو وتشريب لحم ومركة فاصوليه وموز ولبن وقطع حلويات حطيتهن ببوكسات وخابرت ع عمي ابو نور اطمنه علينه وحته يوزعهن ع الناس الفقره... مر اليوم الاول والثاني والثالت كله طبخ واليوم الرابع زارونه بيت عمي ابو نور وعرفت نور وحسين تزوجوا بس لسه الله ما رزقهم بطفل لليل راحوا ومر الاسبوع عادي...
وكالعاده فلست ولازم ادور ع شغل بس قبله سويت تمن باقله وشويت سمج وفطائر ولبن وحمص بطحينه وتبوله وباذنجانيه وحلويات نوعين حطيتهن بعبوات ورحت دا اوديهن لاستاذ اسامه وهم اشكره وابشره وصلتله وشفته صاير شحاله ضعفان ومنتهي حسيت بي مريض بس مبينتله شي فرح لبابا وكيف ع الاكل وشكرني هوااي وخبرته ع الشغل وكلي اكدر اشتغل بنفس شركة الحوالات سابقا لان عدهم فرع ابغداد واني عندي رساله توصيه وشهادة خبره شكرته وطلعت... وره اسبوع وصلتني رساله منه انه اكدر اباشر بالشغل.... وره 5 اشهر توفه استاذ اسامه بالسرطان وحضرنه اني وبابا الفاتحه بعدها بأسبوع اجانه محامي اسامه الله يرحمه وكال انه اسامه الله يرحمه كاتب بوصيته مجموعه محلات وسياره النا طبعه المحل مالتنه نفسه بس انظافله المحلين البصفه وكذلك السياره بعت السياره وبفلوسها فتحت المحلات وبابا كعد بيهن وره كم شهر كدرت اشتري سياره جديده من فلوس المحلات واستمرينه ع هالوضع اني بشغلي وبابا بشغله مرت سنه تقريبا من رجعنه للعراق وبابا فاتحني بموضوع خطبتي جايه رجال ما ادري يمكن ساحره لابويه من كد ما يمدح بي اني مجان عندي مانع مدام بابا موافق بس عندي شروط اولا يعيش ويانه بالبيت وثانيا شوكت ما اريد اكمل دراستي اكملها وميمنعني.... وره يومين كلي بابا الرجال موافق ع شروطج وباجر يجيب السيد ويعقدلكم ثاني وكلت بابا وتم العقد تفاجأت من كلي بابا ع المهر 35 مليون وكيلوين ذهب ادري شعندي فاتحة محل صياغه مقبلت وخليته قرءآن بحجه وره كم يوم بابا خبرني انه خطيبي ديزورنه حظرت نفسي ودا اروح للصاله اتأكد كلشي تمام لكيت ازاد كاعد
_ازاااد!!!
شال راسه وابتسملي اقتربت منه وسلمت عليه بالإيدين بس هوه جرني وسوا سلام ابو البوسات ههههه يمكن اشتاقلي سألته
_شوكت رجعت؟؟
_بوفاة اسامه الله يرحمه
_هااا ما ادري بيك
_ ليش عمي ما كلج كعدنه وسولفنه
_لا يالخونه تتونسون من وراي
_متكشخه خيرج
نزلت راسي مدري ضايجه مدري محرجه
_انتظر خطيبي
_هااا انخطبتي؟؟ ع الخير بس مو جان لازم تنتظريني احنه شتفقنه ها منو الخاين هسه
ضحكت ع كيف وقلت
_اذا اضل وراك اعنس
_لا تره اني هم خطبت...
احس نفسي ضجت لان خطب بس مبينت شي لان عيب
_صدك ع الخير بس منو؟؟
_ راح اكلج بس مو تضوجين؟؟
_لا ليش اضوج...
كام ولزم وجهي وباسني انصدمت ودفعته وضربته
_يا ما تستحي يا قليل الادب يا ناقص والله لأكل لبابا عليك... بهالاثناء طب بابا
_خيركم شنو هالصياح؟
_بابا بابا ازاد باسني
_هههههههه عادي بابا حلال
_اكوولك باسني شنو حلال كوم طيح حظه
_بنيتي عادي شجاج
_عزه عادي شنو لا تكون تنتظره يسوي الاسوأ
_هههههه والله هوه شكله مستعجل عليج ازاد خرب من الضحك....
مستعجل شنو شديحجون ذوله وفوكاها ازاد يضحك وياه يعني يعرف شكوو......
_يااااااااااا ازاد خطيبي
_جا استوج دريتي يحظي
_يي والله
_شكد ثوله لعد...
درت وجهي ع ازاد وكتله طلعت حلال ضحكت وضحك هوه... وره شهر تزوجنه وحفلنه بسيط حظروا اهل ازاد بس تعاملهم رسمي... وره شهرين حللت وطلعت حامل ازاد راد يسقط الطفل لان خاف عليه لا يصعد ع كلبي واني مسويه عمليه بس طمنته وكتله بكلام الدكتوره ووياه كومه تسفيط جذب حته يصدكني صرت بشهر التاسع وجبت بس عمليه لان خافوا قلبي ما يتحمل... الطفل سميناه اسامه... وخلال هالفتره قدمت مسائي وكملت جامعه وازاد مقاطعني تماما ومن اخذ درجه متعجبه يهجرني بحيث حيل تحسن مستواي وين جنت انجح بالدفرات بعد 4 سنوات حملت مره ثانيه وبعد كم شهر توفه بابا واخذ روحي وياه... ع صدري حطيت راسه ولأخر لحضه طلعت روحه وهوه يدعيلي سوينه الفاتحه وتعبت وانهد حيلي اخذوني للمستشفى وصعدوني عمليات جنت بداية السابع طلع وليدي وسميته ياسين ع اسم بابا الله يرحمه وعشت اني وازاد حياتنه بأفضل شكل مرات اوكع بمطب واحس معجزه تجي وتطلعني منه متتخيلون شكد توفقت بحياتي كله من رضا ابويه ودعائه....
العبرة:
قبل لا تقرر تكسر بأهلك تذكر انه كلشي بهالدنيه يتعوض الصديق الحبيب الزوج وحته الابن الا الاب والام محد يعوضهم يجون مره بحياتك فلا تفرط بيهم لانهم طريقك للجنه
وتذكر ع طول ربك ميحملك حمل الا وانت كده دائما اتكل ع ربك وخلي وكيلك بكلشي واتذكر الآية (واصبر لحكم ربك فإنك بأعيننا)
.
.
.
رأيكم يهمني اول مرة اكتب🌸🌸
للكاتبه : hawra_alkhfaji