مش عارفه ريم توصل لـ اختيار طلعت ورقه الحظ وتلعبها وهى هتحدد هتروح لمين تقابله عملتها وكتبت ف ورقتين واحده لوهان والتانيه امير وقعدت لحظات تفكر ومدت ايديها واختارت ورقه وبصت على الاسم واتفاجئت وكان (امير) ...
ريم بملامح زعل: ماهو فعلا لازم امير علشان الورق ال عاوزه
لسه هتقوم ريم لاقت موابيلها بيرن بصت لاقتها رساله صوتيه من رقم غريب فتحتها "ريم انا لوهان ... سورى بجد انا اتاكد حجز الطياره وهكون عندك الساعه 10 مش 9 ومعرفتش اكلمك متاخر لانك اكيد كنتى نايمه وموبيلى فصل شحن فحبيت ابعتلك رساله من رقم تانى علشان متنتظريش كتير ف المطار لوحدك .... باى "
ريم من مفاجئه الرساله فرحت وحست براحه لانها ف الحالتين هتقابل الاتنين من غير ما تكنسل حد فيهم ...قامت جهزت واخدت اوراق ال عاوزها امير ونزلت وركبت العربيه مع السواق ووصلت ف الكافتيريا قاعده مستنيا امير و5 دقائق امير وصل ....
امير: روما وحشتينى
ريم باابتسامه: ان شاء الله تكون رحله مريحه بما انك هترجع كمان شويا
امير: اها قدامى ساعه ع ميعاد الطياره التانيه وفرصه حلوه اقعد فيها معاكى
ريم : تشرب حاجه
امير : قهوه
جت القهوه وامير بيبص ع ريم وريم باصه الناحيه التانيه: بجد كنتى وحشانى
ريم: ميرسى ...
امير: تعرفى ياريم انا نفسى تسافرى وتلفى معايا مبقاش لوحدى ... وتشوفى الصفقات والمكاسب اد ايه بجد جو تانى
ريم باابتسامه: لا شكرا... انا عاجبانى حياتى كده بسيطه ومش معقده بالارقام ... لكل واحد فينا حياته ال بيرتاح فيها
امير : بس انا بحس براحه لما بكون معاكى ...
ريم بصت ل امير وضحكت: لا احنا متفقناش ع كده
بصت ريم ع الساعه وكانت 9:30 : انا مضطره اقوم علشان عندى معاد هنا ف المطار ومش عاوزه اتاخر
امير: حد من صحابك ولا ايه
ريم: ايوه .. يلا خلى بالك ع نفسك واشوفك قريب
امير: عاوزه حاجه اجبهالك وانا راجع
ريم بصت ل امير وباابتسامه: انا لو قلتلك لا مش عاوزه هتجيب برضه ..لكن حقيقى انا مش محتاجه هدايا ..لكن انت بتعمل ال يريحك فبراحتك
امير : ال يريحنى انى اجبلك الدنيا بحالها
ريم: الدنيا فيها ناس تانيه عايش محتاجه ربع تمن هديه من هدايا ال بتجيبها وعندى احسن هما يستنفعوا بيها عنى لانى مش محتجاها
امير بيضحك: علشان كده دايما بتتبرعى بهدايا بتاعتى
ريم: لانى شم محتجاها وممكن غيرى يحتاجها
امير: برضه هفضل اشتريلك هدايا ومتحاوليش
ريم : اوكيه ..يلا سلام
امير: اوكيه.. سلام
راحت ريم سالت ع مخرج طياره ال جايه من كوريا ووقفت تستنى لوهان وشويا وصل لوهان مستخبى نوعا ما كاب ونظاره شمس ريم شاورتله وراح ليها :
لوهان با ابتسامه :Good Moring
ريم: Good Moring ..
لوهان بالكورى :وحشتينى
ريم: بتقول ايه
لوهان: بقول يلا نقعد نشرب حاجه
ريم: اوكيه يلا ...
راحوا قعدوا ف كافتيريا ...ريم :انت مسافر كندا ليه؟
لوهان تنح ثوانى: شغل .. الشركه بعتانى شغل المهم ايه اخبارك
ريم: تمام وانت
لوهان: تمام جدااا .. مش ناويه تيجى كوريا زياره فتره
موحشكيش تقعدى معانا والتخييم و...
ريم قاطعته: فعلا افتقدهم جدا خصوصا انى انا هنا مبخرجش خالص طول الوقت ف البيت ورامى كمان
لوهان: مدام انتى قاعده ف البيت هنا تعالى اقعدى هناك
حتى هتكونى جنبى ومعايا ..اقصد جنبنا يعنى
ريم بتضحك: اوكيه هشوف
لوهان :فكره ...الشهر جى ف احتفال الربيع كل سنه ف شهر 3 بيبقى ف كرنفال هيعجبك اوى ..ف كوريا بيحتفلوا ببدايه الربيع وتفتيح الزهور ..ايه رأيك تيجى تشوفيه وتحضريه وتجيبى رامى معاكى ..
ريم: اممم مش عارفه بجد وبعدين ع الترتيب دا انا ببقى كل شهر ف كوريا
لوهان: وايه المشكله ممكن ابعتلك انا تذكره لو معكيش فلوس
ريم بتضحك: لا مش لدرجه دى... بجد انت جى ترانزيت انا ع ما اعرف فى سفر مباشر من كوريا لكندا ازاى تنزل لندن ترانزيت ... فى سبب جيت علشانه
لوهان: اها ..فى سبب مقدرتش اعمل كنترول عليه
ريم: ايه هى
لوهان بالكورى : ضحكتك وحشتنى
ريم مفهمتش: بتقول ايه
لوهان بسرعه طلع ظرف من جيبه :اقصد ان دا تبرع لجمعيه بما انك بتروحى وانا بقالى فتره مش جيت فنيابه عنى وديهالهم وانا كاتب جواب ف الظرف لادره الجمعيه وهما هيتصرفوا ....
ريم : اوكيه
لوهان: احتفال الربيع هتيجى
ريم: هشوف
لوهان عمل وعد الخنصر بصباعه: توعدينى انك هتيجى
ريم : حياتك كلها وعود كده ..خلى بالك فى وعود مستحيل تحصل
لوهان: مفيش مستحيل قدام الاراده وانا بنفذ كل وعودى الدور عليكى ها توعدينى
ريم فردت صباعها الخنصر وباابتسامه : اوعدك هحاول
لوهان بص ع الساعه: يا دوب الحق شكرا على النسكافيه
ريم سلمت عليه : رحله سعيده
لوهان باابتسامه: اشوفك قريب
مشى لوهان وبيخبط ناحيه قلبه ال بيدق وهو بيبص ع ريم وبيعمل ليها باى باى وهى بتقول: مجنون ...
رجعت ريم ع البيت وهى مبسوطه انها شافت لوهان ورجعت ع اوضتها وكان رامى ف المدرسه ..وهى قاعده وحاطه سماعات MP3 فى ودنها مامتها خبطت ع الباب ودخلت :
حنان: ريم
ريم شافتها : ايوه
حنان : وصلتى الورق ل امير
ريم: اها ..
حنان:وهو عامل ايه
ريم بتضحك: اكيد كويس مش بيكلمك وبتكلميه اكيد مش مستنيه اطمنك عليه من نص ساعه شوفته فيها
حنان اتحرجت: طيب فاضيه
ريم بتضحك: يعنى ورايا ايه ..عاوزه حاجه ؟
حنان : عاوزه اقعد معاكى شويا انزلى نقعد ف الجنينه شويا
ريم: اوكيه ثوانى وهحصلك
شويا ونزلت ريم وقعدت مع مامتها لاقتها جايبالها عصير الفراوله ال بتحبه
ريم مبتسمه: عزمانى ع عصير ف الجنينه ايه الرضا دا
حنان: وعملهولك بنفسى
ريم قعدت: ميرسى كتيرر
حنان باصه لريم وريم لاحظت : ايه يا مامى انتى عاوزه تقعدى معايا ولا تتفرجى عليا
حنان: فرحانه انى شيفاكى ..
ريم بتضحك : لدرجه دى مكنتش بتشاف ولا ايه
حنان : الفتره ال فاتت قبل سفر رنا وبعدها كنتى غريبه معانا
دايما لوحدك ومش بتتكلمى معانا وضحكتك مكنتش بتبان ودايما حزينه .. دلواقتى بقيتى احسن بكتير وغاده طمنتى انك بتتحسنى بسرعه ودا مفرحنى جدااا
ريم: الحمد الله ..هو مشوار وهمشى فيه لسبب واحد انا عاوزه اخف
حنان : ان شاء الله هتخفى وهتبقى احسن ...
ريم: ان شاء الله
حنان : احم... طيب فى السكه وانتى ماشيه فى مشوارك يبقى احسن لو كان معاكى ونيس..شريك
ريم : ازاى يعنى
حنان: يعنى شخص ياخد باله منك .. يساعدك فى مشوارك يحسس انك مش لوحدك و...
ريم فهمت كلام حنان : اه... انتى عاوزانى اتجوز
حنان لاحظت ريم فهمت : هو فى حل غيره وامير مستنى
ريم حطت الكوبايه العصير ع الترابيزه وبتحاول تتمالك نفسها متتعصبش : تانى يا مامى .. مش احنا قفلنا الموضوع دا ...انا مش هتجوز انا مش عاوزه اتجوز دى حريه واختيارى ..
حنان: يا حبيببتى بهدوء كده ..امير ماله عاوزك ومستنيكى ومحافظ ع فلوسك ومالك ومين غيره ..
قاطعتها ريم بعصبيه: مين غيره هيستحملك علشان عارف ظروفك وحالتك وانك لسه تحت العلاج ومين غير هيرضى يتجوز مريضه نفسيه مش كده
حنان: لا مش قصدى كده
ريم بصت لمامتها : مامى ... انا مش عاوزه اتجوز مش هتجوز خالص
حتى لو خفيت مش هتجوز وامير تعشيمكم ليه هو ال مخليه مستنى
انا ناهيه الموضوع معاه لكن تعشيمك انتى ورنا ليه مخليه مصمم ع كلامه ..ذنبه ف رقبتكم انه بيضيع عمره ف انتظار حاجه مستحيله
حنان: امير مش مستنى حد يعشمه هو من زمان مستنيكى
وع فكره هو كلمنى وطلب منى افاتحك تانى بعد ما لاحظنا تقدمك ف العلاج بقى احسن وسألت غاده وقالتلى عادى اتكلم معاكى
ريم: امير ال كلمك ..اوكيه تمام لان الموضوع بيكبر وبياخد حجم مش حجمه هيبقى الكلام مباشر بينى وبينه وبعد اذنك يا مامى اخرجى منها دى حياتى ودى قراراتى بليز وشكرا ع العصير
قامت ريم مشيت ومامتها مااخدتش الرد ال هى عاوزاه
تانى يوم وهما قاعدين فريد اتصل ب حنان عرفهم ان رنا تعبت وراحت المستشفى وعملت عمليه اجهاض وسافرت حنان هى وريم تانى يوم يطمنوا ع رنا وراحوا وقعدوا يومين بالظبط ورجعت ريم لما اطمنت ع رنا
علشان رامى لوحده وبعدها بيومين رجعت مامتها ..وف اليومين دول كان لوهان مش موجود ف كوريا كان مسافر ولان اجازه ريم قصيره جدااا وعدته انها هتيجى تحضر معاهم احتفالات الربيع .....
فى يوم رجع رامى من المدرسه وراح ع ريم ع طول ونزلوا اتغدوا مع بعض وطلعت ريم تذاكرله ..
ريم: امتحانات الميد تيرم الاسبوع الجى
رامى: ايوه
ريم : عاوزه انا Full marks
رامى : اممم ولو حصل هتجيبلى ايه
ريم: هديه انا واثقه هتعجبك اووى
رامى اتحمس: بليز ايه هى شجعينى علشان اذاكر كويس
ريم: هنروح ل رنا نطمن عليها ونقعد اسبوع ايه رأيك
رامى فرح: بجد يا ريم وهنقابل صحابى
ريم: صحابك مين
رامى بتلقائيه: ادمز ومريم ولوهان اصحابى
ريم ضحكت: هما بقوا اصحابك خلاص
رامى: يس
ريم: خلاص هات ال full marks علشان تروحلهم الا بقى هروح لوحدى
رامى : بليز يا ريم خدينى معاكى انا هجيب النتيجه وهتشوفى
ريم بتضحك: اوكيه يا بيبى
مر يومين وريم قاعده مع مامتها فى اوضه المعيشه ورامى جنبها فاتحه اللاب وبيتفرجوا ع فيديوهات الباب خبط وفتحت الشغاله وكان امير .. دخل وباابتسامه كبيره .. امير: مساء الخير
رامى شاف امير قام جرى حضنه: امير ويلكم باك وحشتنى
امير: انت كمان يا رامى
ريم: حمد الله ع السلامه
امير مبتسم: الله يسلمك
حنان : جيت بدرى احنا كنا فاكرينك اخر الاسبوع
امير: لاقيت مش عندى حاجه مهمه قلت فرصه انتهزها اقعد معاكم اكتر
رامى: جبتلى ايه معاك وانت جى
ريم وشوشت رامى : هيقولك اشترالك حاجات اول ما شافها قال اكيد معموله علشانك
امير: جبتلك هدايا هتعجبك اوى اول ما شوفتها قولت دى اكيد معموله ل رامى حبيبى وطبعا منستش ريم وطنط وبابا
ضحك رامى وريم لما سمعوا امير ..
امير: فى حاجه ولا ايه قلتلها بتضحك
ريم: لالا ابدا انا ورامى افتكرنا حاجه كنا بنتفرج عليها قبل ما تيجى مش كده يا بيبى
رامى بيكتم الضحكه: ايوه
حنان: ميرسى يا حبيبى .. هقوم اقولهم يجهزوا الغدا نتغدا مع بعض وعاصم فى طريق جى
امير: ياريت ل احسن اكل البيتى وحشنى جدااا
قامت حنان وريم فضلت تقلب ف اللاب توب ..
امير: انتى عامله ايه يا ريم
ريم قفلت اللاب: الحمد الله
امير : انا سمعت انك بتروحى كوريا كتير ..
خلاص هتاخدى الجنسيه كده ولا ايه
ريم: يعنى تغيير جو ومنها بنطمن ع رنا
امير: زعلت جداا لما عرفت خبر ان الحمل مكملش
ريم: ربنا هيرزقهم ان شاء الله ..وبعدين الجو هناك مشجع لنفسيتها
رامى:اها ... الجو هناك ممتع اوى وادمز ومريم ولوهان بيخرجونا ف اماكن كتيره لما بنروح هناك
امير: مين دول
رامى: اصحاب روما فى كوريا بقوا اصحابى وخصوصا لوهان
امير بيضحك: بقيت بتتكلم كورى يا رامى
رامى: لا احنا هناك بنتعامل بالانجليش ومريم بتتكلم عربى
امير : واضح اووى ان ال هناك واخدينكم عن ال هنا
ريم :انا هقوم اجهز مع مامى الاكل
امير : مش هتشوفى هدايا ال جبتهالك
ريم: اكيد جميله ومش محتاج رائى دايما بتشترى اغلى الحاجات
والماركات كل الناس بتتمنناها
امير: الغالى بيروح لغالى يا روما
ريم: ميرسى
رامى: فين هدايا بتاعتى عاوز اشوفها
امير: اوكيه اوكيه
وفضل امير يبص ع ريم وريم ملاحظه وعامله مش واخده بالها ...
شويا وهى قاعده ف اوضتها امير خبط ودخل ومعاه الشنط الهدايا
امير: لاقيتك نسيتيهم تحت قلت اطلعهملك
ريم : ملوش لازمه تتعب نفسك سوسن كانت هتطلعهم
امير: مش هتشوفيهم
ريم: بعدين ..وغير كده انا قلتلك رائ
امير : ريم انا كنت عاوز اقولك حاجه
ريم: اتفضل
امير متردد : تفضى نفسك بكره ممكن
ريم: ليه
امير: فى عشا بزنس بكره حفله صغيره معزوم فيها وعاوزك تيجى معايا
ريم بتضحك: انت جيت بدرى شغل مش علشانا بقى
امير اتحرج : بصراحه الاتنين ووكانت فرصه
ريم: اها ربنا يوفقك
امير: ممكن ولا فيها ازعاج ليكى ..انا عرفت انك مبقاش عندك مشكله مع الاماكن الاضاءه فيها خفيفه يعنى الدنيا بتتظبط عندك للاحسن
ريم اتبسمت: مش اوى بس الحمد الله
امير : يعنى اعتبرك موافقه
ريم: اوكيه مفيش مشاكل
موبيل ريم رن وكانت رساله بصت ريم عليها بسرعه وخبت الموبيل
امير مد ايده بشنطه من الشنط : اسيبك انا دلواقتى وياريت تلبسى الفستان دا بكره
ريم: اوكيه
امير :ميعادنا بكره اوكيه
ريم: اوكيه
خرج امير ومسكت ريم الموبيل وردت ع لوهان وابتدت محادثه معاه بالرسايل وع وشها علامات السعاده ..!!
فى الميعاد المحدد تانى يوم جهزت ريم ومستنيه امير
امير شافها بالفستان والميكب اذبهل مكانه قرب منها : برنسيس ريم
ريم بتضحك: مش اوى يعنى انت ال قولتلى البس كده
لو كان ينفع البس كاجوال كنت لبست
حنان: قمر يا روما يا حبيببتى
ريم: شكرا
امير: يلا بينا
ريم : يلا بينا
خرجت ريم وامير وحنان واقفه باصه عليهم والابتسامه ع وشها دخلت قعدت والابتسامه ع وشها .. عاصم شافها وقرب منها : ايه السعاده ال ع وشك دى فرحينى
حنان: ريم وامير شكلهم حلو اوى مع بعض يارب يجمع بينهم وافرح بيهم
عاصم: لو ريم عاوزه يا حنان مش انتى عاوزه
حنان قلبت وشها : حاضر ياعاصم هسيبها ف حالها
بس انا واثقه انها مهما لفت مش هتلاقى زى امير ونصيبها مع امير
عاصم: ريم ال تقرر ويلا بينا نتعشى
حنان : حاضر
مشيت ريم وامير فتحلها باب العربيه وقعدت ووصلوا المكان وريم مش مرتاحه حاسه انها غريبه متعرفش حد لكن انتهزتها فرصه تتكلم مع امير بعيد عن البيت دا كان هدفها ف الخروج .... وهما داخلين القاعه ال فيها الحفله حاول امير يمسك ايدها هى بعدت عنه ..فـ امير طلب ريم تحط ايدها ف دراعه راحت حطت طرف صوابعها منعا لااحراج والمنظر العام .... وهما داخلين امير سلم ع صاحب الحفل وريم هزت راسها
امير: اعرفكم خطيبتى
ريم سمعت تنحت ل امير : خطيبتك
صاحب الحفله: جميله خطيبتك هى دى ال بتتكلم دايما عنها
امير بص ل ريم: مهما اتكلمت مش هقدر اوصفها
مرات صاحبه: ممكن اخطفها منك اعرفها ع الموجودين
امير باابتسامه: طبعا طبعا
ريم بملامح دهشه ومفاجئه من تصرف امير وف نفس الوقت مش عاوزه تسبب احراج ل ل امير ولا ل اصحاب الحفله اتحملت وسكتت لغايه ما تروح وتتكلم معاه .... اتكلمت شويا مع مرات صاحب الحفله وكان فى ضيوف اجانب وزوجتهم واتكلمت ريم شويا معاهم وشويا سابتهم و راحت ريم قعدت ع تربيزه وامير شويا وجه ليها : وشك حلو يا ريم
العقد ال كنت قلقان انه ميتمضيش هيتمضى بعد بكره فى الشركه
ريم: مبروووك
امير: مبرووك ليكى انتى كمان ماهى فلوسك
ريم: بس مجهودك مبروك عليك
امير: عاجباكى الحفله مدام ليزا بتشكر فيكى اوى
ريم: اها الحفله كويسه
امير : مالك يا ريم فى حاجه
ريم لسه هتتكلم راح واحد نده ع امير : ثوانى وراجعلك
ريم : اوكيه
قام امير ووقف يتكلم مع رجال اعمال وابتدا عرض يشتغل والاضاءه خفت
وريم كانت قاعده بعيده يعتبر شبه ضلمه قلبها اتقبض وحست انها هتتخنق وهتتعب ..فى اللحظه دى افتكرت لوهان ويوم السينما وانه قال عدى 1 2 3 وامسكى ايدى وكله هيكون تمام ... فعلا هدت نفسها ريم وتخيلت لوهان قاعد جنبها وانها مسكت ايده وفعلا توترها راح وكانت مبسوطه.. اتفاجئت لما الاضاءه اشتغلت وبصت جنبها لاقت انها بتتخيل .. ااستغربت من نفسها وامير واقف شايفها وعلشان بيتكلم لما خلص كلام رجعلها
امير: انتى كويسه انا شوفتك مغمضه عينك لحظات قلقت
ريم: انا تمام ..تمام
امير: طيب يلا بينا نروح
ريم: ياريت علشان صدعت
امير بيضحك: ال يسمع كده ميقولش انك طول اليوم سماعات mp3 ف ودنك وميوزك عاليه
ريم: ميوزك حاجه ورغى حاجه تانيه يلا بينا
امير :يلا بينا
وهما راكبين العربيه ريم طول الطريق مغمضه عنيها بتحاول تهدى من الموقف لغايه ما وصلوا البيت
امير: تصبحى ع خير
ريم: امير ممكن 10 دقايق
ريم: اوكيه
قعدوا ف الجنينه .. امير : خير يا روما
ريم هدت نفسها : ممكن تفسرلى ال حصل دا اسمه ايه
امير بيضحك: هو ايه ال حصل
ريم : امير.. بلاش ذكاء رجال الاعمال دا عليا ... ايه تعريفك ليا بخطيبتك
هو علشان كده جبتلى الفستان دا وصممت البسه
امير : بصراحه ملقتش تعريف احسن من كده ..اغلب الموجودين معاهم زوجاتهم وخطيباتهم فلاقيت نفسى بقول كده من غير ترتيب صدقينى
ريم: من غير ترتيب ..اوكيه اوعدينى مش هتتكرر تانى ..لان كده ممكن تخلينى مخرجش معاك تانى
امير : ريم هو انتى لسه شايله من ال سمعتيه زمان
ريم: ايه بالظبط
امير: ال سمعتيه من كلامى مع فريد
ريم افتكرت: ياااااااااه لا طبعا انا نسيت زى ما قلتلك
امير: طيب ليه مش بتوافقى ع ارتباطنا هو انا فيا حاجه غلط
ريم : امير احنا قفلنا الموضوع.. انت مش فيك حاجه غلط الغلط دا فيا انا ... حرام تربط نفسك بيا كل دا انا قلتلك عيش حياتك وعلاقتنا واضحه اهى انت عيلتى .. وبليز متسمعش كلام مامى وعيش حياتك .. بلاش نخسر بعض ف علاقه الكل عاوزها واحنا لا
امير: بس انا عاوزها ومصمم عليها
ريم بتاخد نفس : صدقنى انا مبفكرش ف الارتباط ..
امير: يعنى وعدك لسه موجود
ريم: وعد ايه
امير: انك لو فكرتى فى الارتباط هكون انا اول حد تفكرى فيه
ريم: دا لو كنت موجود
امير: انا هستنى ياريم هستناكى ...
ريم: امير نصيحه منى متبنيش احلام ع الهوا وعيش حياتك ..تصبح ع خير
ريم خلصت كلام مع امير وطلعت اوضتها وكانت الساعه 11 بليل
وبتبص ع الموبيل لاقت رسايل ومكالمه من لوهان ... بعتتله انها كانت مش فاضيه وغيرت ودخلت ع السرير ومش عارفه تعمل ايه مع اصرار امير فكرت انها تروح ل غاده لكن غاده كانت مسفره شهرين وراجعه ومحبتش ريم تتكلم معاها تليفون واستنت لما ترجع افضل ...!!!
امير كان قاعد ف الجنينه مطلعش وكان بيشرب سجاير وبيفكر
سمع من وراه صوت باباه : انت صاحى لدلواقتى بتعمل ايه
امير طفى السجاره: بابا انت لسه صاحى
عاصم قعد جنب امير : كنت بخلص شغل ف المكتب سمعت صوت العربيه عرفت انكم وصلتوا ..وشوفت ريم طلعت من شويا وانت مكانك قاعد ...
امير: شويا وهطلع انام انا
عاصم: امير ..انا مكنتش قاصد اسمع حواركم مع بعض
بس عاوز اقولك حاجه
امير: اتفضل
عاصم: فى حاجات كتير مش بتحصل من الضغط ..المشاعر بتحصل تلقائى ..وفى فرق بين المشاعر والبيزنس.. يعنى صفقه دخلتها بتصمم عليها وبتحارب علشان تكسبها وتبقى لصحالك لانك بتبقى عارف حدودها ومتطلباتها ايه وواضحه انما المشاعر دى مجهوله صاحبهابس ال يعرفها وهو ال يقرر اتجاهها فين ولمين .. المشاعر لو مش متبادله هيبقى الصفقه فاشله وتضيع وقت ... ركز ف شغلك وبلاش ضغط ع ريم لان الضغط ممكن يزود الرفض وتخسرها ..
امير: بابا انا ....
عاصم قاطعه : انت بتحب ريم ؟
امير : ريم مناسبه ليا زى رنا ما مناسبه لفريد
عاصم: ريم مش زى رنا الاتنين اخوات لكن مختلفين ..زيك انت وفريد
سيب ريم تعيش ع راحتها تاخد قرارتها بنفسها من غير ضغط ... وكلامك مع حنان وانها تضغط عليها مش هتكسب منه حاجه بالعكس ممكن تخسر كتير ... لان ريم ووضعها مختلف عن اى بنت وال مرت بيه كان كتير عليها ... فكر انت تكسبها ازاى قبل ما تعرض عليها الارتباط ...وعاوز اقولك حاجه قبل ما اقوم
امير: اتفضل
عاصم: ريم عيلتى ..ريم بنتى ومش هسمح لحد ل اى حد يأذيها وترجع زى ما كانت مهما كان مين يا امير فاهمنى وانت ابنى ويهمنى ولادى اشوفهم سعداء فى حياتهم بقرارتهم واختيارتهم مش مجبورين ...يلا تصبح ع خير
امير متفاجئ من كلام عاصم : تصبح ع خير
امتحن رامى ونتيجته كانت كويسه جدااا استأذنت ريم من عاصم ووافق انها تسافر هى ورامى اجازه اسبوع واحد ويرجع وحنان كان رافضه يسافروا لوحدهم لانها مشغوله لكن عاصم سمح ليهم يسافروا لوحدهم .... سافرت ريم ورامى كان مبسوط اوى هيشوف فريد ورنا وهيشوف اصحابه ادمز ومريم ولوهان .....!!!
وصلت ريم ومريم كانت ف انتظارها وشويا نزلت ريم راحت مع مريم ورامى المطعم تسلم ع اصحابها ال تعرفهم وتسلم ع مامتها وباباها وبعدها خرجت هى وادمز ومريم ورامى وقابلوا لوهان ف كافيه تانى لما خلص شغل
وبعد السلامات والكلام شويا لوهان جاله تليفون وخرج يتكلم وهما قاعدين كان ف فيديو كليب شغال شد انتباه ريم وشافته ..:
ريم: المغنى دا شبه لوهان جدااا ..بجد حيره انتم هنا شبهه بعض خالص
مريم وادمز بيضحكوا : بجد
ريم: اها ..يعنى فعلا دا شبه لوهان والاغنيه حلوه
مريم : ماهو فعلا لوهان
ادمز: مريم
مريم: ماهو لازم تعرف مش اسرار حرب يعنى
ريم: تقصدى ايه ..ان لوهان دا ..بيغنى ..
م ريم شاورتلها ع الكليب: زى ماانتى شايفه
وفتحت الموبيل بتاعها وجابت اغانى من فرقته: ودى اغانيه
ريم متفاجئه ازاى هو مغنى مشهور ومقلهاش حاجه افتكرت لما كانت ف الحديقه وشبهت ع بوستر ليه والبنات بتتصور جنبه وهما استخبى وعرفت انه ليه دايما بيبقى شبه مستخبى ملامح وشه مش باينه ..
مريم: لوهان ميقصدش يخبى عليكى بس مجتش مناسبه صدقينى
ادمز: فعلا دا ال حصل ..ورغم انه ممكن يتمسك لو اتشاف بصوره والناس تتجمع حواليه كان بيتجنب الاماكن المزدحمه علشان يبقى براحته ..علشان كده دايما تلاقيه مستخبى ف هدومه .. لكن علشان يحسسك براحه بقى يتواجد زى ماانتى شايفه
ريم : اوكيه ..محدش يقوله انى عرفت
رجع لوهان وقعد: ها طلبتوا حاجه
ريم : لوهان فى حاجه عاوزه اوريهالك ممكن واخد رأيك
لوهان: بالتاكيد
شغلت ريم الكليبات : ايه رأيك
لوهان بص ع اغانيه اتفاجئ وبص ع مريم وادمز لاقاهم بيضحكوا بص ع ريم لاقاها مبتسمه : ها ..ايه رأيك
لوهان بلجلجه: ريم ..انا
ريم اخدت الموضوع ببساطه بعد مافهمت من ادمز ومريم وعلشان حست ان لوهان مش قاصد يكذب عليها ..: كان عادى انك تقولى انت وضعك ايه هنا ع الاقل مكنتش احرجك باسئلتى انا معرفش الميديا هنا الممثلين والممطربين والكى بوب معرفهمش كنت عرفنى ع الاقل متحرجش ويضحك عليا كده ..واسببلك ازعاج وانك تكون ف اماكن انت مش حاببها ومتبقاش ع راحتك فيها
لوهان: صدقينى كنت هقولك وغير كده انا ببقى مرتاح وانا معاكى اقصد معاكم وكله تمام
ريم بتضحك: مفيش مشاكل..وحاجه كويسه ان ليا صديق مغنى مشهور
لوهان :افهم من كده عجبتك الميوزك
ريم باابتسامه : جداااا
لوهان فتح موبيله : هسمعك كام سونج حلوه كلماتها كورى بس الميوزك حلوه وهفهمك معناهم انا ..
ريم باابتسامه: اوكيه
وكملوا القعده وعدت ريم الموقف ولا حصل حاجه لانها شايفه ال لوهان بيعمله واضح انه انسان ميضرش حد ابدا ولوهان اطمن انها مزعلتش منه ....!!!!
فريد من وقت اجهاض رنا ومبقاش يسيبها لوحدها اغلب الوقت
رجعت ريم البيت هى ورامى وكانت رنا وفريد قاعدين مستنياهم
بيتفرجوا ع التليفزيون ورنا نايمه فى حضن فريد وهما بيتفرجوا
رامى : واضح يا ريم اننا جينا ف وقت غير مناسب
ريم بتضحك: اه فعلا اعمل نفسك مش هنا ويلا ع الاوضه
رنا وفريد بيضحكوا : تعالوا هنا
ريم: احم احم نعم
فريد: رايحين فين تعالوا اتفرجوا معانا
ريم: لا شكرا الفيلم دا ليكم انتم احنا ملناش ف الحاجات دى
رامى: اها ..ملناش ف الحاجات دى
رنا: احرجتونى
ريم ضحكت ..فريد: ريم ضحكتك حلوه متخليهاش تغيب كده ..انا لو كنت شوفتها قبل رنا كنت حبيتك انتى
رنا بتخبط فريد ف كتفه ا: اه منكم يا رجاله بعد ما تعملوا العمله ترمونا كده
ريم : مين دا يا رنا ..فريد بيهز بس واضح السياسه خليت فريد ميركزش شويا ...
فريد: الله ..الله انا وقعت بينكم الحقنى يا رامى
رامى بيبص ل ريم: روما ال هتقرر الحقك ولا لا انا معاها
رنا : زنقت نفسك بينا شوف هتهرب ازاى
ريم: دور ع حل دبلوماسى
ضحك فريد وقعدوا: بجد بيوحشنى القعده معاكم وبفرح اوى لما بتيجوا هنا بتعملولنا حس بجد
ريم:ان شاء الله ربنا يرزقكم عن قريب بال يعملكم حس ليل نهار
رنا: يارب
ريم: ان شاء الله متقلقيش
ريم:يلا نسيبكم تكملوا قاعدتكم وننام احنا يلا يا رامى ادخل نام علشان بكره تبقى فايق ولا مش هتنزل
رامى : لا اكيد انا وعدت لوهان هكون موجود
رنا: لوهان ..الاسم دا سمعته كتير لدرجه عاوزه اشوفه
ريم: رنا ركزى مع فريد كفايه عليكى ها
رنا: هههههههه يارب اشوفك زى مركزه كده يارب عن قريب
ريم: ف المشمش
رنا: امير مستنى اهو بس انتى توافقى
ريم بملامح ضيقه: رنا .. انا داخله اخد شاور وانام ..
رنا: مش هتتعشى
رامى: اتعشينا ومقفولين
ريم باابتسامه: تصبحوا ع خير
دخلت ريم ورامى الاوضه ...فريد: رنا ..احنا اتفقنا انك مش هتفاتحى ريم تانى ف موضوع امير سيبها تاخد قرارنا وهى ال تقرر بلاش ضغط عليها
رنا: عاوزه اطمن عليها ومامى مش عارفه تتكلم معاها
فريد: الجواز مينفعش ضغط فيه لا منك ولا من مامى ولا من امير ...سبيها ع راحتنا احنا كنا فين وبقينا فين ..توعدينى
رنا: اوكيه اوكيه
تانى يوم نزلت ريم مع مريم ورامى وقابلوا ادمز واصحاب ليهم قضوا النهار مع بعض من غير لوهان وقرب الجو يليل راحوا الكرنفال عند نهر الهان وهما واقفين واتفرجوا ع كام عرض ريم كانت حاسه ف حاجه ناقصه لغايه ما لوهان وصل وحست بكده ان اليوم اكتمل لانها اتعودت كل خروجه ف كل مكان لوهان موجود .. بقى شئ اساسى فى يومها .. وهما واقفين ولعوا العاب ناريه وكان المنظر جميل وصواريخ ف السماء والاضاءات كان المنظر روعه بالنسبالها ..
ريم: مكنتش اتوقع انه هيبقى بالجمال دا بجد روعه
مريم: مش قولتلك ابقى اسمعى كلامى انا بنت هنا وعارفه كل حاجه
لوهان بيضحك ..وميل ع ريم:مش قولتلك هيعجبك ..وعاوز اقولك المكان جميل علشان انتى موجوده صدقينى
ريم بتضحك: بلاش مجاملاات المنظر والكرنفال تحفه
مريم: رامى تعال معايا نروح نشترى ايس كريم عاوزه يا ريم
ريم: لا مش قادره هستناكوا هنا
مشيت مريم ورامى وادمز
لوهان كان راح يجيب حاجه يشربوها .. لوهان: اتفضلى
ريم بصتله .. لوهان : حلال مصنوع من حاجات مسموح تشربيها
ريم ضحكت : شكرا
لوهان : الجو جميل اووى
ريم بسعاده : فعلا مكنتش اتخيل انه جميل بالشكل دا بصراحه حياتى
اختلفت جدااا من وقت ما جيت هنا وعرفت مريم وعرفتك حاجات كتير شوفتها وعرفتها معاكم وانت يا لوهان السبب الرئيسى ال بتكمل كل حاجه معايا وبتسهلى كل حاجه ومفيش حاجه عاوزه اعملهاغير وانت بتنفذها ع طول بجد مش عارفه اردلك جزء من ال بتعمله ..بجد انا مبسوطه انى ليا صديق زيك
لوهان مبتسم وشايف ريم وهى مبسوطه: انا مش عاوز اكتر من كده
ريم : هو ايه
لوهان بالكورى : شروق الشمس
ريم: تقصد ايه ؟
لوهان :ضحكتك متختفيش ودايما اشوفها
ريم : بجد انا مبسوطه انا عمرى كله محسيت بالاحساس دا
لوهان : واحنا قاعدين كده تيجى نلعب لعبه
ريم : اوكيه
لوهان: الصراحه
ريم: ازاى
لوهان: كل واحد يسئل التانى سؤال ويجاوب بصراحه
ولو مفيش اجابه هيبقى ف عقاب
ريم: والعقاب ايه ؟
لوهان : اممممم لاسعه ع الايد
ريم: اوكييه
ريم: اسئل
لوهان: انتى مرتبطيش قبل كده
ريم ضحكت: تعتقد الاجابه ايه
لوهان: اعتقد ايوه ... انسانه فى جمالك وروحك الحلوه والدفئ ال جواكى
وابتسامتك الجميله ازاى ال يشوفها يسيبها ...
ريم بتضحك: ايه كل دا كده اوفر ..
لوهان: ليه انا بتكلم بجد
ريم: لا محصلش انى ارتبطت
لوهان: يعنى لما كنا بنلعب لعبه لا اكذب كان بجد مقابلتيش حبك الاول
ريم: ايوه
لوهان متفاجئ: ليه
ريم اخدت نفس : ببساطه كده وبااختصار ال يرتبط بيا او ال انا احبه
هيكون انسان غير محظوظ اطلاقا ... وبعدين انا مبفكرش فى موضوع الحب انا مش عارفاه محستوش قبل كده علشان احتاجه كفايه عليا الصداقه تعويض عن الحب واعتقد انه افضل منه
لوهان: ازاى
ريم: فى الصداقه كل حاجه متاحه بحدود وانا ببقى عارفه حدودى وال قدامى عارف حدوده فبنتعامل بمنطلق كل واحد يتعامل بوضوح من غير متطلبات من التانى غير الصراحه والصدق والمساعده ..وانا فى لندن كنت مطبقه النظريه ديه وكانت سبب بمعرفتى بناس كتير احترموا صداقتى
وكانت سبب فى خسارتى لناس كتير .. انا مبحبش اظلم حد
لوهان: بس الصداقه بتتحول لحب
ريم: يبقى كده بالنسبالى العلاقه وصلت لمنتهى لا صداقه ولا حب
لان انا بتعامل بصداقه لانى معرفش ايه حب وحرام اعذب ال معايا وال قدامى هيعاملنى بحب ودا عذاب ليه انا مش برضاه واكيد فى واحده غيرى تستاهل تعيش الحاله دى عنى ....
لوهان : علشان كده بتقطعى علاقتك باى حد يعدى حدود
ريم : بيبقى دا حل افضل ليا وليه.. وايه كل دا انت بتقررنى
لوهان بيضحك : فضول سورى .. اسئلى
ريم : اممم نفس السؤال قابلت حبك الاول امتى وحصل ايه
لوهان: ايه الثقه ف السؤال دا انى فعلا لاقيته
ريم: اى شاب بيقابل حب وبيرتبط طبيعى
لوهان: لا مش طبيعى
ريم : لا بجد
لوهان: اممم ممكن تقولى مقابلتش حبى الحقيقى مش الاول..
ريم: ايه الفرق بين الاول والحقيقى
لوهان اخد نفس : الحب الاول بيبقى الاول ف كل حاجه احساس ولمسه وبوسه ... بيبقى بدايه لمعرفه الحب بيعيش مع البعض وبيتنسى مع البعض بحب تانى اقوى وهكذا ...
ريم: والحب الحقيقى
لوهان: هو الحب المعمر ال بيعيش ومبيموتش ابدا بيبقى جزء من حياتنا مهما طالت سنين مبيتأثرش ولا فى حد بياخد مكانه بيبقى هو الحياه لينا ... هو الحب ال يخلى قلبى يدق من غير ما احس .. يشدنى لاانسانه من غير ما افكر وجودى معاها يطمنى ومش احتاج لحاجه تانى .. ببساطه هى تكون سعادتى هى بتكون حياتى
ريم مبتسمه: ياااه ايه الرومنسيه دى .. ولاقيتها
لوهان اتصلب من السؤال وقلبه بيدق وهو بيبص ل ريم
ريم عادت السؤال: هو صعب الاجابه كلامك دا يقول انك لاقيتها
لاقيتها بجد ولا لسه ؟
لوهان فاق من سرحانه: يعنى ممكن تقولى لاقيتها وملقتهاش
ريم: لغز دا
لوهان بص ل ريم: هى فعلا لغز بالنسبالى وهحله
لوهان لحقها قبل ما تسئل ريم مين هى : دورى بقى
ريم : اوكيه
لوهان : امممم انتى مقابلتيش شخص تحسى انك عاوزه تعدى حدود علشانه
ريم بتفكر : لا مقابلتش وسط ال عرفتهم مقابلتش انا ليا ظروف وحياه مختلفه مش اى حد هيتقبلها فصعب علشان كده لاغيت الفكره
و ولو حصل وحسيت وكنت عاوزه اعدى الحدود زى ماقلتلك هيكون انسان غير محظوظ جداا ودا سبب انى الاغى الارتباط من حياتى
لوهان اندهش من الكلام: ليه مش محظوظ الحب احساس حلو ايه ال وحش فيه ؟
ريم: يعنى علشان ظروفى اعتقد مفيش حد هيستحملها
وحياتى معقده شويا وانا شخصيا .. يعنى فى شويا مشاكل فيا
لوهان :ومين فينا مفهوش شويا مشاكل كل انسان فيه مشاكل وحياته فيها مشاكل ..بس الفرق مين بيواجهه مشاكله ويحاربها ويعيش
عن ال بيستسلم ليها ويضيع عمره ..يعنى مثلا عندك انا ابن وحيد
ا اب وام انفصلوا وانا عندى 5 سنين وسافرت لندن مع ماما وعشت هناك
مع زوج ام وكنت بسافر كوريا اجازات ودا كان اتفاق بين ماما وبابا
ولغايه ما ماما اتوفت ورجعت كوريا من 7 سنين ومستقر هنا مع بابا
واشتغلت فى حاجه ال بحبها ورسمت حياتى بنفسى واتفقت مع بابا
شرط ميدخلش فى حياتى ولا قراراتى يعنى ممكن تقولى عايش مع نفسى
ريم: مش باين عليك
لوهان: علشان انا قررت ظروفى ومشاكل حياتى متاثرش عليا مهما حصل
واعيش حياتى والساعه ال بتمر مش بترجع ..فتمر ف حاجه بتبسطنى
علشان كده بسافر وبروح تخييم ورحلات يعنى بنتهز كل فرصه تقابلنى
وبعمل الميوزك ال تعجبنى والاغانى ال سمعتيها .. مش بحب الشهره بحب اعيش طبيعى
ريم حست بقرب للوهان اكتر وهو بيتكلم عن حياته الشخصيه وركزت معاه فى الكلام ..
ريم: اوكيه .. سؤالى ... بتخاف من ايه
لوهان بالكورى : انك تبعدى عنى
ريم: ها
لوهان: اقصد تقطعى علاقتك بيا يعنى لما تسافرى
ريم: لا دا صعب لان مفيش سبب يخلينى اعمل كده متقلقش
لوهان باصص لريم: ياريت
لوهان : قوليلى انتى بتخافى من الضلمه ليه
ريم : ها.. دا موضوع كبير
لوهان: وانا مستعد اسمع
ريم: حكايه ممله
لوهان: انا بحب اووووى الحكايات الممله
ريم بتتنهد وبان ع وشها ملامح حزن لمجرد انها افتكرت :الضلمه بتفكرنى بحاجات مش عاوزه افتكرها وبحاول انساها بتتعبى وعانيت منها ...
اتمالكت نفسها ريم : ببساطه زى ماقلتلك شخصيه معقده ال هيرتبط بيا غير محظوظ
لوهان تلقائى مسك ايد ريم وريم اتفاجئت : عاوز اقولك حاجه
واسمعينى وافهميها كويس ...
ريم باصاله .. لوهان : الشخص ال تحبيه ويحبك هيكون اكتر انسان محظوظ
ودا بجد مش مجامله ..صدقى الكلام دا وثقى فيه ...
طريقه كلام لوهان خلى ريم حست بقشعره بسيطه اول مره تحسها
حست بااحساس غريب اول مره تحسه .. وفى اللحظه دى ابتدت الالعاب الناريه ف النهر شدت ايدها وباصت ريم عليها ف السما ..ولوهان باصص عليها ... وريم مبتسمه من المنظر ..و لوهان شاف ريم ابتسمت ..
ريم لاحظت كده بصتله: لوهان بتبصلى كده ليه
لوهان : ابتسامتك
ريم ابتسمت : مالها
لوهان بالكورى: بحبها
ريم بصت للوهان وفاجاءه رامى جه ومريم وكملوا فرجه وريم مركزتش
رامى : تعالى يا ريم هوريكى حاجه
ريم: يلا بينا
مشيت ريم مع رامى ولوهان واقف ربع ايده وباصص عليها وهى ماشيه ومبتسم ..وقال: محظوظ جداااا
خلصوا قعده وهما ماشيين كانت ريم ومريم ورامى عمالين
يتفرجوا ع الحاجات بتتباع ..ادمز لاحظ لوهان منزلش نظره على ريم
ادمز: ليو
لوهان: ها
ادمز: انت فيك حاجه متغيره صح
لوهان: ازاى
ادمز بيبص للوهان: اهتمامك بريم غريب
طريقه اهتمامك بواحده اول مره اشوفك كده
لوهان اتلجلج: صديقه وضيفه فى بلدى يعنى اسيبها
ادمز : صديقه وضيفه..
انت ليك صديقات كتيره وبيجيوا مش بتفضى نفسك مخصوص علشانهم
ولا بتعملهم رحلات ولا خروج برغم انشغالك ال كلنا عارفينه
سفرك وتصويرك وحياتك ال انت عايشها هنا
لوهان حب يغير الموضوع وبيهز: متشغلش دماغك تعالى نشوفهم بيعملوا ايه
مشى لوهان ادمز مسكه من دراعه ...
ادمز بص ل ريم: بصراحه انت عاوز ايه من ريم
لوهان بص ع ريم وشايفها بتضحك وفرحانه اتنهد: بحبها
ادمز اتفاجئ: بتقول ايه
للوهان بص ل ادمز: متسألنيش ازاى وامتى وليه لانى معرفش ...
انا بعد تفكير ومحاولات كتير عملتها علشان اتاكد واقول بيتهيألى وصلت لنتيجه واحده بس هى بحبها بحب ريم......
