في طُرفةِ عَين

بارت 18

نشف شعره وخر الخاولي علگه وگلي تعاي خل نحجي رحت وراه للهول. كعد واني ظليت واكفه مخليه ايدي على خصري.
احجي اسمعك
صاح انهار اريييد اكل
جاوبته انهار من المطبخ ان شاءالله
رفع راسه يباوعلي كلي انت ليش جيتي
جيت الياسر اني ابني والي حق بي.
حلووو لعد اني هم ابو وانت امه وخل يلتم شملنه شخسرانين
شبيك عمار اني متزوجه
هه تقنعيني؟ ؟ يعني ذاكه الي مسوي نفسه سوبر مان ماطلكج وجيتي. ؟؟
كتلك لاااء
اتطلكي منه ورجعيلي
تحلم ارجع افكر بيك بعد عمار اني احب زوجي وبعدني على ذمته بس اهله حارميني منه.

بكيفج لعد لو اني وياسر لو رجلج المادري شلونه.

ودخل جوه بقيت وحدي كلش محتاره.
شون اتصرف وي عمار شون راح احمي ياسر.

حاولت احجي لعمي عليه گلي شبيدي اني هم رجال مريض ومحتار بامه
حجيت لانمار اخو كال معليه اني هو ابنه وبكيفه.

مرت الايام هيج اجوا عمامي هم بينهم كطع بس اجو شافوا ابويه وسألوني عن زواجي احتاريت شحجي وكدام عمار نوب عمار يهمسلي ويغمز متكوليلهم عن زواجج شبيج خايفه شبيج ويضحك.
اني كتلهم تعرض الحادث وطلعوا اهله بره يتعالج.

بهالفتره ابويه صحته مو تمام كلش
نقلنا للمستشفى وعمامي ويانه دائما اسمع منهم جملة خلي يموت يرتاح احسن اله.
بس بداخلي اني الي جاي اموت.
فرات مامنه خبر ابد
تليفونه مطفي
و أَبحثُ عن طَيفكِ في شَوارِعٍ حَيّة، أكَاد أموتْ و أنا أَجولُ أَروِقَتها البَهِيجَة مَكسوٌ بالحُزن.
بس جنت انتظره واكول يرجع لازم يوم يرجع الي
بس ماكو
اخابر ام بنين كلي امل طلع فرات يسال عني يمها بس ماكو متعرف عنه اي شي ولاشافته
كلتلي جابوا وحده تشتغل بالصالون وطردتني
انقهرت حيييل عليها كتلهه لعد شوون
دااشتغل بالبيت ومرات اروح يم صديقتي اشتغل اذا عدها شغل هوايه
والبنات شونهم مشتاقتلكم هوااايه.
والله الحمدلله البنات زينات الحمدلله زوجتهن بقت بس الزغيره جان منين اجيب اصرف عليهن وشغل ماكو انت شخبارج
بالظيم اني الله كريم.
بهالفتره غيث رحم بحال انهار ورجعها بسسسس لحتى تداري  اطفاله لان زوجته حامل وهي مصدكت ترجع. جانت كل عمرها تخاف يتزوج عليها بس هسه تقبلت الواقع غصب عنها
ياسر تمرض وتأذى كلش لان جان يريد يروح وياهه بس غيث ميريده وعمار ميقبل.
ابويه كضاهه بالمستشفى وحالته ميئوووس منها حد يوم خلص ماااات.
جذب الي يكول ارتاح منه لا تعودت عليه وصارت روحي بي رغم مشفت منه شي دلال وعطف وحب ابد.
بس مكانه فارغ كلش كرسيه ملابسه حتى من يضوجني هم.
بس هذا حد يومه.
خابرت ام بنين هي الوحيده الي اصبرني بكلامها كتلها جنت اصير عصبيه عليهِ وهسه متندمه بسرعه راح
ظلت تهديني تكولي هم مقصرتي ويا رغم كل شي متخليتي عنه.
سالتها عن فرات كالت مااعرف عنه شي.
صار عندي هوس وخوف خفت لاصدك فرات مات وتركني ليش لحد هسه ماسأل عني. ؟؟
بعد وفاة ابويه ام عمار توفت
بالعزا شفت اختها مرت عمي ماسلمت عليها هي اجت بوستني وكالت عذريني حبيبه محجيت وياهه ابد.
الكل مجانوا يعرفوني لان متغير شكلي.
بس انهار تكوللهم عليه.
مجان الي خلك احد الي بيه كافي وزايد.

مرت الايام وياسر يروح للشغل واني مابيدي شي ومااكدر امنعه ومرت انمار كلش احسها ضايجه مني واني كعدتي وياهم احسها محلوه ابد بس وين اروح ومااكدر اترك ياسر.
صارت جية فرات اليه لحتى ينقذني حلم مااشوفه لابنوم ولابيقضه وماادري شون صابره بلا مااعرف اخباره.
اباوع لصوره وداخلي كله يون ويحن اله شكد تحملت المخده الي انام عليها من المي وحزني ودموعي .
جنت اخاف من عمار هواي يتحرش بالحجي ويضوجني ويذكرني بفرات كل شويه.

بفد يوم عمار كال الياسر لتروح باجر للتقاطع عندي شغل ثاني الك.
ياسر ماطلع لحد الظهر كعد عموري من النوم وتغده واخذ ياسر وراح.
ايام يجي ياسر هلكان من التعب مياكل يجي يشمر نفسه وينام.
لحد ما ظل ميجي حتى بالليل متت خوف عليه
عمار لازم البطل وكاعد يشرب ولايهمه خفت منه
رحت لاخو انمار دكيت الباب عليهم مرته طلعتلي تكولي نايم وهو شعليه.
عمي هم كعدته عمو ياسر مااجه يكولي شسويله اني اريد اناااااام.
ياربي شون بشر ذولي وينك فرات وكتك هسه تعوفني
للصبح اني مانايمه من كعد انمار كتله ياسر مااجه بالليل عفيه شوفليا ميصير هيج الولد راح يضيع حرام عليكم.
راح انمار وللعصر مناك خابرني كال سالت عليه الولد اليطلع وياهم كالوا يشتغل بالسوك حمال.
سوده عليه الله لايوفقك عمار وين بي يدفع عربانه هو زغير وين يتحمل يدفع.
لبست عباية راس وطلعت للسوك ادور عليه قررت لحظه ماابقى هنا اخذه وارجع وهم ادور على فرات.
واعرف اخباره.
دخلت للسوك ادور عليه سالت شكم ولد يدفعون عرباين حماليين كالو المغرب كلهم يتجمعون يم محل ابو حيدر يسلمون العربانه اله لان هم ياخذوها منه ايجار فالمغرب يرجعوها.
دلوني على محل ابو حيدر ورحت كعدت بصفه انتظره
للمغرب اني كاعده لمحته اجه يدفع بالعربانه فارغه كوه وهو ضعيف ظليت ادعي على عمار واتحسب عليه. يربي طفل الي بعمره هسه بالبيت ديلعب بليستيشن لو يرسم لو يتفرج تلفزيون وهو بالسواگه يفتر.
شفته سلم العربانه ودفع فلوس ايجارهه.
شافني اجه يتمشى باتجاهي بخجل.
بس شفته حضنته دفعني كلي اني جبير عيب تحضنيني بالسوك
كتله موبيدي اريد اخذ التعب عنك
ليش اجيتي
حتى اخذك ويايه انت ليش مدتجي للبيت؟ ؟وين تنام
اخذني ورحت ويا وصلنه لمكان اظلم قليل يوصله الضوه  بنهاية السوك وشفت ديحضرون كراتين جبير مال سبالت فارغه وغيرها و ولد بمختلف الاعمار
يحضرون نفسهم حتى ينامون بمكان لايصلح للبشر
كال هنا انام
احتاريت شسوي بسته على راسه دموعي وكعت على. شعره مثل المطر من ينزل على العشب ويبلله كتله ماتظل هنا وانا امك  
رجعنه للبيت ويوم ثاني من الصبح لملمت اغراضي وملابس ياسر وكتله يلا نروح
وين؟ ؟
انت معليك اني راح اخذك واعيشك هناك احسن عيشه
اني اريد ابقى هنا قريب على اخوتي واختي وامي وابوي حتى لو ميردوني بس اني احاول مااريد ابتعد عنهم.
ياسر اوعدك وعد اخليك تشوفهم ونجي نزورهم بس هسه امشي ويايه
كوه قنعته.
قررت اخذه لبيت ام بنين
وهناك يحلها الف حلال.
ومن الصبح كلهم نايمين طلعنا اني وياسر
اخذنه تكسي لكراج المحافظه وصعدنا سياره عبريه.
ومشت بينه. ،،
يتبع
بارت تعويض باحداث سريعه